2. Pandemonium
Die soektog
Interaksie met die engele
Joh 20:14 En toe sy dit gesê het, draai sy haar om
agtertoe ....
Jesus se verskyning
Betekenis vir Maria
3. Betekenis vir ons?
- Die dood is oorwin!
Openb 1:18 en die lewende; en Ek was dood en kyk, Ek
leef tot in alle ewigheid. Amen. En Ek het die sleutels
van die doderyk en van die dood.
- Sonde is oorwin!
1 Kor 15:55 -57 Dood, waar is jou angel? Doderyk, waar
is jou oorwinning? Die angel van die dood is die sonde,
en die krag van die sonde is die wet. Maar God sy dank,
wat ons die oorwinning gee deur onse Here Jesus
Christus.
4. - Persoonlike verhouding met Hom
Joh 1:12 Maar almal wat Hom aangeneem het, aan
hulle het Hy mag gegee om kinders van God te word,
aan hulle wat in sy Naam glo;
- ‘n Plek word vir ons voorberei! Hy kom weer!
Joh 14:1-3 Laat julle hart nie ontsteld word nie; glo in
God, glo ook in My. In die huis van my Vader is daar
baie wonings; as dit nie so was nie, sou Ek dit vir julle
gesê het. Ek gaan om vir julle plek te berei. En as Ek
gegaan en vir julle plek berei het, kom Ek weer en sal
julle na My toe neem, sodat julle ook kan wees waar Ek
is.
#Pandemonium
Kan u dit vir u self voorstel. Die gebeure van die voorafgaande 4 dae en nou dit. Die oomblik is Jesus nog besig om die paasmaaltyd met Sy dissipels eet en die volgende oomblik haal hulle Hom, dood, van ’n kruis af. Dit nadat Hy gespot en gegesel was. Voor sononder is Hy begrawe. Nou, 3 dae later, kom Maria by die graf aan. Ek weet nie of sy al mooi tot verhaal kon kom nie. Heel waarskynlik nog baie hartseer en verslae. Nou wil Sy net graag naby aan haar Meester kom. Sy kom na Sy graf toe. By haar aankoms sien sy die steen, wat die opening van die graf geseël het, was weggeneem. Jesus is weg. Ek dink, op daardie stadium, kon sy nie haar oë glo nie. Miskien het sy vir haarself gesê: “so wat nog?”. Nou verbaas niks my verder meer nie. In haar verwardheid, is die 1ste ding waaraan sy kan dink om na Petrus se huis toe te hardloop. Daar deel sy die ontstellende nuus. Jesus is verwyder en ons weet nie waar Hy nou is nie.
#Die soektog
Met die nuus meegedeel hardloop Petrus en Johannes ook na die graf toe. Miskien was Maria, in haar hartseer, per ongeluk by die verkeerde graf. Miskien het sy nie mooi gekyk nie. Hy kan tog nie weg wees nie? Wie sal Hom wou verwyder en waarheen? Daar aangekom sien die 2 dat die graf inderdaad leeg is. Al wat in Jesus se graf te siene was, was die doeke waarmee sy liggaam toegedraai was. Die kopdoek apart van die ander. Jesus was nie meer in die graf nie!
#Interaksie met die engele
Uit die gedeelte wil dit voorkom asof die 2 dissipels na die gebeure die graf moes verlaat het. Maria het egter by die graf gebly. Sy was te hartseer. Hoewel Jesus nie meer in die graf is nie, is dit die laaste plek wat sy weet Hy was. Sy het gehuil. Toe gebeur die heel onverwagse; sy sien 2 engele en die engele begin met haar te gesels. Hulle vra haar uit na haar hartseer. Sy antwoord hulle maar dit lyk of dit wat met haar gebeur nie mooi na haar toe deurdring nie.
#Joh 20:14 .....
Ek weet nie van u nie, maar as 2 engele my uitvra sal ek hulle nie net kortliks antwoord en dan wegdraai nie. As daar iemand is wat mag weet waar Jesus is, moet dit mos die engele wees. Dalk het hulle sommer nog ’n paar ander antwoorde ook? Hoe dit ook al sy, Maria draai haar rug na hulle
#Jesus se verskyning
Die volgende oomblik staan Jesus in lewende lywe voor haar. ’n Mens sou verwag dat sy uitbundig Hom tegemoet sou hardloop. Die feit is egter sy erken Hom nie dadelik nie. Dit is eers toe Hy haar naam sê wat sy Hom erken. Wat ’n oomblik moes dit nie gewees het nie? Kan dit wees? Nie alleen het ek Hom gekry nie, Hy is nie meer ’n lyk nie, HY LEWE!
#Betekenis vir Maria
Of Maria mooi die implikasies van die opgestane Jesus verstaan het, weet ons nie. Ek dink dat dinge was op daardie stadium ’n bietjie teveel vir haar gewees. Moontlik was sy nog bloot net besig om die onmiddellike gebeure te verwerk. Dit was mos regtig Jesus? Dit was mos Sy stem. Wat ’n môre!
#Betekenis vir ons?
Ek glo almal in hierdie gebou is bekend met die inhoud van die storie wat ek nou net met u gedeel het. Dit is goeie begin. Die feit is baie ander mense, self satan homself ken dit ook. Weet hy dit nie goed nie? As die gebeure vir ons bloot geskiedenis is van ’n man wat uit die dood opgestaan het, mis ons uit op so baie. Verseker is Sy opstanding per sy, ’n fantastiese wonderwerk. Dit wat Sy opstanding woordeloos aankondig is egter baie groter. Wat is dit? Ek wil net ’n paar van hulle noem
#Die dood is oorwin!
#Openb 1:18 ...
Tot op daardie stadium was die dood die een vyand wat die mens nie kon oorwin nie. Jesus het die dood oorwin. Die leë graf sê vir ons die dood is oorwin! Hierdie dood spreek van die fisiese dood. Hy hou lewe en dood in Sy hande. Dit beteken egter meer as dit
#Sonde is oorwin!
#1 Kor. 15:55-57 ..
Jesus het sonde oorwin. Sy opstanding is ook vir ons ’n simbool dat ek en jy die sonde kan oorwin. Nie net die sonde nie, maar ook die gevolg van sonde.. Die loon van die sonde is die dood. Jesus se bloed het kom betaal vir ons sonde. Wanneer ek in geloof hierdie feit my eie maak was Sy bloed ook al my sonde weg en gaan ek saam met Hom opstaan in die ewigheid en vir ewig met Hom regeer.
#Persoonlike verhouding met Hom
#Joh 1:12 ...
Tot op hierdie stadium was persoonlike verhouding met Hom nie moontlik nie. Verhouding met God tot voor Sy opstanding het plaasgevind met n Hoërpriester as tussenganger. God het hoofsaaklik in verhouding gestaan met Israel. Al hoe jy deel kon word van hierdie voorreg was om die joodse godsdiens en tradisies aan te neem. Die lee graf sê hierdie tydvak is verby. Hoe kan ons in elk geval in verhouding staan met iemand wat dood is. Alles wat op daardie stadium tussen God en Israel gebeur het, het Sy klimaks bereik. N Nuwe tydvak het aangebreek. Hy het alles nuut kom maak. Die ou dinge het verby gegaan
#‘n Plek word vir ons voorberei!
#Joh 14:1-3 ....
Wanneer ons na die lee graf kyk, sê dit ook vir ons dat konstruksie werk is aan die gang. Konstruksiewerk aan ons ewige huis. Daar waar geen mot en roes verniel en geen dief inbreek en steel nie. Die lee graf is die waarborg dat dit waarna ons utsien bestaan en in vervulling sal kom. Dit sê ook dat Jesus kom weer. Daarom is die lee graf, net soos die kruis, ‘n geweldige simbool van hoop. Net soos wat die kruis ons motiveer, inspireer en tot dankbaarheid noop, doen die lee graf dit ook. Op n ander manier as die kruis, maar nie te min net so n sterk simbool.
#WAT ’n MÔRE!
Inderdaad kan ons vanoggend uitroep: Wat ’n Môre! Die gebeure van daardie oggend het nie alleen Maria se lewe ingrypend verander nie, ook ons lewens. Jesus is die enigste God. Geen ander sg god maak daarop aanspraak dat hy die dood oorwin het nie. Daar is ook nie ’n ander een as Hy nie. Die leë graf sê ons het ’n God soos geen ander nie. Niemand kan met Hom vergelyk word nie. Hierdie God is vanoggend hier. Hy is hier om jou te laat deel in die genoemde en talle ander gevolge van die leë graf. Kan ons Hom vanoggend loof en dank vir die leë graf?