#lewe jy vir God of lewe jy vir die wereld.?
So baie keer in ons lewens voel ons dat ons lewe is ’n gejaag.
Ons staan vroeg op en dan begin ons rondhardloop, om reg te maak vir werk of om die kinders by die skool te kry, voor ons self ook werk toe moet gaan.
Na werk hardloop ons gewoonlik weer rondom, om die kinders te gaan haal en dalk kort jy brood en melk, so dan gaan jy nog eers winkel toe en al hierdie gejaag is om almal gelukkig te hou tot ons hulle in die bed kan kry.
Ja, ons lewens kan sinneloos voorkom as ons so daarna kyk en nie weet waarvoor ons lewe nie.
So ek wil weer vra vir wie lewe jy, lewe jy vir God of lewe jy vir die wereld.?
#Julle was dood....
Op watter manier was ons dood?
Ons was geestelik dood voor ons vir Christus in ons lewens toe gelaat het.
Paulus sê in Efesiers 2:1-2 ons was dood-
Deur die misdade en die sondes waarin ons gewandel het, volgens die loop van hierdie wêreld.
Dit beteken ons het gelewe soos die wêreld, soos sondaars.
#verlore seun
Ons was soos die verlore Seun, wat gedink het hy kan die wêreld by homself aandurf.
Hy het gerebelleer teen gesag; hy het sy geld gemors; gekuier saam met verkeerde vriende; totdat hy later niks oorgehad het nie.
#Voor Christus
Voor ons Christus in ons lewens toegelaat het, was ons presies soos die verlore seun.
Ons het in die duisternis gewandel, gedink ons kan die wêreld by onsself aandurf.
Ons het ook gerebelleer teen God, maak nie saak hoeveel keer hy ons geroep het nie.
Ons sê net elke keer nee. Ons het eerder agter die sonde aangeloop.
Dit is die manier waarop ons dood was, dit beteken ons het nog nie God se lewendmakende Gees gehad nie.
Na lewe...
#Lewend gemaak
Wie het vir wie lewend gemaak? Efesiers 2:1
God het ons wat sy kinders is lewend gemaak.
Hoe het God ons lewend gemaak?
Vers 5 sê: God het ons deur sy grote liefde waarmee Hy ons liefgehad het, lewend gemaak saam met Christus.
#Saam met Christus
Nou wat beteken dit dat God ons lewend gemaak het saam met Christus?
Sien die dag toe ons begin glo het in Christus, het ons ’n nuwe gees gekry. Christus se Gees.
Daarom dan dat ons ’n nuwe lewe gekry het.
#Nuwe lewe
My vraag is nou wat maak ek en u met ons nuwe lewe, wat God vir ons geskenk het, uit sy groot genade.
Laat my toe om vir julle die volgende storie te vertel.
#Max Lucado storie
Daar was eendag 5 weeskinders, hulle het niemand gehad wat na hulle gekyk het nie.
Eendag het ’n koning van hulle gehoor en net daar en dan besluit hierdie koning Hy wil die kinders aanneem. Sy kinders maak. Hy wil vir hulle ’n nuwe lewe gee.
So bereik die nuus die kinders en die mense in hulle dorpie se ore. Almal was baie bly vir al die kinders want nou gaan hulle ’n nuwe pappa kry wat vir hulle omgee. Die mense in die dorpie begin toe vir die kinders vertel maar julle sal vir die Koning iets moet gee om te wys dat julle goed genoeg is om sy kinders te wees. Julle moet hom mos darem beindruk met julle gawes.
Die kinders spring toe aan die werk. Die oudste seun was goed met houtwerk en hy maak toe die allermooiste goed uit hout. Die ander seun was goed met lees en hy besluit maar hy sal die koning beindruk deur al sy kennis en hy begin baie hard te leer.
Die oudste dogter was weer baie goed met skilder, die ander een kon weer baie mooi sing. Hierdie oudste vier kinders was so hard besig om hulle gawes te oefen dat hulle vergeet het van hulle jongste sussie.
Die jongste sussie se hart was gebroke, want sy het niks gehad om vir die koning te bied nie, niks om hom mee te beindruk nie.
Sy het maar na die stadspoort gegaan, daar waar sy altyd gegaan het, want daar was altyd reisigers en dan het sy met hulle gesels en hulle ook gehelp, sy het hulle diere versorg en vir die reisigers gewys waar hulle so bietjie kan rus indien hulle moeg sou wees. Na ’n paar dae kom daar toe ’n reisiger aan en die sussie kon sien dat hy baie moeg is. Sy groet hom en sy gee haar tyd aan die reisiger. Die reisiger vra toe of sy na sy perd sal omsien want hy moet iemand kom soek in die dorpie. Hy is toe weg maar nie lank nie of hy is terug. Baie hartseer. Die jongste sussie merk dit toe op en vra hom toe wat is fout. Hy vertel haar toe dat die mense wat hy in die dorp kom soek het almal te besig was met hulle eie lewe, hulle was so besig dat hulle nie eers geweet het hy was daar nie.
Hierdie jongste sussie besef toe dat dit die Koning is, sy is toe eers skaam en sê toe vir hom jammer dat sy niks het om vir hom te bied nie, maar die koning sê toe: Jy het vir my jou tyd gegee en dit is vir my baie meer belangriker as enige ander gawe.
#nes die koning
Julle sien gemeente nes die Koning vir die kinders ’n nuwe lewe wou skenk in die Paleis, net so kom God en gee God ook vir elkeen van ons ’n nuwe lewe. God gee vir ons hierdie nuwe lewe uit sy genade. Die nuwe lewe is verniet en nes die kinders nie nodig gehad het om vir hulle nuwe lewe te werk nie, het ons ook nie nodig om vir ons nuwe lewe te werk nie.
#Kan niks doen
Niks wat ons doen, kan maak dat ons God se genade kan ontvang nie. Kyk maar wat het gebeur met die oudste kinders toe hulle gedink het hulle moet werk vir die Koning om die nuwe lewe te ontvang – hulle het so besig geraak dat hulle dit heeltemal gemis het.
Net so met ons ook, as ons dink ons moet werk om God se nuwe lewe te verdien, gaan ons dit ook mis, want ons gaan te besig word.
Die Bybel sê in vers 8:”Want uit genade is julle gered, deur die geloof en nie uit julleself nie.
Dit beteken gemeente al wat ons moet doen om hierdie nuwe lewe te ontvang is om te glo in Christus Jesus.
#Is jou lewe te besig.
Broers, susters is jou lewe so besig dat jy dalk nie eers sal besef as God jou roep nie. Wat maak u met u lewe, is dit so ’n gejaag agter werk en kinders aan dat u nie tyd het vir u skepper nie. Vir u Koning wat u aangeneem het nie, wat vir u ’n nuwe lewe kom gee, die ware lewe. Die ewige lewe. Maak u nog tyd vir u koning? Gee u nog u self vir die Koning?
#God se maaksel
Vers 10 sê ons is sy maaksel – God se maaksel – geskape in Christus Jesus tot goeie werke wat God voorberei het, sodat ons daarin kan wandel.
Wanneer ons tyd maak vir God en ons tyd in God se hande gee, kan Hy ons gebruik soos wat Hy ons nodig het, want slegs dan kan ons groei om meer en meer soos Jesus te word.
Ek dink ons sal besef dat ons geloof ook nie net ’n saak tussen my en my skepper is nie.
Ek sal vir ander wil gaan vertel hoe hulle ook die nuwe lewe kan kry. Dalk moet ek vir iemand by my werk vertel, of dalk iemand verby wie ek loop in die straat.
Gemeente as jou lewe ’n gejaag is, wil ek vir u elkeen uitdaag, dat u sal tyd maak vir u Koning en hy sal vir jou nog meer tyd gee.
Ek wil weer vra: “Vir wie lewe jy, vir die wêreld of vir God.
Kom ons bid.
