1. 190500МАРКЕТИНГИЙН СУДАЛГААНЫ ҮНДСЭН ЧИГЛЭЛ<br />Маркетингийн шийдвэр гаргахад хэрэглэгдэх мэдээллийг олж цуглуулах, эмхэлж цэгцлэх эрэмбэ дараатай үйл явцыг маркетингийн судалгаа гэдэг. Маркетингийн судалгааны үндсэн зорилго хэрэглэгчдийн хэрэгцээ, шаардлагыг хангахтай холбогдсон асуудлуудыг шийдвэрлэхийн тулд түүнд шаардлагатай мэдээллийг бий болгоход оршино. Иймд маркетингийн судалгаа нь тоо баримт, бодитой үйл явдлын тухай мэдээг илрүүлэн олж шийдвэр гаргахад хүрэлцэхүйц мэдээллээр менежерийг хангахад чиглэгдэнэ. Менежер хүн хэдий чинээ мэдээлэлтэй байна, төдий чинээ үндэслэлтэй бөгөөд үр ашигтай шийдвэр гаргаж чадна. <br />Шийдвэр гаргахын тулд мэдээлэл олж авч байгаа үйл явц бол үндсэндээ судалгаа хийж байгаа хэрэг юм. Мэдээллийн үнэ цэнэ нь хүний өдөр тутмын үйл ажиллагаанд гаргасан шийдвэрийн үнэ цэнээр тодорхойлогдоно. Хэрэглэгчдийн худалдан авах хүсэл сонирхолыг төрүүлэхүйц өнгө, үзэмжтэй, амт чанартай бүтээгдэхүүн үйлчилгээ бий болгон, боломжийн үнэ, оновчтой сувгаар сурталчилан борлуулах арга ухааныг маркетингийн судалгаа бүрдүүлж байдаг. Иймд маркетингийн судалгаа нь байгууллагад маркетингийн хольцын зохистой хослолыг хэрэглэн зах зээлд амжилт олох нөхцлийг бүрдүүлнэ. <br />Зах зээлийн тухайн нөхцөлөөс ямар алба, ямар хүч ажиллуулах шаардлагатай байгааг олж харан байгууллагынхаа дотоод нэгжүүд, түүнчлэн нийлүүлэгч түнш, хамтаран ажиллах байгууллагаа сонгон авч, үйл ажиллагаа, үйлчилгээгээрээ хэрэглэгчдийг өөртөө татан, нэр хүндээ дээшлүүлэн, зах зээлээ өргөжүүлэх нөхцөл, боломжийг маркетингийн судалгааны үр дүн олж авсан гадаад, дотоод орчны шинжилгээний дүгнэлт бүрдүүлж өгнө. Гадаад орчны талаархи мэдээлэл, тухайлбал, үйлчилж буй хүн амын нас, хүйс, ажил мэргэжил, гэр бүлийн бүтцийн өөрчлөлт, эдийн засаг, улс төр, техник технологи, соёлын орчны өөрчлөлтийн талаархи нарийн тодорхой мэдээллийг хэн түргэн олж үйл ажиллагаагаа түүнд зохицуулж чадна, тэр өрсөлдөөнд ялж, байр сууриа бэхжүүлж чадна. Мэдээллийн үнэн зөв, найдвартай байдлыг хангагч гол үндэс нь судалгаа. Мөн аливаа юмс үзэгдэлд нухацтай хандаж, судлаж нарийвчилснаар янз бүрийн шинэ санаануудыг бий болгох боломжтой. <br />Маркетингийн судалгааны өөр нэг бодитой үр дүн бол байгууллага, аж ахуйн нэгж хөгжлийнхөө үндсэн чиглэл, урт ба богино хугацааны төлөвлөгөө боловсруулах бодит үндэслэлийг олж авдагт оршино. Маркетингийн судалгааны явцад байгууллагын өмнө тулгарч байгаа эгзэгтэй асуудлыг шийдвэрлэх хамгийн боломжтой арга замыг олох, дэвшүүлсэн зорилго, зорилт, төлөвлөгөөгөө үр ашигтай хянах боломж бүрддэг. Маркетингийн судалгааны үр дүнд маркетингийн шинэ шинэ боломжуудыг нээн илрүүлж, байгууллага хөгжин дэвжих, өрсөлдөгчөө ялан дийлэх аугаа их нөөц, хүчийг хуримтлуулна. Маркетингийн маш олон янзын нөөц, боломжууд байдаг. Тухайлбал, цоо шинэ зах зээл олох, шинэ бүтээгдэхүүн үйлчилгээ бий болгох, шинэ сав баглаа боодол бүтээх, борлуулалтын шинэ суваг нээх гэх мэт боломжууд байдаг. Эдгээр боломжуудыг зөвхөн маркетингийн судалгааны үр дүнд л илрүүлж болно. <br />Байгууллагууд маркетингийн судалгааг тодорхой дэс дарааллын дагуу хийж гүйцэтгэх хэрэгтэй байдаг. Маркетингийн судалгааг дараах дарааллаар хийдэг. Үүнд:<br />2857538100Судлах асуудлыг тодорхойлох<br />Судалгааны дизайн боловсруулах<br />Мэдээлэл цуглуулах арга хэлбэрээ сонгох<br />Түүвэрлэлтийн дизайн гаргаж мэдээлэл цуглуулах<br />Мэдээ сэлтийг шинжлэн дүгнэлт гаргах<br />Судалгааны тайлан бэлтгэх<br />Маркетингийн судалгаа логик уялдаа холбоо бүхий нарийн төвөгтэй дэс дараат үйл явц бөгөөд судлах зүйл, түүний шинж төлөв, удирдлагад тулгарсан шийдвэрлэх асуудлын байдлаас хамааран эдгээр дарааллыг хэрхэн хэрэгжүүлэх, судалгааг яаж төгсгөх арга хэлбэрийг шийднэ. Маркетингийн судалгааг бодож боловсруулсан төлөвлөгөөний дагуу байнга хэрэгжүүлснээр маркетингийн мэдээллийн тогтолцоо бүрддэг. Маркетингийн мэдээллийн тогтолцоо нь чухадаа маркетингийн шийдвэр гаргах зорилгоор мэдээллийг байнга, төлөвлөгөөтэйгөөр цуглуулах, шинжлэх ба толилуулах арга, ажиллагааны сүлжээ юм. <br />Байгууллагаас хэрэглэгч, түншүүдтэйгээ байнгын бөгөөд найдвартай хэлхээ холбоо тогтоож хадгалахад маркетингийн зорилго оршино. Үйлдвэрлэгч хэрэглэгч талууд бие биедээ бүрэн итгэж амласан амлалтаа биелүүлж харилцан ашигтай ажиллаж байвал маркетингийг хэрэгжүүлж чадаж байна гэж үздэг. Маркетер энэ нөхцөл боломжийг хангаж, хэрэгжүүлж байдаг. Иймд маркетер хүн маркетингийн үзэл баримтлал, арга хэрэгслийг бүрэн утгаар нь ойлгож эзэмшсэн байх шаардлагатай. <br />Байгууллагын маркетингийн стратеги, маркетингийн судалгаа хооронд салшгүй уялдаа байх ёстой. Маркетингийн судалгаанаас гарсан дүгнэлт маркетингийн стратегийг тодорхойлох үндэс болдог. Маркетингийн стратегитай уялдсан нэг чухал асуудал бол зах зээлд бүтээгдэхүүнийг дахин байршуулах явдал юм. Зах зээлд бүтээгдэхүүнийг дахин байршуулах гэдэг нь бүтээгдэхүүнд хэрэглээний дэвшилтэт давуу талыг бий болгох, бүтээгдэхүүний өрсөлдөх чадварыг дээшлүүлэх, нэг ёсондоо бүтээгдэхүүнийг хөгжүүлэх, сайжруулахтай холбогдсон ойлголт юм. <br />Маркетингийн судалгааны үндсэн чиглэлийг дараах байдлаар тодорхойлж болох юм. Үүнд: <br />Зах зээл ба борлуулалтын судалгаа<br />Зах зээлийн багтаамжийн үнэлгээ<br />Зах зээлийн хэсгийн үнэлгээ<br />Зах зээлийн хөгжлийн хандлага<br />Борлуулалтын мэдээлэл<br />Зах зээлийн чадавхийн үнэлгээ<br />Хэрэглэгчдийн хүсэл хандлага<br />Өрсөлдөгчдийн зах зээл <br />Бүтээгдэхүүний судалгаа<br />Шинэ бүтээгдэхүүний санаа олох<br />Бүтээгдэхүүний концепци бий болгох<br />Бүтээгдэхүүнийг турших<br />Туршиж буй бүтээгдэхүүний мааркетингийг зохион байгуулах<br />Баглаа боодлын янз бүрийн төрлийг судалж турших<br />Үнийн судалгаа<br />Үнэ ба эрэлтийн хамаарлын судалгаа<br />190505715Амьдралын мөчлөгийн янз бүрийн шатууд дахь үнийн бодлогын прогноз<br />Бүтээгдэхүүний идэвхжүүлэлтийн судалгаа<br />Зарлал сурталчилгааны үр ашиг<br />Мэдээллийн хэрэгслүүдийн үр ашиг<br />Сурталчилгааны янз бүрийн хувилбаруудыг турших<br />Идэвхжүүлэлтийн хэрэгсэл, аргуудыг харьцуулан шинжлэх<br />Бүтээгдэхүүнийг хэрэглэгчдэд хүргэж буй явц:<br />- агуулахын байршил<br />- жижиглэн худалдаалах цэгүүдийн байршил<br />- үйлчилгээний албадын байршил<br />Маркетингийн орчны судалгаа<br />маркетингийн дотоод орчны үнэлгээ<br />Гадаад орчны хүчин зүйлийн нөлөөлөл<br />Өрсөлдөгчийн судалгаа<br />Өрсөлдөгчдийн зорилго, хүчтэй ба сул талын судалгаа<br />Өрсөлдөгчдийн хариу үйлдлийн бүтцийн үнэлгээ<br />Өрсөлдөгчдийн санхүүгийн хүчин чадлын ба технологийн түвшний үнэлгээ<br />Удирдлага зохион байгуулалтын түвшний үнэлгээ<br />Өрсөлдөгчийн нэр хүнд ба аргаа өөрчлөх чадварын үнэлгээ<br />Нөөц ба шинжлэх ухааны чадавхийн үнэлгээ <br />Маркетингийн судалгааны аль чиглэлээр судалгаа хийх вэ? гэдгийг тухайн байгууллагын зорилго, зорилт, зах зээлийн нөхцөл байдалтай уялдуулан тодорхойлно. Зах зээл, хэрэглэгчдийн шаардлагыг иш үндэс болгох нь маркетингийн судалгааны гол агуулга болж, үйлдвэрлэл, худалдааны үйл ажиллагааны үр ашгийг тодорхойлно. Зах зээлийг хэсэгчлэх, хэрэглэгчдийг хайж олох, нэвтэрч болох сиймхийг олж харах нь зах зээлийн судалгааны бодит алхмууд юм. <br />Судалгаа хийж байх үед харгалзах нэг чухал үндэслэл бол маркетингийн үзүүлэлтүүдийн тухайн үеийн төлөв байдлыг тодруулаад зогсохгүй цаашдын чиглэл, хандлагыг нь олж харан байгууллагын зорилго, стратегийг тодорхойлоход ашиглах явдал юм. <br />Байгууллага зах зээлийн ширүүн өрсөлдөөний нөхцөлд оршин тогтнох бодит үндэс нь нарийн бодож, төлөвлөн хийсэн маркетингийн судалгааны үр дүнг ашиглахад оршино. <br />