"Шинэ үеийн нягтлан бодогчид 2013" онлайн тэмцээний 2-р шатны цогц бодлого.
Нягтлан бодогчдын ур чадварыг дээшлүүлэх, мэргэжлийн холбогдолтой хууль тогтоомж, журам стандартын талаарх мэдлэгийг шалгах, нягтлан бодогчийн мэргэжлийн нэр хүндийг өсгөх үндсэн зорилготойгоор Монгол улсад анх удаа нягтлан бодох бүртгэлийн нээлттэй “Шинэ үеийн нягтлан бодогчид 2013” онлайн тэмцээнийг зохион байгууллаа. Тэмцээнийг Новасофт ХХК-ийн санаачлагаар Монгол улсын Сангийн Яам, Татварын ерөнхий газар, Нийгмийн даатгалын ерөнхий газар, Монголын мэргэшсэн нягтлан бодогчдын институт, Татварын мэргэшсэн зөвлөхийн нийгэмлэг хамтран зохион байгуулж, BDO Audit компани ерөнхий ивээн тэтгэгчээр оролцсон байна. Онлайн тэмцээний 2-р шатны шалгаруулалт 2013 оны 11 дүгээр сарын 30-нд Татварын ерөнхий газрын 8 давхарт "Татвар төлөгчийн танхим"-д амжилттай явагдаж өндөрлөлөө. 2-р шат BAAZ Санхүү бүртгэлийн онлайн систем дээр цогц бодлого бодох хэлбэрээр явагдсан бөгөөд 1-р шатнаас шалгарч үлдсэн шилдэг 46 оролцогч өрсөлдөн мэдлэг ур чадвараа сорьлоо. 2-р шатанд өрсөлдөн эхний 10 байранд шалгарсан нийт оролцогчдод Санхүүчдийн баярт оролцох урилга гардуулсан бөгөөд шагналт байранд шалгарсан оролцогчидын шагналыг уг баярын арга хэмжээн дээр гардуулах юм.