BALAGTASAN

1. REINA ANTONETTEP. FRANCO NNHS Page 1 of 3
Paksa: Sino ang Dapat Magturo ng Values sa mga Bata: Pamilya o
Paaralan
BALAGTASAN
Lakandiwa:
Sa lahat ng naririto sa aking harapan
Sa mga mag-aaral, guro at magulang
Isang mapagpalang araw po sa inyo mga kaibigan
Salamat sa inyong presensya,sa akin ito’y karangalan
Sa panahon ngayon, napakahirap magdesisyon
At mahirap sumagot sa maraming mga tanong
May mga bagay na mula noon hanggang ngayon
Di nalulutas sapagkat puno ng komplikasyon
Ang mga bata sa paligid, ating pagmasdan
Iba’t ibang ugali ang ating matutuklasan
Sa mukha nila ay bakas ang kainosentehan
Ngunit di natin alam ang kanilang pinagdaraanan
Ngayon kayo’y malugod naming inaanyayahan
Halina’t makinig sa paksang pagtatalunan
Isang isyung napakahalaga na mabigyang kasagutan
Nang magabayan ng tama ang mga kabataan
Sa mga bata, sino ang dapat magturo ng halagahan
Ating limiin, Pamilya nga ba o paaralan?
Ang sagot, ating alamin sa isang balagtasan
Kanilang mga katwiran, itatak na sa isipan
Atin ng simulan ang balitaktakang makabuluhan
ipinakikilala ko sa inyo ang mga makatang kaibigan
mga tinig nila’y atin ng pakinggan
alamin, suriin ang ibibigay na kaalaman
Sa gawing kaliwa ko ang tagapagtanggol ng pamilya
Gampanin ng magulang ay binibigyang halaga
Na ang kagandahang asaldaw at pagdidisiplina
Ay resposibilidad na hubugin ng kanyang ama’t ina
Sa gawing kanan ko ay naniniwala sa paaralan
Paghubog ng halagahan, sa mga guro inaatang
Mabubuting ugali daw ay natututunan sa eskwelahan
Impluwensyang maituturing ng kaklase at sangguruan
Panig ng Pamilya:
Pagka’t ako’y lumaki sa masayang pamilya
Sa piling ng aking butihing ama’t ina
Kasama ng mga kapatid kong mapagmahal talaga
Ugali’t asal ko, natutunan sa kanila
Reina Franco nga pala, mga kaibigan
Panig ng pamilya ang aking ipaglalaban
Akong makata sa inyong harapan
Ay buong lugod na mangangatwiran
Naniniwala akong higit na kaninuman
Pamilya ang responsable sa paghubog ng halagahan
Pagkat sila ay sama- sama sa iisang tahanan
Pagdidisiplina sa bata,sa kanila nakaatang
Ang mga magulang ang siyang nagpapasya
Kung ano ang nararapat para sa anak nila
Di nga ba’t sila ang nakaaalam sa tuwina
Kung ano ang mabuti para sa mga anghel nila
Panig ng Paaralan:
Teka lamang magandang binibini
Ikaw muna ay huminto kung maaari
Pagkat katwiran mo ay tila may mali
Katwiran ko nama’y pakinggan mo sandali
Di nga ba’t mga bata ngayon, sa paaralan mas nananatili
Impluwensiya ng guro’t kamag- aral ang siyang
naghahari
Sa pananamit at pananalita, sa kilos at mga ginagawi
Di maikakailang epekto ng paaralan ay sadyang malaki
Lahat ng mga aktibidades na sa paaralan ginagawa
Lahat nagtuturo ng kagandahang asal at pakikipagkapwa
Iniuukit, itinatatak lahat ng pagpapahalaga
Hindi lamang sa isip pati na rin sa puso ng mga bata
Hayaan ninyo munang ako ay magpakilala
Sa inyong harapan, Antonette Franco nga po pala
Naniniwalang ang paaralan ang tagapaghubog sa mga
bata
Sa kagandahang asal at pagpapahalaga, walang dudang
sila nga
Panig ng Pamilya:
Ngunit pamilya pa rin ang dapat na pundasyon
Sa mga pangangailangan ng bata,dapat sila ang
tumugon
Mula pagkabata,sila dapat ang nagbibigay atensyon

2. REINA ANTONETTEP. FRANCO NNHS Page 2 of 3
Sa paghubog ng halagahan, sa lahat ng pagkakataon
Hindi basta basta ang gampanin ng pamilya
Sapagkat lahat ng bagay ay nagmumula sa kanila
Mula sa ugali, kilos at pagpapahalaga
Pamilya ang humuhubog mula ng ipinanganak sila
Mula ng tayo ay iluwal ng ating butihing ina
Ang magulang na natin ang gumagabay sa tuwina
Sa dumaraang pagsubok, nariyan ang pamilya
Laging tumutulong upang malutas ang problema
Ang pamilya ay siya ring naghahanda sa mga bata
Sa pagharap sa malaking mundo ng pakikipagkapwa
Bago pa man tayo maglakad at makapagsalita
Di nga ba’t alam na natin kung ano ang mali at tama?
Panig ng Paaralan:
Baka nakalilimutan mo magandang binibini
Na sa panahon ngayon, magulang ay bihira ng mapirmi
Laging wala sa bahay, sa trabaho ay bisi
Pagkat kinabukasan ng anak, pinaghahandaang mabuti
Kung gayon, sa ganitong kadahilanan
Paaralan,walang iba ang siyang mapag- iiwanan
Sa paggabay sa mga bata at sa kanilang halagahan
Kanino ng resposibilidad? Di ba’t nasa paaralan?
Sa mga panahong walang oras ang pamilya
Paaralan ang kanlungan ng mga anghel nila
Values education mula grade 1 hanggang hayskul pa
Halos araw araw kada taon,Itinuturo sa kanila
Kaya nga sangguruan natin ay sadyang walang tigil
Sa pagtuturo ng kabutihan ang pinagtutuunan ng pansin
Nang ang mga bata ay lumaking mabait at masunurin
Masipag, magalang, responsible, matapat at maunawain
Panig ng pamilya:
Kung sinasabi mong mga magulang ay lagi ng abala
Walang tigil kamo sa pagkayod para sa anak nila
Kung kaya’t mga supling ay tila nababalewala na
Hindi ba’t walang kasalanan niyon kundi sila?
Simula’t simula pa lamang, bago sila nag- asawa
Dapat batid na nilang tungkulin ay sadyang mabigat na
Pagpapalaki sa anak, maging ang paghubog sa kanila
Mahirap at masalimuot ngunit ganoon talaga
Walang dahilan upang maisantabi ang pamilya
Sa paghubog ng halagahan, numero uno sila
simula pagkabata, sila na ang kapiling at kasama
kaya’t sa pagdidisiplina, nasa balikat talaga nila
Pinakamaliit na yunit, iyan ang pamilya
Maliliit na detalye, sa kanila rin nagmumula
Tulad ng magandang asalat mabuting pagkalinga
Pamilya ang ugat ng kabutihan sa kapwa
Panig ng Paaralan:
Para ano pa’t pinag- aaralang mga bata?
Kung ang lahat naman pala ay mababalewala
Kung kaya na pala ng pamilya, ano pang halaga?
Itinuturo ba sa Paaralan ay di na mahalaga?
Sa panahon ngayon, aminin man natin o hindi
Pinag-aaralang mga bata upang mas mapadali
ang pagkatuto nila sa konsepto ng tama at mali
at matutong magpahalaga sa kanilang mga sarili
Hindi ba’t kapag ang bata ay nagkamali
Magulang ng bata,paaralang ang sinisisi
Guro, kamag- aral, kaibigan, lahat ng bahagi
Kahit walang kasalanan, damay, walang pagkasi
Pagdisiplina sa mga bata, sa paghubog ng halagahan
Paghubog ng personalidad, sakop din ng paaralan
Sa pakikipagkapwa tao, at sa pansariling kapakanan
Lahat ng iyan, sa paaralan nakaatang
Lakandiwa:
Hep! Hep! Hep! Atin na po munang putulin
Ang balitaktakan ng mga makatang magigiting
Oras na upang husgahan ang katwirang masining
Na binitiwan ng bawat panig na walang kasinggaling
Ngayon ay malaya kayong makapagdedesisyon
Kung kaninong panig ba kayo aayon
sino nga ba ang dapat magturo ng halagahan
alin sa dalawa? Pamilya o paaralan?
Nawa’y bawat kaisipan ay inyong natandaan
Ngunit ano’t anupaman ang inyong kadahilanan
Lagi ninyong iisipin dapat tayo ay nagtutulungan
sa bawat aspeto ng buhay, bawa’t isa’y ating kailangan.
Pansamantala’y kami muna’y magpapaalam
Maraming salamat sa pakikinig mga kaibigan
Nawa’y nagustuhan munti naming balagtasan
Magandang araw po’t sumainyo ang kabutihan.

3. REINA ANTONETTEP. FRANCO NNHS Page 3 of 3