Crónica celebración "40 anos vivindo a escola", Antonio González

1. 1
ACTO CONMEMORATIVO DO CUADRAXÉSIMO ANIVERSARIO DO
COLEXIO «VIRXE DA CELA» DO XESTAL, MONFERO
XOVES, 16 DE XUÑO DE 2016
Quixo a sorte que dende comezos de ano, alá entre xaneiro e febreiro de 2016, a
dirección e un grupo de profesoras —por maioría, con perdón de don Alfonso e don
Manuel— do CPI, agora plurilingüe, «Virxe da Cela», fosen conformando unha
comisión para organizar as actividades e o acto cos que conmemorar o cuadraxésimo
aniversario deste Colexio. Para tal fin, movidos polo ánimo sempre característico delas
de facer máis, de dedicarse ao traballo con tesón, tiveron a ben pedir as colaboracións
de cantos pasaron polo Colexio do Xestal, lugar onde tiveron a ocasión de vivir
experiencias inesquecibles, moitas veces, as primeiras da vida, e noutras ocasións, as da
plena realización profesional. Entre a diversa xente que colaborou, destaca dona
Mercedes Cachaza Platas, profesora deste Colexio entre os cursos 1980-1981 e 2008-
2009, momento da súa xubilación —cousa que non fixo que perdese contacto con
compañeiros e alumnos—, quen nos agasallou co relato das súas vivencias e lembranzas
da escola, dende que era alumna ata que chegou a exercer o gratificante labor da
docencia.
E dicimos que quixo a sorte, ou a deusa Fortuna dos antigos romanos, que con
tanto entusiasmo se acollese esta conmemoración entre os implicados, e que tanto
traballo se lle dedicase ao longo dos últimos meses, para rematar culminando no acto
que no comedor escolar do centro —que xa serviu de salón de actos en máis ocasións—
se celebrou gozosamente o pasado xoves, día dezaseis de xuño de 2016.
Estando todo disposto —megafonía, audiovisuais, decorado— para dar lugar ao
nomeado acto, tras a petición do debido silencio —un ben moi prezado— por parte de
dona Pilar Castro, inauguraron este as palabras de dona Camino Pereiro González,
directora, que presentou os aspectos xerais do proxecto educativo que se desenvolve
actualmente no CPI Plurilingüe «Virxe da Cela» e que remarcou a traxectoria que
seguiu este Colexio ao longo dos anos sempre cara á mellora da calidade da educación.
Acompañaron á directora na mesa da primeira rolda de intervencións: don Manuel
Couce García, primeiro director do centro, que ademais era alcalde de Monfero
naqueles anos, e que demostrou aos asistentes gozar dunha memoria excepcional e de
ser un gran relator de lembranzas; don Alberto Cortizas Rejo, tenente alcalde do
Concello de Monfero, ex alumno do Colexio, que ademais das palabras que pronunciou

2. 2
en nome da institución que representaba, falou tamén das súas vivencias como alumno e
dos bos recordos que do Colexio puido levar.
Interveu xunto a eles tamén don Indalecio Cabana Leira, xefe territorial da
delegación da Consellería de Cultura, Educación e Ordenación Universitaria na Coruña,
e que destacou no seu discurso o gran traballo da dirección do centro e do profesorado
no desenvolvemento de diversos e interesantes proxectos educativos, nos que ademais
están implicados membros das tres universidades galegas —A Coruña, Vigo e
Santiago—, e entre os cales figuran iniciativas orixinais que presentan experiencias
educativas moi enriquecedoras como, no eido da comunicación lingüística, o
Laboratorio de Radio que coordinan Sergio Pascual e Lucía Abarrategui. Foron as
palabras de don Indalecio Cabana moi gratificantes para o profesorado, posto que el
mesmo sinalou que estaba garantida a continuidade desta empresa educativa integral
que é o CPI «Virxe da Cela», e asegurou o apoio da Consellería para poder seguir
adiante coas diferentes actividades que nel se desenvolven, logrando excelentes
resultados na formación do alumnado.
A última intervención da primeira rolda foi a de don Jorge Pena Barbeito,
presidente da Asociación de Nais e Pais de Alumnos —ANPA—, que incidiu nos
sentimentos de comunidade e de pertenza ao Colexio como aspectos intimamente
ligados á vida social de Monfero, Irixoa e arredores, é dicir, incidiu na función do
Colexio como centro de socialización, idóneo para coñecerse e compartir experiencias
enriquecedoras, aprender uns dos outros, facer amizades e, co paso do tempo, afianzar
esas relacións mediante o recordo común do que era a vida nas aulas do Xestal.
Tras esta intervención, produciuse o cambio dos integrantes da mesa, que
pasaron a ser dona Mercedes Cachaza Platas, profesora xubilada, o alumno presentador
Sergio García Coira, e os ex alumnos dona Catuxa Lage Gómez, avogada, e don
Antonio González López, estudante de Historia en Santiago. Trala debida presentación
de Sergio, procedeu dona Mercedes Cachaza a ler o discurso onde fixo un resumo —
invitada a resumir por dona Pilar Castro Arias, a profesora secretaria do centro, que
nesta ocasión miraba por optimizar o tempo— do que foi a vida escolar durante tantos
anos no Xestal, dende os claustros e consellos escolares ata as aulas, e tamén fóra, en
diversas excursións que se foron facendo. Despois de dona Mercedes, foi a ex alumna
Catuxa Lage Gómez quen pronunciou unhas palabras sobre a súa experiencia no Xestal,
e quen se viu embargada pola emoción do recordo, cousa que fixo que lle faltasen as
palabras, pois as palabras moitas veces non nos asisten cando se trata de expresar
sentimentos fondos e verdadeiros. Seguidamente, Antonio González López presentou
unhas breves notas sobre cultura e educación, pretendendo invitar á reflexión, e sobre a
concentración escolar de Monfero no Colexio do Xestal, así como algunhas palabras de
encomio ó labor educativo como fermosa dedicación e unha apelación ás autoridades
para coidar o bo funcionamento do sistema e para garantir a continuidade de empresas
educativas de recoñecido éxito como a do «Virxe da Cela» de Monfero.

3. 3
Finalizadas as intervencións, pasouse a proxectar o vídeo elaborado polas
profesoras Verónica Dopico e Yolanda Castro coas fotos de corenta anos de escola,
imaxes capaces de refrescar a memoria e de espertar a emoción de quen revive os
tempos gozosos da infancia e da vida escolar. Axudaron a que afloraran os sentimentos
as cancións que como banda sonora acompañaron a sucesión de fotografías ben
seleccionadas para a ocasión.
Rematou con ese vídeo o acto conmemorativo propiamente dito, dándose paso
ao tempo dos aperitivos e da conversación, que puideron manter entre si os asistentes,
antes de facer a fotografía conxunta final diante do edificio de Secundaria.
Asistiron ao acto conmemorativo do cuadraxésimo aniversario o alumnado de
Primaria e Secundaria, o profesorado actual, varios ex alumnos e antigos profesores do
centro: o citado don Manuel Couce, dona María José Otero, don José Manuel Lagares,
don José Dopico, don José García, don Gonzalo Tizón, dona Mercedes Cachaza, dona
Elvira Castro, dona Carolina Herranz, don Pedro García, dona Teresa López e don
Carlos —profesor de inglés de Primaria hai algúns anos—. Asistiron entre as
autoridades, os citados don Indalecio Cabana e don Alberto Cortizas, don Antonio
Deibe, alcalde de Irixoa, e os concelleiros don José Otero e don José Roca. Asistiron
entre o histórico persoal laboral do Colexio dona Marisa Cachaza, dona Purificación
Sanjuán e don Álvaro Calvo acompañado pola súa dona, ademais do persoal que estaba
neses momentos traballando, como dona Elvira Carpente. Asistiron tamén pais e nais de
alumnos, como dona María José Ramos, que presidiu a ANPA moitos anos. Contáronse
entre os asistentes cinco dos once directores que tivo o Colexio, estando presente o
primeiro, don Manuel Couce García; o sexto, don Gonzalo Tizón Sánchez; a sétima,
dona Elvira Castro Otero; a décima, dona Míriam Seoane Míguez, e a undécima, dona
Camino Pereiro González.
Houbo que lamentar, así mesmo, a ausencia de quen non puido vir por verse
suxeito a responsabilidades —varios ex profesores do Colexio que actualmente dirixen
outros centros—, a imprevistos e sobre todo, a aqueles que non puideron asistir por
enfermidade, a quen lle transmitimos desexos de recuperación, e á vez, o noso pesar por
non nos poder acompañar neste día.
Para rematar co acto, fixéronse fotografías do conxunto dos asistentes —excepto
os profesores Pepe Dopico, Pepe García e José Manuel Lagares, que tiveron que
marchar antes— diante do edificio de Secundaria, e o alumnado da ESO realizou unha
coreografía que foi gravada en vídeo para facer o que se chama lipdub. Entre tanto, a
prensa escrita —o Diario de Ferrol e La Voz de Galicia— fixéronse eco do
acontecemento, que saíu publicado o día seguinte nas páxinas destes diarios. Houbo
unha boa reportaxe fotográfica do acto, que recaeu nas profesoras Yolanda e Verónica,
coma sempre, por seren elas as mellores no tema, e despois un grupo de profesoras e un
ex alumno —don Alfonso tivo que marchar— foron tomar uns refrixerios ao bar de
dona Cristina García Caínzos no Xestal, deixando o centro ao bo recado de dona Pilar
Castro, dona Marta Novo e demais profesorado.

4. 4
Foron convidados a xantar no comedor escolar dona Mercedes Cachaza e
Antonio González, modestos conferenciantes no acto, que foron os últimos en visitar a
exposición temporal da escola histórica concedida polo Museo Pedagóxico de Galicia
—MUPEGA— ao centro co gallo da devandita conmemoración, exposición que antes
puideron visitar os asistentes ao acto. Durante o transcurso do acto solemne de
conmemoración, o alumnado de Infantil gozou dunha xornada amenizada por uns
contacontos que actuaron na Biblioteca.
***
Resultou este acto un acontecemento de celebración da vida convivida, dos anos
compartidos de traballo docente e de aprendizaxe, un acto da lembranza, antídoto contra
o esquecemento, ocasión para o reencontro, do que se pode tirar un sentimento de
alegría por ter noticia das persoas coas que se viviu parte da vida, ás que se lles puido
dar o mellor dun —no caso dos mestres— ou das que se recibiu un ben prezado —no
caso do alumnado— como a boa educación, nutritivos xantares, sorrisos e traballos ben
feitos como a pulcritude das instalacións, o arranxo de avarías e a administración de
material, méritos debidos ao persoal de cociña, ao de limpeza e ao conserxe —Purita,
Marisa, Carmen, Marcelino, Iago, Elvira, etc.; Loli e Victoria, e Álvaro—.
En definitiva, un reconfortante e fermoso acto de absoluta humanidade, que
agranda o orgullo e o sentimento de privilexio de quen se ve indisolublemente ligado ao
Colexio «Virxe da Cela» do Xestal, Monfero, dende tenra idade e xa para sempre no
tempo que quede por vivir. A todos, o máis sincero agradecemento.
Atentamente, a 20 de xuño de 2016:
Antonio González López
P. S.: Véxanse os vídeos, as fotografías e os recortes da prensa, así como os demais
traballos realizados ex profeso, no blog elaborado e actualizado pola profesora Verónica
Dopico <https://40anosvivindoaescola.blogspot.com.es>.