Hausnarketa ik tak hezkuntza aireberritzeko aitzakiak
1. HAUSNARKETA PERTSONALA
Gaur egungo gizarteak aldaketa nabarmenak jasan ditu teknologiaren ondorioz.
Gizartean aurrerapen teknologiko handia egon da eta eskolak gizartearekin batera
aurrera egin beharko luke. Hala ere, oraindik metodo tradizional asko erabiltzen dira
eta horrek eskolan aldaketa handirik ez egotea eragin du.
Eskoletan IKT-ak erabiltzea emaitza onuragarriak izan ditzakeela uste dut. Gaur
egun teknologiaz inguratuta bizi gara eta garrantzitsua da ikasleei teknologia horien
erabilpena irakastea eta ezagutza berriak teknologia horietaz baliatuz transmititzea.
Ikasgelan ordenagailuak edo arbela digitalak erabiltzea, klasea modu
dinamikoago batean emateko aukera eskaintzen digu eta modu horretan errazagoa
izaten da ikaslearen interesa piztea. Argi dago interesa edo motibazioa oso
garrantzitsua dela zerbait ikasterako orduan, motibaziorik gabe inoiz ez delako ikasketa
esanguratsu bat emango. Beraz, egokia iruditzen zait ikasgelan honelako tresnak
erabiltzea, ikasleen motibazioa pizteko balio baitute.
Gaur egun ume gehienek badakite ordenagailuak, tablet-ak eta horrelako
tresnak erabiltzen baina normalean jolasteko tresna gisa soilik erabiltzen dituzte.
Tresna hauen erabilera ez da jolasetara mugatzen eta hau da ikasleei transmititu behar
dieguna. IKT-ak egin beharreko lanak edo presentazioak modu ezberdin eta
erakargarriago batean egiteko aukera eskaintzen digute, metodo tradizionalak alde
batera utziz.
Hala ere, arazoak egon daitezke eskoletan IKT-ak erabiltzeko orduan. Izan ere,
hauen erabilera egokia egiteko irakasleek prestakuntza berezia jaso behar dute eta
gerta liteke batzuk prestakuntza hori jasotzeko prest ez egotea edo norbere burua gai
ez ikustea teknologia berri horiek erabiltzen ikasteko. Eta argi dago jarrera horrekin
inoiz ez dugula lortuko eskolan aldaketarik egotea.