1. … passatu lu stradoni
Si sciuta illu mari la notti
innariendi manniósa
spagli schinchiddhi di luci
e adrunata si specchja
candu intendi lu passu licéri
di lu bugghju.
Fala zittu zittu lu silènu
affagnatu a la muntagna,
ascultendi lu bàttimu di la tarra.
Lu ’ecchju, pusatu illu mitali
è strulachendi li stélli
li cunnosci a una a una,
occhj chjusi l’assuìta
lachendi illa catréa
lu bàrriu di l’anni.
… s’agatta in carréra
ghjuchendi cu’ lu ’entu
intendi la zivvula càtriddhendi
timi
-chjurréddhu è minóri-
una bóci lu chjama
iddhu cilca e…
la ’idi, ritta illu caponi!
Ma una zinzula lu distulba
la catréa baddhulìgghja
abbri l’occhj, vidi sólu li stélli…
La mamma surridi, avvilguendi:
è chì, arrumbata ill’azza di lu céli
… passatu lu stradoni.