1. La ’janna succugnàta
… sirià un cantu a cuncoldu
sutt’a li frondi di lu sintìtu
candu lu rimattu di la risacca
imbianca la custéra
e, un taddhólu di niuléddhi scapriunìti
ghjóca illu céli pinsarósu…
imbirriàtu da lu ’èntu, lu magroni
si capùzza, pischendi
illu mari a mulmùttu.
Lu pinsamentu, tambiddhendi
curri a briddha sciolta
assuitendi, a l’appògghju la Marina…
bruculìu di passoni, faiddhùgnu diffarenti
è paltendi lu ’apóri… pari abbunaccèndi.
Una frinaréddha licéri
a cunfàffara cu’ lu disìciu
trasgìna lu spantu a chiddh’ala
e, ascultendi li bóci d’una ’olta
s’incanta ill’òru di lu mari.
A taldu… la spunzinéddha curiósa
s’abbènta illa carréra lastricata
ciavanendi a chjuchjù pa’ li caponi
candu in dillìriu ’idi la ’janna succugnàta
e la ’jenti di tandu cuntrastendi…
La mùita di lu mari è carizzendi la séra.