1. Tradimentu
Ill’aria un cantu nóu
mi chjama,
una musiga diffarenti m’assuita.
Lu sonu d’una cètara, luntana
mai stracca, spagli lu só tulmentu…
Si mùgghjani li pianti,
cannuccàti pàtini li fiori
a puppusoni pa’ l’assustu.
Dugna bicchu di monti si scióddhi a lu signali…
Cos’è chistu lumentu,
chistu tagnulu chi s’intendi e noni…
Fugghj dugna neuléddha
agghjutata da lu ’entu,
cilchendi un catagnólu illu céli lastimósu.
Allibbuta, la ciaciarra si caglia
a strulacà lu sóli spintu.
La tarra innulziddhita,
aguniósa illu so’ dólu,
suppolta l’asprióri
di lu diseltu di l’infidaltai.
Dugna cosa si ’esti di tristura
e di luttu.
S’abbrini li sippulcri
a lu scalmentu,
a la patima di la Passioni!
Piegnini silinziosi, illu céli, l’àgnuli
strimintuti a l’accunoltu di Lu ’Justu…
Tuttu s’è addrimputu!
Veni, disiciatu pintimentu
in chisti dirrami,
scàgghia dugna córi di pétra.
Occhj, puppii, sciuddhìtivi di pientu,
stélli, adruneti la notti di lagrimi…
Illu scunseltu
si spagli, rancicu, lu rimolsu…
si spigni l’aldóri di l’inichitài.
Un siccuttu rintrona,
cramendi paldonu pa’ l’umanitài!
