Spoken Word poetry

1. PAGHILOM
By: Gomersindo Polidario Jr.
Isang gabi, habang pinagmamasdan ko ang buwan
Ay hindi ko mapigilan ang humanga sa kanyang kagandahan
Kahit may mga gabing sa tingin natin ay hindi ito buo
Patunay lang na di lahat nang nakikita nang mata ay totoo.
Pero walang nakakapigil sa kanya na libutin ang mundo.
Gusto kung mayakap ang mga bituin
Habang dinadamdam ang lamig nang hangin
Gusto ko silang maramdaman sa aking bisig
Gaya nang isang tunay na pagmamahal na walang
hinihintay na kapalit.
Gusto kung balutin nang malakas na ulan
Para walang makakapansin sa mga luhang nag uunahan
na tumulo mula sa mapupungay na pisngi
na pilit tinatago sa matatamis na ngiti
Kasabay ng mahinang pintig
ng pusong malamig
Na handa ng bumitaw
Kasabay ang di marinig na sigaw.
Teka lang, naintindihan mo ba talaga ang tunay na estorya?
Di lahat nang nakikita nang mata ay totoo…
Pagmamahal na walang hinihintay na kapalit….
Tinatago sa matatamis na ngiti….
di marinig na sigaw….
Ang tinutukoy ko ay ikaw
Oo ikaw, ikaw na nakikinig sa akin ngayon “Kumusta ka?”
Balita ko, lagi ka raw masaya, pero di nga totoo ba?
Hindi kasi yan yung nakikita ko sa iyong mga mata.
Ang nakikita ko ngayon ay ang bigat na iyong dinadala
Na pilit tinatago mula sa salitang “Okay lang ako”.
Kahit alam natin na ito kasinungalingan at hindi totoo.
Ang sarap siguro bumalik sa nakaraan
Yung tipong laruan at candy lang ang iniiyakan
At hindi tulad ngayon, boyfriend, girlfriend, pamilya at pera
Dagdag mo pa ang walang katapusang problema
Yung tipong kakasahod mo lang..ubos na

2. Yung mga katrabaho mong nag aaya nang SB
Samanatalang ikaw pinagtyatyagaan lang ang 3 in 1 na kape
Dahil kailangan mong tipirin ang iyong sarili
Kahit tipong walang wala kana
Ang mahalaga maipadala mo sa pamilya
Ang sarap sigurong bumalik sa panahon,
na hindi pa kilalala ang salitang depresyon
Ngunit nandito na tayo sa katutuhanan
Na ang nakaraan ay hindi na maaring balikan
Ang nakaran na kailangan na nating lagpasan
at hindi na dapat hinihintuan.
Sa mga oras na to magpakatotoo ka
Tanggalin mo yung pag iisip na hindi ko kaya
Na hindi ako magaling at wala akong kwenta.
Hayaang maghilom ang sarili mula sa multo nang nakaraan.
Maghilom mula sa sakit nararamdaman.
Palayain ang sarili mula sa takot na baka walang magkakagusto sayo.
Kasi kung walang magkakagusto sayo
sino ang gagawa nito para sa sarili mo.
Palayain mula sa takot na baka walang magmamahal sayo
Dahil ito na yung oras para mahalin ang sarili mo.
Sa mga oras na ito gusto kung itanong mo ito sa sarili mo.
Sino nga ba ang paniniwalaan ko?
Yung sarili ko ba o yung yung sinasabi ng iba.
Wag kang mamuhay sa takot at opinyon nang iba
Minsan may mga pagkakataon na bumabagsak ka
Na akala mo hindi kana makaka ahon pa
Ang buhay ay hindi tulad nang paghihintay
sa pagtila nang bagyo
Ngunit sa pamamagitan nang pagsayaw sa ulan
at hangin na dala nito.
Ang buhay ay tulad nang isang hanging banayad
na naglalakbay sa gitna nang unos
Kailangan mo lang sumabay sa agos.
Tulad nang isang tanikalang bukas
Alam mo ang daan paano makakalabas
ngunit hindi pinapalaya ang sarili.

3. Kung hindi mo pa rin makuha
ang talagang punto nitong tula
Bawat isa sa atin may may sariling paksa
Sa bawat sinulat nating kabanata
May kanya kanya tayong kwento
na parehong hindi natin alam kung ano ang magiging dulo
ang mahalaga ay maging totoo tayo
dahil kung masakit na nga ang magmahal nang taong hindi ka gusto
Mas masakit pa rin kung pati ikaw ay walang pakialam sa sarili mo.