More Related Content
Similar to Coptic Joshua (20)
More from Bassem Matta (20)
Coptic Joshua
- 1. Joshua (Bohairic)
ⲟⲩⲟϩ ⲡⲉϫⲉ ⲡϭⲟⲓⲥ ⲛⲓⲏⲥⲟⲩ ϫⲉ ϧⲉⲛ ⲫⲟⲟⲩ ⲛⲉϩⲟⲟⲩ ϯⲛⲁⲉⲣϩⲏⲧⲥ ⲛϭⲓⲥⲓ
ⲙⲙⲟⲕ ⲙⲡⲉⲙⲑⲟ ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲧⲏⲣⲟⲩ ϫⲉ ϩⲓⲛⲁ ⲉⲩⲉⲉⲙⲓ ϫⲉ
ⲕⲁⲧⲁ ⲫⲣⲏϯ ⲉⲧⲁⲓϣⲱⲡⲓ ⲛⲉⲙ ⲙⲱⲩⲥⲏⲥ ⲡⲁⲓⲣⲏϯ ϯⲛⲁϣⲱⲡⲓ ⲛⲉⲙⲁⲕ ϩⲱⲕ
ⲟⲩⲟϩ ϯⲛⲟⲩ ϩⲟⲛϩⲉⲛ ⲛⲛⲓⲟⲩⲏⲃ ⲉⲑⲃⲉ ϯⲕⲩⲃⲱⲧⲟⲥ ⲛⲧⲉ ϯⲇⲓⲁⲑⲏⲕⲏ ⲉⲕϫⲱ
ⲙⲙⲟⲥ ⲛⲱⲟⲩ ϫⲉ ⲁⲣⲉⲧⲉⲛϣⲁⲛϣⲉ ⲛⲱⲧⲉⲛ ⲉϧⲟⲩⲛ ⲉⲡⲓⲙⲱⲟⲩ ⲛⲧⲉ
ⲡⲓⲓⲟⲣⲇⲁⲛⲏⲥ ⲧⲉⲧⲉⲛⲟϩⲓ ⲉⲣⲁⲧⲉⲛ ⲑⲏⲛⲟⲩ ϧⲉⲛ ⲡⲓⲓⲟⲣⲇⲁⲛⲏⲥ
ⲟⲩⲟϩ ⲡⲉϫⲉ ⲓⲏⲥⲟⲩ ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ ϫⲉ ϯ ⲙⲡⲉⲧⲉⲛⲟⲩⲟⲓ ⲙⲡⲁⲓⲙⲁ
ⲉϧⲟⲩⲛ ⲉⲣⲟⲓ ⲛⲧⲉⲧⲉⲛⲥⲱⲧⲉⲙ ⲙⲡⲥⲁϫⲓ ⲙⲡϭⲟⲓⲥ ⲫⲛⲟⲩϯ
ϧⲉⲛ ⲫⲁⲓ ⲧⲉⲧⲉⲛⲛⲁⲉⲙⲓ ϫⲉ ⲫⲛⲟⲩϯ ⲉⲧⲟⲛϧ ⲛⲉⲙⲱⲧⲉⲛ ⲟⲩⲟϩ ϧⲉⲛ ⲟⲩϥⲱϯ
ⲉⲃⲟⲗ ϥⲛⲁϥⲱϯ ⲉⲃⲟⲗ ϧⲁ ⲧⲉⲧⲉⲛϩⲏ ⲙⲡⲓⲭⲁⲛⲁⲛⲉⲟⲥ ⲛⲉⲙ ⲭⲉⲧⲧⲉⲟⲥ ⲛⲉⲙ
ⲫⲉⲣⲉⲍⲉⲟⲥ ⲛⲉⲙ ⲉⲩⲉⲟⲥ ⲛⲉⲙ ⲁⲙⲟⲣⲣⲉⲟⲥ ⲛⲉⲙ ⲅⲉⲣⲅⲉⲥⲉⲟⲥ ⲛⲉⲙ
ⲓⲉⲃⲟⲩⲥⲉⲟⲥ
ϩⲏⲡⲡⲉ ⲓⲥ ⲛϫⲉ ϯⲕⲓⲃⲱⲧⲟⲥ ⲛⲧⲉ ϯⲇⲓⲁⲑⲏⲕⲏ ⲙⲡϭⲟⲓⲥ ⲙⲡⲕⲁϩⲓ ⲧⲏⲣϥ
ⲥⲉⲛⲁⲉⲣϫⲓⲛⲓⲟⲣ ⲙⲡⲓⲓⲟⲣⲇⲁⲛⲏⲥ ϩⲓⲧϩⲏ ⲙⲙⲱⲧⲉⲛ
ϯⲛⲟⲩ ⲇⲉ ϭⲓ ⲉⲃⲟⲗ ϧⲉⲛ ⲑⲏⲛⲟⲩ ⲙⲓⲃ ⲛⲣⲱⲙⲓ ⲉⲃⲟⲗ ϧⲉⲛ ⲛⲉⲛϣⲏⲣⲓ
ⲙⲡⲓⲥⲣⲁⲏⲗ ⲟⲩⲣⲱⲙⲓ ⲕⲁⲧⲁ ⲫⲩⲗⲏ
ⲟⲩⲟϩ ⲉⲣⲉ ⲛⲓⲟⲩⲏⲃ ⲟϩⲓ ⲉⲣⲁⲧⲟⲩ ⲛⲏ ⲉⲧϥⲁⲓ ϧⲁ ϯⲕⲓⲃⲱⲧⲟⲥ ⲛⲧⲉ
ϯⲇⲓⲁⲑⲏⲕⲏ ⲙⲡϭⲟⲓⲥ ⲙⲡⲕⲁϩⲓ ⲧⲏⲣϥ ϧⲉⲛ ⲫⲙⲱⲟⲩ ⲛⲧⲉ ⲡⲓⲓⲟⲣⲇⲁⲛⲏⲥ
ⲛⲁⲩⲱϣⲉⲙ ⲇⲉ ⲉⲧϣⲟⲩⲱ ⲉϩⲣⲏⲓ ⲛⲁⲕⲛⲏ ⲉϥϣⲟⲩⲱ ⲉϧⲣⲏⲓ
ⲟⲩⲟϩ ⲡⲓⲗⲁⲟⲥ ⲁϥⲧⲱⲛϥ ϧⲉⲛ ⲛⲟⲩⲙⲁⲛϣⲱⲡⲓ ⲉⲑⲣⲟⲩⲉⲣϫⲓⲛⲓⲟⲣ
ⲙⲡⲓⲓⲟⲣⲇⲁⲛⲏⲥ ⲛⲓⲟⲩⲏⲃ ⲇⲉ ⲁⲩⲧⲁⲗⲟ ⲉϫⲱⲟⲩ ⲛϯⲕⲓⲃⲱⲧⲟⲥ ⲛϯⲇⲓⲁⲑⲏⲕⲏ
ⲙⲡϭⲟⲓⲥ ϩⲓⲧϩⲏ ⲙⲙⲱⲟⲩ
- 2. ϧⲉⲛ ⲡϫⲓⲛⲑⲣⲟⲩⲓⲛⲓ ⲇⲉ ⲉϧⲟⲩⲛ ⲛϯⲕⲓⲃⲱⲧⲟⲥ ⲉⲡⲓⲓⲟⲣⲇⲁⲛⲏⲥ ⲛϫⲉ ⲛⲓⲟⲩⲏⲃ
ⲉⲩϥⲁⲓ ϧⲁ ϯⲕⲩⲃⲱⲧⲟⲥ ⲛⲧⲉ ϯⲇⲓⲁⲑⲏⲕⲏ ⲙⲡϭⲟⲓⲥ ⲁⲩϫⲟⲗⲕⲟⲩ ⲁⲩⲱⲙⲥ
ⲛⲟⲩⲙⲉⲣⲟⲥ ϧⲉⲛ ⲫⲙⲱⲟⲩ ⲙⲡⲓⲓⲟⲣⲇⲁⲛⲏⲥ ⲛⲁϥⲙⲉϩ ⲇⲉ ⲙⲙⲱⲟⲩ ϣⲁ
ⲛⲉϥⲥⲫⲟⲧⲟⲩ ⲙⲫⲣⲏϯ ⲛⲛⲓⲉϩⲟⲟⲩ ⲛⲧⲉ ⲡⲓⲱⲥϧ ⲛⲥⲟⲩⲟ
ⲟⲩⲟϩ ⲉⲧ ⲁⲩϭⲣⲟ ⲉⲙⲁϣⲱ ϣⲁ ⲉϩⲣⲏⲓ ⲉⲡⲥⲁ ⲛⲕⲁⲣⲓⲁⲑⲓⲁⲣⲓⲙ ⲙⲫⲙⲱⲟⲩ
ⲉⲧϣⲟⲩⲱ ⲉϩⲣⲏⲓ ⲁϥϧⲁϯ ⲉⲃⲟⲗ ⲉⲫⲓⲟⲙ ⲛⲁⲣⲁⲃⲁ ⲫⲓⲟⲙ ⲛⲛⲓϩⲙⲟⲩ ϣⲁ
ⲛⲧⲉϥⲙⲟⲩⲛⲕ ⲉⲡⲧⲏⲣϥ ⲟⲩⲟϩ ⲡⲓⲗⲁⲟⲥ ⲛⲁϥⲟϩⲓ ⲉⲣⲁⲧϥ ⲙⲡⲉⲙⲑⲟ ⲛⲓⲉⲣⲓⲭⲱ
ⲟⲩⲟϩ ⲛⲓⲟⲩⲏⲃ ⲉⲧⲁⲩϥⲁⲓ ϧⲁ ϯⲕⲓⲃⲱⲧⲟⲥ ⲛϯⲇⲓⲁⲑⲏⲕⲏ ⲙⲡϭⲟⲓⲥ ⲟϩⲓ
ⲉⲣⲁⲧⲟⲩ ϩⲓϫⲉⲛ ⲛⲏ ⲉⲧϣⲟⲩⲱ ϧⲉⲛ ⲑⲙⲏϯ ⲙⲡⲓⲓⲟⲣⲇⲁⲛⲏⲥ ⲟⲩⲟϩ ⲛⲉⲛϣⲏⲣⲓ
ⲙⲡⲓⲥⲣⲁⲏⲗ ⲉϫⲉⲛ ⲓⲟⲣ ⲁⲩⲙⲟϣⲓ ϧⲉⲛ ⲡⲉⲧϣⲟⲩⲱ ϣⲁⲛⲧⲉ ⲡⲓⲗⲁⲟⲥ ⲉⲣϫⲓⲛⲓⲟⲣ
ⲙⲡⲓⲓⲟⲣⲇⲁⲛⲏⲥ
ⲡϭⲟⲓⲥ ⲇⲉ ⲁϥⲥⲁϫⲓ ⲛⲉⲙ ⲓⲏⲥⲟⲩ ⲉϥϫⲱ ⲙⲙⲟⲥ ⲙⲉⲛⲉⲛⲥⲁ ⲑⲣⲉ ⲡⲓⲗⲁⲟⲥ
ⲧⲏⲣϥ ⲉⲣϫⲓⲛⲓⲟⲣ ⲙⲡⲓⲓⲟⲣⲇⲁⲛⲏⲥ
ϫⲉ ϭⲓ ⲛϩⲁⲛⲣⲱⲙⲓ ⲉⲃⲟⲗ ϧⲉⲛ ⲡⲓⲗⲁⲟⲥ ⲟⲩⲣⲱⲙⲓ ⲕⲁⲧⲁ ⲫⲩⲗⲏ
ⲛⲧⲉⲕϩⲟⲛϩⲉⲛ ⲛⲧⲟⲧⲟⲩ ⲛⲥⲉⲱⲗⲓ ⲉⲃⲟⲗ ϧⲉⲛ ⲡⲓⲙⲁ ϧⲉⲛ ⲑⲙⲏϯ
ⲙⲡⲓⲓⲟⲣⲇⲁⲛⲏⲥ ⲙⲡⲓⲓⲃ ⲛⲱⲛⲓ ⲉⲩⲟⲩⲟϫ ⲟⲩⲟϩ ⲛⲁⲓ ⲙⲁⲣⲟⲩⲭⲁⲩ ⲛϧⲣⲏⲓ ϩⲓ
ⲟⲩⲥⲟⲡ ϧⲉⲛ ⲛⲉⲧⲉⲛⲙⲁ ⲛϣⲱⲡⲓ ⲙⲡⲕⲱϯ
ⲟⲩⲟϩ ϧⲉⲛ ⲡϫⲓⲛⲑⲣⲉ ⲓⲏⲥⲟⲩ ⲙⲟⲩϯ ⲙⲡⲓⲓⲃ ⲛⲣⲱⲙⲓ ⲉⲃⲟⲗ ϧⲉⲛ ⲛⲏ ⲉⲧⲟⲓ
ⲛⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲟⲩⲣⲱⲙⲓ ⲕⲁⲧⲁ ⲫⲩⲗⲏ
ⲁϥⲥⲁϫⲓ ⲛⲉⲙⲱⲟⲩ ⲉϥϫⲱ ⲙⲙⲟⲥ ϫⲉ ϯ ⲙⲡⲉⲧⲉⲛⲟⲩⲟⲓ ϩⲓⲧϩⲏ ⲙⲙⲟⲓ
ⲙⲡⲉⲙⲑⲟ ⲉⲃⲟⲗ ⲙⲡϭⲟⲓⲥ ϧⲉⲛ ⲑⲙⲏϯ ⲙⲡⲓⲓⲟⲣⲇⲁⲛⲏⲥ ⲟⲩⲟϩ ⲙⲁⲣⲉ ⲡⲓⲟⲩⲁⲓ
ⲙⲙⲱⲧⲉⲛ ϭⲓ ⲉⲃⲟⲗ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲛⲟⲩⲱⲛⲓ ⲛⲧⲉϥⲧⲁⲗⲟϥ ⲉϫⲉⲛ
ⲧⲉϥⲛⲁϩⲃⲓ ⲕⲁⲧⲁ ⲧⲓⲃ ⲙⲫⲩⲗⲏ ⲛⲧⲉ ⲡⲓⲥⲣⲁⲏⲗ
ϫⲉ ϩⲓⲛⲁ ⲛⲧⲉ ⲛⲁⲓ ϣⲱⲡⲓ ⲛⲱⲧⲉⲛ ⲉⲩⲙⲏⲓⲛⲓ ⲉϥⲭⲏ ⲉϧⲣⲏⲓ ⲛⲥⲏⲟⲩ ⲛⲓⲃⲉⲛ
ϫⲉ ϩⲓⲛⲁ ⲁϥϣⲁⲛϣⲉⲛⲕ ⲛⲣⲁⲥϯ ⲛϫⲉ ⲡⲉⲕϣⲏⲣⲓ ⲉϥϫⲱ ⲙⲙⲟⲥ ϫⲉ ⲟⲩ ⲛⲉ
ⲛⲁⲓⲱⲛⲓ ⲉⲧⲭⲏ ⲉϧⲣⲏⲓ ⲛⲱⲧⲉⲛ
- 3. ⲛⲑⲟⲕ ϩⲱⲕ ⲉⲕⲉⲉⲣⲟⲩⲱ ⲙⲡⲉⲕϣⲏⲣⲓ ⲉⲕϫⲱ ⲙⲙⲟⲥ ⲛⲁϥ ϫⲉ ⲉⲑⲃⲉ ϫⲉ
ⲁϥⲙⲟⲩⲛⲕ ⲛϫⲉ ⲡⲓⲓⲟⲣⲇⲁⲛⲏⲥ ⲛⲓⲁⲣⲟ ϧⲁⲧϩⲏ ⲛϯⲕⲩⲃⲱⲧⲟⲥ ⲛϯⲇⲓⲁⲑⲏⲕⲏ
ⲙⲡϭⲟⲓⲥ ⲙⲡⲕⲁϩⲓ ⲧⲏⲣϥ ⲉⲑⲣⲉⲥϫⲓⲛⲓⲟⲣ ⲙⲙⲟϥ ⲟⲩⲟϩ ⲛⲁⲓⲱⲛⲓ ⲉⲩⲉϣⲱⲡⲓ
ⲛⲱⲧⲉⲛ ⲛⲟⲩⲉⲣⲫⲙⲉⲩⲓ ϧⲉⲛ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ϣⲁ ⲉⲛⲉϩ
ⲟⲩⲟϩ ⲁⲩⲓⲣⲓ ⲛϫⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲕⲁⲧⲁ ⲫⲣⲏϯ ⲉⲧⲁϥϩⲟⲛϩⲉⲛ
ⲛⲧⲟⲧϥ ⲛⲓⲏⲥⲟⲩ ⲟⲩⲟϩ ϧⲉⲛ ⲡϫⲓⲛⲑⲣⲟⲩⲱⲗⲓ ⲙⲡⲓⲃ ⲛⲱⲛⲓ ⲉⲃⲟⲗ ϧⲉⲛ
ⲑⲙⲏϯ ⲙⲡⲓⲓⲟⲣⲇⲁⲛⲏⲥ ⲕⲁⲧⲁ ⲫⲣⲏϯ ⲉⲧⲁ ⲡϭⲟⲓⲥ ϩⲟⲛϩⲉⲛ ⲉⲧⲟⲧϥ ⲛⲓⲏⲥⲟⲩ
ϧⲉⲛ ⲡϫⲓⲛⲑⲣⲟⲩⲕⲏⲛ ⲇⲉ ⲉⲩⲉⲣϫⲓⲛⲓⲟⲣ ⲧⲏⲣⲟⲩ ⲛϫⲉ ⲛⲉⲛϣⲏⲣⲓ ⲙⲡⲓⲥⲣⲁⲏⲗ
ⲉⲩⲱⲗⲓ ⲙⲙⲱⲟⲩ ⲛⲉⲙⲱⲟⲩ ⲉϩⲣⲏⲓ ⲉⲧⲟⲩⲡⲁⲣⲉⲙⲃⲟⲗⲏ ⲁⲩⲭⲁⲩ ϧⲉⲛ ⲡⲓⲙⲁ
ⲉⲧⲉⲙⲙⲁⲩ
ⲓⲏⲥⲟⲩ ⲇⲉ ⲁϥⲧⲁϩⲟ ⲉⲣⲁⲧⲟⲩ ⲛⲕⲉⲓⲃ ⲛⲱⲛⲓ ϧⲉⲛ ⲡⲓⲙⲁ ⲉⲧⲟⲩⲙⲟⲩϯ ⲉⲣⲟϥ
ϫⲉ ⲭⲁⲧⲟⲩ ⲛⲛⲓϭⲁⲗⲁⲩϫ ⲛⲛⲓⲟⲩⲏⲃ ⲛⲏ ⲉⲧϥⲁⲓ ϧⲁ ϯⲕⲩⲃⲱⲧⲟⲥ ⲛϯⲇⲓⲁⲑⲏⲕⲏ
ⲙⲡϭⲟⲓⲥ ⲟⲩⲟϩ ⲥⲉⲭⲏ ⲉϧⲣⲏⲓ ϧⲉⲛ ⲡⲓⲙⲁ ⲉⲧⲉⲙⲙⲁⲩ ϣⲁ ⲉϧⲣⲏⲓ ⲉⲫⲟⲟⲩ
ⲛⲉϩⲟⲟⲩ
ⲟⲩⲟϩ ⲓⲏⲥⲟⲩ ⲛⲉ ⲁϥⲉⲣϧⲉⲗⲗⲟ ⲡⲉ ⲉⲁϥⲁⲓⲁⲓ ϧⲉⲛ ⲛⲉϥⲉϩⲟⲟⲩ
ⲟⲩⲟϩ ⲁϥⲙⲟⲩϯ ⲛϫⲉ ⲓⲏⲥⲟⲩⲥ ⲉⲛⲉⲛϣⲏⲣⲓ ⲙⲡⲓⲥⲣⲁⲏⲗ ⲛⲉⲙ ⲛⲟⲩϧⲉⲗⲗⲟⲓ
ⲛⲉⲙ ⲛⲟⲩⲁⲣⲭⲱⲛ ⲛⲉⲙ ⲛⲟⲩⲥⲁϧ ⲛⲉⲙ ⲛⲟⲩⲣⲉϥϯϩⲁⲡ ⲟⲩⲟϩ ⲡⲉϫⲁϥ
ⲛⲱⲟⲩ ϫⲉ ⲁⲛⲟⲕ ⲁⲓⲉⲣϧⲉⲗⲗⲟ ⲟⲩⲟϩ ⲁⲓⲁⲓ ϧⲉⲛ ⲛⲁⲉϩⲟⲟⲩ
ⲛⲑⲱⲧⲉⲛ ⲇⲉ ⲁⲣⲉⲧⲉⲛⲛⲁⲩ ⲉϩⲱⲃ ⲛⲓⲃⲉⲛ ⲉⲧⲁϥⲁⲓⲧⲟⲩ ⲛϫⲉ ⲡϭⲟⲓⲥ ⲡⲉⲛⲛⲟⲩϯ
ⲛⲛⲁⲓⲉⲑⲛⲟⲥ ⲧⲏⲣⲟⲩ ⲉⲃⲟⲗ ϩⲁ ⲡⲉⲧⲉⲛϩⲟ ϫⲉ ⲡϭⲟⲓⲥ ⲡⲉⲛⲛⲟⲩϯ ⲛⲁϥϯ
ⲉϩⲣⲏⲓ ⲉϫⲱⲕ
ⲁⲛⲁⲩ ⲓⲥ ϩⲏⲡⲡⲉ ⲁⲓϯ ⲛⲱⲧⲉⲛ ⲛⲛⲓⲉⲑⲛⲟⲥ ⲉⲧⲁⲩⲥⲱϫⲡ ϧⲉⲛ ⲛⲉⲧⲉⲛⲕⲗⲏⲣⲟⲥ
ⲉϧⲟⲩⲛ ⲉⲛⲉⲧⲉⲛⲫⲩⲗⲏ ⲓⲥϫⲉⲛ ⲡⲓⲓⲟⲣⲇⲁⲛⲏⲥ ⲛⲓⲉⲑⲛⲟⲥ ⲧⲏⲣⲟⲩ ⲁⲓϥⲟⲧⲟⲩ
ⲉⲃⲟⲗ ⲟⲩⲟϩ ⲓⲥϫⲉⲛ ⲡⲓⲛⲓϣϯ ⲛⲓⲟⲙ ⲉϥⲉϣⲱⲡⲓ ⲉϥⲟⲓ ⲛⲑⲱϣ ϣⲁ
ⲛⲓⲙⲁⲛϩⲱⲧⲡ
ⲡϭⲟⲓⲥ ⲇⲉ ⲡⲉⲛⲛⲟⲩϯ ⲛⲑⲟϥ ⲉϥⲉϥⲟⲧⲟⲩ ⲉⲃⲟⲗ ϧⲁⲧϩⲏ ⲙⲡⲉⲧⲉⲛϩⲟ
- 4. ϣⲁⲧⲟⲩⲧⲁⲕⲟ ⲉϥⲉⲟⲩⲱⲣⲡ ⲛⲱⲟⲩ ⲛⲛⲓⲑⲏⲣⲓⲟⲛ ⲛⲁⲅⲣⲓⲟⲛ ϣⲁⲧⲉϥϥⲟⲧⲟⲩ ⲉⲃⲟⲗ
ϧⲁⲧϩⲏ ⲙⲡⲉⲧⲉⲛϩⲟ ⲟⲩⲟϩ ⲁⲣⲓⲕⲗⲏⲣⲟⲛⲟⲙⲓⲛ ⲛⲕⲁϩⲓ ⲕⲁⲧⲁ ⲫⲣⲏϯ
ⲉⲧⲁϥⲥⲁϫⲓ ⲛⲉⲙⲱⲧⲉⲛ ⲛϫⲉ ⲡϭⲟⲓⲥ ⲡⲉⲛⲛⲟⲩϯ
ϫⲉⲙⲛⲟⲙϯ ⲟⲩⲛ ⲉⲙⲁϣⲱ ⲁⲣⲉϩ ⲉⲓⲣⲓ ⲛϩⲱⲃ ⲛⲓⲃⲉⲛ ⲉⲧⲥϧⲏⲧⲟⲩ ϩⲓ ⲡϫⲱⲙ
ⲛⲧⲉ ⲫⲛⲟⲙⲟⲥ ⲙⲙⲱⲩⲥⲏⲥ ϩⲓⲛⲁ ⲛⲧⲉⲧⲉⲛϣⲧⲉⲙⲣⲓⲕⲓ ⲉⲟⲩⲓⲛⲁⲙ ⲟⲩⲇⲉ ϫⲁϭⲏ
ϩⲟⲡⲱⲥ ⲛⲧⲉⲧⲉⲛϣⲧⲉⲙϣⲉ ⲉϧⲟⲩⲛ ⲉⲛⲁⲓⲉⲑⲛⲟⲥ ⲉⲧⲁⲩⲥⲱϫⲡ ⲟⲩⲟϩ ⲫⲣⲁⲛ
ⲛⲛⲟⲩⲛⲟⲩϯ ⲛⲛⲟⲩϫⲟϥ ϧⲉⲛ ⲑⲏⲛⲟⲩ ⲟⲩⲇⲉ ⲛⲛⲉⲧⲉⲛⲟⲩⲱϣⲧ ⲙⲙⲱⲟⲩ ⲟⲩⲇⲉ
ⲛⲛⲉⲧⲉⲛϣⲉⲙϣⲓ ⲙⲙⲱⲟⲩ
ⲁⲗⲗⲁ ⲉⲣⲉⲧⲉⲛⲉⲧⲉⲙ ⲑⲏⲛⲟⲩ ⲉⲡϭⲟⲓⲥ ⲡⲉⲛⲛⲟⲩϯ ⲕⲁⲧⲁ ⲫⲣⲏϯ ⲉⲧⲁⲣⲉⲧⲉⲛⲁⲓⲥ
ϣⲁ ⲉϧⲟⲩⲛ ⲉⲡⲁⲓⲉϩⲟⲟⲩ
ⲟⲩⲟϩ ⲉϥⲉϥⲟⲧⲟⲩ ⲉⲃⲟⲗ ⲛϫⲉ ⲡϭⲟⲓⲥ ⲉⲃⲟⲗ ϩⲁ ⲡⲉⲧⲉⲛϩⲟ ϩⲁⲛⲛⲓϣϯ
ⲛⲉⲑⲛⲟⲥ ⲟⲩⲟϩ ⲉⲩϫⲟⲣ ⲟⲩⲟϩ ⲙⲡⲉ ϩⲗⲓ ⲟϩⲓ ⲉⲣⲁⲧϥ ⲙⲡⲉⲧⲉⲛⲙⲑⲟ ϣⲁ
ⲉϧⲟⲩⲛ ⲉⲡⲁⲓⲉϩⲟⲟⲩ
ⲟⲩⲁⲓ ⲉⲃⲟⲗ ϧⲉⲛ ⲑⲏⲛⲟⲩ ⲁϥϭⲟϫⲓ ⲛⲥⲁ ⲟⲩϣⲟ ϫⲉ ⲡϭⲟⲓⲥ ⲡⲉⲛⲛⲟⲩϯ
ⲛⲁϥϯ ⲉϩⲣⲏⲓ ⲉϫⲱⲛ ⲕⲁⲧⲁ ⲫⲣⲏϯ ⲉⲧⲁϥϫⲟⲥ ⲛⲁⲛ
ⲟⲩⲟϩ ⲉⲣⲉⲧⲉⲛⲉⲁⲣⲉϩ ⲉⲙⲁϣⲱ ⲉⲙⲉⲛⲣⲉ ⲡϭⲟⲓⲥ ⲡⲉⲛⲛⲟⲩϯ
ⲉϣⲱⲡ ⲅⲁⲣ ⲛⲧⲉⲧⲉⲛⲫⲉⲛϩ ⲑⲏⲛⲟⲩ ⲛⲧⲉⲧⲉⲛⲙⲟⲩϫⲧ ⲛⲉⲙ ⲛⲓⲉⲑⲛⲟⲥ ⲁⲩⲥⲱϫⲡ
ⲛⲉⲙⲱⲧⲉⲛ ⲟⲩⲟϩ ⲛⲧⲉⲧⲉⲛϣⲟⲙ ⲉⲣⲱⲟⲩ ⲛⲧⲉⲧⲉⲛⲙⲟⲩϫⲧ ⲛϧⲏⲧⲟⲩ ⲟⲩⲟϩ
ⲛⲑⲱⲟⲩ ϧⲉⲛ ⲑⲏⲛⲟⲩ
ⲁⲣⲓⲉⲙⲓ ϫⲉ ⲛⲛⲉϥⲟⲩⲁϩ ⲧⲟⲧϥ ⲛϫⲉ ⲡϭⲟⲓⲥ ⲉϥⲱϯ ⲛⲛⲁⲓⲉⲑⲛⲟⲥ ⲉⲃⲟⲗ
ϧⲁⲧϩⲏ ⲙⲡⲉⲧⲉⲛϩⲟ ⲟⲩⲟϩ ⲉⲩⲉϣⲱⲡⲓ ⲛⲱⲧⲉⲛ ⲉⲩⲫⲁϣ ⲛⲉⲙ ⲟⲩⲥⲕⲁⲛⲇⲁⲗⲟⲛ
ⲛⲉⲙ ϩⲁⲛⲓϥⲧ ϧⲉⲛ ⲛⲉⲧⲉⲛⲑⲓⲃⲥ ⲛⲉⲙ ϩⲁⲛⲥⲟⲩⲣⲓ ϧⲉⲛ ⲛⲉⲧⲉⲛⲃⲁⲗ
ϣⲁⲛⲧⲉⲧⲉⲛⲧⲁⲕⲟ ⲉⲃⲟⲗ ϩⲁ ⲡⲓⲕⲁϩⲓ ⲛⲁⲅⲁⲑⲟⲛ ⲫⲏ ⲉⲧⲁϥⲧⲏⲓϥ ⲛⲱⲧⲉⲛ ⲛϫⲉ
ⲡϭⲟⲓⲥ ⲡⲉⲛⲛⲟⲩϯ
ⲁⲛⲟⲕ ⲇⲉ ϯⲛⲁϣⲉⲛⲏⲓ ϩⲓ ⲡⲓⲙⲱⲓⲧ ⲕⲁⲧⲁ ⲫⲣⲏϯ ⲛⲛⲏ ⲧⲏⲣⲟⲩ ⲉⲧ ϩⲓϫⲉⲛ
- 5. ⲡⲓⲕⲁϩⲓ ⲟⲩⲟϩ ⲉⲣⲉⲧⲉⲛⲉⲉⲙⲓ ϧⲉⲛ ⲡⲉⲧⲉⲛϩⲏⲧ ⲛⲉⲙ ⲧⲉⲧⲉⲛⲯⲩⲭⲏ ϫⲉ ⲙⲡⲉ
ⲟⲩⲥⲁϫⲓ ⲛⲟⲩⲱⲧ ϩⲉⲓ ⲉⲃⲟⲗ ϧⲉⲛ ⲛⲓⲥⲁϫⲓ ⲧⲏⲣⲟⲩ ⲉⲧⲁϥϫⲟⲧⲟⲩ ⲛⲁⲛ ⲛϫⲉ
ⲡϭⲟⲓⲥ ⲡⲉⲛⲛⲟⲩϯ ⲕⲁⲧⲁ ϩⲱⲃ ⲛⲓⲃⲉⲛ ⲉⲧⲉⲣⲛⲟϥⲣⲓ ⲛⲁⲛ ⲁⲩϣⲱⲡⲓ ⲧⲏⲣⲟⲩ