Obradoiro: composición de cantiga de amigo colectiva
1. CANTIGA DE AMIGO COLECTIVA
Imos compoñer un texto con intención poética
seguindo os recursos propios da cantiga de amigo,
recoñecíbeis no esquema da dereita.
Realizarase en parellas ou grupos mediante o sistema
do folio xiratorio. De inicio, poñede o voso nome na
parte superior dunha folla. Máis adiante, logo de seguir
as indicacións dadas, o papel irá rotando na orde que
se indique na aula. Cando vos chegue unha folla dos
demais, non debedes anotar de novo os vosos nomes,
só ler con atención o escrito e atender as novas
instrucións.
Tanto ao inicio como despois, seguide as indicacións
escribindo directamente o que se pide.
2. CANTIGA DE AMIGO COLECTIVA
1. VERSO 1
O noso poema tratará un tema sobre a relación amorosa
no contexto actual: a ausencia da persoa amada, o control
e os impedimentos por parte dos pais, o encontro
próximo... e mesmo podemos chegar á parodia, pero
nunca á procacidade.
Logo de poñer os nomes, máis abaixo escribide un
verso de extensión media (entre 8 e 16 sílabas). Pode ser
unha referencia ao lugar de ansia/espera/encontro, unha
apelación a un elemento do contorno...
3. CANTIGA DE AMIGO COLECTIVA
2. VERSO 2
Rotamos as follas.
Escribide un verso que continúe o escrito polo/as
compañeiros/as, de extensión próxima e que rime co
anterior.
4. CANTIGA DE AMIGO COLECTIVA
3. VERSO REFRÁN
Rotamos as follas.
Para ese dístico xa creado, compoñede un verso máis
pequeno, que non rime cos anteriores. Procurade que
aluda a un sentimento ou que sexa suxestivo, pois
constituirá o retrouso, o “refrán” do poema.
5. CANTIGA DE AMIGO COLECTIVA
4. 2ª ESTROFA (VERSOS 3, 4 e REFRÁN)
Rotamos as follas.
Deixamos algo de espazo e redactamos a seguinte
estrofa. O primeiro verso será igual ao primeiro do
poema pero con cambio no final, de xeito que se cree
unha rima distinta.
A seguir, reproducimos o segundo verso da primeira
estrofa, pois continuamos co paralelismo, mais
cambiando tamén o seu final, rimando co verso
anterior.
Por último, reproducimos o refrán.
6. CANTIGA DE AMIGO COLECTIVA
5. 3ª ESTROFA (VERSOS 5, 6 e REFRÁN)
Rotamos as follas.
Aplicamos o leixaprén: o primeiro verso da terceira
estrofa será o segundo da primeira. Reproducímolo,
entón, tras deixar algo de espazo en branco.
A continuación, escribimos un novo verso, o segundo
da terceira estrofa, que deberá rimar co anterior.
Para pechar a cobra, reproducimos o refrán.
7. CANTIGA DE AMIGO COLECTIVA
6. 4ª ESTROFA (VERSOS 7, 8 e REFRÁN)
Rotamos as follas.
Aplicamos o leixaprén: o verso 7 será igual ao 4.
Aplicamos o paralelismo: o verso 8 será parcialmente
igual ao 6 e rimará co anterior.
Aplicamos o refrán.