1. ENTREGA DOS LIBRIÑOS “PASAPORTE Á INDIA”
O “Pasaporte á India” é un documento persoal, individual e intrasferible, expedido
polos órganos competentes da Administración Xeral de Monferosolidario, que acredita, fóra do
CPI Virxe da Cela, a identidade dos nenos e nenas que participaron activamente no curso
académico 2013-2014 no proxecto School to School coa Fundación Vicente Ferrer.
Unha sinxela e vistosa actividade que funciona como unha carta de presentación, que
amosa os nosos gustos e afeccións e a nosa imaxe persoal, e que terán unha dobre vertente.
Por unha banda serán enviados á Konampalli School, para que os nenos e nenas desta escola
india podan saber algo máis sobre nós, neste interesante intercambio cultural no que ano tras
ano, e con este xa van catro, estamos a realizar a través da FVF. E por outra, quedarán como
rexistro do noso paso polo centro, esa memoria que conservaremos nas nosas casas e que co
tempo faranos lembrar dos nosos compañeiros e compañeiras, con quen tantos días e tantas
experiencias compartirmos a longo de todo este curso. Quedarán tamén como un fermoso
recordo para Oliva e Vanesa, esas marabillosas mestras de infantil que deixaron pegada no CPI
Virxe da Cela , e que non estarán connosco para o vindeiro curso.
Como non queremos poñernos tristes e morriñentos, centrámonos no venres 16 de
maio de 2014, véspera das Letras Galegas, que foi unha xornada de celebración, aproveitada
non so para homenaxear a Xosé María Díaz Castro, senón tamén para repartir no recreo
premios, diplomas e galardóns para varias actividades desenvolvidas no noso centro: a entrega
dos “Pasaportes á India” (Monfersolidario), os premios do “Concurso de Cubertas de
Libros”(Departamento de Plástica), “III Edición Concurso Preguntón” (Biblioteca Castelao), e
“Concurso literario San Valentín 2014” (EDLG). Despois de xantar os nenos e nenas de Infantil
(3 anos) e de Infantil (4 e 5 anos) fixeron unha fermosa e simpática foto en “familia” diante do
panel onde están expostos os seus traballos, que mandarán tamén aos seus compañeiros da
India. Esperamos ansiosamente recibir a contrapartida por parte da Konampalli School…