1. Palas de Rei, 25 de novembro de 2019
Moi boas, nenas e nenos, familias e demais membros da
comunidade educativa do CEIP Palas de rei.
Dende que cheguei á biblioteca, fai uns 6 anos, sentinme moi a
gusto. Este ano decidín escribirvos, cando menos, unha carta en
cada un dos tres trimestres do curso, así que aí vai a primeira.
Descansei moito no verán, viaxei, coñecín outras bibliotecas
e…veño cargada de ideas. Só pido a vosa axuda para poder
levalas á práctica.
Estades preparados para vivir un curso cheo de emocións?
Como vedes, cambiamos un pouco a organización da biblioteca, e aínda lle faltan
cambios que irán chegando pouco a pouco. Agora mesmo estamos decorando a porta de
entrada. Dentro, estamos facendo unha árbore…Bueno, non vos vou adiantar máis.
Que acontece no tempo de lecer na biblioteca?
Os luns e martes podedes facer préstamo de libros, ler, gozar dos novos libros da
biblioteca, dos xogos…
Os mércores é o día do cine; sempre hai algunha curtametraxe, documental ou vídeo. Un
día destes preparo unhas palomitas que ben as merecemos.
Os xoves hai unha sesión de conta contos na que os protagonistas son nenos e nenas do
cole.
Rematamos a semana coa bibliopatio que percorre o patio para achegar contos ao
alumnado de infantil e de 1º de primaria.
Pero…estade moi atento. Porque chegarán novas actividades en calquera momento.
Que actividades levamos feitas?
Algunhas delas son: o 24 de outubro conmemoramos o día das bibliotecas; en Samaín as
familias acudiron a contar contos de medo; esta semana realizaremos unha actividade en
relación coa ciencia, xa que novembro é o mes da ciencia...
Isto é un non parar. E o que nos queda!!!
2. Por certo, cando teño un oco, vou facendo un diario do que acontece na biblioteca.
Botádelle unha ollada ao seguinte enlace; seguro que vos vai gustar.
https://abibliodepalas.blogspot.com/
Sabedes que?
Estou moi ilusionada e moi contenta porque en cada recreo hai un bo número de
alumnos e alumnas na biblioteca.
Para que todo isto se faga realidade os mestres/as están traballando moito e poñendo
moito empeño. Hai unha morea de nenas e de nenos colaborando en cada tempo de lecer
que veñen cargados de enerxía, de ilusión e de gañas de traballar…E polas tardes, desde
que vós marchades, eu non paro de traballar para tervos todo listo. Traballando todos
xuntos facemos un gran equipo!
Antes de que me esqueza: acepto calquera suxestión que se vos ocorra para
incorporar á biblioteca, polo que vou colocar unha caixa de suxerencias na que podedes
meter as vosas ideas. Eu lereinas e a ver que podo facer.
Non quería despedirme sen dar unha especial benvida ás novas lectoras e lectores que
veñen por primeira vez ao noso cole. Espero que vos divirtades e aprendades tanto coma
nós coas actividades.
Remato xa; fixen unha pequena parada para escribirvos esta carta, pero teño que seguir
traballando.
Chegarán moitas sorpresas…Estade atentos ao meu blog, as miñas cartas, a todo o que
aconteza na biblio…
P.D. Teredes na casa algún coxín que non usedes e que poidades doar á biblioteca?
E que estou pensando que así estaremos moito máis cómodos. Valen de calquera cor e
tamaño. Que emoción!! Quen verá ás nenas e aos nenos…
Apertas grandes!!
Daia, a mascota da biblioteca.