पोवारी(पंवारी) भाषा : पोवारी(पंवारी) मध्यभारत को वैनगंगा क्षेत्र मा निवासरत पंवार(पोवार) समाज की मायबोली(मातृभाषा) आय। डॉ. भोलानाथ जी तिवारी को द्वारा रचित किताब, "भाषा विज्ञान कोष" मा ऐव तथ्य उल्लेखित से की पोवारी बोली बालाघाट अना सिवनी जिला मा बोली जासे। 1891 की जनगणना मा 70,000 मानुष पोवारी बोलने वाला होता । अज छत्तीस कुर का पंवार (पोवार) की देश मा जनसंख्या 14 लाख को आसपास से। लगभग अरधी पोवार जनसंख्या पोवारी मा बोलसेती अना दुई तिहाई समाजला पोवारी उमजसे। ऐन बात की लगित जरुरत से की समाज को बीच मा आपरी मायबोली को अधिकाधिक प्रचार होनो पायजे, तब आपरी मातृभाषा को अस्तित्व बरकरार रहे, नही त् आपरो पुरखाइन की या विरासत मुराय जाहे।
