Discurso del lehendakari - Apertura de curso de HABE

1. Navarra, 2 – 01007 VITORIA-GASTEIZ
tef. 945 017 972 – e-mail: prentsa@euskadi.eus
LEHENDAKARITZA
Komunikaziorako Zuzendaritza
PRESIDENCIA
Dirección de Comunicación
HABEren IKASURTEA IREKITZEKO EKITALDIA/ APERTURA DE
CURSO DE HABE
2015-09-11-Bilbao-11-09-2015
Lehendakariaren hitzaldia – Discurso del Lehendakari
Herri agintariok, herri ordezkariok, euskeraren alorrean eragileok zareten
guztioi, jaun andreok, egunon denoi.
Aurten 50 urte betetzen dira euskaraz alfabetatzeko lehenengo kanpaina abian
jarri zenetik. Gaur, lehenengo alfabetatze-eskola haiek ekarri nahi ditut gogora:
Rikardo Arregi zenaren ekimenez eta Euskaltzaindiaren babespean antolatu
ziren.
Gazte euskaltzale haiek ikusmen handia izan zuten. Garbi ikusten zuten
euskarak kultura hizkuntza ere behar zuela izan; ezin zuela etxera edo
lagunartera mugaturik iraun. Gizarte berriaren beharretara egokitu behar zela,
gizarte modernoaren beharretara.
Ekimen hark berehala azaleratu zuen euskal gizartean zegoen nahi eta
borondate argi bat. Laster batean, euskalduntzea gailendu zitzaion
alfabetatzeari. Euskara ikasi nahi zuten herritarrak gau-eskoletara hurbiltzen
hasi ziren.
Handik hona bide luzea egin du helduen euskalduntzeak, batez ere,
autogobernua eskuratu genuenetik aurrera. Duela hogeita hamar urte, euskara
sustatzeko politika publikoak gorpuztu ziren. Garbi ikusi genuen euskara
biziberritzeko eginkizuna belaunaldi arteko eginkizuna zela. Denok gara
beharrezkoak.
Hizkuntzari dagokionez, gure legeriak ez du euskara mugatzen gizatalde,
lurralde edo esparru jakin batzuetara bakarrik. Ez; aitzitik, guztion ondare egiten
du euskara: euskal hiztun diren herritarrena bezalaxe, erdal hiztun direnena
ere.
Euskarari buruzko oinarrizko lege-araubideak herritar guztiei aitortzen die
euskara jakiteko eta erabiltzeko eskubidea. Legezko oinarri hori aintzat hartuz,
proposatu zion Eusko Jaurlaritzak Legebiltzarrari, heldutan euskara ikasteko
aukera, Bizialdi Osoko Ikaskuntzaren Legearen esparruan txertatzea. Hori da
legealdi honetan onartu den lehenbiziko legea. Ziur nago lege horren
garapenean aukera berriak sortu ahal izango ditugula euskara edozein adinetan
ikasi ahal izateko.
Gizarte elebiduna osatzea dugu helburu, eta gizarte elebidunak herritar
elebidunak behar ditu. Horretan ari gara etengabe, eta hirurehun milatik gora
hiztun berri irabazi ditu euskarak. Berriz diot, hirurehun milatik gora.

2. 2
Horietatik heren bat helduen euskalduntzeak eman ditu, euskaltegietatik irten
dira. Izugarrizko urratsa eman dugu. Baina oraindik asko dugu egiteko. Oraindik
biztanle heldutan asko dira elebakar direnak. Horietako asko nahi ditugu
motibatu, nahi ditugu erakarri, euskara ikastera.
Inoiz ez da berandu hizkuntza bat ikasteko. Argi erakutsi duzue hori
euskaltegiok. Hizkuntza bat ikasteak abantaila asko ematen dizkio norberari.
Abantaila asko dakarzkio gizarteari ere, berdintasunerako bere alea jartzen du
heldutan euskara ikasten duen herritar bakoitzak, gizarte-kohesiorako zurkaitz
berri bat.
Beraz, euskara ikasteko pausua ematera gonbidatu nahi ditut herritar
elebakarrak. Ikasteko pausu hori emateko prest dauden herritarrei gero eta
aukera hobeak eskaintzea da gure ardura.
Badakit, euskaltegietan, HABErekin batera, ahalegin handiak egiten ari zaretela
irakasbideak hobetzen. Curriculum berria izango duzue datorren ikasturtetik
aurrera. Europako Markora erabat egokitzeaz gainera, Europako Markoa gure
ezaugarrietara egokitzeko aukera emango digun Curriculum berria.
Jakizue, heldu euskaldun berri bakoitza ekarpen garrantzitsua dela gure
gizartearentzat. Zenbat eta elebitasun zabalagoa, orduan eta elkarbizitza
hobea, orduan eta berdintasun sendoagoa.
Hori goiburutzat hartuz, pausuz pausu aurrera egiten ari gara. Legealdi honen
hasieratik, euskararen sustapena zehar-lerro gisa ulertu nahi izan dugu.
-Lehenengo neurria Jaurlaritzako sail guztietan Euskara Unitateak sortzea izan
zen.
-Halaber, Jaurlaritzak eratu dituen hamalau plan estrategikoetako bat izan da
euskarari buruzkoa: 2014an Euskararen Agenda Estrategikoa onartu genuen.
-Euskaltegi publiko eta pribatu homologatuentzako, euskaltegiko ikasleentzako
eta mundu zabaleko euskal etxeentzako diru-laguntza deialdiak egin ditugu
urtero. Ikasturte berri honetarako 30 miloi euro onartu ditugu dagoneko,
euskaltegien jarduera finantzatzeko eta ikasleentzat ikasprozesu eraginkorrak
sustatzeko.
Badakigu, ondo jakin ere, ez dagoela dena eginda. Badakigu badela zer
hobeturik. Gure erronka da, erakunde maila guztien arteko elkarlanaren bidez,
helduen euskalduntzeari behar besteko egonkortasuna ematea.
Bukatzera noa. Joan den 50 urteko ibilbideari jarraipena eman behar diogu,
merezi du eta. Orduan bezala, gaur ere, edozein adinetan ikasi daiteke
euskara, posiblea da eta positiboa.
Euskara ikastea ez da inoren kalte, norberaren eta beste guztion mesede
baizik. Euskara heldutan ikasteko pausua ematen duenak ekarpen eskerga
egiten dio bizikidetzari.

3. 3
Honenbestez, ba, ikasturte berria ilusioz eta profesionaltasunez hasteko opa
dizuet guztioi: HABEko lankideoi eta euskaltegietako lankideoi.
Seguru nago ikasturte arrakastatsua izango dela eta, iaz izan duzuen 33.000
herritarren kopuruak, jarraipena izan eta hazi izango dela. Itxaropen horrekin,
pozik eta poziktibity, hasiera ematen diogu helduen euskalduntzearen 2015-
2016 ikasturteari.
Mila esker guztioi.