7 last words bisaya

1. commentator: Palihug manindog
Commentator: Ang Ikaduhang Pulong:
“sultihan ko ikaw, karong adlawa mokoyug ka kanako
didto sa paraiso”
Kinutlo gikan sa ebanghelyo sumala ni San Lukas
(Lk. 23:39 – 43)
Unya usa sa mga criminal nga nagbitay didto mibugalbugal kaniya:
“dili ba ikaw man ang mesiyas? Luwasa ang imong kaugalingon ug kami!”.
Apan gibadlong siya sa iyang kauban nga nag-ingon, “wala kaba mahadlok
sa Dios? Kita nia dinhi gisilotan sa mao rang silot. Apan ang silot natong
duha angay kanato kay gisilotan man kita sibo sa atong nabuhat, apan siya
walay sala”. Ug miingon siya kang Jesus; “Jesus, hinumdumi ako kung
maghari ka na!” Miingon si Jesus kaniya, “sultihan ko ikaw, karong adlawa
mokuyog ka kanako didto sa paraiso.”
Ang ebanghelyo sa Ginoo.
Daygon Ikaw, O Kristo.
Commentator: Ang ikaduhang pulong pagabatbaton sa atong
igsoon nga si Brod. EMILIANO NOVO
Palihug manglingkod.

2. Magbabasa:
Ang Ikaduhang Pulong:
“sultihan ko ikaw, karong adlawa mokoyug ka kanako
didto sa paraiso”
Unsa may atong bation kon kita ingnan ni Jesus, “SULTIHAN KO
IKAW, KARONG ADLAWA MOKUYOG KA KANAKO DIDTO SA
PARAISO.” Kalipay ba? Kalibog? O Kaulaw? Kining tulo maoy natural nga
bation sa tawo apan tingale mas molabaw ang atong kaulaw tungod sa
atong dautang binuhatan nga gisuklian sa gugma ug gibaslan sa kayo nga
mao ang usa ka paraiso.
Apan, sa atong katilingban karon, pipila nalang ang adunay kaulaw
nga mobuhat ug kasal-anan. Kadaghanan dili na makonsensiya tungod sa
balikbalik nga pagpakasala. Ang uban dili na gani makaila unsay maayo ug
unsay dautan. Ang kaugalingong hilig ug kagustuhan mao nay basehan sa
ilang binuhatan. Ug, labi pang ngil-ad ug subo palandongon nga ang mga
dautang binuhatan nahimo nang normal ug gidawat sa katilingban. Sa
tanang ahensiyasa pangagamhanan ug bisan sa tanang hut-ong sa
katawhan kusog nga mikuyanap ang walay puas nga kurapsiyon,

3. pagpanlimbong, pagpahimulos sa mga kabus ug pagpanlupig sa mga
mahuyang.
Angayan pa bang moingon si Jesus kanato karon, “SULTIHAN KO
IKAW, KARONG ADLAWA MOKUYOG KA KANAKO DIDTO SA
PARAISO”? Takus ba kitang modawat sa iyang gidalit nga paraiso? Dili, dili
na gyud kita angayan ug dili gayud kita takus! Apan, sa waly duha-duha, si
Jesus moingon gihapon kanato, sama sa iyang gisulti sa kawatan nga
nagbitay sa krus, “SULTIHAN KO IKAW, KARONG ADLAWA MOKUYOG
KA KANAKO DIDTO SA PARAISO”. Siya moingon gihapon niini kanato
kun kita mapaubsanong moila sa atong pagkamakasasala, modawat sa
atong kahuyang ug moangkon sa atong mga limitasyon. Sama sa kawatan
nga nagpakita sa iyang hugot nga pagtuo kang Jesus ug nag-ila sa iyang
kaugalingon nga usa ka dakong makasasala nga angayan silotan, kita
usab may paglaum sa pagbag-o sa atong kinabuhi, bisan unsa pa kita ka
makasasala, ug mahimong makadawat usab sa iyang saad sa kaluwasan
nga nag-ingon, “SULTIHANKO IKAW,KARONG ADLAWA MOKUYOG KA
KANAKO DIDTO SA PARAISO.”
Pagkabulahan sa usa ka tawong makasasala nga makakuyog kang
Jesus didto sa paraiso! Dinhi atong masinati ang walay sukod nga gugma
ug kalooy sa Dios. Ang Dios dili magdumdom sa mga kasal-anan nga

4. nabuhat sa tawo kon siya adunay mapaubsanon ug mahinulsolon nga
kaugalingon, magbasol sa atong mga sala ug modangop ngadto sa Dios
diha sa Sakramento sa pagkumpisal, sigurado gayud nga si Jesus
moingon kanato pag-usab, “SULTIHAN KO IKAW, KARONG ADLAWA
MOKUYOG KA KANAKO DIDTO SA PARAISO.”
Kay unsa ba diay kining paraiso? Ang unang mosantop dayon nga
hulagway sa atong hunahuna mao ang balaang dapit, diin adunay
lunhawng tanaman nga nangalimyon sa daghang mga bulak, mga dagkong
kakahoyan nga taghom kasilongan ug puno sa mga maayong bunga, nga
nagkadaiyang kahayopan ug kalanggaman kansang mga huni daw
simponiya sa musika, mga tubod sa tin-awng tubig nga midagayday sa
mga kasapaan, kasubaan ug kadagatan nga puno sa nagkalainlaing mga
isda ug uban pang maanindot nga mga butang nga gihimo sa Dios alang
sa kabulahanan sa tawo. Pagkatahum paminawon sa usa ka pagdapit nga
nagkanayon, “SULTIHAN KO IKAW, KARONG ADLAWA MOKUYOG KA
KANAKO DIDTO SA PARAISO.”
Apan unsa may nahitabo sa paraiso nga gitugyan sa Dios kanato
dinhi sa kalibutan? Waly hunong ang pagpamutol sa atong mga
kakahoyan; ang atong mga kabukiran walay puas nga gipangbuldos sa
iresponsable nga pagmina; ang mga kahayopan ug kalanggaman

5. nangapuo na; ang mga tubod sa tin-awng tubig nangahanaw na; ug sama
sa dugong pula nga midagayday sa samad sa atong kabukiran, ang mga
lapok midaus-os ngadto sa atong mga kasubaan ug kadagatan nga
nahimong hinungdan sa pagnihit sa atong kaisdaan. Kini mao ang resulta
sa waly hunong nga pagpanamastamas sa atong kinaiyahan nga miguba
sa paraiso nga gimugna sa Dios dinhi sa kalibutan alang unta kanatong
tanan. Nan, unsaon pa man pag-ingon ni Jesus “SULTIHAN KO IKAW,
KARONG ADLAWA MOKUYOG KA KANAKO DIDTO SA PARAISO”?
Apan, adunay paraiso nga mas labaw pa kaanindot sa unsay atong
makita sa kalibutan ug kini atong makaplagan sulod sa atong kahiladman.
Kun biyaan ta ang atong mga kadautan, ug sama sa bulahang kawatan
magbag-o kita sa atong kinabuhi ug motuman sa kabubut-on sa Dios,
maangkon nato ang kalinaw, kalipay ug gugma nga maoy tuburan sa
tiunay nga panaghiusa, pagsinabtanay ug pag tinabangay. Kini mao ang
paraiso sa kahiladman diin kita dad-on sa atong Ginoo sa iyang pag-ingon,
“SULTIHAN KO IKAW, KARONG ADLAWA MOKUYOG KA KANAKO
DIDTO SA PARAISO”?
Gikan sa kahiladman sa tawo, modagayday usab kini ngadto sa
kalibutan pinaagi sa atong mga maayong binuhatan nga mahimong

6. magtambal sa nasamdan natong kinaiyahan. Kini sugdan na nato karon
kay tingali’g moabot ang adlaw nga wala na kitay panahon. Hinaut pa unta!
Song via audio visual presentation:
Commentator: Palihug mangluhod ug mosabat sa pag-ampo
Pag-ampo:
Amahan sa kalooy ug gugma, sud-onga kami nga nagasangpit
kanimo uban sa paglaum ug pagtoo. Gamaa dinhi kanamo ang
mapaubsanon ug mahinulsolon nga kasingkasing. Hatagi kami sa igong
grasya sa pag-ila sa among mga kalapasan nga maoy hinungdan sa
pagkaguba sa kinaiyahan. Tabangi kami sa pagkumpisal sa among mga
sala aron mabag-o ang among kinabuhi ug mamahimo kaming angayan
magpuyo sa paraiso uban ni Kristo nga among Ginoo.
Amen.
Commentator: Palihug manindog.