PAG-AMPO SA NOVENA ALANG SA PAGSAULOG SA KAPISTAHAN SA MAHAL NGA PATRONA: BIRHEN SA REGLA (NOVEMBER 12 - 20)

1. NOVENA SA MAHAL NGA BIRHEN SA REGLA
NUESTRA SEÑORA DE REGLA PARISH NATIONAL
SHRINE
LAPU-LAPU CITY (OPON), CEBU

2. PAG-AMPO SA MATAG ADLAW SA MAHAL
NGA BIRHEN SA REGLA
Hinumdoman mo, O maloloy-on uyamot nga
Birhen sa Regla, nga sukad wala pa gayud
mahitabo nga may usa nga midangop sa imong
panalipod, nangayo sa imong panabang ug
nagpakiluoy kanimo nga imong gitalikdan.
Nagdasig kami niining paglaum, nagadangop
kanimo, O ulay sa mga ulay, among Inahan. Ania
kami sa imong atubangan nagaluhod tungod sa
kabug-at sa among mga sala.
O Inahan sa Dios nga nagpakatawo, Ayaw
kawanga ang among mga pangamuyo, hinonoa,
pamati-a uban sa maayong kabubut-on ug ihatag
ang among gipangayo. Amen.

3. PAG-AMPO SA UNANG ADLAW
O Labing Santos nga Inahan sa Dios, tungod sa imong
kamaloloy-on giila ka nga Inahan sa mga katawhan, kalipay sa
mga masulob-on ug sudlanan sa matuod nga tinubdan sa
grasya nga mao si Jesus.
Ania kami atubangan sa imong milagrosang lawaran sa Regla
aron pag-ila nga ikaw mao ang among dalangpanan. Señora,
ipakita ang imong kalumo ug kaaghop kanamo nga nagpaila
nga imong mga Anak ug Debotos. Pangayoa sa Diosnong
mong Anak ang grasya alang sa among pagpangita sa
Gingharian sa Langit ug aron kami andam motuman ug
mosunod kaniya.
Dagkoti ug padilaaba ang kalayo sa imong Diosnon nga gugma
diha sa among mga kalag aron higugmaon ka namo sa tibuok
kasingkasing. Sa katapusan ipadangat kanamo ang ulosahong
kaayohan nga among pangayoon kanimo karong adlawa – kon
kini alang sa Himaya sa Dios ug sa kaayohan sa among kalag.
Amen.
(Mag-ampo sa hilom)
Maghimaya ka Maria… (3x)
Himaya sa Amahan…

4. MAG-AMPO KITA
O Maria, Ulay sa mga ulay, ania kami sa atubangan sa imong
milagrosa nga larawan sa Regla aron sa pagpadayag sa imong
kaputli. Among paningkamutan pagsangyaw ngadto sa tanang
katawhan nga ikaw mao ang sinugdan sa bag-ong panahon.
Ang arka nga gipili ug gipalingkawas gikan sa silot sa sala,
malinis nga salampati nga walay buling, tanaman nga
gipanalipdan gikan sa gahum ni satanas.
Ikaw, Matahum nga Lirio, taliwala sa katunokan sa kalibutan,
nga ulay ug walay buling sa sala. Pinili ka sa Dios gidayeg sa
mga anghel, gipasidunggan sa mga tawo ug gikahadlokan sa
yawa. Nagadayeg kami sa Dios tungod sa iyang paglingkawas
kanimo gikan sa sala, paghatag nimo kanamo nga lunlon
katahum ug hingpit nga kaputli.
Ikaw, nga labaw kaputli ug kasantos kay sa tanang mga
binuhat tungod sa pagbuot sa Dios, himoa usab nga putli ang
among mga kalag aron mahimong angayan sa mga mata sa
Dios ug mahimong takus nga magsud-ong kanimo sa kanunay
didto sa langit. Amen.

5. PAG-AMPO SA IKADUHANG ADLAW
O Rayna sa langit ug yuta, gipuno ka sa Dios sa tanang mga
kaayohan, pamatia pag-ayo ang among pag-ampo nga
mapaubsanon. Kon moatubang na unya kami sa hukmanan sa
Bugtong mong Anak nga among gipasipad-an O
makagagahum nga Rayna, sa imong kaluoy ug puangod
nagadangop kami kanimo.
Ingon nga dili mo dumtan ang tawo nga makasasala, dili usab
nimo talikdan ang tawo nga nagpakitabang kanimo. Pinaagi sa
maaghop mong mga kamot, kuhaa ang mga makasasala gikan
sa makalolooy nilang kahimtang, ug pangayoa alang kanila ang
pasaylo sa tanan nilang mga sala. Nadasig kami karon sa
pagsangpit kanimo, sangpita ang imong Anak nga Jesucristo,
nga dili unta kami niya talikdan ug itugyan ngadto sa gahum sa
panulay.
O tuburan sa Diosnong grasya ihatag kanamo nga imong
nanginahanglan nga mga anak ang mga kaayohan nga among
gipangayo karon kon kini alang sa Himaya sa Dios ug sa
kaayohan sa among mga kalag. Amen.
(Mag-ampo sa hilom)
Maghimaya ka Maria… (3x)
Himaya sa Amahan…

6. MAG-AMPO KITA
Matahum ug buotan nga Birhen sa pagpanamkon kanimo
labaw ka kaputli ug kasantos kay sa tanang mga anghel, ug
gipuno diha-diha dayon ang imong kalag sa mga grasya.
Tungod niini nalipay kami nga namalandong sa katahum ug
kahingpit nga gidayandayan kanimo sa Ginoo.
Busa nagaluhod kami atubang sa imong Santos nga larawan
sa Regla ug nagadayeg sa Dios sa kahitas-an tungod sa mga
grasya nga gihatag sa among kalag. Dawata, mapuangoron
nga Inahan, ang among diyutay nga halad, ug tabangi nga
mapuno ang among mga kalag sa langitnon mong mga hatag.
Kay gilinisan na man kami sa bunyag, ipadangat kanamo ang
grasya alang sa adlaw-adlaw namo nga pagbansay sa mga
Birtudes aron molambo kami diha sa kasantos ug modangat sa
Kahimayaan sa Langit diin didto among masud-ong uban sa
mga Angheles ang imong katahum. Amen.

7. PAG-AMPO SA IKATULONG ADLAW
Halangdon nga Rayna ug Senyora namo, nagasalig kami sa
imong kalooy ug kaaghop, ug nagahapa kami sa imong altar
aron himoon namo nga Langitnong Magtutudlo sa among mga
kalag. Tudloi kami pagtuman sa Santos nga mga sugo sa Dios
ug sa dalan sa katarong.
Lipaya usab ang among kasub-anan niining kinabuhi, kay ikaw
Santos nga Birhen mao man ang bug-os nga mananabang sa
lungsod nga Kristohanon ug gisaligan sa tibuok namong
kasingkasing. Tudloi kami sa imong dalaygon nga mga panig-
ingnan ug lig-ona sa grasya sa imong Anak, si Jesucristo, aron
makasunod kami sa imong Mahal nga mga Birtudes, ug
modangat kanamo ang mga kaayohan nga among gipangayo
karon kon angay sa Kahimayaan sa Dios ug sa kaayohan sa
among kalag. Amen.
(Mag-ampo sa hilom)
Maghimaya ka Maria… (3x)
Himaya sa Amahan…

8. MAG-AMPO KITA
O Maria Santos nga Bata ug Halangdon nga Rayna sa mga
Birtudes, sa gamay pa ikaw miadto ka kanunay sa Templo aron
pagsimba sa Dios. Ang imong kahingpitan, gidayeg sa mga
tawo ug sa mga Angheles, sama sa usa ka matahum nga
salingsing nga niturok gikan sa gamut ni Jesus, mitubo ikaw
ngadto sa hingpit nga kasantos ug kaputli alang sa imong
hinigugmang Anak.
Kami karon nagaluhod atubangan sa Santos mo nga larawan
sa Regla ug nagapasalamat sa Amahan tungod sa mga grasya
nga iyang gihatag kanamo pinaagi kanimo. Naglaum kami sa
imong Inahanon nga gugma ug nangamuyo nga ipadangat mo
kanamo ang hiyas sa pagpaubos ug pagtinguha kanunay sa
pagbuhat og maayo, aron sama kanimo magahalad kami sa
Ginoo sa among kasingkasing ug magsunod sa imong mga
Birtudes aron mahimo kaming takus pagtagamtam sa ganti sa
Dios didto sa langit. Amen.

9. PAG-AMPO SA IKA-UPAT NGA ADLAW
O Maria, Rayna sa Langit, sa imong matam-is nga ngalan nga
puno sa grasya ug sa mga Diosnong hatag, nangalisang ang
mga gahum sa impiyerno ug nangalipay ang mga katawhan.
Nasayod ka nga kami daghang mga pagsulay ug katalagman,
ug sa walay hunong gisulay sa yawa. Ayaw itugot,
Makagagahum nga Rayna, nga kon mosangpit kami sa imong
Santos nga ngalan uban sa maayo nga debosyon mabuntog
kami sa mga kaaway sa kalag.
Hinonoa, lig-ona ang among mga kasingkasing sa Diosnon nga
grasya, aron sa imong panabang makadaug kami sa mga
pagsulay sa yawa ug mabuntog ang iyang mga binuhatan. Ug
karon, kay milaum kanimo, nangamuyo kami nga ipadangat mo
kanamo ang mga kaayohan alang sa among mga kalag. Amen.
(Mag-ampo sa hilom)
Maghimaya ka Maria… (3x)
Himaya sa Amahan…

10. MAG-AMPO KITA
O Santos ug Putli nga Maria, Birhen nga labing mapaubsanon
ug labing halangdon, takus ikaw mahimong Inahan sa Dios
tungod sa hingpit mo nga pagkaandam modawat sa sinugo nga
langitnon ug tungod sa mapaubsanon mo nga pagtando sa
mensahe sa anghel.
Nagaluhod kami aron atubangon sa imong Santos nga larawan
sa Regla ug nangamuyo kanimo kay ikaw man ang labing
hingpit nga binuhat sa Dios. O nagdilaab nga kalayo sa
gugmang Diosnon, nagalaum kami sa gahum sa imong pagka-
inahan, ug naghangyo nga tultolan mo kami ngadto sa Diosnon
nga gipanamkon sa putli mong sabakan, pinaagi sa among
pagpasalamat sa Dios ug sa pagsubay sa iyang mga sugo.
Agaka kami diha sa pagtuman sa iyang kabubut-on ug
pagdawat uban sa maayong kabubut-on sa mga kagul-anan
nga iyang gihatag, aron among matuman dinhi sa yuta ang
iyang kabubut-on maingon nga gitahud kini ug gituman sa
langit. Amen.

11. PAG-AMPO SA IKA-LIMANG ADLAW
Birhen nga buotan uyamot ug dili mahubas ang mga tuburan sa
kaayo ug kalooy, kanimo gitugyan sa Dios ang iyang mga
grasya ug ang paglipay kanamo nga mga masulob-on nga
napuno sa kasal-anan ug gibug-atan sa tanang mga
kalisdanan.
Nagaluhod kami uban sa dakong pagpaubos, atubangan sa
imong hamili nga laraw sa Regla, ug nagadangop kanimo uban
sa dako ug tinuod nga paglaum. Nadawat mo gikan sa Dios
ang dili maisip nga mga grasya, dili lamang sa imong kaayohan
kon dili usab aron imo kaming tabangan sa among mga
panginahanglan.
Busa maloloy-on nga Inahan, ilingi mo kanamong mga
makasasala nga mga Anak ni Eva ang mapuangoron mong
mga mata. Kay ikaw man ang Inahan sa Ginoo, ihalad mo
kaniya ang among mga kasingkasing aron mahiusa kami
kaniya ug among maalagaran ug higumaon sa matuod.
Ipadangat kanamo, O Birhen nga Inahan, ang grasya nga
among gipangayo karon kon kini alang man sa Himaya sa
Dios, sa imong kadayganan ug sa kaayohan sa among mga
kalag. Amen.
(Mag-ampo sa hilom)
Maghimaya ka Maria… (3x)
Himaya sa Amahan…

12. MAG-AMPO KITA
Mapaubsanon Uyamot nga Birhen, buhi nga puloy-anan sa
Diosnong pulong, nagdali ka paglakaw ngadto sa kabukiran sa
Judea dala ang manluluwas diha sa imong sabakan, aron
pagduaw ug paglipay sa tigulang nga Inahan sa iyang
tigpahibalo si Juan Bautista.
Naulaw kami sa among daghang mga sala, maghinulsol kami
niini sa tibuok namong kasingkasing ug nagaluhod atubangan
sa imong kalumo, nangamuyo kami kanimo nga iampo mo
kami aron sama ni Juan Bautista ug sa iyang Inahan modangat
kanamo ang mga grasya sa kaluwasan.
Ipaambit usab kanamo ang mga kaayohan nga madawat ni
San Juan, aron uban sa dakong pagpaubos ug mainiton nga
gugma alagaran namo ang Dios dinhi sa yuta ug dayon unya
sa langit. Amen.

13. PAG-AMPO SA IKA-UNOM NGA ADLAW
Santisima Birhen Maria, Inahan sa matahum nga gugma, sa
Santos nga kahadlok ug sa matarong nga paglaum. Gipili ka
daan sa Dios aron mahimong dangpanan ug saliganan sa
tanan nga nagpakilooy sa imong pagkamatinabangon.
Tungod kay imo man kaming mga Anak, maloloy-ong Inahan,
midangop kami kanimo, nga tabangan mo kami. Ikaw ang
gilauman sa mga Kristiyanos ug agianan sa mga kalooy nga
Diosnon. Maloloy-on nga Señora, ipadangat kanamo ang
kalooy sa Dios, ang pasaylo sa among mga sala ug ang paglig-
on nga pagsaad sa dili na magpakasala pag-usab.
Itugot nga madawat namo ang among gipangayon karon kon
angay ugaling sa Himaya sa Dios ug kaayohan sa among mga
kalag. Amen.
(Mag-ampo sa hilom)
Maghimaya ka Maria… (3x)
Himaya sa Amahan…

14. MAG-AMPO KITA
Matam-is uyamot nga Maria, halad ka nga labing ulay sa
gugmang Diosnon. Tungod sa hingpit mo nga pagkaandam sa
Anak sa Dios nagpasalamat kami ngadto sa Dios, kinsa sa
dakong pagpaubos mibuot nga ikaw mahimong Inahan sa
iyang Anak.
Nagadayeg kami kanimo tungod sa imong mainitong tinguha sa
paghimugso sa Ginoo, ingon man usab sa bililhon mong mga
binuhatan ug sa halangdon mong mga hiyas nga imong
gibansay agig pangandam sa pagmatuto kaniya.
Ug usab, nagadayeg kami kanimo tungod sa mga grasya nga
gibubo sa Dios pagpahimugso mo sa iyang Anak. Nagaluhod
kami atubangan sa kahibulongan mong larawan sa Regla. Aron
pinaagi sa imong kaayo, ipadangat mo kanamo ang hiyas sa
pagkamapasalamaton sa langit.
Himoon ka namo nga mag-aagak sa tanan namong mga buhat
aron maandam kaming modawat sa mga bunga sa
pahanungdan sa among manunubos. Amen.

15. PAG-AMPO SA IKA-PITONG ADLAW
O Birhen nga putli ug walay buling manlalaban ka sa mga tawo
atubangan sa Dios. Ikaw ang ginikanan nga nakapawala gikan
sa kalibutan sa kasubo nga gidala ni eva. Ikaw usab ang
gihatagan sa Dios ug gahum pagpahid sa mga luha sa among
kalag.
Sa dakong kadasig ug lig-on nga paglaum mianhi kami aron
imong tabangan. O Inahan sa Dios, himoa nga mahimo kaming
takus modawat sa imong panabang. I-ampo ko kami O Señora,
kay sayod kami nga ikaw paminawon sa imong Anak.
Tabangi nga mapapas ang among mga sala ug maputli ang
among kalag sa mga kahugawan ug buling niini agaka, lig-ona
ug tudlo-i kami sa pagdayeg ug pagpasalamat sa Dios tungod
sa iyang kalooy kanamo. Labaw sa tanan, ipadangat kanamo
ang among gipangayo karon kon ugaling angay man kini sa
Kahimayaan sa Dios ug kaayohan sa among kalag. Amen.
(Mag-ampo sa hilom)
Maghimaya ka Maria… (3x)
Himaya sa Amahan…

16. MAG-AMPO KITA
O Santos nga Birhen, gidayeg kanunay ang imong kinabuhi
tungod sa ulosahong mga hiyas nga imong gihuptan. Nalipay
kaming nagsud-ong kanimo nga gidayandayanan sa mga hatag
nga langitnon, ug mabinantayon ug matinguhaon sa paghatag
kanamo ug panig-ingnan sa mga maayong buhat.
Ania kami atubangan sa halangdon mong larawan nga Regla,
naulaw tungod sa hakog nga mga tinguha ug pagpalabi-labi
nga naghari sa among kabubut-on. Naglaum kami sa imong
kaayo, O Santos uyamot nga Inahan sa Manunubos.
Nangamuyo kami kanimo nga ang among pagkamapaubsanon,
pagkamasinugtanon ug uban pang mga hiyas nga gipakita mo
didto sa Templo sa Mahal mong Anak.
Ipadangat kanamo aron kami makasubay sa dalan sa katarong
uban kanimo, ug makadangat sa kahimayaan sa langit. Amen.

17. PAG-AMPO SA IKA-WALONG ADLAW
Mahimayaon uyamot nga Birhen ug Inahan, saliganan ka ug
dalangpanan sa alaut nga mga makasasala. Tuburan ka nga
dili matiti sa mga grasya, ug masilaw nga bitoon sa kadagatan
nga abyan niining kinabuhi. Gidayeg ka sa tanang mga binuhat,
kay silang tanan modangop kanimo ug makadawat gayod sa
Diosnong kalooy.
Ayaw kami biyai hinoon lipaya. Nadasig sa inahanong mong
kaayo ug kamabination, midangop kami karon sa imong
atubangan aron pagdayeg ug paghimaya kanimo. Labaw ka sa
mga anghel sa himaya, sa mga Serafin sa gugma ug sa tanang
mga bulahan ug linalang sa langit sa mga hiyas.
Tabangi ang among mga kasingkasing nga magdilaab alang
lamang sa gugma sa Dios, mag-alagad ra kaniya ug
magdayeg, ug aron sa katapusan madawat namo ang
gipangayo karon – kon angay man sa kahimayaan sa Dios, sa
imong kadayganan ug sa kaayohan sa among kalag. Amen.
(Mag-ampo sa hilom)
Maghimaya ka Maria… (3x)
Himaya sa Amahan…

18. MAG-AMPO KITA
O mapuangoron Uyamot nga Birhen, bisan nag-ungaw ka sa
kamatayon apan wala ka mahadlok ug malisang ni maglikay
niini aron lamang mabuhi, kon dili gipaninguha mo lamang nga
matuman ang kabubut-on sa Dios.
Atubangan sa halangdon mong larawan nga Regla,
nangamuyo kami uban sa dakong pagpaubos ug paglaum,
ihatag kanamo ang maayo mong mga panig-ingnan ug mga
hiyas alang sa maayo nga kamatayon.
Aron tungod niini makahimo kami pagpanamilit ug pagtalikod
sa tanang mga butang nga kalibutanon, ug maandam kanunay
sa pagsangpit sa Dios, kay pinaagi sa pagsunod sa imong
kinabuhi ug kamatayon makaambit usab kami sa korona ug
ganti nga langitnon nga imong naangkon. Amen.

19. PAG-AMPO SA IKA-SIYAM NGA ADLAW
Halangdon nga Rayna sa kalangitan ug kayutaan, Inahan nga
mahigugmaon sa mga tawo, puno ka sa tumang grasya.
Kahayag ka nga katingalahan nga nagdilaab sa gugmang
Diosnon nga kanunayng nagsiga ug wala dag-a sa bisan
unsang kalibutanon nga tinguha.
Ikaw Birhen nga Mahinuklogon nga gibutang sa Dios nga daw
masigang bitoon, nga nagdan-ag ug maghayag sa mga tawo
nga anaa sa kangitngitan niining kinabuhia. Pamatia sa
maayong kabubut-on ang among mga pag-ampo.
O Balaan nga Señora, gilibotan kami sa mga kangitngitan.
Tungod niini, midangop kami kanimo ug nagluhod dinhi sa
imong halangdon nga atubangan. Nangamuyo kami sa
kinasingkasing nga ipadangat mo kanamo ang kahayg aron
makaila kami sa among mga sala ug makadawat sa grasya sa
paghinulsol kanila.
Sa ingon mahayagan ang among salabotan ug maglig-on ang
among kabubut-on, ug higugmaon namo ang Dios labaw sa
tanan ug siya lamang ang alagaran. Ipadangat usab kanamo
ang gipangayo karong adlawa kon angay man ugaling sa
Himaya sa Dios, sa imong kadayganan ug sa kaayohan sa
among mga kalag. Amen.
(Mag-ampo sa hilom)
Maghimaya ka Maria… (3x)
Himaya sa Amahan…

20. MAG-AMPO KITA
Mabination nga Rayna, Birhen nga Mahimayaon, gihimo ka sa
Dios nga Señora sa langit ug sa yuta. Ang imong Himaya,
kaayo ug katahum labaw kamasilakon ug dalaygon sa mga
anghel; matahum ka labaw sa tanang butang ug masiga pa sa
adlaw.
Nagapasalamat kami sa Dios kay giluwas ang imong lawas sa
pagkadunot, ug gituboy ka sa imong Anak ngadto sa
kahimayaan sa pagkorona kanimo nga Rayna sa Langit ug sa
Yuta. Nagaluhod kami karon nga mapaubsanon sa hamili mong
atubangan ug maanyag mong larawan nga Regla, ug
nangamuyo kanimo, Inahan sa Kalooy: gikan sa mahimayaon
mong kahimtang ihatag kanamong mga alaut ug makalolooy
ang kalipay.
Inahan nga Mapuangoron, labani ug panalipdi kami sa imong
gahum batok sa among mga kaaway. Sa katapusan, ipaangkon
kanamo ang mga grasya ug mga kaayohan nga among
gipangayo kanamo niining Novena, aron mahimo kaming takus
atubangan sa Dios ug sa kaluahian among matagamtam ang
korona ug kalipay sa walay katapusang kabulahan sa langit.
Amen.

21. GOZOS SA MAHAL NGA BIRHEN SA REGLA
FR. GERARD TRIENEKENS, MSC
Refrain:
Birhen nga Santos sa Regla,
Sa kaluoy ka ginikanan,
Sa kaluoy ka ginikanan;
Sa nga tanan nga kadautan,
Imo kaming panlabanan. (2x)
I.
Sa Dios ka piniling daan
sukad sa walay sinugdan
Gihimo ka nga katingad-an
kang Adan nga kaliwatan
Kay sa ilang kasal-anan,
gigawas ka nga bulahan
Kay sa ilang kasal-anan,
gigawas ka nga bulahan.
(Repeat Refrain 2x)
II.
Maria, ikaw ang gilauman ug
maglig-ong dalangpanan.
Bituon sa kadagatan, sa
magsasakay dunggoanan.
Himaya sa kalibutan,
paraisong binulakan!
Himaya sa kalibutan,
paraisong binulakan!
(Repeat Refrain 2x)
III.
Maanyag ka nga walay
ingon.
Matahum bisan maitum.
Saliganan nga malig-on sa
nga tanan pangayoon.
Busa sa mga kaayohan, Imo
kaming panhatagan.
Busa sa mga kaayohan, Imo
kaming panhatagan.
Busa sa mga kaayohan, Imo
kaming panhatagan.
(Repeat Refrain 2x)