1. COMMENTATOR: Ang atong IKAUNOM NGA PULONG: “ NATAPOS NA.”
KINUTLO GIKAN SA EBANGHELYO SUMALA NI SAN JUAN (Jn. 19:29-30)
Didto may usa ka panaksan nga puno sa suka, ug nagtunlob silag espongha
sa suka ug gibutang sa usa ka sanga sa isopo, ug giisa nila kini ngadto sa iyang
baba. Human makatilaw si Hesus sa suka, miingon siya, “Natapos na!” Unya
miduko siya ug namatay.
Ang Ebanghelyo sa Ginoo.
Response: (Daygon Ikaw, O Kristo)
COMMENTATOR: Palihog manglingkod. Ang atong unang pulong
pagabatbaton sa atong igsoon nga si Rey Illana.
PAMALANDONG:
(Basahon kita sa kompas ug makusog nga tingog. Paningkamutan ang pagbasa nga magagikan gayod
sa kaugalingong kasingkasing nga puno sa kahulogan.)
“NATAPOS NA!” Kini usa ka matahom nga pulong nga sagad ibungat sa
mga tawong nagbudlay diha sa kahago ug paningkamot. Pagkatam-is niini nga
pulong litokon alang sa usa ka mamumuno human sa iyang kakapoy sa tibuok
adlaw nga pagtrabaho. Pagkaanindot ibungat niini nga pulong alang sa mga
ginikanan nga nagsud-ong sa ilang mga anak nga mipaso na sa graduation.
“NATAPOS NA!”
Kini mao ang pulong sa kalamposan nga mahimayaong gipadayag sa mga
tawong nagtuman sa ilang responsibilidad kansang tumong ug misyon sa kinabuhi
ilang gipuy-an. “NATAPOS NA!”
Nan, unsa bay misyon ug tumong sa atong kinabuhi? Angay gayod natong
susihon ug palandongon kung unsa bay tumong sa atong kinabuhi. Nakaamgo na
ba kita kung unsay katuyuan nganong gipakatawo kita niining kalibutana?
Nakaplagan na ba nato ang misyon sa kinabuhi nga angay natong tumanon?
Mga igsoon, kung wala pa nato nahibaloan ang atong katuyoan ug misyon,
ang atong kinabuhi dili gayod magmakahuloganon. Bisan unsay atong buhaton,
2. ang atong mga pagbudlay ug mga kahago mahimong taphaw lamang ug walay
hinungdan kay wala man kini’y padulngan. Ang tawo, kansang kinabuhi walay
tumong ug direksyon, dili gayud makasulti niini nga pulong: “NATAPOS NA!”
Sukad pa sa sinugdan, si Hesus nahibalo nang daan sa katuyoan nganong
gipahimugso Siya niining kalibutana. Ang kahulugan sa mismo sa Iyang pangalan
nga gihatag sa anghel nagpadayag niini: “Nganli Siyag Hesus kay luwason Niya
ang katawhan gikan sa ilang kasal-anan” (Mat. 1:21). Sa makadaghang higayon,
si Hesus nagpahimangno nang daan ngadto sa Iyang mga tinun-an sa unsay
Iyang dangatan: “Ang anak sa Tawo kinahanglan nga mag-antos pag-ayo ug
isalikway sa mga punoan sa mga Hudeo..., patyon Siya ug banhawon sa ikatulo
ka adlaw” (Lk. 9:22). Tataw kaayo ang misyon sa atong Ginoong Hesukristo ug
uban sa dakong gugma kanatong tanan, didto sa krus Iya kining gituman. Busa,
Siya nakaingon, “NATAPOS NA!”
NATAPOS NA ang panghimayad sa mga sala. NATAPOS NA ang paghalad
sa putli ug bugtong sakripisyo nga nakapahimuot sa Dios Amahan. NATAPOS NA
ang pagtugyan sa Iyang lawas ug pag-upa sa Iyang dugo alang sa kaluwasan sa
tanang katawhan. NATAPOS NA ang paglugtas sa tanikala sa kamatayon. Ang
nating Kordero sa Dios nga nagawagtang sa mga sala sa kalibutan giihaw na ug,
busa, ang buhat sa kaluwasan “NATAPOS NA!”
Nan unsa may atong ikabalos Kaniya? Unsa may atong ikabalos sa Dios
Amahan nga, tungod sa Iyang walay kinutubang gugma kanato, :Gihatag Niya
ang Iyang bugtong Anak, aron ang tanan nga motuo Kaniya dili malaglag” (Jn.
3:16)? Unsa may gipangayo sa Dios kanato nga kung atong buhaton makaingon
usab kita uban ni Hesus, “NATAPOS NA!”?
Usa ka adlaw sa kinabuhi ni Hesus, ang katawhan nangutana Kaniya: “Unsa
may among buhaton aron pagtuman sa mga ipabuhat sa Dios?” Si Hesus
mitubag, “Ang buluhaton nga ipabuhat sa Dios kaninyo mao nga motuo kamo sa
Iyang gipadala” (Jn. 6:28-29).
3. PAGTUO,mga igsoon.Ang atong PAGTUO sa Anak sa Dios maoy bugtong
gipangayo sa Dios kanato! Ato ba kining nahatag? Ato ba kining natuman?
Makaingon ba kita sa kasingkasing gayud atubangan sa Dios nga “Oo. Ginoo,
mituo ako Kanimo!”?
“NATAPOS NA!”
Apan dili dinhi natapos ang atong PAGTUO. Dili paigo ang pag-ingon
lamang nga “Mituo ako!” Si Santiago nagkanayon, “Unsay kapuslanan kon ang
usa ka tawo moingon nga siya may pagtuo apan walay maayong binuhatan?
Makaluwas ba kaniya ang iyang pagtuo? Dili gayod! Pananglit may mga
kaigsonan nga nagkinahanglan ug bisti ug walay igong pagkaon, magpulos ang
inyong pag-ingon kanila, ‘Panalanginan unta kamo sa Dios! Pagsinina kamo ug
kaog maayo!’ – kon dili ninyo sila hatagan sa ilang gikinahanglan? Ingon niini ang
pagtuo: “patay kini kon dili ubanan sa buhat”
Buhing PAGTUO ang gipangayo sa Dios kanato. Pinaagi lamang sa atong
maayong binuhatan, kita makahatag ug kinabuhi sa atong PAGTUO. Pinaagi
lamang sa atong konkretong binuhatan, kita makatuman sa atong PAGTUO ug
mahimong takus sa pag-ingon , “NATAPOS NA!”
Subo palandungon nga sa atong katilingban karon, pagkadaghang pasalig
nga wala matuman, pagkadaghang proyekto nga wala mahuman, pagkadaghang
balaod nga wala masunod, pagkadaghang plano nga wala matinuod ug
pagkadaghan sa tahas ug responsibilidad nga gayud mabuhat. Unsaon man nato
sa pag-ingon, “NATAPOS NA!”?
Kita nga mituo sa Dios ug sa atong Ginoong Hesukristo, kita nga pinaagi sa
bunyag nakadawat sa kaluwasan nga gidaog ni Hesus ngadto didto sa krus, kita
nga mga Kristiyanos, mamahimo unta kitang matinud-anong saksi sa BUHING
PAGTUO ug maglakaw subay sa Dalan, Kamatuoran ug Kinabuhi, aron tapos
nato mapuy-i ang atong tagsatagsa ka misyon sa kinabuhi dinhi sa kalibutan,
moatubang kita sa DIOS, ang Maghuhukom sa tanan, ug moingon kita Kaniya:
“NATAPOS NA!”
4. Si Hesus nga atong Manunubos mahinangpon usab nga mosugat unya
kanato uban sa mainitong pagdapit sa pag-ingon: “Duol kamo nga gipanalanginan
sa akong Amahan ug dawata ninyo ang Gingharian nga giandam alang kaninyo
sukad pa sa pagbuhat sa kalibutan” (Mt. 25:34).
“NATAPOS NA!”
REFLECTION SONG via audio-visual presentation
COMMENTATOR:
PAG-AMPO:
Mag-ampo Kita: (Mohilom sa makadyot)
Amahan sa among Manunubos tabangi kami nga magmatinud-anon ug
magmalahotayon sa among pagsaksi kanimo diha sa buhing pagtuo. Himoa nga
makatuman kami sa among misyon pinaagi sa pagbuhat sa unsay angay buhaton
sumala sa imong kabubut-on. Hinaut nga, human sa among paglawig niining
kinabuhia makaabot kami sa Imong gingharian uban ni Kristo nga among Ginoo.
Amen.
