2. DAFTAR ISI
1. AKU AREP SINAU ……………………………………………………………… 1
2. YOGJA MENCUTAKE ATI ……………………………………………………. 2
3. SUWUNG ………………………………………………………………………….. 3
4. KASETYAN ………………………………………………………………………... 4
5. CRITA ESUK ……………………………………………………………………… 5
6. CRITA LAWAS …………………………………………………………………… 6
7. OBONG-OBONG KERTAS LAWAS ………………………………………… 7
8. SERTIFIKASI ……………………………………………………………………… 8
9. KATRESNAN SEJATI ……………………………………………………………. 9
10. PITUTURE WONG TUWA ……………………………………………………. 10
11. ANGIN APA KUWI ………………………………………………………………. 11
12. GURUKU ……………………………………………………………………………. 12
13. NGALAM DONYA ………………………………………………………………… 13
14. TAUN 2015 ………………………………………………………………………… 14
15. PANCEN …………………………………………………………………………….. 15
16. AJA NGAPUSI ……………………………………………………………………… 16
17. TETESING EMBUN ……………………………………………………………….. 17
18. ANA ING PANTAI KLAYAR …………………………………………………….. 18
19. KOWE YA JAWA …………………………………………………………………… 19
20. LINGSIR WENGI .…………………………………………………………………. 20
BIODATA PENULIS ……………………………………………………………………………… 21
3. AKU AREP SINAU
dening: Amin Hartitik
Aku arep sinau luwih anteng,
katimbang luwih akeh omong…
Aku arep sinau sabar,
Katimbang ngumbar kanepson…
Aku arep sinau ngalah,
saka sifat gumunggung…
Aku arep sinau mesem,
saka rasa sedhih…
…..Urip kanggo sinau…..
Sinau iklash sanajan ora rila…
Sinau sregep, sanajan abot…
Sinau tepa salira, sanajan ora padha …
Sinau tresna, sanajan kelara-lara
Sinau tentrem, sanajan kuwi goreh…
Sinau percaya, sanajan kuwi pacoban…
….aku kudu sinau….
Amarga ora sateruse urip kuwi kepenak….
4. YOGJA MENCUTAKE ATI
dening: Amin Hartitik
Yogja mencutake….
Kaya mangkono pangucapmu marang aku
Ing plataran pawiyatan luhur Karangmalang…
Ya…pancen mencutake tenan,
Mangkono sing banget takrasakake.
Yogja kang mencutake…
Pancen kuwat pepenginanku bali ing kutha kuwi.
Padha karo kangenmu marang Yogja
Yogja pancen mencutake…
Nalika wulan ndadari ing plataran panggung balet Ramayana…
Penari kang luwes lan obahing badan nengsemake.
Yogja mencutake…
Ing Tugu, ing Malioboro lan ing saben pojokan-pojokan kutha,
Karo mangan mie ayam lan angete wedang rondhe…
Yogja mencutake ing kampus-kampus….
Yogja mencutake ing masjid-masjid….
Yogja…
Kowe…
Aku…
Tresna…
5. SUWUNG
dening: Amin Hartitik
tawang ngglanthang
ati ngathang-athang
----- saumpama bisa mesem sithik wae langit ambyor udan lintang----
nek uluk salam keslametan wae wis ra digape,
apa maneh arep crita ngudharasa?
dudu slirane sakbenere, nanging wong liya sing ora nate
tak kenal, sanajan blegere pawujudanmu kang bagus,
aku dadi kaya cecak kang kepingin ngunthal setlika,
tangeh lamun....................................
sanajan slirane cedhak, amung sak lumpatan paribasane,
ananging katon adoh tan bisa kinira
wis cukup semene,
anggonku nggoleki cuwilan crita sing nate kosuwek,
: sak nyatane kabeh amung lamis, ora tumus saka punjere ati
mugi Gusti Allah, bisaa maringi dalan padhang,
lan ngapura kabeh kaluputanmu....
6. KASETYAN
dening: Amin Hartitik
sliramu apa lali
nalika tangan iki ngrukep
ngekepi cuilan atimu sing kadhung
mbok buwang ing pinggire kedung
tak jumputi, trus tak simpen
nganti seprene...
ngarep-ngarep sliramu
teka nakokake, syukur-syukur njaluk bali
kaya sing kawuri,
mangertiya,
aku isih setya tuhu
njaga lan ngemani atimu...
sliramu apa lali
nalika tangan iki ngrukep
ngekepi cuilan atimu sing kadhung
mbok buwang ing pinggire kedung
tak jumputi, trus tak simpen
nganti seprene...
ngarep-ngarep sliramu
teka nakokake, syukur-syukur njaluk bali
kaya sing kawuri,
___________ pecut wis diseblakake,
barang kebacut diapakne___________
mangertiya,
aku isih setya tuhu…
7. CRITA ESUK
dening:Amin Hartitik
esuk-esuk ana sing ngomongne
kangen, cinta-cintaan, sepi,
ana sing ngomongne mati,
neng tipi, beritane padha wae,
mung korupsi, napi kabur,
pejabat kesandhung kasus,
narkoba,
wis pokoke macem-macemlah...
lha sing marahi sepet,
neng ati judheg,
berasku entek,
pedaringan kosong mlompong,
brambang bawang gari siji,
uyahe blas,
apamaneh lombok, trasi...
endhog dadi barang aji,
daging pitik apa sapi dadi ngimpi...
bocah cilik wis ra seneng ngaji,
sedina-dina neng ngarep tipi,
upin-ipin dadi idola,
spongebob dadi kanca setya,
wis, ora sah nggagas apa-apa ,
wis ben sing seneng korupsi,
wis ben sing kecekel pulisi,
wis ben sing lagi kangen-kangenan,
wis ben sing lagi cinta-cintaan,
uripku dudu uripmu,
sik taknyambut gawe dhisik,
oleh sithik sing penting mberkahi,
ora mlebu bui,
tanpa korupsi…
8. CRITA LAWAS
dening: Amin Hartitik
kesrimpret kesandhung
niba tangi jangkahku
mecaki lurung kang dawa
nyenyet, tanpa rowang...
nggawa obore ati
sing meh mati, liyap-liyep kagodha angin sore,
ing poncotaning lurung,
durung mesti yen sliramu mapagi aku
nggegemi astaku,
lumaku bareng tekan tikungan marga,
guyon cekikikan, njiwit ati kasmaran,
nanging ora,
kuwi wis meh saumure anakmu wedok,
mestine sliramu ya wis lali,
prasetya luntur kagerus mangsa,
dudu salahmu, saumpama sliramu lali,
crita lawas,
aku sliramu lan sore
mecaki lurung dawa,
sak dalan-dalan amung seneng,
gegojekan, ngguyu cekikikan,
dhuh….!
9. dening: Amin Hartitik
Obong-obong kertas lawas,
isine kebak pangarep
lan crita asmara kepungkur
wis ora isa dibusak,
nulismu ngganggo mangsi cina,
ora bisa luntur, ora bisa ilang,
garit-garit alus swarane,
tharik-tharik aksarane,
mumbungi ati sing nate kasmaran,
kayaa tan ana liyane....
obong-obong kertas lawas,
nggigit nyuwak ati kang nate tatu,
ati enomku
biyen,
nalika aku lan kowe,
isih wani isin, ngempet rasa ing telenging ati,
tan wani ngomong,
amung nulisi kertas iki,
sesambungan, ganti ginanti,
aksaramu mentes, cetha yen kowe ya tresna,
aksaraku mandhes, nancep neng njero rasamu
biyen,
sadawane dalan,
tanganku tanganmu ora nate pisahan !
obong-obong kertas lawas,
yen iki pancen wis titi wancine,
: aku, kowe duwe panguripan dhewe
_____obong-obong kertas lawas,
isine layangmu, critamu, gambarmu, tresnamu_____
10. SERTIFIKASI
dening: Amin Hartitik
Sertifikasi, sertifikasi….
Saben uwong wis padha krungu
Apa maneh ana ing kalangan guru
Nanging…
Kanthi sertifikasi mau
Apa bocah-bocah banjur mituhu
Ora wani marang Guru
Mugiya kanthi sertifikasi iki…
Para siswa tambah bekti
Sinau ana sekolahan kang mligi
Mantep, karep sajroning ati….
Kanthi sertifikasi …
Para guru ana kang ndhaftar haji
Uga akeh kang tuku Mersi
Nanging kang utama
Kanthi sertifikasi …
Para siswa tambah prestasi
Lan bekti marang Ibu Pertiwi
Lan marang kang gawe urip pati…
11. KATRESNAN SEJATI
dening: Amin Hartitik
Godhong-godhong garing
Kumleyang katiyup angin
Kentir kagawa ilining banyu kali kang bening
Agawe gumregah rasa tresnaku iki yen eling
Eling marang salam kangenmu…
Wengi iki udan nganyari bumi
Thathit nyamber pertiwi kang loh jinawi
Lintang-lintang terang padha mati
Wis ora ana para jalma slira-sliri
Wengi iki sepi, sepi, lan saya sepi
Atiku tansaya dhuhkita ing sepine wengi iki
Ra krasa luh tumetes ing pipi
Kelingan marang janji-janji kang diucap lathi
Janji-janji Arjuna kang suci
Rinakit ukara-ukara tresna kang edi
Ing serat-serat tresna sejati…
12. PITUTURE WONG TUWA
dening: Amin Hartitik
Pasar iki isih urip kaya wingi
Nanging wis ora kaya mbiyen maneh
Dipangan wektu kang tansah lumaku
Kumandhange ilang musna
Oncat melu jaman…
Banyu bengawan iki anteng iline
Nanging wis koncatan kedhung
Jerone bisa dijajagi dening rasa
Wis ora wening sinawang…
Garising Gusti kabeh wis mesthi
Garising kodrat jalma tan bisa oncat
Nggatekake pituture wong tuwa…
Yen nandur ngundhuh…
Utang bakal mbalekake…
Melik nggendhong lali…
Bakale ngundhuh wohing pakarti….
13. ANGIN APA KUWI
dening: Amin Hartitik
Kaya kesokan banyu panas
Mlocot atiku…
Mencolot kabeh-kabeh kasenenganku
Sakala ambyar ing dhuwur langit
Ilang sajroning pepedhut
Udhar talining rasa
Nggawa raga dikempit dhemit
Dhuh Gusti….
Angin apa kuwi kok kebat
Nyebabake awak mati sagenggeming urip
Kabeh-kabeh kudu waspada
Ati-ati….
Aja melu nduweni
Aja ngrasuki
Merga ati kang suci mau
Mungsuhe lathi iblis
Kang landhep kaya pedhang lan welat tipis…
14. GURUKU
dening: Amin Hartitik
Biyen…
Jare digugu lan ditiru
Ana sing lugu lan kuru
Sapa gelem amung mituhu….
Biyen…
Sakabehing ujarmu dadi idu geni
Guyumu njalari leganing ati
Nanging gajimu ora ngregani
Iklash lan pasrah marang Gusti
Saiki…
Sertifikasi iku sing dadi premati
Aku ora selak iku pancen mupangati
Bisa gawe mukti lan munggah kaji
Kanggo sangu sowan marang Gusti
Nanging…
Sapa bisa nagih sakabehing janji
Aku dhewe uga ora ngerti…
15. NGALAM DONYA
dening: Amin Hartitik
Wong ala padha ngegla
Wong becik padha siningkir
Kuwi kasunyatane
Pejabat ala ilang gapite
Iku bebasane
Merga kesusu muluk barang kang melik
Dhuh Gusti…
Manungsa wis padha ngenut karep udele dhewe
Becik ketitik ala ketara ora percaya
Rawe-rawe rantas malang-malang putung iku sesantine
Sing gedhe …. ngadigang ngadigung gadiguna
Sing cilik …. mung pasrah narima
Jane iki donya apa neraka
Kok padha panase, padha isine
Ora ana bedane…
Sejatine aruming asma bakal teka
Yen mlaku nganggo teken kanthi tekun
Saguh ngutamakake kang utama
Lan bisa manunggaling jiwa raga
Ya mangunggaling rasa…
16. TAUN 2015
dening: Amin Hartitik
Esuk sawise wengi kang cinipta
Ana kang kudu kopateni
Wewayangan saka wong kang kopundhi-pundhi
Ngreridhu ati…
Dadi tali kang nyrimpeti laku
Dadi racun kang memateni pikir
Anggonmu bengak-bengok ngempet larane ati
Prasasat sundhul langit, tekan pucuking jagad
Ananging ora ana kang maelu
Esuk sawise wengi kang cinipta
Srengenge bakal sumunar
Giligna tekadmu, banterna playumu
Senadyan abot aja pisan-pisan noleh menyang mburi
Ya ing kene pandadarane urip
Nggoleki apa kang kudu disauri
Marang dhiri pribadi
Sakwise wingi dina-dina kang lumaku
Kang banget kokgethingi…
17. PANCEN
Dening: Amin Hartitik
Aku iki pancen wong ora duwe,
nanging aku dudu kere…
Aku iki pancen wong ala rupane,
nanging aku dudu wong duraka…
Aku iki pancen wong cilik,
Nanging aku dudu wong lurik…
Aku iki pancen bodho,
Nanging aku dudu wong kodo…
Aku iki pancen wong kasar…
Nanging aku dudu wong nyasar….
Gusti Allah wis pirsa…
Kabeh kang gumelar ing jagad raya
Ora mung kang kasat mata dalasan ing atining manungsa
Ing cipta, rasa, lan karsa priyangga
Ing kene…
Ing kana…
Ing ngendi-endi…
Mula kuwi den ati-ati
Yen wus tekan titi wanci
Kabeh bakal diadili
Gusti Allah Maha Suci
Bakal miyak sakabehing wewadi….
18. AJA SENENG NGAPUSI…
dening: Amin Hartitik
Kahanan samangko ora ngilangake wektu semana
Banyu mili ora bakal bali
Panjalukku ora mesthi kedadeyan
Nelangsa ati iki
Sanadyan ndonya mangerteni
Ananging ati ora bisa ngapusi
Aja ngapusi!
Mreneya neng cedhakku
Cekelen ati iki, tansah tangis kang mili-mili
Ananging…
Aku mangerteni tangis iki ora ana ajine
Mreneya, dakrungokake kekarepanmu
Aku tansaya tresna sliramu
Sanadyan lara kanggone atiku…
Aja ora isa ngapusi!
Nutupi tresnaku iki …
19. TETESING EMBUN
dening: Amin Hartitik
Tetesing embun
Ndadekake ati ngalamun
Marakake getun
Kalamun-lamun
Nalika aku menyang stasiun
Wayah esuk umun-umun
Taksawang ing stasiun
Penumpang kang padha mudhun
Nanging sawise padha mudhun
Sliramu ora mudhun
Aku ya gumun
Kamangka sliramu
Wis lunga mataun-taun
Banjur aku mung getun
Kaya dene ngenteni tetesing embun…
20. ANA ING PANTAI KLAYAR
dening: Amin Hartitik
Ana ing Pantai Klayar Pacitan
Atiku nyawang awang-awang
Nembus lintang ing angkasa
Piye bisane nyunari
Sa-isine bumi
Atiku … amung mamang
Ana ing Pantai Klayar pacitan
Aku amung bisa nyenyuwun
Mugiya jembare segara
Bisa nguripi kabeh warga
Ana ing Pangtai Klayar Pacitan
Mugiya aku bisa ngapura
Kaya dene jembare segara
Gusti Allah mugi pirsa…
21. APA KOWE YA JAWA
dening: Amin Hartitik
Aku tansaya dilalekake
Ya amarga kemajuane jaman
Jamane saya lumaku
Aku saya ditinggal…
Aku iki ya basamu
Aku iki ya budayamu
Tega-tegane aku kok pendhem
Mendheme ora semeter rong meter
Nganti bocah cilik wae ora ngerti sira…
Apa maneh tutuk lan rikma
Ngakune aku iki duwekmu
Apa ngenteni aku dipupu Negara manca?
He wong Jawa…
Piwelingku
Bisaa rumangsa yen aku iki duwekmu
Aja mung bisa rumangsa nduweni…
22. LINGSIR WENGI
Dening: Amin Hartitik
Angger wengi wis teka
Sepi jalma neng ngarep netra
Kelingan sing ora-ora
Antarane bayangan lan kasunyatan
Ora bisa dipisahake
Mulane akeh wong kang padha seje
Karo sing dibayangake lan dikarepake
Angger wis kaya ngene
Malik grembyang jagade
Akeh wong kang nguwisi uripe
Kanthi dalan kang ora diparengake
Mulane sapa wae kang ora bisa turu
Yen wis lingsir wengi
Padhaa gregah sholat wengi
Ngilangake rubeting ati….
23. BIODATA PENULIS
Nama : Amin Hartitik, S.Pd.
NIP : 19721101 200701 2 006
Nama Sekolah : SMP Negeri 1 Karanganyar
Jabatan/Gol : Penata / III c
Guru : Mulok Bahasa Jawa
Rumah : Tegalasri Rt 03 Rw VI
Bejen Karanganyar
No Hp : 081 329 395 625
21