Malaki ang bahaging ginagampanan ng heorapiya mula pa sa sinaunang panahon hanggang sa kasalukuyan. Ang idinikta ng katangiang pisikal ng lugar kung saan nanirahan ang mga sinaunang tao ang humubog sa kanilang pamumuhay. Bagama't hindi maitatangging nagdulot din ang heograpiya ng mapanghamong sitwasyon sa buhay ng sinaunang tao, malaki pa rin ang epekto nito sa pagkakaroon ng maayos na pamumuhay.Nagsimula ang salitang heograpiya sa wikang Griyego na geo o daigdig at graphia o paglalarawan. Samakatuwid, ang heograpiya ay tumutukoy sa siyentipikong pag-aaral ng katangiang pisikal ng daigdig. Ang pag-aaral ay sumasaklaw sa mga anyong lupa, anyong tubig, klima at panahon, likas na yaman, flora, fauna at distribusyon/ interaksyon ng tao at iba pang organismo sa kapaligiran nito.