1. O S. N. DE CCOO DE GALICIA, UGT-GALICIA e USO-GALICIA
CONTRA A REFORMA DA CONSTITUCIÓN
E POLA CONVOCATORIA DUN REFERENDO
UGT-Galicia, o S. N. de CCOO de Galicia e USO Galicia acordan manifestar
publicamente o seu rexeitamento á proposta de reforma da Constitución
española elaborada polos responsables dos grupos parlamentarios do PSOE e
do PP, pedirlles aos deputados e senadores de todos os grupos parlamentarios
que non a voten favorablemente e que, no caso de que a proposta fose
aprobada, se convoque un referendo para a súa ratificación.
Consideramos que, polo seu contido e polos seus prazos de aplicación, esta
reforma non vai axudar á redución dos niveis actuais de déficit público que só
pode lograrse sen deteriorar gravemente o tecido económico e social do noso
país mediante a promoción do crecemento económico e o emprego, unha
reforma fiscal equitativa e progresiva e un permanente rigor no uso do gasto
público.
Ao mesmo tempo, impón unha grave limitación á autonomía dos gobernos
democráticos e á capacidade de autogoberno orzamentario das diferentes
administracións públicas. Isto afectará gravemente á súa capacidade de utilizar
a política orzamentaria ao servizo dos obxectivos da política xeral.
Supostamente motivada polos ataques especulativos ás débedas soberanas, a
reforma introduce na nosa máxima norma xurídica un factor económico de
carácter netamente procíclico que pode chegar a impedir a acción dos
gobernos para que a nosa economía non entre, no futuro, nunha recesión.
Constitúe tamén unha ameaza permanente para as prestacións e institucións
do Estado de benestar, as políticas sociais e a cooperación para o
desenvolvemento.
Se o contido é rexeitable, o procedemento que se vai adoptar para a súa
aprobación é inaceptable: vaise producir coa lexislatura esgotada, anúnciase
en pleno período de vacacións, quérese aprobar definitivamente transcorridos
só quince días desde que o presidente do Goberno a propuxera o 23 de
agosto, quérese realizar sen debate político nin social de ningunha clase e,
finalmente, sen que a reforma sexa sometida a referendo.
Por todo iso, e tendo en conta que o seu contido —a constitucionalización da
obriga de equilibrio orzamentario e límite da débeda nas contas das
administracións públicas— é unha opción ideolóxica e política que, ademais de
ser errónea e inútil, ten un carácter marcadamente conservador, podemos
afirmar que esta reforma rompe o consenso constitucional sobre o que se
baseou a elaboración da nosa Carta Magna.
CONTRA A REFORMA DA CONSTITUCIÓN E POLA CONVOCATORIA DUN REFERENDO

2. Ante a gravidade deste proceder, as organizacións sociais abaixo asinantes
consideran necesario que a cidadanía exprese publicamente:
1. O seu rexeitamento á reforma constitucional que se propón.
2. A petición aos/as deputados/as e senadores/as de que non a voten
favorablemente no trámite parlamentario.
3. A esixencia de que, se a proposta é aprobada polo Parlamento, sexa
sometida a referendo.
Para iso, CCOO de Galicia, UGT-Galicia e USO-Galicia chaman a cidadanía e
as forzas políticas e sociais a participaren nas mobilizacións que se convoquen.
Conscientes da necesidade de traballar pola converxencia de todas as
organizacións e plataformas que estamos contra esta reforma da Constitución
en Galicia, acordan en particular:
1. Convocar concentracións o día 6 de setembro ás 19.00 horas na Coruña,
diante da Delegación do Goberno en Galicia, diante das subdelegacións do
Goberno de Lugo e Ourense e, en Vigo, diante dos edificios administrativos da
Xunta de Galicia.
2. Apoiar a participación nas demais concentracións e mobilizacións que se
convoquen estes días contra a reforma da Constitución e pola convocatoria dun
referendo.
3. Apoiar iniciativas de diferente natureza, en particular a recollida electrónica
de sinaturas.
Santiago de Compostela, 30 de agosto de 2011
CONTRA A REFORMA DA CONSTITUCIÓN E POLA CONVOCATORIA DUN REFERENDO