Muphunzira za mitundu yosiyanasiyana ya aonjezi.

1. AONJEZI
MITUNDU YA AONJEZI

2. MITUNDU YA AONJEZI
• Awonjezi alipo mitundu ingapo motere:
a. Muonjezi wamchitidwe
b. Muonjezi wamaonekedwe
c. Muonjezi wamkhalidwe
d. Muonjezi wa nthawi
e. Muonjezi wa malo
f. Muonjezi wokana
g. Muonjezi wovomera
h. Muonjezi wotsindika
i. Muonjezi wokayika

3. MUONJEZI WAMCHITIDWE
• Amanena za momwe ntchito idachitikira, ikuchitikira komanso
idzachitikire. Muonjezi ameneyu amayankha mafunso awa:
motani? bwanji?
Zitsanzo
a. Mtsikanayu akuyimba mwanthetemya.
b. Amayi amavina bwino.
c. Ochimwa adzalira modandaula.

4. MUONJEZI WAMAONEKEDWE
• Amakamba za mneni nthawi zonse ndipo amayankha funso
lakuti motani?
Zitsanzo
a. Maluwa awa akuwoneka mobiriwira.
b. Nyembazo zinkaoneka modera.
c. Akuwoneka mopusa.

5. MUONJEZI WAMKHALIDWE
• Amasonyeza za mkhalidwe wa mmene ntchito yachitikira
m’chiganizo ndipo amayankha funso loti motani?
Zitsanzo
a. Msungwana uyu walandira mphatso yake mwaulemu.
b. Iye amalima mwaulesi.

6. MUONJEZI WA NTHAWI
• Amanena za nthawi yomwe ntchito idachitikira, yachitikira
ndipo idzachitikira. Iyeyu amayankha mafunso awa: liti? nthawi
yanji?
Zitsanzo
a. Abambo ndi amayi adzanyamuka Loweruka.
b. Tidayamba kulima mwezi watha.
c. Chimanga ichi achitenga lero.

7. MUONJEZI WA MALO
• Amanena komwe ntchito idachitikira, yachitikira komanso
idzachitikire ndipo amadziwika ndi aphatikiram’mbuyo awa: mu-,
m’-, pa-, ku-, kumasinde omwe amathandiza popanga aonjezi a
mtunduwu. Iwowa amayankha mafunso monga: kuti? muti? muti?
Zitsanzo
a. Tipita kumudzi.
b. Tenga manyowa m’khola la mbuzi.
c. Ikani zofundazo pamphasa.

8. MUONJEZI WOKANA
• Amasonyeza kuti ntchito siidachitike, siichitika kapena
siidzachitika.
Zitsanzo
a. Ayi, sanatenge.
b. Toto, sindingasenze mtolowu.
c. Iyayi, sindidzapita nawo.

9. MUONJEZI WOVOMERA
• Amasonyeza kuti ntchito idachitika, ikuchitika kapena
idzachitika.
Zitsanzo
a. Inde, wataya ndiwe.
b. Chabwino, ndikuperekezani.
c. Eya, chikhochi ndaswa ndine.

10. MUONJEZI WOTSINDIKA
• Amasonyeza kutsimikizira kuti ntchito yachitika mopitirira
muyeso.
Zitsanzo
a. Mwayi adamenyedwa kwambiri dzulo.
b. Abambowa adatithandiza kwabasi.
c. Iye wakwiya zedi chifukwa basi yamuthawa.

11. MUONJEZI WOKAYIKA
• Amasonyeza kusakhulupirira kuti ntchito ichitika.
Zitsanzo
a. Kapena iweyo upita nawo.
b. Mwanayo mwina akhoza mayeso.
c. Kaya, ngati angabwerenso.