Traballo sobre A tumba de Breogán

1. A TUMBA DE BREOGÁN
Creado polo talentoso debuxante e guionista Abel Alves (Ferrol, 1981) e polo veterano e
prolífico ilustrador arxentino Esteban Tolj (Rosario, Arxentina, 1964), este cómic aborda
un relato de ficción histórica ambientado na Coruña de 1870, onde se entrelazan
personaxes históricas con outras ficticias, no que o patrimonio e folklore da cidade
herculina xogan un papel fundamental.
A trama comeza cun inesperado e misterioso descubrimento durante unhas obras na
Torre de Hércules. Os traballadores atoparan unha inscrición en latín do arquitecto desta
antiga edificación romana. O seu nome era Caio Sebio Lupo e na súa mensaxe menciona
a tumba onde repousan os restos do mítico rey celta. A noticia chega aos ouvidos de
Eduardo Pondal, quen, cunha gran curiosidade e emoción, vai buscar a sepultura pola
súa conta, sen reparar en que moi posiblemente outras persoas poden ter intereses
contrarios. A partir de aquí comezarán unha serie de emocionantes e acelerados sucesos
nos que o poeta de Ponteceso contará coa inestimable axuda de Antón Dedo d’Ouro, un
hábil e combativo ex bandoleiro.
Xuntos, Pondal e Antón, embárcanse nunha aventura chea de perigos e enigmas nos que
se ven obrigados a mesturar o inxenio e a intelixencia do poeta coa forza e afouteza do
foraxido; cerebro e músculo, traballando conxuntamente.

2. Como mencionei anteriormente, nas páxinas deste relato aparecen figuras destacadas
da historia da Coruña e de Galicia como a parella formada por Manuel Murguía e Rosalía
de Castro, así como a escritora e aristócrata Emilia Pardo Bazán. E en canto ás
edificacións, aparece, ademáis da referida Torre de Hércules, a Colexiata de Santa María
do Campo, que adquire unha gran relevancia na historia. Aínda que os autores se toman
algunhas licenzas artísticas, a recreación e representación das rúas e os ambientes
coruñeses da época resultan atractivos e realistas.