1. I ENCONTRO DE CENTROS ESCOLARES SOLIDARIOS DO PLAN PROXECTA
Case unha trintena de alumnos/as e dúas profesoras participamos no I Encontro
de Centros Galegos Solidarios do Plan Proxecta, que tivo lugar o pasado venres 4 de
outubro de 2013 en Santiago de Compostela. Partimos ben cedo de Monfero para
chegar a tempo á inauguración do Encontro, prevista para as 10:30 de mañá, e contando
nin máis nin menos que coa presenza e discurso de Beatriz Mato Otero, Conselleira de
Traballo e Benestar, quen enmarcou esta actividade dentro do Plan de Voluntariado da
Xunta de Galicia.
Acto seguido o noso ben coñecido Ramón Molina, alma mater do proxecto
"Micromovies en Prol do Voluntariado", foi o encargado de presentar, guiar e
dinamizar toda a xornada. Parabéns, Ramón, por ter toda esa enerxía e entusiasmo, e
pola túa dedicación (comprendemos que foron moitísimas as horas empregadas para a
montaxe das micromovies e para a preparación deste encontro). E ao fin... o máis
esperado... poder ver o resultado das gravacións nos oito centros participantes e
comprobar a cantidade e a calidade das iniciativas levadas a cabo en cada un deles.
A nosa compañeira Antía (3º ESO) foi a encargada de saír ao escenario e
presentar o CPI Virxe da Cela, describindo as nosas actividades e perfilando a nosa
filosofía de traballo. O resultado da micromovie... xa está á vosa disposición. E para
todos vós, os rapaces e rapazas que este ano xa non estades no noso centro e que tedes
unha presenza tan notable na micromovie, lembrade que xa está pendurada no noso
blogue. Vaia dotes interpretativas!!!
Despois de permanecer sentados e atentos toda a sesión de mañá, na proxección
das micromovies, gozamos dun xantar conxunto (o noso compañeiro Iago de 4º de ESO
fixo unha completa reportaxe sobre o grado de satisfacción de todos os participantes en
relación á comida). A planificación para a tarde estivo centrada en actividades máis
dinámicas e participativas, nas que todos os asistentes mesturámonos na colectividade,
tendo a oportunidade de coñecer a outros alumnos/as e profes, e entre todos levando a
cabo xogos e dinámicas do máis divertido. Paralelamente podíanse visitar os "stands"
dos diferentes centros, onde atopábamos documentos e obxectos que ilustraban as súas
actividades solidarias, e incluso falar directamente cos alumnos/as destes coles, para o
intercambio de impresións. O noso compañeiro Iago (4º ESO) exerceu a figura de
xornalista, e con micrófono a man, foi achegándose aos alí presentes para recoller as
súas impresións. Posteriormente o seu compañeiro Adrián (4º ESO) realizou unha
entrevista do mais "formal" a Alberto Otero, Subdirector Xeral de Voluntariado, quen
agradeceu a toda a mocidade polo seu compromiso.
Como punto final da xornada realizouse un "mercado do troco", onde cada quen
poido intercambiar un obxecto traído da casa e que posiblemente estaba en desuso, con
un novo obxecto que captara a nosa atención, previo "regateo" entre os protagonistas do
troco.