1. Таалагдсан шүү найз 
Цайныхаа дээжийг барих хүнтэй байх гэж
Цагаан сараар гэрийн минь хоймор дүүрэн байхыг харах гэж
Цадигийг мэдэхгүй хүүгээ үлгэрлэх хүнтэй байхыг үзэх гэж
Цаанатай наанатай хорвоогийн эргүүлэгт ганцаар өтлөхгүй байх гэж
Цаг хугацаатай уралдан гэргий болох гэж яарна би
Хааяа нэг санаа алдахдаа энгэрт нь наалдах гэж
Хаа нэгтээ явахад нь санаж хүлээх гэж
Хажууд минь байхад амар амгаланг мэдрэх гэж
Ханилан суугаад насаараа жаргах гэж
Хором мөчүүдтэй уралдан гэргий болох гэж яарна би
Сэтгэл нь хааяа нэг үймрэхэд тайтгаруулах гэж
Сэрэхэд нь халуун цайтай угтах гэж
Сэрүүн шөнөөр хөлийг нь хучих гэж
Сэтгэлдээ түүнийгээ хайрлах гэж
Сэмрэх цаг хугацаатай уралдан гэргий болох гэж яарна би
Хатуу чийрэг бие нь ядрахын цагт халамжлах гэж
Хат суусан сэтгэл нь үймрэхийн цагт аргадах гэж
Хааяада нэг халамцуу ирэхийн цагт асрах гэж
Хатуу хорвоогоос уйдахын цагт хамдтаа байх гэж
Харван өнгөрөх цаг хугацаатай уралдан гэргий болох гэж яарна би...
Ж. Тэгшжаргал