Lecture notes on Rukwangali Language Education 2B [ LRU 3612]

1. ELO 5: Likida Nongendeseso omu novhura
kuvyukisa varongwa ava va kara noudigu
wokuresa rambangako Nongendeseso
dokufunda udwa wokuresa ntani hena
kuresa kokulikwatesa ntani kokuresa vavali-
vavali, eruganeso nobuke ukare uhaku
kovarongwa ava va kara noudigu womomutwe/
wokomutjima.

2. Kehagero lyerongwa varongwamitili va hepa
ku:
5.1. Likida nongendeseso dokuronga varongwa va sige
nkareso zoudwa wokuresa.
5.2. Singonona asi yisinke kuresa kokulikwatesa ntani
kwavavali-vavali ntani o tunge yiviyauka kwa nkenye simwe.
5.3. Horowora nobuke edi nadi vhura kufira varongwa
ava va kara noudigu womomutwe/ wokomutjima / ava va
kara noudigu momaparugawo di kare uhaku wawo.
5.4. Likida evhuro lyokuruganesa nobuke di kare uhaku
wovarongwa ava va kara noudigu womomutwe/
wokomutjima.

3. Etwaromo
Uumwe ou kwa demenena pounongo wokuresa moomu nye
ngesi sina kara hepero kufwaturura asi yisinke nani azi tanta
ezi nkango “ kuresa”.

4. Efwatururo lyonkango ezi kuresa.
Kuresa unongo ou atu ruganesa mokuzuvha eyi yina tjangwa
mokuruganesa mutungo gononkango, nondandazwi tu tunture
muhagaro gwa yeyi vana tjanga.

5. Sinzi sovantu kapi va nyanyukira nawa-nawa kuresa pwavelike,
morwa kukwama omu vavarera kutunda kounona wawo.
Ngomurongi ya ha kugusa si Mukumo mokugava mbatero
kovarongwa worupe oru. Nongendeseso musinke nye edi
novhura kuruganesa mokuronga varongwa woge va sige
nkareso zoudwa wokuresa? Tu zeni si tu tare konongendeseso
odo dina ku kwama ko:

6. Nongendeseso dokuronga varongwa va sige
nkareso zoudwa wokuresa.
1. Murongi pomuhowo a tantere varongwa vendi omu ga
tamekere kuresa.
2. Rongikida Ezuva lyokuresa eli lya tuliswa po nare.
 Ereso lyokukara ngesi kwa hwa kuhoroka mwaSitarara
nkenye elima.

7. 3. Hamesera mo varongwa mokuresa komeho o gave
mavyukiliro kuhamena omu vana kuresa.
 Eyi kuninkisira morwa eharo lyokuresa mutupu mo mwawo.
Tanko to vaninki varese nkenye eyi ove wa hana kugava
mavyukiso nositambo sokuvatura meharo lyokuresa, nsene
eyi yina ka pita ntani nye novavyukisa kuresa kwawo.

8. 4. Va pa unankondo wokuhorowora nobuke edi
vana hara kuresa monkondwarongero zawo.
Varongwa ku yi hafera unene nsene ta va pe unankondo va
horowore vene nobuke edi nava resa, nokuresa kwawo tava
kuhafere.

9. 5. Va twara monzugo mwina mwa kara nobuke
dokuresa va ka papare nobuke edi dina va zi
komutjima.
Mevango eli tava kavhura kukagwana mo nobuke dokulisiga-
siga edi nava vhura kukahorowora nyamwawo yipo va ka di
rese.

10. 6. Rongikida varongwa woge va ze konosure dopeke
va ka li pakerere novakwaawo mokuresa.
Kwato ogu munona ga hara va mu zore morwa kapi ga diva
kurugana sininke simwe songandi. Nsene o yi rugana eyi
vsrongwa ngava hara kulironga kuresa morwa kapi vana hara
vava zore omu vana kuresa.

11. 7. Tura varongwa monomuzumo omu nava
vhura kuresa kulikwatesa.
Mokurugana eyi varongwa tava vhuru kulipukurura vene na
vene apa vana kutura mapuko pokuresa.

12. Efwatururo lyokuresa kelikwateso
Oku yiko kuresa komalitambasano oku aku horoka apa
varongwa ava wiza kumwe nositambo sokulikwateso kuresa
buke zonene ndi yitjangwa yoyire oku tava va vatere
nokuvavyukisa komurongi gwawo ndi muresi ogu ga diva
kuresa

13. Eyi novhura kukoneka ngomurongi nsene
kuna kupitisira kuresa kelikwateso
1. Varongwa va hepa kutarere ukonentu wokuresa
komuresinawa ogu ana kuruganesa yilyo yorutu nawa ntani
elindagurozwi nawa.
2. Nonkango da hepa kunenepa nawa yipo varongwa navenye
va mone nawa kumwe nokulikwatesa kuresa
sintokorwatjangwa.

14. Uwa wokuresa kulikwatesa
o Varongwa kulizuvha uwawa mokuresa yitjangwa eyi ava pili
kuvhura kuresa pwavene.
o Varongwa ku li pa mbatero monombunga dawo apa vana
kuresa.
o Kulironga elizokumwe kuhamena eraka lyopatjangwa
nelilyopakana.
o Kuvatera mokuronga nonkango donondigu edi da hwa
kuruganeswa.

15. o Kunkondopeka etedo lyewa lyesimwititi.
o Mokuresa kokulikwatesa, varongwa kulihamesera mo
mokuresa nomokulironga asi ngapi omu ava resa ntani awo
kuzuvha asi kuna kulironga ntani kulimona vene asi awo
varesi.

16. Varongwa kuvhura kuresa eyi yina kukwa ko:
o Masimwititi
o Nonsumo
o Nobuke dononene
o Nomutango
o Mbudi zomonkondwarongero

17. Yiviyauka yokomeho zokuresa
o Murongi ta gava etwaromo lyesimwititi. Omu kuvhura
kuuyunga mo kuhamena Edina lyobuke ntani epepahoveso
lyobuke.
o Hamesera mo varongwa kuhamena eyi vana kumona
kepepahoveso lyobuketjangeso ntani eyi vana kugazara
kuhamena etjangototo eli nava ka resa.
o Metwaromo, murongi a vatere varongwa mokulitungira efano
kuhamena etjangototo, yihorokwa, ntani kupura mapuro
gokapulilira yipo varongwa va li hamesere mo.

18. Yiviyauka yopokuresa
o Kuresa kokuhova kukara kuresa kelihafeso.
o Murongi a like nkenye nkango apa ana ku zi resa.
o Varongwa va hepa kukwama nomeho apa ana kuresa
murongi.
o Resa sireswa nezwi eli wa hwa kuruganesa, morwa
varongwa va hepa nawo kulihamesera mo.
o Ruganesa elindagurozwi lyouhunga.

19. o Hageka kuresa yipo o pure varongwa va pumbe eyi yina
kuhoroka. Pura ngwendi “ mouhunga ndi?”

20. Yiviyauka yokonyima zokuresa
o Konyima zokuresa, murongi ta tengwida varongwa konyima
pokuninka mapumbo. Kuvapura omu kava yidiva asi
mouhunga kava kara ndi ngapi omu vana yidiva asi
mapumbo gawo kapisi uhunga.
o Gava mpito kovarongwa kuhamena magazaro gawo mulyo
unene morwa varongwa ku li hamesere mo sili unene.

21. Kuresa kwavavali-vali
Oku yiko kuresa omu varongi novarerwa/ vakurona ava vatere
vanavawo meliyombereso kuresa. Kuresa oku kwa hepa
muresi ogu ga kara nounkurungu wokuresa natni murongwa
ogu ana kulironga kuresa tava resa kumwe buke.

22. Varongwa ava va kara noudigu womomutwe ndi
wokomutjima kumwe noyitjangwa/ nobuke edi nava
vhura kuresa
o Masanseko kuhafesa nokuronga vanonagona novakondi
monkedi zokulifana.
o Masanseko kuninkisa vanonagona va divare yinka yawo.
o Nkedi zokuresa esanseko komunona kuhamena munona
mukwawo kuvavatera moyiruwo yeguwo. Masanseko
gokukara ngesi kuninkisa vanona va gwane malimbururo
gomawa. Sitambo sokuresa esanseko lya ngesi kuninkisa
munona a gwane mbili ntani makorangedo.

23. o Masanseko kuninkisa munona alironge asi nawa tupu
poyiruwo yimwe kutura mapuko.
o Pokuvaresera masanseko ga ngesi, murongi a ruganesa
mukumozwi gokutemwinina moomu va yi simwitira.
o Vahorowera nobuke edi va hara unene owo vanona ono hara
kuresera.
o Wa hepa kudiva asi munona ga hepa kudiva kupurakena
kumwe nokuhafera nobuke pepupi lyenona.

24. o Ruganesa masanseko o guse po maudigu.
Mokuyirugana eyi, resa nobuke domafano doyikaramo ya ngesi
edi dina kufumbura maupyakadi, ehandu lyovanonagona yipo yi
va tjindja.
o Sinzi sonobuke domafano dovanonagona kuuyunga mo
kuhamena maupyakadi aga ava gwanekere nago.
o Horowora nobuke edi dina kusimwitira maupyakadi.

25. o Horowora nye nobuke edi dina kusimwitira suma
somaupyakadi ngwendi; woma, yiruwo youdigu, sihonena
epiroepakerombili vakurona vanavawo/ esigiliro/ epiro ndi
nomfa domuharwa mekoro. Siho. Mahodi gonsigwe
o Nobuke dimwe kusimwitira mauvera, ediruko lyepata lyawo
pomukundo apa pwa kara kaume gomunona ogo.
o Horowora nobuke edi nadi fumbura elizuvho movarongwa.
Siho. Mbili, kuzuvhira ko vakwawo, egawombatero,
kutarurura udigu womuntu, ngo.ngo.

26. o Horowora nobuke edi nadi va pa ndi nadi keverera
elinunupiko mokatji kovanona ava ava lizuvhu ngwendi asi
awo va nunu ntani kwato ogu gokuvavatera mekuruzuni
mokatji kovakondi novakuru.
o Horowora nobuke edi adi uyunga kuhamena runyando
kuhamena elizuvho lyedona.

27. o Varongwa woge va rese nobuke edi da simwitira kuhamena
munonagona ogu vana gusa ko mokudana novakwaawo ava
va kara asi kapisi vepupi lyendi.
o Varongwa kuvhura simpe hena kuresa unongotango, morwa
kwa kara neganohoramo lyokutanga maudigu ntani
malizuvho govanonagona.

28. Yeliyombereso
Nobuke musinke novhura kuhorowera varongwa ava va kara
noudigu womomutwe/ wokomutjima? Liyonga nakaume zoge
ove o uyunga ko asi morwasinke ono kuuyungira ngoso.