Bible in caposho, cumanasho, macuni, monaxo, monocho

TOPA YÕG TAPPET
O Novo Testamento Na Língua Maxakalí

O Novo Testamento na língua Maxakalí
Brasil
Primeira Edição
© 1981, La Liga Bíblica.
Segunda Edição
© 2011, Wycliffe Bible Translators, Inc.
Licencia Creative Commons
http: creativecommons.org/licenses/by-nc-nd/3.0

Índice
Mãteo....................................Mateus (Mt)................................................... 1
Mãꞌak....................................Marcos (Mc)................................................ 67
Nok.......................................Lucas (Lc)...................................................110
Toãm.....................................João (Jo).....................................................184
ꞌAt.........................................Atos (At).....................................................241
Hõmãn..................................Romanos (Rm).......................................... 301
1 Konĩn.................................1 Coríntios (1 Co)...................................... 329
2 Konĩn.................................2 Coríntios (2 Co)...................................... 354
Gat........................................Gálatas (Gl)............................................... 372
ꞌEpex.....................................Efésios (Ef)................................................ 383
Pinipẽn.................................Filipenses (Fp)........................................... 393
Konoxẽn................................Colossenses (Cl)......................................... 400
1 Texanõn.............................1 Tessalonicenses (1 Ts)............................ 406
2 Texanõn.............................2 Tessalonicenses (2 Ts).............................412
1 Timõn................................1 Timóteo (1 Tm).......................................416
2 Timõn................................2 Timóteo (2 Tm)...................................... 424
Tit.........................................Tito (Tt)..................................................... 430
Pinẽm...................................Filemom (Fm)............................................ 433
ꞌEmeo....................................Hebreus (Hb)............................................. 435
Tiak......................................Tiago (Tg).................................................. 456
1 Pet.....................................1 Pedro (1 Pe)............................................ 463
2 Pet.....................................2 Pedro (2 Pe).............................................472
1 Yoãm..................................1 João (1 Jo).............................................. 477
2 Yoãm..................................2 João (2 Jo).............................................. 484
3 Yoãm..................................3 João (3 Jo).............................................. 486
Yot........................................Judas (Jd).................................................. 488
Apokalipse............................Apocalipse (Ap)..........................................491
Mapas..................................................................................................... 523
O Novo Testamento na língua Maxakalí do Brasil, 2da ed., © 2011, Wycliffe Bible Translators, Inc.

1
Yeyox Kunnix yõg mõnãyxop
1 1 Yeyox Kunnix yõg mõnãyxop xohix xop te tik hittap Namix hãꞌ
mõkputox, ha mõnãyxop hittap ꞌAmanãm hãꞌ mõkputox.
2 ꞌÃmanãm te ꞌIyak mũg tak, ha ꞌIyak te Yako mũg tak, ha Yonah mũg
tak, xiꞌ taknõy xop mũg tak. 3 Ha Yonah te Pet mũg tak, xix Yet mũg
tak, haꞌ mũg tut ꞌãxetꞌax Tãm. Ha Pet te ꞌExnõg mũg tak, ha ꞌAnãm mũg
tak, 4 ha ꞌÃmĩnãnap mũg tak, ha Nãy mũg tak, ha Xanmõm mũg tak, 5 ha
Moax mũg tak, haꞌ mũg tut ꞌãxetꞌax Hap. Ha Moax te ꞌOmet mũg tak, haꞌ
mũg tut ꞌãxetꞌax Hot, ha ꞌOmet te Yexe mũg tak, 6 ha Namix mũg tak. Yã
hõmã Namix te ꞌIyaet yõg tikmũꞌũn xohix xat.
Ha Namix te ꞌOnit xetut mũg, ha Xanomãm put, 7 ha Homoꞌãm mũg tak, ha
ꞌAmit mũg tak, ha ꞌAxa mũg tak, 8 ha Yoxapah mũg tak, ha Yonãm mũg tak, ha
ꞌOyit mũg tak, 9 ha Yotãm mũg tak, ha ꞌAkax mũg tak, ha ꞌEyekit mũg tak, 10 ha
Mãnãxex mũg tak, ha ꞌÃmõm mũg tak, ha Yoyit mũg tak, 11 ha Yekõnĩn mũg
tak, xiꞌ taknõy xop mũg tak, ꞌĩhã puknõg xop te ꞌIyaet yõg tikmũꞌũn mõgãhãꞌ,
nũy hãm puknõg haꞌ mõgãꞌ, tu hãpxexka Maminõn tuꞌ mõgãhãꞌ, pu tu piꞌ.
12 Tu Maminõn tuꞌ pip, ꞌĩhã Yekõnĩn te Xanatit mũg tak, ha Yonomameo mũg
tak, 13 ha ꞌAmiot mũg tak, ha ꞌEnitkĩy mũg tak, ha ꞌAyoh mũg tak, 14 ha Xanok
mũg tak, ha ꞌAkĩy mũg tak, ha ꞌEniot mũg tak, 15 ha Mãtã mũg tak, ha Yako mũg
tak, 16 ha Yoye mũg tak, ha Mãnix mũtik yãytahaꞌ, haꞌ put Yeyox ꞌãxetꞌax Kunnix.
17 Kaxĩy ꞌAmanãm mõkputox te homik-tok put, ha tehomik-tok put,
ha tehomik-tok put, tu mõktu xohix te 14, tu mõktu Namix te ꞌIyaet
yõg tikmũꞌũn xat, ha tehomik-tok put xohix te 14, tu mõktu ꞌIyaet yõg
tikmũꞌũn te hãpxexka Maminõn tuꞌ mõg, ha mõkputox nõy xohix te 14
kamah, ha mõktu Yeyox Kunnix mũg tut teꞌ put.
Yeyox mũg tut teꞌ put
18 Tuꞌ put hã xĩy: Tute yãytap-tup Yoye mũtik, pa nõm mũtik nõm ꞌohnãg ꞌĩhã
Topa Koxuk tek-tok putnãhãꞌ. 19 Ha Mãnix te yãy kutok xuk, ha Yoye teꞌ yũmmũg,
MÃTEO TE HÃMꞌÃPAK
MAXꞌAX ꞌÃKTUX

2
yã hãmyok mĩy, tuꞌ yĩy ꞌohnãg, tu hãmpeꞌpaxex, hu: “Pũyã tikmũꞌũn Mãnix
kummuk ꞌãktux hok!” Kaxĩy. Tuꞌ xaptop tuꞌ nĩm putup, 20 tu hãmpeꞌpaxex, ꞌĩhã
pexkox yõg nũꞌkutnãꞌax nũn, Yoye mõꞌyõn ꞌĩhãꞌ nũn, tuꞌ yõtkup tu hãmꞌãktux, hu:
—‍Yoye, ꞌãmũn yã Namix hã ꞌãmõkputox, hu ꞌãkuxanõg hok, nũy Mãnix
mũy, nũy nũ mũtik yãytax. Yãꞌ max Mãnix, ha Topa Koxuk tek-tok putnãp-
tup, 21 hak-tok pit put putup, ha xateꞌ xuxetꞌax mĩy putup Yeyox, ha yãy
yõg tikmũꞌũn kuxa kummuk xit putup, nũy kuxa max tat ꞌũyãnãn tuꞌ.
22 Topa te hãpxopmã kaꞌok, yã hõmã tik te Topa pupi hãmꞌãktux
tikmũꞌũn puꞌ, yĩy: 23 “ꞌŨn hok yũm tek-tok xuk putup, hak-tok ꞌãxetꞌax te:
ꞌẼmãnẽo.” Yã tikmũꞌũn yĩyꞌax hã: “Topa te yũmũg mũtik tihiꞌ.” Kaxĩy. Tu ta
tuꞌ kux. Yã Topa yõg hãmꞌãktux hittap hã Mãnix te yãy kutok xuk nõmhã.
24 Ha Yoye yãy koxak, tuꞌ yĩpkox pip, tu Mãnix mũg, 25 pa nõm mũtik
nõm ꞌohnãg, mõktuk-tok put, ha Yoye teꞌ xuxetꞌax mĩy Yeyox.
Tik puknõg xop te hãmyũmmũg nũn
2 1 Yeyox mũg tut teꞌ put kõmẽn Menẽg tuꞌ, yã hãpxexka Yonex yõg
kõmẽn, ha ꞌEnot te hãpxexka yõg tikmũꞌũn xohix xat, ꞌĩhã Mãnix
tek-tok put, ha tik puknõg xop te hãmyũmmũg nũn, mãyõn xupepꞌax haꞌ
nũn, tu mãyõnnãg xop yũmmũg, tu Yenoyanẽn haꞌ nũn, tuꞌ nũn tu nũktu
mõxahaꞌ, 2 nũy kakxop pit xax, tuꞌ yĩkopit, hu:
—‍Piꞌyãꞌ xip tik te tikmũꞌũn xatꞌax kutok? Yãꞌ tut teꞌ put nõmhã, pu
Yoneo yõg tikmũꞌũn xohix xat. Hãptox tukmũg tihiꞌ, tu kakxop yõg
mãyõnnãg pẽnãhã pepi pexkox tuꞌ, tu mãyõn xupepꞌax ha mãyõnnãg
pẽnãhãꞌ, tuk nũn tu nũktu nũk-tettex kakxop puꞌ. Kaxĩy.
3 Ha ꞌEnot teꞌ xupak, tuꞌ xutĩgãhãꞌ, xix Yenoyanẽn yõg tikmũꞌũn xohix
xutĩgãhãꞌ, 4 yĩy ꞌEnot te ꞌãmãnex xexka xop xãnãhãꞌ, xix hãmyũmmũg xop
xãnãhãꞌ, pu yãy tu nũnnãy, tu taꞌ nũn tu nũktu mõxahaꞌ, ha ꞌEnot te:
—‍Tep mũn ꞌãktux Topa yõg tappet teꞌ? Piꞌyãꞌ xip putup ꞌũtut ꞌĩhãk-tok
put, Topa te nõm yãykutnãhãꞌ? Kaxĩy.
5 Ha:
—‍Kõmẽn Menẽg kopaꞌ put putup, hãpxexka Yonex tuꞌ. Yã tik hittap te
Topa pupi hãmꞌãktux, tu tappet tu kaxꞌãmiꞌ, tu kakxop nãꞌax ꞌãktux, hu:
6 “Menẽg mũn kõmẽn kutõgnãg, pa Topa teꞌ xexkãnãp-tup,
ꞌũyãykutnãꞌax yõg kõmẽn hah,
yĩy Topa te kõmẽn xexkãnãp-tup,
ha yãykutnãꞌax te yõgnũ tikmũꞌũn xat max putup,
tu ꞌIyaet yõg tikmũꞌũn xat putup.” Kaxĩy.
7 Ha ta ꞌEnot te tik xop xãnãhãꞌ, nõm tik te hãmyũmmũg xop te hãptox
tuꞌ nũn, haꞌ xãnãhãꞌ, pu nũꞌ, haꞌ xaptop tuꞌ nũn, pu tikmũꞌũn ꞌũpẽnã hok,
ha ꞌEnot teꞌ yĩkopit, hu:
—‍Hãm ꞌũm ꞌĩhã ꞌãxop te nõ mãyõnnãg pẽnãhãꞌ? Kaxĩy.
Haꞌ xuktux, 8 yĩy ꞌEnot te mõꞌpok Menẽg hah, tu:
MÃTEO 1, 2

3
—‍Mõy kakxop pit xax, nũy xipiꞌ, nũy nũy ꞌãꞌ xuktux, ꞌũyĩy kama nũk
xup kakxop keppah. Kaxĩy.
9 Tu hãmꞌãktux kux, ha ta tik xop mõg, tu taꞌ mõg putat hã, tu mõktu
Menẽg tuꞌ mõxahaꞌ, tu mãyõnnãg pẽnãhã ꞌũxeheh. Hõmã mãyõnnãg te mãyõn
xupepꞌax tuꞌ xip hãmnõgnõy tuꞌ, yã hõnhã pepiꞌ xip, tu tik keppaꞌ mõg, nũy tik
xop mõgãꞌ, tu mõktu mĩptut tuꞌ xupep, ha kakxop pit xip, yĩy mãyõnnãg hup, tuꞌ
xup pepiꞌ tu pexkox yokamaꞌ xup, 10 ha tik xop kuxa hittup xexkah, mãyõnnãg
pẽnãhã tuꞌ kuxa hittup, 11 tu mĩptut hãꞌ mõxakux, tu kakxop pẽnãhãꞌ, ꞌũtut
Mãnix mũtik tihiꞌ, yĩy nũktettex kakxop keppah, tuꞌ kuxa teꞌ yẽy. Hak-nãy tu
hãpxop max popmãhãꞌ, ha takat xexkah, yã pipkup yãnãm ꞌãta popmãhãꞌ, xix
hãpxop puk haxnãg tuꞌ hõm xix mĩxux hep ꞌũhaxnãg mĩha tuꞌ hõm.
12 Tu mõꞌyõn ꞌĩhã Topa teꞌ yõtkup hã hãmyũmmũgãhãꞌ, puyĩy ꞌEnot ha putpuꞌ
mõg hok, yĩy taꞌ mõg, putat nõy hãꞌ mõg, tu mõktu yãy yõg hãm tuꞌ mõxahaꞌ.
Hãpxexka ꞌEyit tu nũꞌpahaꞌ
13 Ha pexkox yõg nũꞌkutnãꞌax te Yoye haꞌ mõg, ꞌĩhã mõꞌyõn, tuꞌ yõtkup
hã hãmꞌãktux, hu:
—‍ꞌÃpu ꞌãyok, nũy ꞌãknĩhã xihip. ꞌÃk-tok put, xiꞌ tut mõgãꞌ, nũy
hãpxexka ꞌEyit tu mõy ꞌãmõxãn, nũy nõ te nox piꞌ, ha mõktu ꞌãte xa
hãmꞌãktux. Yã ꞌEnot te kakxop xak, ꞌũp-tex putup tuꞌ. Kaxĩy.
14 Yĩy Yoye yok, tu kakxop put, xiꞌ tut mõgãhãꞌ, tu hãpxexka ꞌEyit
ꞌũnũpa tuꞌ mõg ꞌĩhã ꞌãmnĩy, 15 tuꞌ ti kaꞌok, ha mõktu ꞌEnot tuꞌ xok. Hõmã
tik hittap te Topa pupi hãmꞌãktux, tu tappet tu kaxꞌãmiꞌ, tu Yeyox ꞌãktux,
hu: “ꞌÃtek kutok xãnãhãꞌ, ꞌĩhã hãpxexka ꞌEyit ta tuꞌ xip.” Kaxĩy. Yã Topa
yõg hãmꞌãktux hittap hã Yeyox nox xip hãpxexka ꞌEyit kopa nõmhãꞌ.
ꞌEnot te xonat xop xat pu kakxop kix
16 Ha ta ꞌEnot teꞌ hip, tu tik puknõg te hãmyũmmũg xop hip, pa ꞌap nũnꞌah, tu
yã mõꞌãmãꞌ. Yĩy ꞌEnot gãy xexkah, tuꞌ xat, pu kõmẽn yõg kakxop pit xohix xexka
kix, nũy kakxop yõg hãmyãxatamuk 2 xohix kix Menẽg kopah, xix kõmẽn kũnãpaꞌ
pip kakxop pit kix. Yã hõmã, hãmyãxatamuk 2 ꞌĩhã tik puknõg te hãmyũmmũg
xop te mãyõnnãg pẽnãhãꞌ, huꞌ nũn, nũy kakxop xax, yĩy ꞌEnot teꞌ xat, pu kakxop
pit kutõgnãg xohix kix, nũy kakxop puxet putex. 17 Hõmã, hãmyãxatamuk xohix
xexka ꞌĩhã, tik hittap Yenemĩn te Topa pupi hãmꞌãktux, nũy tappet tu kaxꞌãmiꞌ, yĩy:
18 “Kõmẽn Hãmã yõg tikmũꞌũn potahaꞌ,
yã Haket potahaꞌ, ꞌũk-tok xak tuꞌ,
tuꞌ kuxa teknõg, ꞌũk-tok xakix hah.” Kaxĩy.
Yã Topa yõg hãmꞌãktux hittap hãꞌ xatꞌax gãy te kakxop kix nõmhãꞌ.
Yãy yõg hãm tuꞌ putpuꞌ nũn
19 Hãpxip kutõgnãg ꞌĩhã ꞌEnot xok, ha pexkox yõg nũꞌkutnãꞌax te ꞌEyit haꞌ mõg,
tu Yoye haꞌ mõg, tu hãmꞌãktux ꞌĩhã Yoye mõꞌyõn, ꞌũyõtkup hã hãmꞌãktux, 20 hu:
MÃTEO 2

4
—‍ꞌÃpu, ꞌãyok, kakxop put, xiꞌ tut mõgãꞌ, nũy ꞌIyaet yõg hãm ha putpu
mõg. Yã tik kummuk xok, nõm te kakxop xak, nũy putex. Yĩy mõg. Kaxĩy.
21 Ha Yoye yok, tu kakxop put, xiꞌ tut mõgãhãꞌ, ha taꞌ mõg ꞌIyaet haꞌ, tuꞌ mõg
tu mõktuꞌ mõxahaꞌ, 22 ha tikmũꞌũn te hãmyũmmũgãhãꞌ, tu ꞌEnot kutok ꞌAkenap
ꞌãktux, ha Yonex yõg tikmũꞌũn xat, yãy tak yãnãn tuꞌ xat, yĩy Yoye kuxãnõg, pa
Topa te hãmyũmmũgãhãꞌ, ꞌĩhã mõꞌyõn, ꞌũyõtkup hã hãmyũmmũgãhãꞌ, yĩy Yoye
mõg hãpxexka Ganinet tuꞌ, xix kakxop mõg, xiꞌ tut mõg, 23 nũy tu ti kaꞌok kõmẽn
Nãyane kopah. Yã hõmã tik hittap te Topa pupi hãmꞌãktux, tu Yeyox ꞌãktux, hu:
“Tikmũꞌũn teꞌ xuxetꞌax mĩy putup, tu Nãyane yõg tik ꞌãxetꞌax putup.” ꞌŨkux. Kaxĩy.
Yã Topa yõg hãmꞌãktux hittap hã Yeyox xip kaꞌok kõmẽn Nãyane tuꞌ nõmhãꞌ.
Yoãm te Topa pupi hãmꞌãktux
3 1 Hãpxip ꞌĩhã Yoãm tep-tox pix, tu hãpxexka Yonex yõg hãm panip
xexka haꞌ mõg, nũy Topa pupi hãmꞌãktux, 2 tu:
—‍Mãꞌ, yãyhãhup, nũy hãpkummuk mĩy kux. Yã hõnhã Topa te ꞌãxat
nũnteꞌ Kaxĩy.
3 Yã hõmã tik hittap ꞌIyait te Yoãm ꞌãktux, ꞌĩhã Topa pupi hãmꞌãktux, yĩy:
“Tik xip hãm panip xexka tuꞌ, tuꞌ yĩy kaꞌok, tu:
ꞌÃpu, Topa yõg putat max mĩy,
nũy Topa pu putat kohe tuꞌ yoaꞌ.”
ꞌŨkux. Kaxĩy.
4 Yoãm te kãmẽn xeh hã topixxax mĩy, nũy tu xokxop xax hãg-nãy hĩy, tu
kunit mãhãꞌ, xix puk hep xup. 5 Ha ta kõmẽn Yenoyanẽn yõg tikmũꞌũn xohix
nũn, xix hãpxexka Yonex yõg tikmũꞌũn, xix tikmũꞌũn te kõnãg xexka Yohnãm
yĩkaꞌ pip, tuꞌ nũn, 6 ha Yoãm te tikmũꞌũn xohip-tox pix, ꞌĩhã tikmũꞌũn te yãy
yõg hãpkummuk mĩyꞌax ꞌãktux, tu yãyhãhup tu hãmꞌãktux, nũy nõm kuxyãꞌ.
7 Ha Paniye xop nũn kamah, xix Xanoxeo xop nũn, puyĩy Yoãm kamap-
tox pix. Pa Yoãm te:
—‍ꞌÃxop kummuk xop te kãyãk-tok putuk! Piyã ꞌãxat, xayĩy ꞌõg hãpkummuk
mĩyꞌax tu kux, puyĩy Topa ꞌãha gãy hok, nũy ꞌãkummugã hok? 8 ꞌÃpu
hãpxopmã max, pu tikmũꞌũn xohix xate yãyhãhup yũmmũg. 9 Hãmꞌãktux
hok, hu: “Yã mõnãyxop ꞌAmanãm yã yũmũꞌã hã mõnãyxop xeꞌeꞌ, ꞌa Topa te
ꞌũgkummugãp-tupꞌah,” Kaxĩy. ꞌŨxuktux hok! Yã Topa mũn kaꞌok, tu mĩkax
xap hã ꞌAmanãm mõkputox mĩyꞌax. 10 Tikmũꞌũn te mĩm kup kummuk xak,
kupuk hãꞌ xak, tu kuxap hã mõꞌhap, pu tu nõg, ha kaxĩy Topa te tikmũꞌũn
kummuk kix putup, tuꞌ nõaꞌ. 11 ꞌÃte ꞌãp-tox pix, tu kõnãg hã ꞌãp-tox pix, xa
yãyhãhup, nũy hãpkummuk mĩy hok ꞌũxeheh, pa tik puxet tek peꞌ nũn putup,
tuꞌ kaꞌok, ha tak puꞌuk. ꞌAp maxꞌah ꞌãte nõ pataxax tat, yãk mũn kutõgnãg.
Hamũn te Topa Koxuk xa mõꞌkutnãp-tup puyĩy ꞌãkuxa kaꞌogãꞌ, nũy ꞌãkuxa
kummuk tupmãꞌ. 12 Yã pẽnẽn pahaꞌ, nũy xuxnãg xetox xap mõy mĩxux kopah,
nũy xap xix mĩptut kopah, ꞌĩhã mĩxux naknãg mõꞌhap kuxap tuꞌ, ha kaxĩy
MÃTEO 2, 3

5
Topa te yãy yõg tikmũꞌũn xex max, paꞌ yĩpkox ꞌohnãg xop xũygãp-tup, kuxap
hãꞌ puk putuk nõ xũygãp-tup, haꞌ xũy xuxix tapax ꞌohnãg. ꞌŨkux. Kaxĩy.
Yoãm te Yeyox putox pix
13 Hãpxip kutõgnãg ꞌĩhã Yeyox mõg, tu ta hãpxexka Ganinet tuꞌ xip, tu
kõnãg xexka Yohnãm haꞌ mõg, pu Yoãm putox pix, 14 pa Yoãm te:
—‍ꞌÃmhok! Kaxĩy hok! Pak mũn putox pix ꞌũyãnãn tuꞌ! ꞌÃxexka, hak
mũn kutõgnãg. Teptu xatek xat, ꞌũg ꞌãp-tox pix? Kaxĩy.
15 Ha Yeyox te:
—‍Topa te ꞌãp-tup, xak putox pix. Yã puxiꞌ. Kaxĩy.
Ha: —‍Ya hamũn. Kaxĩy. Tup-tox pix.
16 Haꞌ pix kux, ꞌĩhã Yeyox te kõnãg kox tuꞌ xupep, ha pexkox xõn, ha Yeyox
te Topa Koxuk pẽnãhãꞌ, ha ta tuꞌ yĩxohoh kuxxuxtut putuk, tu mõktu Yeyox
putox tonnok, tu yĩmũꞌ xip, 17 ha ta Topa yĩy, tu hãmꞌãktux pexkox tuꞌ, hu:
—‍Nũhũ ꞌũgkutok pit. ꞌÃte nõm mõꞌyãy xeꞌẽgnãg, hak kuxa hittupmãhãꞌ! Kaxĩy.
Hãmgãyãgnãg te Yeyox xapit puyĩy hãpkummuk mĩy
4 1 Ha Topa Koxuk te Yeyox mõgãhã hãm panip tuꞌ, ha Hãmãyãgnãg te
Yeyox xapit, puyĩy hãpkummuk mĩy. 2 Yã ꞌãmnĩy xohix te 40 hã ꞌap
xitꞌah Yeyox, ha putup tep-tex, 3 yĩy Hãmgãyãgnãg teꞌ yĩka xupep, tu:
—‍Pax xa yã Topak-tok, ꞌãpuꞌ xat, pu nũhũ mĩkaxxap yãyhã pãm xeꞌeꞌ,
xayĩꞌ mãꞌ. Kaxĩy.
4 Ha Yeyox te:
—‍Topa yõg tappet te tikmũꞌũn xat, pu pãm puxet hã tu hi kaꞌok hok,
pãyãꞌ xat, pu Topa yõg hãmꞌãktux hã tikmũꞌũn kuxa hi kaꞌok. Kaxĩy.
5 Ha Hãmgãyãgnãg te kõmẽn Yenoyanẽn haꞌ mõgãhãꞌ, yã Topa yõg
kõmẽn, ha Topa pet xexka tuꞌ mõgãhãꞌ, puꞌ pet tox xanep yĩmũ ꞌãtiꞌ, 6 ha:
—‍Pax xa Topak-tok, xa nũy nũhãy hãm tuꞌ. Yã Topa yõg tappet te:
“Topa te pexkox yõg xop nũꞌpok putup, nũy ꞌãpẽnã max,
tu ꞌãtat putup, ꞌũyĩm hã ꞌãtat putup,
ka mĩkaxxap ꞌãpata xũy.”
ꞌŨkux. Kaxĩy.
7 Ha:
—‍Pa Topa yõg tappet te hãmꞌãktux kamah, hu: “ꞌÕgnũ Topa hã
hãpkutexꞌex hã gãyã hok.” Kaxĩy.
8 Ha Hãmgãyãgnãg teꞌ mõgãhã yĩktix tox xanep yĩmũꞌ, tu hãm xexka
max xohix tuꞌ mũg, tu hãpxopmãꞌax max xohix tuꞌ mũg, 9 tu:
—‍Pẽnãꞌ! ꞌŨgmũn pu nũꞌãxup, kopxix xaꞌ hõm hãpxop xohix. Kaxĩy.
10 Ha Yeyox te:
—‍ꞌÃkmũnꞌah. Mõg, nũy ꞌãpep. Yã Topa yõg tappet te: “Topap-xehnãg pu
nũꞌãxup, nũy ꞌãkuxaꞌ yẽy.” Kaxĩy.
MÃTEO 3, 4

6
11 Yĩy Hãmgãyãgnãg teꞌ nĩm, ha pexkox yõg nũꞌpok xop nũn, nũy Yeyox
pẽnã max.
Yeyox te hãpxopmã kõnãmãhãꞌ
12 Ha taꞌ nũn xonat xop, tu Yoãm mũg, tu kanet hã mõꞌtat, ha Yeyox
teꞌ yũmmũg, tu hãpxexka Ganinet tuꞌ mõg, 13 tu kõmẽn Nãyane nĩm, nũy
kõmẽn Kapãnãn tuꞌ xip, ha kõnãg xexka Ganinet teꞌ yĩkaꞌ xup, yãꞌ xip
hãpxexka Yemonõm xix Nãptanix tuꞌ. 14 Hõmã, hãmyãxatamuk xohix ꞌĩhã
Topa te hãmꞌãktux, ha tik hittap ꞌIyait te nõm pupi hãmꞌãktux, tu tappet tu
kaxꞌãmiꞌ, nũy tikmũꞌũn xohix pu hãmyũmmũgãꞌ, nũy Yeyox xipꞌax ꞌãktux.
Yã Topa yõg hãmꞌãktux hittap hã Yeyox te kõmẽn Kapãnãn tuꞌ nox xip, yĩy:
15 “Yemonõn yõg hahãm, xix Nãptanix yõg hahãm,
yã kõnãg xexka kux tuꞌ pip, tu kõnãg xexka Yohnãm xatapaꞌ pip,
nõꞌõm puknõg yõg Ganinet.
16 Yãꞌ puknõg xop te hãpkoxtap kopaꞌ pip, tu hãmyũmmũg ꞌohnãg,
tu kuyãnãm xexka pẽnãp-tup, puyĩy hãptupmãꞌ,
puyĩꞌ puknõg xop hãmyũmmũg,
ha kuyãnãm te hãpkoxtap tu mãp-tup,
nũy nõm puknõg xop kuxa hittupmãꞌ.” ꞌŨkux. Kaxĩy.
17 Ha Yeyox te hãmꞌãpak maxꞌax ꞌãktux hãmãxap, hu:
—‍ꞌÃpu, yãyhãhup, tu ꞌõg hãpxopmãꞌax kummuk kux! Yã hõnhã Topa te
yãy yõg tikmũꞌũn xat. ꞌÃpu ꞌĩpkox piꞌ! Kaxĩy.
Yeyox te tik te 4 xãnãhãꞌ
18 ꞌÃmnĩy ꞌũm ꞌĩhã Yeyox te hãpkumep, tu kõnãg xexka Ganinet yõg
hãpkux tuꞌ hãpkumep, ꞌĩhã tik taknõy 2 pẽnãhãꞌ, ha mãm xuk, tuꞌ
xuxetꞌax Xĩmãm, yãꞌ xuxetꞌax nõy te: Pet, xiꞌ taknõy ꞌãxetꞌax ꞌÃneneꞌ, tu
mõ tut panip yõn, tu mãm xuk pax, 19 ha Yeyox te:
—‍ꞌÃpu, ꞌũkpe mõg ꞌũg ꞌãyũmmũgãꞌ, xayĩy tikmũꞌũn tuk ha nũnnãꞌ. Kaxĩy.
20 Yĩy tut panip nĩm, nũy Yeyox mũtik hãpkumep.
21 Haꞌ mõg ꞌĩhã tik taknõy 2 nõy pẽnãhãꞌ, haꞌ xuxetꞌax Tiak, xiꞌ taknõy ꞌãxetꞌax
Yoãm, yã Yemeneo kutok, tu yãy tak yõg mĩpkox kopaꞌ mãm, nũy tut panip mĩy.
Ha Yeyox teꞌ xapit, puyĩy nũ mũtik hãpkumep, 22 ha hãpxip ꞌohnãg ꞌĩhãꞌ mõg, tu
yãy tak nĩm, xix mĩpkox nĩm, nõm te kõnãg yĩmũꞌ mõg, ha Yeyox peꞌ mõg.
Yeyox te hãmyũmmũgãhã xix hittupmãhãꞌ
23 Ha Yeyox te hãpkumep punethok, tu ta Ganinet yõg hãpxexka xohix hã
hãpkumep, tu Topa pet xohix kopa hãmyũmmũgãhãꞌ, tu Topa yõg hãmꞌãpak
maxꞌax ꞌãktux, xix Topa te tikmũꞌũn xatꞌax ꞌãktux, tu tikmũꞌũn pakut xop
hittupmãhãꞌ, 24 ha hãpxexka Xit yõg tikmũꞌũn xohix teꞌ xupak, huꞌ pakut xop tat
Yeyox hah, yã hãmpakut xohix te tikmũꞌũn pakutnãhãꞌ, xix yãmĩy kummuk teꞌ
pakutnãhãꞌ, ha nõm tikmũꞌũn te yãy pu xuꞌux xop tat, xix hãpkumep hok xop
MÃTEO 4

7
tat, ha Yeyox teꞌ xohix hittupmãhãꞌ. 25 Ha tikmũꞌũn xohix punethok teꞌ peꞌ mõg,
yã Ganinet yõg tikmũꞌũn, xix kõmẽn te 10 yõg tikmũꞌũn, xix Yenoyanẽn yõg
tikmũꞌũn, xix Yonex yõg, xix Yohnãm xatapaꞌ pip xop. Yãꞌ xohix te Yeyox peꞌ mõg.
Yeyox te hãmꞌãktux yĩktix yĩmũꞌ
5 1 Jesus te tikmũꞌũn xohix pẽnãhãꞌ, tu yĩktix tuꞌ mõg, tu mõktu
pepiꞌ xip, tuꞌ yũm. Ha yãy yõg tik xop teꞌ yĩkaꞌ mãm, 2 ha
hãmyũmmũgãhãꞌ, nũy Topa yõg hãpxopmãꞌax yũmmũgãꞌ, hu:
3 —‍ꞌŨkuxa hittupꞌax tikmũꞌũn kuxa kopaꞌ hok xop.
Yã Topa te nõm tikmũꞌũn xat xeꞌeꞌ, huꞌ kuxa hittupmãhãꞌ.
4 —‍ꞌŨkuxa hittupꞌax tikmũꞌũn pota punethok xop.
Yã Topa teꞌ kuxa hittupmãp-tup.
5 —‍ꞌŨkuxa hittupꞌax tikmũꞌũn te yãy kutõgnãg peꞌpaxex.
Yã Topa te nõm pu hãmꞌãktux xex, tuꞌ xaxok ꞌohnãg, yĩy pexkox yõg
hãpxop pop putup.
6 —‍ꞌŨkuxa hittupꞌax tikmũꞌũn yĩpkox pip xop, nõm teꞌ xak, nũy Topa
puꞌ yĩpkox piꞌ, tu hãmyok mĩy putup xũy.
Yã Topa teꞌ kuxa mãmmãhãꞌ.
7 —‍ꞌŨkuxa hittupꞌax tikmũꞌũn teꞌ nõy kuxa kaꞌ.
Yã Topa te nõm tikmũꞌũn kuxa kaꞌ.
8 —‍ꞌŨkuxa hittupꞌax tikmũꞌũn kuxa tup xop.
Yã nõm te Topa pẽnãp-tup.
9 —‍ꞌŨkuxa hittupꞌax tikmũꞌũn te yãykix kuxyãhãꞌ.
Yã ꞌõm te Topa hãk-tok xeꞌeꞌ.
10 —‍ꞌŨkuxa hittupꞌax tikmũꞌũn xũy, nõm tikmũꞌũn xũy nũy hãpxopmã max.
Yã Topa teꞌ xexkãnãp-tup ꞌĩhãꞌ hep xop xohix xat.
11 —‍ꞌÃkuxa hittupꞌax ꞌĩhãꞌ gãyxop te ꞌãxũygãhãꞌ, xix ꞌãmãnõg, xix ꞌãkteꞌex
kummuk, xix ꞌãkupex, ꞌũkpe ꞌãmõg hah. 12 ꞌÃkuxa hittupꞌax, yã Topa te xa
popmãp-tup pexkox yõg hãpxop xohix. Yã hõmã tik gãy xop te Topa yõg tik
hittap xop xũygãhãꞌ, tuꞌ pupi hãmꞌãktux xop xũygãhã kamah, ꞌãmũn putuk.
Yeyox te ꞌãmot xuxpex ꞌãktux xix kuyãnãm
13 —‍ꞌÃmot xuxpex teꞌ xitꞌax xuxpexgãhãꞌ, ha xogyĩn kutnat, puyĩy tuk-
tox hok. Ha kaxĩy ꞌãxop te Topa hãꞌ puknõg xop pu hãmmaxnãhãꞌ. Pax pu
ꞌãmot kuꞌuk kummuk hãk-tox, puxix tikmũꞌũn xep-tup nõg, nũy hãptopa
putyõn, haꞌ xohix teꞌ tonnok.
14 —‍Kuyãnãm te hãptupmãhãꞌ, ha kaxĩy ꞌãxop te tikmũꞌũn pu Topa pupi
hãmꞌãktux, tuꞌ kuxa hittupmãhãꞌ. Tikmũꞌũn xohix te kõmẽn pẽnãhãꞌ, yã kõmẽn
te yĩktix yĩmũꞌ pip. 15 Piyã kuyãnãm tatꞌax pahaꞌ, nũy nõ manax kopaꞌ yũm,
tu mõꞌnĩy? ꞌAp yũmꞌah, pãyã mĩmpe yĩmũꞌ yũm, puyĩy mĩptut xohix tupmãꞌ,
puyĩy tikmũꞌũn nõ hãmpẽnã max. 16 Ha kaxĩy ꞌãxop te tikmũꞌũn pu Topa yõg
MÃTEO 4, 5

8
hãmꞌãktux ꞌãktux, pu tu hittup, ha kaxĩy ꞌãxop te hãpxopmã max, pu tikmũꞌũn
pẽnãꞌ, nũy ꞌÃtak Topa pu hãmꞌãktux, hu: “Yã ꞌãmax xeꞌẽgnãgꞌ”! Kaxĩy.
Tu Topa yõg xatꞌax ꞌãktux
17 —‍ꞌŨpeꞌãpaxeh hok, hu: “Yeyox nũn, nũy Mõyyex yõg xatꞌax nõaꞌ.” Kaxĩy.
ꞌÃmhok. ꞌAknũnꞌah ꞌũg tik hittap xop yõg hãmꞌãktux nõaꞌ, nõm hittap xop te
Topa pupi hãmꞌãktux, ꞌap nõãp-tupꞌah, pak nũn nũy hãmꞌãktux yũmmũgã max.
18 ꞌŨxaxok hok. Yãꞌ xatꞌax xip kaꞌok, tuꞌ nõg ꞌohnãg. Yã Topa yõg tikmũꞌũn teꞌ
xuktux putup mõꞌkumaꞌ mõg. Yã kaxꞌãmiꞌax kutõgnãg xut ꞌohnãg, ꞌĩhã pexkox xip,
ꞌĩhãꞌ xip hahãm. ꞌŨnõg ꞌohnãg. 19 Yĩy tikmũꞌũn yĩpkox pip ꞌohnãg Topa yõg xatꞌax
puꞌ, xiꞌ nõy yũmmũgãꞌax, puꞌ yĩpkox hok, puxix ꞌõm kutõgnãg. Yã Topa te nõm
kutõgnãg ꞌãktux putup ꞌĩhã yãy yõg tikmũꞌũn xat. ꞌA xexkãnãp-tupꞌah. Pa tikmũꞌũn
yĩpkox pip, tuꞌ nõy yũmmũgãꞌax, pu yĩpkox piꞌ, puxix Topa xexka ꞌãktux putup,
ꞌĩhã yãy yõg tikmũꞌũn xat. 20 Yĩy hãpxopmã max Topa puꞌ, tu ꞌãyĩpkox pip pax
Topa puꞌ, puyĩy Topa ꞌãxop pu pexkox xõn, ꞌĩhã yãy yõg tikmũꞌũn xat, nũy: Mõnãy!
Kaxĩy. Pa hãmyũmmũg xop yĩpkox ꞌohnãg xop, xix Paniye xop teꞌ mõxakux ꞌohnãg.
Tu tep-tup nõg ꞌãktux
21 —‍Tik hittap te mõnãyxop pu hãmꞌãktux, tuꞌ xat, hu: “ꞌŨp-tex hok.
Tikmũꞌũn teꞌ nõy putex, puxiꞌ mõgã tik pa te hãmyũmmũg keppah, puyĩꞌ
yõg hãpkummuk mĩyꞌax kopit.” Kaxĩy. 22 Pa ꞌãte ꞌãxat, hu: Tikmũꞌũn teꞌ
nõy hãꞌ gãy, puxix tik pa te hãmyũmmũg kopit. Ha tikmũꞌũn teꞌ nõy pu
hãmꞌãktux, hu: “ꞌÃkummuk,” kaxĩy, puxix tik xexka xop hãpkummuk
mĩyꞌax kopit. Ha tikmũꞌũn teꞌ nõy putup nõg, hu nõm pu hupmãhãꞌ,
hu: “ꞌÃp-tox kummuk!” kaxĩy, puxix nõm mõgã Hãmgãyãgnãg Pet hah.
23 ꞌÃmõg Topa pet hah, nũy Topa pu hãpxop mõꞌhap, nũy tuꞌ haxyãꞌ, tu
hãmpeꞌpaxex, hu: “Hamũn, ꞌũgnõy gãy, tute ꞌã tuꞌ gãy,” kaxĩy. 24 ꞌÃpu, ꞌõg
hãpxop mõꞌhapꞌax nĩm, nũy mõg mõꞌkaꞌok ꞌãnõy hah, pu ꞌãnõy mũtik
yãyhã ꞌãxape ꞌũxeheh, hak-nãy tu ꞌõg hãpxop mõꞌhap Topa puꞌ.
25 —‍Tikmũꞌũn te xa tuꞌ gãy, xix ꞌãkupex, tu ꞌãmõgãꞌax tik pa te
hãmyũmmũg hah, ꞌãpu nũ mũtik yãyhã ꞌãxape, ka ꞌãmõgã tik pa te
hãmyũmmũg hah, haꞌ xat pu ꞌãmũy, nũy kanet kopa mõꞌãtat. 26 Pax xa kanet
kopa ꞌãxip, hu ta ꞌãxupa hok, tu mõktu tayũmak xexka hã pago, xayĩy ꞌãpep.
ꞌŨnõy hãꞌ xupxet ꞌãktux
27 —‍ꞌÃxop te Topa yõg xatꞌax yũmmũg, ha: “ꞌÃnõy hã xupxet hok!”
Kaxĩy. 28 Pa ꞌãte ꞌãxat, hu: ꞌŨn ꞌãpa hã pẽnã hok, nũy ꞌũn putup hok.
Tikmũꞌũn te ꞌũn pẽnãhãꞌ puxiꞌ kuxa kopaꞌ xonnix. 29 Pax xa ꞌãpa xeꞌe xa
hãpxopmã kummugãꞌ, ꞌãpu ꞌãpa xut, nũy putyõn. Yãꞌ max ꞌãpap-xet, ha
taꞌ kummuk, xa Hãmgãyãgnãg Pet ha ꞌãmõg. 30 Pax xa ꞌãyĩm xeꞌe xa
hãpxopmã kummugãꞌ, ꞌãpu ꞌãyĩm xax mĩkax hã, nũy putyõn. Yãꞌ max
ꞌãyĩm puxet, ha taꞌ kummuk xa Hãmgãyãgnãg Pet ha ꞌãmõg.
MÃTEO 5

9
Tik te yãy xetut nĩm ꞌãktux
31 —‍Tikmũꞌũn te ꞌãxat kamah, hu: “Tik teꞌ xetut nĩm putup, puxix tappet
mĩy, pu tuꞌ nĩm.” Kaxĩy. 32 Pa ꞌãte ꞌãxat xeꞌeꞌ: ꞌÃxetut nĩm hok. Pẽyãꞌ xetut te
tik nõy mũtik xonnix, ꞌũtux hok pu nĩm, pãyãꞌ xetut te tik nõy mũtik xonnix
hok, ꞌũtux hok pu nĩm hok, ka tik nõy mũy, nũy nũ mũtik tuꞌ xonnix. Yã tik
teꞌ nõy xetut mũg, tu nõm hãꞌ xupxet, yã hãpkummuk mĩy.
Tute hãmꞌãktux xexꞌax ꞌãktux
33 —‍Mõnãyxop hittap te Topa yõg hãmꞌãktux ꞌãpak, hu ꞌãxat, hu: “Xate
Topa pu hãmꞌãktux xex, ꞌãpuꞌ xaxok hok, nũy mĩy.” Kaxĩy. 34 Pa ꞌãte: Topa
ꞌãxetꞌax ꞌãktux hok ꞌĩhã hãmꞌãktux xex, xix pexkox ꞌãktux hok. Pexkox yã
Topa xipꞌax xeꞌẽgnãg hah, 35 xix hãm xexka ꞌãktux hok, ꞌĩhã hãmꞌãktux
xex. Yã hãm xexka xohix Topa yõg, yãꞌ yõg hãptonnokꞌax. Ha Yenoyanẽn
ꞌãktux hok. Yã Topa teꞌ xat xeꞌẽgnãg, yãꞌ yõg kõmẽn xeꞌeꞌ, 36 xix ꞌãxe ꞌãktux
hok, ꞌĩhã hãmꞌãktux xex. Piꞌyãꞌ yãy xe yãyhã yãm-nok, xip-nĩy? ꞌAp yãyhã
yã yũmmũgꞌah, yĩy ꞌãxe ꞌãktux hok, ꞌĩhã hãmꞌãktux xex. 37 Hu hãmꞌãktux
kutõgnãg, hu: “ꞌÃmhok,” kaxĩy, xix: “Hamũn,” kaxĩy. Puxiꞌ. Yã Hãmgãyãgnãg
mũn te tikmũꞌũn yũmmũgãhã, pu hãmꞌãktux tox. Hãmꞌãktux tox hok!
ꞌŨnõy pu hãpkummuk hãꞌ yãnãn ꞌãktux
38 —‍Tikmũꞌũn te: “Yãꞌ max tikmũꞌũn kummuk pu hãpkummugã ꞌũyãnãn tuꞌ,
nũy tu pago.” Kaxĩy. 39 Pa ꞌãte: Tikmũꞌũn kummuk pu hãpkummugã hok, nũy
tu pago hok, pa tik te ꞌãpayĩn kix, ꞌãpuꞌ tux hok pu ꞌãpayĩn nãg nõy kix kamah.
40 Tikmũꞌũn te ꞌõg topixxax xut, ꞌãpu ꞌõg kayak tuꞌ hõm kamah, ha tu paxmõg.
41 Xonat puknõg te ꞌãxat, xayĩy ꞌũyõg hãpxop putux tat, ꞌãpuꞌ tat. Ha ꞌãxat pu
kinõm puxet hãꞌ tat, ꞌãpu kinõm 2 hãꞌ tat. 42 Tikmũꞌũn te hãpxop ꞌũm xak, nũy ta
putpu xaꞌ hõm, ꞌãpu tuꞌ hõm. Tikmũꞌũn teꞌ hok xak hãpxop ꞌũm, ꞌãpu tuꞌ hok hõm.
ꞌÃhãꞌ puknõg xop putup pax
43 —‍Tikmũꞌũn te: “ꞌÃxapep-tup pax, paꞌ puknõg xiꞌ gãy xop putup hok.”
Kaxĩy. 44 Pa ꞌãteꞌ: Gãy xop putup pax, xiꞌ puknõg xop, xix Topa tuꞌ xax, pu nõm
hã hãmmaxnãꞌ, 45 xa ꞌãxop yãyhã Topa hã ꞌãk-tok xop xeꞌeꞌ. Yã Topa te mãyõn
xat, puꞌ hep xop xohix pu hãm pukgãꞌ, yã hãpxopmã kummuk xop puꞌ mĩy, xix
hãpxopmã max xop puꞌ mĩy kamah. Tute tex nũꞌkutnãhãꞌ hep xop xohix pu. Yã
tikmũꞌũn te hãmyok mĩy xop pu nũꞌkutnãhãꞌ, xix tikmũꞌũn te hãpkoheꞌ mĩy xop
pu tex nũꞌkutnãhã kamah. 46 ꞌÃxop te ꞌãxapep-tup xix tikmũꞌũn gãy xop putup
nõg, puxix Topa xa pexkox yõg hãpxop ꞌũm hõm hok. Yã tik kummuk xop te
gohet pupi tayũmak pop, tute yãy xape xop mũn putup pax, xiꞌ puknõg xop
putup nõg. 47 ꞌÃxop te ꞌãxape xop mũtik hãmꞌãktux puxehnãg, ha taꞌ puknõg
xop te yãy xape mũtik hãmꞌãktux kamah, nõm xop te Topa hãꞌ puknõg xop.
MÃTEO 5

10
48 —‍ꞌÃpu hãpxopmã max xeꞌẽgnãg, nũy ꞌÃtak Topa putuk, ha pexkox
kopaꞌ xip, tu hãpxopmã max xeꞌẽgnãg mõꞌkumaꞌ mõg.
ꞌÃnõy pu hãmmaxnãhãꞌ
6 1 —‍ꞌÕg pa ꞌãtiꞌ! Hãpxopmã max hok, nũy mõꞌãmã hok, puyĩy
tikmũꞌũn pẽnãꞌ. ꞌÃmhok. Pa Topa pu hãpxopmã max xeꞌe, puyĩy
Topa pẽnãꞌ. Pãyã xateꞌ mĩy puyĩy tikmũꞌũn pẽnãꞌ, puxix Topa yũmũg Tak
xa pexkox yõg hãpxop ꞌũm hõm putup hok.
2 —‍Xate tikmũꞌũn hok xop pu hãpxop hok hõm, ꞌãpu ꞌĩy hok. Yã mõꞌãmãꞌax
xop pa max, pãyãꞌ kuxa kummuk, tu yãy yõg hãpxopmã maxꞌax ꞌãktux, tu Topa
pet kopa hãmꞌãktux, xix kõmẽn kopa hãmꞌãktux, pu tikmũꞌũn hãpxopmãꞌax
yũmmũg, tu: “Yã tik max, ꞌõhõm!” Kaxĩy. Yã Topa tep-tup nõg, tu: “Puxiꞌ.”
Kaxĩy. Tu pexkox yõg hãpxop ꞌap hõm putupꞌah, mõꞌãmã pax xop puꞌ hõm
putupꞌah. 3 Xate tikmũꞌũn hok hã nõ teheh, ꞌãpu hãmꞌãktux hok, pu tikmũꞌũn
ꞌũm yũmmũg hok, pu ꞌãxape xeꞌe yũmmũg hok. 4 Tikmũꞌũn ꞌũm puꞌ xuktux hok,
puxix Topa xa pexkox yõg hãpxop hõm. Yã Topa te hãpxopmãꞌax xohix pẽnãhãꞌ.
Tute Topa pu hãmꞌãktux ꞌãktux
5 —‍Tikmũꞌũn te mõꞌãmã, yãꞌ pa max, pãyãꞌ kuxa kummuk, tu Topa pu
hãmꞌãktux hitop, tu kõmẽn yõg putat hãꞌ xuktux, xix Topa pet kopaꞌ xuktux,
pu tikmũꞌũn pẽnãꞌ, nũy tu: “ꞌŨmax nõꞌõm! Yã Topa pu hãmꞌãktux pax!” Kaxĩy.
Pãyã yãꞌ koit. 6 Pa ꞌãpet ha mõg, nũy mõhãmyĩnnĩn, nũy ꞌãp-xehnãg hã ꞌõg
ꞌÃtak Topa pu hãmꞌãktux, ꞌĩhã xate nõm pẽnã ꞌohnãg, haꞌ xupak, tu xaꞌ hõm
pexkox yõg hãpxop. Yã Topa ꞌõg ꞌÃtak te hãpxopmãꞌax xohix pẽnãhãꞌ.
7 —‍Topa pu ꞌãp-xehnãg hã hãmꞌãktux, tu hãmꞌãktux ꞌãhĩynãg hok,
ꞌũpuknõg xop putuk. Nõm te Topa pu hãmꞌãktux tox, tu hãmꞌãktux ꞌãhĩynãg,
puyĩy Topaꞌ xupax. 8 Kaxĩy mĩy hok! Topa yã ꞌõg ꞌÃtak, tu hãmyũmmũg
xeꞌẽgnãg, tu xatep-tup yũmmũg tap. 9 Yĩy Topa pu hãmꞌãktux kaxĩy, hu:
“Yũmũg ꞌÃtak, nõm te pexkox tuꞌ xip, pũyãꞌ xohix kuxaꞌ yẽy ꞌãkeppah,
tu ꞌãmax xeꞌẽgnãg ꞌãktux.
10 Pũyã tikmũꞌũn xohix ꞌõg xatꞌax puꞌ yĩpkox piꞌ nũhũ hãhãm tuꞌ.
Yã pexkox yõg xop xohix yĩpkox pip nõmhã.
11 ꞌÃmnĩy xohix ꞌĩhãk mũꞌã hãpxop ꞌũm nũꞌkutnãꞌ, ꞌũyĩꞌ mãꞌ,
12 hak mũ yõg hãpkummuk mĩyꞌax xaxogãꞌ, pu tu kux.
Tikmũꞌũn tek mũg kummugãhãꞌ, hak mũꞌãte nõm mĩyꞌax xaxogãhã
kamah, haꞌ kux.
13 ꞌŨtux hok puk mũg kopit hok, ꞌũgmũꞌã hãpxopmã kummuk hok, pak
mũg kaꞌõgãꞌ, ꞌũyĩy hãpxopmã max.
Yã ꞌãxexka xeꞌẽgnãg, hu tikmũꞌũn xohix xat, xix hãpxop xohix xat, haꞌ xat
kuxyã ꞌohnãg, ꞌãkaꞌok xeꞌẽgnãg hah, xix ꞌãmax xeꞌẽgnãg kamah. Hamũn.”
MÃTEO 5, 6

11
14 —‍ꞌÃnõy yõg hãpkummuk mĩyꞌax xaxogãꞌ, puxix ꞌÃtak Topa ꞌõg
hãpkummuk mĩyꞌax xaxogãꞌ, 15 pa ꞌãnõy yõg mĩyꞌax xaxogã hok, puxix
Topa ꞌõg mĩyꞌax xaxogã ꞌohnãg.
ꞌÃxit hok nũy Topa pu hãmꞌãktux
16 —‍ꞌÃxit hok nũy Topa pu hãmꞌãktux, hu ta ꞌãpa hittup. Tikmũꞌũn te
mõꞌãmãꞌ, yãꞌ pa max, pãyãꞌ kuxa kummuk, tuꞌ xit hok ꞌĩhã pa kummuk,
puyĩy tikmũꞌũn pa kummuk pẽnãꞌ, tuꞌ xit hok yũmmũg, pa Topa te nõm xop
pu pexkox yõg hãpxop hõm ꞌohnãg. 17 ꞌÃxit hok, nũy Topa pu hãmꞌãktux,
ꞌãpu ꞌãpayĩn pix, xix ꞌãxe yoaꞌ, 18 puyĩy tikmũꞌũn ꞌãxit hok yũmmũg hok.
Yã ꞌÃtak Topa puxehnãg teꞌ yũmmũg, ha tikmũꞌũn te Topa pẽnã hok, ha
hãpxopmãꞌax xohix pẽnãhãꞌ, tu xa pexkox yõg hãpxop hõm putup.
Pexkox yõg hãpxop ꞌãktux
19 —‍Hãpxop xohix pop hok, xix tayũmak xexka pop hok, nũy yãy tu
nũꞌxok, tu mõktu ꞌõg tayũmak xohix nũnte hãm xexka tuꞌ. Yãꞌ kut teꞌ
mãhãꞌ, hak-nox, haꞌ nõg, ha tik kummuk teꞌ nõy yõg hãpxop hãꞌ xupxet, xix
ꞌõg tayũmak hãꞌ xupxetꞌax, yĩy pop hok, 20 pa pexkox yõg hãpxop pop, tik
ꞌũm te nõm hãpxop hãꞌ xupxet hok, xik-nox ꞌohnãg. 21 Tikmũꞌũn kuxa te yãy
yõg hãpxop xak, yĩy pexkox yõg hãpxop xax, puyĩy ꞌãkuxa hittupmãꞌ.
Kuyãnãm ꞌãktux
22 —‍Kuyãnãm te tikmũꞌũn pa putuk, tu hãptupmãhãꞌ, ha tikmũꞌũn te
hãmpẽnã max. ꞌŨpa max, puxix nõmhã hãmpẽnã max kamah. 23 ꞌŨpa
kummuk, puxix hãmpẽnã kummuk. Pax xa ꞌãpa hok, puxix hãmpẽnã
ꞌohnãg. Yã ꞌãmnĩy koxtap pax!
Tute ꞌũptexop xexka ꞌãktux
24 —‍Tikmũꞌũn teꞌ xuxyã 2 pu hãm hok. Yãꞌ xuxyãp-xet putup nõg, tu taꞌ
nõy putup pax. Kaxĩy tikmũꞌũn te Topa pu hãm hok ꞌĩhã tayũmak xak pax.
25 —‍Yĩy ꞌãte xa hãmꞌãktux, hu: Xutigã hok, nũy tu: “ꞌÃtep-tep mãꞌax?”
Kaxĩy. Xix: “ꞌÃtep-tep mũn xoꞌopꞌax?” Kaxĩy. Xix: “Piꞌa ꞌãte mõꞌtatꞌax?”
Kaxĩy. Yũmmũg. Tikmũꞌũn yĩn max hãmãxap, hak-nãy tu hãpxop xitꞌax
xix topixxax. 26 Putuxnãg pẽnãꞌ, haꞌ topahaꞌ. ꞌAp hãpxop xap xokꞌah,
xix hãpxop ta nũnnã ꞌohnãg, tuꞌ pet kopaꞌ xex ꞌohnãg, pa ꞌÃtak Topa te
pexkox tuꞌ xip, tu pẽnãnãꞌ xip, puyĩy putuxnãg xit. Piꞌyã Topa tep-tup? Yã
Topa te tikmũꞌũn putup xexkah, tu putuxnãg xop putup kutõgnãg. 27 Pax
pu tikmũꞌũn ꞌũm yãykuxop xexkah, puxiꞌ xutigãꞌax hãꞌ hi tox ꞌohnãg.
28 —‍Teptu hãmpeꞌãpaxex, hu: “Tep tek mõꞌtatꞌax?” Kaxĩy. Pẽnã mĩnnut.
ꞌŨtuk max, tuꞌ hãm ꞌohnãg, tu topixxax xap ꞌohnãg yãy puꞌ, 29 pa ꞌãte xa hãpxeꞌe
ꞌãktux: Mõnãyxop hittap Xanomãm yãꞌ xexkah, tu ꞌIyaet yõg tikmũꞌũn xohix
xat, tup-texop xexkah, tu topixxax max mõꞌtat, pa Xanomãm xax ꞌãnuk max,
MÃTEO 6

12
ha mĩnnut xax ꞌãnuk mãynãg. 30 Yã Topa te mĩnnut xop xax mĩy, xix mĩxux
xop xax, ha hõnhãꞌ xip, tu hãptup ꞌĩhãꞌ tap, ha kuxap hã mõꞌxut, haꞌ nõg, yĩy
Topa te xa topixxax mõꞌtatnãhã kamah, pa ꞌãkuxa mãm puꞌuk Topa kopah.
31 Yĩy yãy xutigã hok, nũy ꞌãxitꞌax xax hok, nũy xoꞌopꞌax xax hok, nũy topixxax
xax hok. ꞌÃmhok. Kaxĩy hok. 32 ꞌŨpuknõg xop te Topa yũmmũg ꞌohnãg, huꞌ
yãykuxop punethok, pa Topa yã ꞌãxop hã ꞌÃtak, tu pexkox tuꞌ xip, tu ꞌãpẽnãnãꞌ
xip, nũy xa hãpxop xohix mõꞌpok, 33 yĩy Topa xax hãmãxap, tu nõm pu
ꞌãyĩpkox piꞌ, nũy nõ xatꞌax mĩy, ha xaꞌ popmãp-tup hãpxop xohix. 34 Yĩy xutigã
hok ꞌĩhã hãptup peꞌãpaxex. Yã hãptup mõꞌnãp-tup, ha xate hãpxop xak putup
punethok, nũy yãykuxop. Pa hõnhã yã yãykuxop punethok. Yãꞌ puxiꞌ.
ꞌŨnõy yõg hãpxopmãꞌax ꞌãktux kummuk
7 1 Tikmũꞌũn nõy yõg hãpxopmãꞌax kopit hok, nũy nõ kummuk ꞌãktux
hok, ka Topa ꞌõg hãpxopmãꞌax kopit, nũy ꞌãkummuk ꞌãktux kamah.
2 ꞌÃxop te ꞌãnõy yõg hãpxopmãꞌax kopit, ha kaxĩy Topa te ꞌãkopit putup; ꞌõg
panat hã ꞌãnõy pu hãpxop xap hãmenex, puxix nõm panat hã xa hãmenex
hãpxop xap kamah ꞌũyãnãn tuꞌ. ꞌÃnõy puk-tõgnãg hõm, puxix xaꞌ hõm ꞌãk-
tõgnãg kamah. ꞌÃnõy pu punethok hõm, puxix xaꞌ hõm punethok ꞌũyãnãn
tuꞌ. 3 Xate ꞌãnõy yõg hãpxopmãꞌax kummuk pẽnãhãꞌ. Teptu xate pẽnã hok
yãy yõg hãpxopmãꞌax kummuk? 4 Xate ꞌãnõy pu hãmꞌãktux, hu: “Nãy, tux
hok ꞌũ xa hãmyũmmũgãꞌ,” kaxĩy, ꞌĩhã ꞌãpa te hãmyũmmũg ꞌohnãg. 5 ꞌÃpa
te hãmyũmmũg ꞌohnãg, yã mõꞌãmãꞌ. Yãy yõg hãpxopmã kummuk kux
hãmãxap, xayĩy kunãy tu ꞌãnõy yõg hãpxopmãꞌax kummuk kuxyãꞌ.
6 —‍Topa yõg hãpxop max hõm hok kokex putuk xop puꞌ, ka gãy ha ꞌãp-top.
ꞌÕg kupxat xap max hõm hok xapup putuk xop puꞌ, kaꞌ gãy ha nõm tonnok.
Kaxĩy Topa yõg hãmꞌãktux ꞌãktux hok hãmgãy xop puꞌ, ka ꞌãp-tex ꞌũgãy tuꞌ.
Topa mũn max
7 —‍Topa tuꞌ xax, puxix xaꞌ hõm. ꞌŨxax, hu taꞌ xipiꞌ, hãptopa ꞌãxip, tuꞌ xãnãꞌ,
puxix xaꞌ xõn. 8 Tikmũꞌũn te ta tuꞌ kax, puxiꞌ pop, ha tikmũꞌũn teꞌ xak, puxiꞌ xipiꞌ,
ha Topa te hãpxõn putup ꞌĩhã tikmũꞌũn te hãptopa xãnãhãꞌ, hu: “Hãpxõn!” Kaxĩy.
9 ꞌÃk-tok te pãm xak. ꞌOk hõm putup mĩkaxxap, nũy tu yãnãn? ꞌÃmhok! 10 ꞌÃk-tok
te mãm xak. ꞌOk hõm putup kãyã gãy, nũy tu yãnãn? ꞌÃmhok. ꞌAp yãnãn putupꞌah.
11 Tikmũꞌũn kuxa kummuk, tu hãpxopmã kummuk, pak-tok putup pax, tu tu
hãpxop max hõm, ha ꞌÃtak Topa kuxa max xeꞌẽgnãg, tu pexkox tuꞌ xip, tuꞌ yãy
kutok xop pu hãpxop max xeꞌe popmãhãꞌ, ꞌĩhãk-tok xop te ta tuꞌ kax, puꞌ popmãꞌ.
12 —‍Xatep-tup tikmũꞌũn xa hãmmaxnãꞌ, yĩy nõm pu hãpxopmã max
hãmãxap. Yã Mõyyex teꞌ xat, xix tik xop hittap te yũmũꞌã hãmyũmmũgãhãꞌ.
Tute putat 2 ꞌãktux
13-14 —‍Hãmpakꞌax yĩkox kutõgnãg hã mõy mõnãy. Ha taꞌ xip hãmpakꞌax
yĩkox xexkah, ꞌũyõg putat te Topa yõg putat xakgãhãꞌ, ha tikmũꞌũn punethok
MÃTEO 6, 7

13
te putat xexka hãꞌ mõg, yĩy mõnãy hok, pak-tõgnãg nõm hãmpakꞌax yĩkox hã
mõnãy, nũy Topa yõg putat xeꞌe hã mõg, xayĩy ꞌãhi xeꞌẽgnãg mõkuma mõg.
Tute tik xop te mõꞌãmãꞌax ꞌãktux
15 —‍ꞌÕg pa ꞌãtiꞌ! Yã tik xop te mõꞌãmãꞌ, tu Topa pupi hãmꞌãktux xop putuk,
pãyã hamũnꞌah. Yãꞌ koit. ꞌŨpa te kahnẽn pa putuk, pãyãꞌ kuxa kopa kokex
gãynãm putuk. 16 Tu hãmꞌãktux max, pa hãpxopmã kummuk. Xate tikmũꞌũn
yõg hãpxopmãꞌax pẽnãhãꞌ, nũy tikmũꞌũn yũmmũg. Mĩm kup te xãpxox tahaꞌ,
pãyã ꞌa xupxak taꞌah, xix gõyap taꞌah. 17-18 Kaxĩy mĩm kup max xohix te mĩnta
max tahaꞌ, ꞌap kummuk ꞌũm taꞌah, ha mĩm kup kummuk te mĩnta kummuk
tahaꞌ, ꞌap max mũn taꞌah, 19 ha tikmũꞌũn teꞌ kup kummuk xak, pu hãm tu nãy,
pu kuxap hã mõꞌxut, haꞌ nũꞌ nĩꞌ nũy nõg. 20 Ha kaxĩy ꞌãxop te tik te mõꞌãmãꞌax
pẽnãhãꞌ, tuꞌ yõg hãpxopmãꞌax kopit, nũy yõg hãpxopmãꞌax kummuk yũmmũg.
Tikmũꞌũn te Yeyox puꞌ yĩpkox pip
21 —‍Tikmũꞌũn tek xãnãhãꞌ, hu ꞌãtu: “Yãyãꞌ, Yãyãꞌ,” kaxĩy, pa ꞌũyãg yĩpkox
ꞌohnãg, ha yõgnũ ꞌÃtak Topah, tu pexkox tuꞌ xip, tu nõm yĩpkox hok xop xat
putup ꞌohnãg. Pa tikmũꞌũn yãg yĩpkox piꞌ, puxix Topa nõm xat. 22 Yãꞌ yõg hãptup
xeꞌe mõꞌnãꞌax, ꞌĩhã tikmũꞌũn punethok te: “Yãyãꞌ, Yãyãꞌ, ꞌũgmũꞌãte ꞌãxuxetꞌax
ꞌãktux nũy hãmꞌãpak maxꞌax ꞌãktux, tu yãmĩy kummuk mõy tikmũꞌũn kuxa
kopah, tu hãpxopmã kaꞌok xeꞌẽgnãg, tikmũꞌũn puxet teꞌ mĩy hok,” kaxĩy, 23 kopxix
hãmꞌãktux putup, nũy tu nõy yãnãn, hu: “ꞌÃte ꞌãyũmmũg ꞌohnãg. Mõy, mõg, nũy
ꞌãpep, ꞌãte ꞌãp-tupꞌah, ꞌãxop te hãpxopmã kummuk punethok hah.” Kaxĩy.
Tute mĩptut mĩyꞌax ꞌãktux
24 —‍Tikmũꞌũn te yõg hãmꞌãktux ꞌãpak, tuꞌ yĩpkox piꞌ, puxix ta tu
hãmyũmmũg, yã tik pet max putuk, ha mĩkaxxap xexka yĩmũꞌ yãꞌ pet,
25 ha tex gãy mõꞌyũm, tuꞌ xupep, tu yã kõnãg xet, ha ꞌãmuuh gãy te
mõꞌkouk xexkah, pa mĩptut yũm kaꞌok mĩkaxxap xexka hã.
26 —‍Ha tikmũꞌũn te yõg hãmꞌãktux ꞌãpak, tuꞌ yĩpkox ꞌohnãg, tu hãmyũmmũg
ꞌohnãg, tu tik pet kummuk putuk, ha ꞌãmot yĩmũꞌ yãꞌ pet. 27 Ha tex gãy kaꞌok, ha
mĩptut te ꞌãmot tu mõꞌyũm, tuꞌ puꞌuk, tu yãy koxyõy, tu nũꞌnãnãm. Ta tuꞌ kux.
Yeyox te hãmꞌãktux kaꞌok
28 Tu hãmꞌãktux kux, ha tikmũꞌũn kuxãnõg. Yã hãmꞌãktux kaꞌok hã
Yeyox te tikmũꞌũn pu hãmyũmmũgãhãꞌ. 29 Tik te hãmyũmmũg xop te
hãmꞌãktux puꞌuk, pãyã Yeyox mũn te hãmꞌãktux kaꞌok, ꞌũxat tuꞌ.
Yeyox te tik xax kunutnãm tapmãhãꞌ
8 1 Yeyox te yĩktix tuꞌ yĩxohoh, ꞌĩhã tikmũꞌũn xohix punethok teꞌ peꞌ
mõg, 2 ha tik pakut nũn, tuꞌ xax kunut, tu Yeyox keppaꞌ kopaxux hãꞌ
nãhãꞌ, tu tu nũꞌ xup, tu:
MÃTEO 7, 8

14
—‍Yãyãꞌ, ꞌok xatek putup ꞌũg hittupmãꞌ? Kaxĩy.
3 Ha Yeyox mõꞌyĩm kutit, tu tik ꞌãpit, tu:
—‍Hamũn. ꞌÃte ꞌãp-tup. ꞌÃhittup. Kaxĩy.
Hãpxip ꞌohnãg ꞌĩhã tik xax max xupep, 4 ha Yeyox te:
—‍Tikmũꞌũn pu ꞌãktux hok, pa ꞌãmãnex ha mõg hãmãxap, pu ꞌãxax
pẽnãꞌ, nũy ꞌãhittup yũmmũg, hak-nãy tu Topa pu hãpxop mõꞌhap, pu tu
hax. Yã hõmã mõnãyxop Mõyyex te hãpxop mõꞌhap xat, pu tikmũꞌũn pu
yãy hittupꞌax yũmmũgãꞌ. Kaxĩy.
Yeyox te kãmãnat hittupmãhãꞌ
5 Tu taꞌ mõg, Yeyox mõg kõmẽn Kapãnãn haꞌ, tuꞌ mõg tu mõktuꞌ xupep,
paꞌ xip tik te Hõm yõg gohet puknõg puꞌ hãm, tu Yeyox haꞌ nũn, tu ta tuꞌ
xak, puꞌ yõg kãmãnat hittupmãꞌ, 6 hu:
—‍Notot, yõgnũ kãmãnat tek pet tuꞌ xip, tu pakut xexkah, tu hãpkumep
hok. Yãꞌ xũy xexkah. Kaxĩy.
7 Ha Yeyox te:
—‍ꞌŨgmõg, nũy nõꞌ hittupmãꞌ. Kaxĩy.
8 Ha gohet yõg tik te:
—‍ꞌÃmhok! ꞌÃmõg hok! Nãy. ꞌÃxexkah, hakmũn kutõgnãg, yĩk pet ha mõg
hok. ꞌÃpu, hãmpakutꞌax xat, pu kãmãnat nĩm, haꞌ hittupmãp-tup. 9 ꞌŨgmũn
yĩpkox xip yõgnũ xexka xop puꞌ, tu xonat xop xat ꞌũyãnãn tuꞌ, hakmũn pu
yĩpkox pip. ꞌÃte xonat puxet xat, hu: “Mõg,” kaxĩy, haꞌ mõg, ha xonat nõy xat,
hu: “Mãꞌ,” kaxĩy, haꞌ nũn. Haꞌ nõy xat, hu: “Mõy mĩy!” kaxĩy, haꞌ mĩy. Kaxĩy.
10 Ha Yeyox teꞌ xupak, tuꞌ kuxa hittup, tu tikmũꞌũn teꞌ peꞌ mõg pu hãmꞌãktux, hu:
—‍ꞌÃte xa hãpxeꞌe ꞌãktux: Nũhũ tik kuxa yũm kaꞌok ꞌũgkopah, ha ꞌIyaet yõg
tikmũꞌũn kuxa mãm puꞌuk, yũmũ yõg tikmũꞌũn kuxa mãm puꞌuk. 11 ꞌŨxaxok
hok! Hãmpuknõg xop nũn putup, tu hãm xexka xohix tuꞌ nũn putup, nũy
ꞌãmuk xexka mã Yoneo xop mũtik, ꞌĩhã Topa te yãy yõg tikmũꞌũn xat, ha
mõnãyxop hittap ꞌAmanãm mũtik xit putup, xix mõnãyxop hittap ꞌIyak mũtik
xit putup, xix mõnãyxop hittap Yako mũtik xit putup, 12 ha Topa te ꞌIyaet yõg
tikmũꞌũn mõꞌpok putup hãptopaꞌ, tuꞌ papuk putup, hãpkoxtap kopaꞌ pip putup,
ꞌũkuxa mãm ꞌohnãg hah. Tuꞌ xũy xexkap-tup, hu potaha hãptopaꞌ pip tuꞌ. Kaxĩy.
13 Tu gohet yõg tik pu hãmꞌãktux, hu:
—‍ꞌÃpet ha mõg. ꞌÃkuxa yũm kaꞌok ꞌũgmũn kopah, yĩy Topa te ꞌõg
kãmãnat hittupmãhãꞌ. Kaxĩy.
Hãpxip ꞌohnãg ꞌĩhã kãmãnat hittup.
Yeyox te tikmũꞌũn punethok hittupmãhãꞌ
14 Ha taꞌ mõg Yeyox, tu Pet xetut mũg tut haꞌ mõg, tuꞌ mõg tu mõktu mĩptut tuꞌ
xupep, tu mõꞌnãhãꞌ, paꞌ xetut mũg tut pip, ꞌũpakut tuꞌ, tuꞌ xax pukpex, 15 ha Yeyox
te ꞌũn yĩm ꞌãpit, haꞌ xuxiꞌ, haꞌ yok, tuk-nĩhãꞌ xip, tu hãpxop xitꞌax puk, ha nõꞌ xit.
MÃTEO 8

15
16 Ha ꞌãmãxak ꞌĩhã tikmũꞌũn teꞌ pakut xop nũnnãhã Yeyox hah, puyĩy yãmĩy
kummuk mõy, puyĩy hittupmãꞌ, tuꞌ xat, tuꞌ yĩyꞌax hã yãmĩy kummuk mõy, tu
tikmũꞌũn pakut hittupmãhãꞌ. 17 Hõmã, hãmyãxatamuk xohix ꞌĩhã, tik hittap
ꞌIyait te Topa pupi hãmꞌãktux, tu Topa yõg yãykutnãꞌax ꞌãktux, yã Yeyox ꞌãktux,
tu: “Tik te yũmũ yõg hãmpakut hãꞌ tot, tu yũmũg xũyꞌax hãꞌ tot.” Kaxĩy. Yã
Topa yõg hãmꞌãktux hittap hã Yeyox te tikmũꞌũn hittupmãhã nõmhãꞌ.
Tikmũꞌũn te Yeyox mũtik hãpkumep
18 Ta Yeyox te tikmũꞌũn xohix xexka pẽnãhãꞌ, huꞌ xat, pu yãy tik xop
mõg, ha kõnãg xexka xak. 19 Ha tik te hãmyũmmũg nũn, tu:
—‍Notot, ꞌãte ꞌãmũtik hãpkumep putup. Yã hãm ꞌũm hã ꞌãmõgꞌax,
kamak mõgꞌax ꞌãpeheꞌ. Kaxĩy.
20 Ha:
—‍Kokexmax hex te hãpkox kopaꞌ pet, ha putuxnãg te mĩm yĩkpak tuꞌ
pet, pak mũn Tikmũꞌũn Kutok, ꞌak pet ꞌũm xipꞌah, nũy ꞌũkpihiꞌ. Kaxĩy.
21 Ha ta tik nõy te Yeyox mũtik hãpkumep, tu:
—‍Yãyãꞌ, tux hok ꞌũktak nõ hãpkot hãmãxap. Kaxĩy.
22 Ha Yeyox te:
—‍ꞌŨgmũtik hãpkumep. Pũyãꞌ xakix xop ꞌũxakix nõy xop nõ ꞌãpkot. Kaxĩy.
Yeyox te ꞌãmuuh gãy ꞌãxiꞌ
23 Tu taꞌ mõg, tu mĩpkox hã mõꞌnãhãꞌ, nũy kõnãg xexka yĩmũꞌ mõg, ha
yãy yõg tik xop te nũ mũtik mõg. 24 Hãpxip ꞌohnãg ꞌĩhã kõnãg gãy, ha
ꞌãmuuk gãy kamah, tu mĩpkox mõꞌyõn, ha yãy mahamnãm kõnãg yĩmũꞌ,
ha kõnãg te mĩpkox hã mõꞌyũm, pa Yeyox mõꞌyõn. 25 Ha tik xop te Yeyox
yĩkãgnãg hãꞌ mõg, tu tuhuk, ha yãy koxak, ha:
—‍Yãyãꞌ! Mõꞌõn hok, ka yũmũg xakix! Kaxĩy.
26 Ha Yeyox te:
—‍Teptu yã ꞌãkuxãnõg? ꞌÃkuxa mãm puꞌũgnãg ꞌũgkopah! Kaxĩy.
Tuꞌ yok, tu ꞌãmuuh gãy tuꞌ xat, xix kõnãg gãy tuꞌ xat, pu tu xuxiꞌ, haꞌ
xuxiꞌ. 27 Ha tik xop teꞌ pẽnã kaꞌok, ꞌũkuxãnõg tuꞌ, tu:
—‍Tik ꞌũm ꞌõhõm? Yã ꞌãmuuh gãy xat, xix kõnãg gãy xat, haꞌ yĩpkox pip,
huꞌ xuxiꞌ! Kaxĩy.
Yeyox te yãmĩy kummuk mõy
28 Ha taꞌ mõg Yeyox, tu hãpxexka Ganat tuꞌ mõg, tuꞌ mõg Ganinet yõg
kõnãg xexka xatapaꞌ, tu mõktuꞌ xupep, pa tik 2 nũn, ha yãmĩy kummuk
tek-teꞌex kummuk, yĩy xukpot tuꞌ tihiꞌ. Ha yãmĩy teꞌ gãyãhãꞌ, yĩy
tikmũꞌũn xohix teꞌ yĩpkutuk, tu xukpot yõg putat nõãꞌyẽn, hu yĩmmap hãꞌ
mõg. 29 Hãpxip ꞌohnãg ꞌĩhã tik yĩy kaꞌok, tu:
—‍Xate tep mũn putup? ꞌÃmũn yã Topak-tok. ꞌOk nũn, nũy ꞌũgmũg
kummugã hãmãxap? Kaxĩy.
MÃTEO 8

16
30 Ha taꞌ pip xapup, tu mĩxux mãhãꞌ, 31 ha yãmĩy te:
—‍Pẽyã xatekmũg mõy, ꞌãpuꞌ xat ꞌũ xapup kopak mũg mõxakux. Kaxĩy.
32 Ha:
—‍Mõg, nũy mõxakux. Kaxĩy.
Haꞌ mõg, tu xapup xop hãꞌ mõxakux, ha yĩktix yĩmũꞌ pip, tu yĩxo mõꞌkaꞌok, tu
kõnãg xexka tuꞌ mõxahaꞌ, tu kõnãg hãꞌ mõxakux, tuꞌ xakix kõnãg xexka kopah.
33 Ha tik xop te xapup pẽnãhãꞌ, tu nũꞌpahaꞌ, tu kõmẽn haꞌ mõg, tu mõktu
mõxahaꞌ kõmẽn tuꞌ, tu hãmꞌãktux, tu yãmĩy kummuk ꞌãktux, xix tik 2 ꞌãktux,
yãmĩy te nõm gãyãhãꞌ. 34 Ha taꞌ nũn kõmẽn yõg tikmũꞌũn xohix, tu Yeyox haꞌ
nũn, tuꞌ pẽnãhãꞌ, ꞌĩhã tuꞌ xak, pu nõm hãpxexka nĩm, nũy mõg, haꞌ mõg.
Yeyox te tik te hãpkumep hok hittupmãhãꞌ
9 1 Ha ta mõꞌnãhã Yeyox, tu mĩpkox hã mõꞌnãhãꞌ, tu kõnãg yĩmũꞌ mõg, tuꞌ
mõg, tu mõktu kõmẽn Kapãnãn tuꞌ xupep. 2 Ha ta tikmũꞌũn te tik nũnnãhãꞌ,
ha hãpkumep hok, yĩy tikmũꞌũn te tutpe hã mõꞌtat. Ha Yeyox teꞌ pẽnãhãꞌ, tu
tikmũꞌũn kuxa mãm kaꞌok pẽnãhãꞌ, tu tik te hãpkumep hok pu hãmꞌãktux, hu:
—‍ꞌŨgnix ꞌãhittup. Yã Topa te ꞌõg hãpkummuk mĩyꞌax xaxogãhãꞌ pu tu kux. Kaxĩy.
3 Ha tik xop te hãmyũmmũg ꞌũm te:
—‍Nũhũ tik te yãy ꞌãktux Topah! Yãꞌ koit. Kaxĩy.
4 Ha Yeyox te tik xop yõg hãmpeꞌpaxex yũmmũg, hu:
—‍Teptu ꞌãxop te hãpkummuk peꞌãpaxex? 5 Piyãꞌ kaꞌok, pe hãpkummuk
mĩyꞌax xaxogãꞌax ꞌãktux, peꞌ yok nũy hãpkumepꞌax ꞌãktux? 6 ꞌŨgmũn yã
Tikmũꞌũn Kutok, tu xa hãmyũmmũgãhãꞌ, xayĩy hãmyũmmũg. Yã Topa te
ꞌãꞌ hõm yãy ꞌãxetꞌax ꞌũyĩy hãm xexka tu hãpkummuk mĩyꞌax xaxogãꞌ. Kaxĩy.
Tuꞌ yõkãnãm, tu tik te hãpkumep hok xat, hu:
—‍ꞌÃyok, nũy ꞌãknĩhãxip, tu tutpe pepiꞌ xup, nũy ꞌãpet ha mõg. Kaxĩy.
7 Haꞌ yok, tuknĩhãꞌ xip, tu yãy pet haꞌ mõg. 8 Ha tikmũꞌũn teꞌ pẽnãhãꞌ, tu
kuxãnõg, tu Topa max ꞌãktux. Yã Topa te tikmũꞌũn kaꞌogãhã pu tuꞌ nõy hittupmãꞌ!
Yeyox xix Mãteo
9 Tu taꞌ mõg Yeyox, tu hãpkumep, ꞌĩhã tik nõy pẽnãhãꞌ, ha tik te gohet
puknõg puꞌ hãm, nũy nõm pupi tayũmak pop, tuꞌ xuxetꞌax Mãteo, tu
gohet yõg petnãg kopaꞌ xip, nũy tayũmak pop, ha Yeyox te:
—‍ꞌŨkpe mõg. Kaxĩy.
Ha Mãteo yok, tuknĩhãꞌ xip, tu taꞌ mõg Yeyox mũtik, 10 tuꞌyãy xipꞌax
haꞌ mõg, nũy tuꞌ xit, ha Yeyox te nõm mũtik mõg, tuꞌ xit, ꞌĩhã Mãteo xape
xop nũn, xix tik te nõm mũtik tayũmak pop nũn, xix tikmũꞌũn kummuk
nũn, tu Yeyox mũtik xit, xix ꞌũyõg tik xop mũtik xit, 11 ha Paniye xop teꞌ
pẽnãhãꞌ, tu Yeyox yõg tik xop yĩkopit, hu:
—‍Teptu ꞌõgnũ Notot xit tayũmak pop xop mũtik, xix tikmũꞌũn kummuk
mũtik xit? ꞌAp maxꞌah. Kaxĩy.
12 Ha Yeyox teꞌ xupak, hu:
MÃTEO 8, 9

17
—‍Tikmũꞌũn hittup te notot xak ꞌohnãg, pa ꞌũpakut xop teꞌ xak. 13 Mõg,
nũy Topa yõg tappet mõꞌkupix, nũy hãmyũmmũg, ha: “ꞌA ꞌãtep-tupꞌah
xokxop mõꞌhap ꞌũg hax. ꞌÃmhok. Pa ꞌãte tikmũꞌũn te hãpxopmã maxp-
tup.” Kaxĩy. Yãk nũn, nũy tikmũꞌũn kummuk xãnãꞌ, ꞌũyĩy tu hupmãꞌ, ha
ꞌãteꞌ xãnã ꞌohnãg tikmũꞌũn te yãy max peꞌ paxex. Kaxĩy.
Yeyox teꞌ xit hok ꞌãktux
14 Hãpxip kutõgnãg ꞌĩhã Yoãm yõg tik xop nũn, nõm tep-tox pix yõg tik
xop nũn, tu Yeyox haꞌ nũn, tu nũktuꞌ yĩkopit, hu:
—‍ꞌŨgmũg xit hok punethok, xix Paniye xop xit hok punethok. Teptu ꞌõg
tik xop xit hokꞌah? Kaxĩy.
15 Ha Yeyox te hãmyũmmũgãhãꞌ, nũy Topa yõg hãpxopmãꞌax yũmmũgãꞌ, tu:
—‍Tik te yãytahaꞌ, tu ꞌãmuk xexka mĩy, tuꞌ xape xop xãnãhãꞌ, puyĩy nũ mũtik
tu hittup. ꞌOk potaha ꞌũxape xop ꞌĩhã tik te yãytaꞌax te nũ mũtik xip? ꞌAp potaꞌah.
Yãꞌ hittup! Pa tik te yãytaꞌax mõg, tu ꞌãmuk xexka kuxyãhãꞌ, ha nõmhãꞌ xape xop
hittup ꞌohnãg. ꞌAp xit putupꞌah. ꞌŨgmõg, puxik yõg tik xop xit hok kamah.
16 —‍Tikmũꞌũn te topixxax kutut tu nõ yãg xex, tuꞌ xap, ꞌap yãg tup xapꞌah
topixxax kutut tuꞌ, ka yãy pot. Kaxĩy Yoãm yõg tik xop te mõnãyxop yõg
hãpxopmãꞌax hittap tat, haꞌ yõg tik xop te yõgnũ hãpxopmãꞌax tup tat. 17 Ha
tikmũꞌũn te xupyãg hep mĩy, tuꞌ xokxax kutut kopaꞌ xuk ꞌohnãg, ka nõ xax
kutut tu yãy pot, haꞌ hep te hãm tu nũꞌnãhãꞌ, haꞌ nõg. ꞌÃmhok. Pa xupyãg
hep tup xuk xokxax tup kopah, nũy ti kaꞌok. Kaxĩy Yoãm yõg tik xop te
hãpxopmãꞌax hittap tat putup, tu nõm tup putup nõg. Kaxĩy.
Yeyox te ꞌũn xix kakxop hex hittupmãhãꞌ
18 Yeyox te hãmꞌãktux ꞌĩhã Yoneo xop yõg tik teꞌ xatꞌax nũn, tu nũktuꞌ
kopaxux hãꞌ nãhãꞌ, tu:
—‍Hõnhãk-tok hex xok. Mãꞌ, nũy ꞌũkpet ha mõg, nũy tu tukũm yĩmũ
yĩm xeh, nũy putpuꞌ hĩnnãꞌ. Kaxĩy.
19 Ha Yeyox mõg, ha ta tik peꞌ mõg, ha tik xop te nũ mũtik mõg kamah.
20 Ha ꞌũn nũn, tu hãmyãxatamuk xohix te 12 hãꞌ pakut, ha ꞌũn yõg
hãmpakutꞌax hãꞌ pakut, tu Yeyox xãmpaꞌ xip, tuꞌ xax kuxyã ꞌãpit, hu:
21 “ꞌÃteꞌ xax ꞌãpit putup mõꞌkaꞌok, ꞌũghittupmãꞌ.” Kaxĩy.
22 Ha yõkãnãm, tu ꞌũn pẽnãhãꞌ, tu:
—‍ꞌÃkuxãnõg hok, Nixix! ꞌÃhittup, ꞌãkuxa yũm kaꞌok tuꞌ. Kaxĩy.
Hãpxip ꞌohnãg ꞌĩhã ꞌũn hittup.
23 Ha taꞌ mõg Yeyox, Yoneo xop yõg tik teꞌ xatꞌax peꞌ mõg, tu mõktu
mõxa tik pet tuꞌ, tuꞌ mõxakux, tu nõ hãpkot yõg kax ꞌãpak, ha tikmũꞌũn
xohix te mĩptut kopaꞌ pip, 24 ha Yeyox te:
—‍Mõg, nũy ꞌãpep hãptopaꞌ. ꞌA kakxop ꞌũm xokꞌah, yã mõꞌyõn! Kaxĩy.
MÃTEO 9

18
Ha tikmũꞌũn te nõ yĩxix, 25 tuꞌ mõg, ꞌĩhã Yeyox te kakxop hex pet ha
mõꞌnãhãꞌ, tuꞌ yĩm mũg, haꞌ yok, tuknĩhaꞌ xip, 26 ha tikmũꞌũn xohix teꞌ
yũmmũg, tuꞌ xeꞌ xuktux hãpxexka xohix yõg tikmũꞌũn puꞌ.
Yeyox te tik pa hok 2 pa nãhãꞌ
27 Ha taꞌ mõg Yeyox, tu putat hãꞌ mõg, pa tik pa hok 2 tihiꞌ, tuꞌ peꞌ mõg,
tuꞌ yĩy kaꞌok, tu:
—‍ꞌÃmũn yã mõnãyxop Namix mõkputox, yĩk mũg kuxa kaꞌ! Kaxĩy.
28 Ha Yeyox te mĩptut hã mõꞌnãhãꞌ, ha tik pa hok teꞌ yĩkaꞌ tihiꞌ, ha:
—‍ꞌOk ꞌãkuxa mãm kaꞌok ꞌũgmũn kopah? ꞌOk ꞌãhittupmãꞌax ꞌãteꞌ? Kaxĩy.
Ha:
—‍Hamũn! Kaxĩy.
29 Yĩy Yeyox teꞌ pa ꞌãpit, tu:
—‍Hãmpẽnãꞌ! ꞌÃkuxa mãm kaꞌok ꞌũgkopah. Yãꞌ puxiꞌ. Kaxĩy.
30 Tuꞌ pa maxnãhãꞌ, ha hãmpẽnã max. Ha Yeyox te:
—‍Tikmũꞌũn xop puꞌ xuktux hok! Kaxĩy.
31 Pa tu taꞌ mõg, tu Yeyox ꞌãktux hãpxexka yõg tikmũꞌũn xohix puꞌ.
Yeyox te tik yĩy hok yĩgãhãꞌ
32 Tuꞌ mõg, ꞌĩhã tikmũꞌũn te tik yĩy hok nũnnãhãꞌ, tu Yeyox haꞌ nũnnãhãꞌ, ha
yãmĩy kummuk te tik kummugãhãꞌ, pu tu yĩy hok, 33 ha Yeyox te yãmĩy xut, tu tuꞌ
mõꞌkutnãhãꞌ, tuꞌ xat pu mõg, ꞌĩhã tik yĩy, tu hãmꞌãktux. Ha tikmũꞌũn kuxãnõg, tu:
—‍Tep te ꞌũm nũhũꞌ? Yã hõnhã ꞌIyaet yõg tikmũꞌũn te hãpxopmã kaꞌok
xeꞌẽgnãg pẽnã hãmãxap. Hõmã ꞌap pẽnãꞌah. Kaxĩy.
34 Pa Paniye xop gãy, tu:
—‍Yã Hãmgãyãgnãg mũn te Yeyox kaꞌogãhã pu yãmĩy kummuk mõy. Kaxĩy.
Yeyox te tikmũꞌũn kuxa kaꞌ
35 Ha ta Yeyox te hãpkumep, tu kõmẽn xohix haꞌ mõg, xix xip tu xexka
xohix haꞌ mõg, tu hãmyũmmũgãhã Topa pet kopah, tu hãmꞌãpak maxꞌax
ꞌãktux, xix Topa te tikmũꞌũn xatꞌax ꞌãktux, tu tikmũꞌũn pakut hittupmãhãꞌ,
yã hãmpakutꞌax xohix mõy, nũy nõ tu hittupmãꞌ, 36 ꞌĩhã tikmũꞌũn pẽnãhãꞌ,
tuꞌ kuxa kaꞌ, ꞌũp-xehnãg pip hah, tu kahnẽn xop putuk, tik te nõm pẽnã
ꞌohnãg putuk, 37 yĩy yãy yõg tik xop pu hãmꞌãktux, hu:
—‍Yã hãpxop ta punethok, puyĩy pet ha yĩkũy, nũy kopa nũꞌ xok, pa
tikmũꞌũn kutõgnãg pip nũy nõ yĩkũy. 38 ꞌÃpu, hãpxa xuxyã tuꞌ xax, pu
tikmũꞌũn xãnãꞌ, puyĩy hãpxop ta nũnnãꞌ. Kaxĩy. Ha kaxĩy Yeyox te tikmũꞌũn
ꞌãktux. Yã punethok te Topa xak, pãyã ꞌaꞌ xipi yũmmũgꞌah. ꞌÃpu Topa tuꞌ
xax, pu tik nũꞌpok, puyĩy tikmũꞌũn yũmmũgã max, nũy Topa ha mõgãꞌ.
MÃTEO 9

19
Yeyox yõg tik xop te 12
10 1 Tu ta yãy yõg tik xop xãnãhãꞌ, nũy mõꞌpok, tu yãy ꞌãxetꞌax hõm
pu yãmĩy kummuk tu mõy, nũy tikmũꞌũn pakut xohix hittupmãꞌ,
2 ha tik xohix te 12 mõꞌpok, haꞌ xuxetꞌax te: Xĩmãm, yãꞌ xuxetꞌax nõy Pet,
xiꞌ taknõy ꞌÃneneꞌ, xix Tiak, xiꞌ taknõy Yoãm. Yã Yemeneo kutok 2, 3 xix
Pinip, xix Matõmẽo, xix Tõmẽ, xix Mãteo, nõm te gohet pupi tayũmak
pop, xix ꞌAppeo kutok ꞌãxetꞌax Tiak kamah, xix Tanep, 4 xix nõm tik te
Yoneo xop xexkanãp-tup, tuꞌ xuxetꞌax Xĩmãm kamah, xix Yot ꞌIxkanot,
nõm te mõꞌãmãꞌ, nũy gãyxop mõgã Yeyox hah.
Yeyox te tik te 12 mõꞌpok
5 Ha Yeyox te mõꞌpok, tu:
—‍Hãmpuknõg xop ha ꞌãmõg hok, xix Xãmãnit yõg kõmẽn ha ꞌãmõg hok,
6 ꞌãmhok. Pa ꞌIyaet yõg tikmũꞌũn xax, yã Yõneo xop, yã kahnẽn te hãmyũmmũg
hok putuk nõꞌõm, tikmũꞌũn te nõm xaxok hah. ꞌŨxax, nũy ꞌũm pipiꞌ, 7 nũy
hãmꞌãpak mãxꞌax ꞌãktux, hu: “Hõnhã Topa te yãy yõg tikmũꞌũn xat, puyĩy tu
yĩpkox piꞌ.” Kaxĩy. 8 Tikmũꞌũn hittupmãꞌ, xiꞌ xax kunut xop puꞌ xax tapmãꞌ, xix
hãmpakut xop xohix tupmãꞌ. Tikmũꞌũn xakix xop hĩnnã putpuꞌ, xix yãmĩy
kummuk mõy tikmũꞌũn kopah, pu tu hittup. Topa te xaꞌ hok hittupmãhãꞌ, yĩy
tayũmak pop hok ꞌũyãnãn tuꞌ, ꞌĩhã ꞌãnõy hittupmãꞌ. Yãꞌ hok hittupmãꞌ. 9 Tayũmak
xexka ta hok, 10 xix tut ta hok, nũy hãpxop xuk, xix topixxax punethok ta hok, xix
pataxax, xiꞌ kuptõy ta hok. ꞌÃmhok. Tikmũꞌũn hãm, puxix tu xit max, puxix tuꞌ pip
max kamah, yĩy hãpxop punethok ta hok. Pũyã tikmũꞌũn xaꞌ popmã hãpxop xohix.
11 —‍Kõmẽn xix xip tu xexka ha mõxakux, ꞌãpu tikmũꞌũn max xax, xayĩy ꞌũpet
kopa ꞌãpiꞌ, ꞌãpihi nũy nox piꞌ, ꞌĩhã kõmẽn kopa hãmꞌãpak maxꞌax ꞌãktux, tu mõktu
putpu ꞌãmõg. 12 Tikmũꞌũn pet ha mõxakux, ꞌãpuꞌ xuxyã pu hãmꞌãktux, hu: “Pũyã
tikmũꞌũn kuxa mãm, nõm te ꞌãpet kopaꞌ pip,” Kaxĩy. 13 Tikmũꞌũn te ꞌãxop pu:
“Mõnãy, nũy pihiꞌ nũnteh,” kaxĩy, yĩy taꞌ piꞌ, ha nõm tikmũꞌũn kuxa mãm putup.
Pa tikmũꞌũn te: “Mõnãy hok, pa mõg!” kaxĩy, hu ta nõm tikmũꞌũn kuxa mãm
ꞌohnãg. 14 Pẽyã kõmẽn yõg tikmũꞌũn ꞌãp-tup nõg, tu ꞌãxĩnnã hok, ꞌãpu mõy, tu
hãpkõnõn xit ꞌãpata tuꞌ, pu tikmũꞌũn xohix pẽnãꞌ, nũy yũmmũg. Yãp-tup nõg xop
yĩpkox ꞌohnãg. 15 ꞌŨxaxok hok: hãptup mõꞌnãp-tup ꞌĩhã Topa teꞌ hep xop xohix
yõg hãpxopmãꞌax kopit, tu kõmẽn Xonõm yõg tikmũꞌũn kuxa kap-tup, xix kõmẽn
Gõmõg yõg tikmũꞌũn kuxa kap-tup, pa tikmũꞌũn yĩpkox hok xop kuxa ka ꞌohnãg.
Tute hãpkummugãꞌax ꞌãktux
16 —‍ꞌŨg ꞌãpax: ꞌÃte mõꞌãpok tikmũꞌũn gãy kopah. Pa mõxip, nũy
hãmyũmmũg, pu ꞌãkix hok, nũy hãmgãy te kahnẽn kix putuk hok. Kãyã gãy
xop te hãmyũmmũg, xix kuxxuxtut gãy ꞌohnãg. Xapi ꞌãxop gãy hok kamah,
pãyã hãmyũmmũg, nũy hãpkummuk mĩy hok. 17 ꞌÕg pa ꞌãtiꞌ! Tikmũꞌũn gãy
te ꞌãmũg putup, nũy ꞌãhĩy, nũy ꞌãmõgã tik pa te hãmyũmmũg keppah, tu xikot
MÃTEO 10

20
hã ꞌãkix putup Topa pet kopah. 18 Yã ꞌãxop mõg ꞌũgmũtik, yĩy tikmũꞌũn te
ꞌãmõgãp-tup gohenanok xop keppah, xix hãpxexka yõg tik teꞌ xatꞌax keppah, pu
ꞌõg hãpxopmãꞌax kopit, yĩy ꞌãxop te hãmꞌãpak max ꞌãktux putup ꞌũxatꞌax xop
puꞌ, xiꞌ puknõg xop puꞌ. 19 ꞌÃmõgãꞌ, ꞌãpu ꞌãxutigã hok, hu: “ꞌÃte putep ꞌãktuxꞌax?”
kaxĩy, xix: “ꞌÃte hãmꞌãktux ꞌũm ꞌãktuxꞌax?” kaxĩy. ꞌÃxutigã hok. Hãpxip ꞌĩhã
Topa te xa hãmꞌãktux yũmmũgãp-tup, xa hãmꞌãktux. 20 Yã yãy yõg hãmꞌãktux
xa yũmmũgãp-tup, xayĩy hãmꞌãktux, tu ꞌõg ꞌÃtak Topa Koxuk pupi hãmꞌãktux.
21 —‍Ha tikmũꞌũn punethok te yãy xape mõgãp-tup pu gãyxop tu kix, haꞌ tak
xop tek-tok xop mõgãp-tup puꞌ kix, hak-tok xop teꞌ tak mũtik yãytukmĩy putup,
tuꞌ kix putup, 22 yã tikmũꞌũn xohix te ꞌãp-tup nõg putup, ꞌãmõg ꞌũgmũtik hah,
pa ꞌãpu nõãꞌ tot, ha mõktuꞌ kux. Yã Topa teꞌ gãyxop nõãp-tup, tu ꞌãmõy putup
hãpkummuk mĩy xop kopah, xa mõg. 23 Tikmũꞌũn te xa hãpkummugãꞌ, ꞌãpu
nũmãn, nũy kõmẽn nõy ha mõg. ꞌÃte xa hãpxeꞌe ꞌãktux: ꞌA ꞌãxop te hãmꞌãktux
kux putupꞌah ꞌIyaet yõg kõmẽn xohix kopa, ꞌĩhãk nũn, ꞌa xate hãpxopmã kux
putupꞌah, ꞌĩhãk nũn, ꞌĩhã ꞌũgmũn yã Tikmũꞌũn Kutok nũn.
24 —‍Tik te hãmyũmmũgãhãꞌ, tu hãmyũmmũg max, pa tik nõy te
hãmꞌãpak, tu hãmyũmmũg kutõgnãg. Haꞌ xuxyã teꞌ xat, huꞌ kaꞌok, pa
kãmãnat yĩpkox pip, huꞌ puꞌuk. 25 Yãꞌ max tik te hãmyũmmũgãꞌax yõg
hãmꞌãktux ꞌãpak, tu mõktu hãmyũmmũg, nũy ꞌũyõg yũmmũgãꞌax putuk.
Ha kãmãnat max hãm, nũy mãynãg mĩy, tuꞌ xuxyã putuk. Pax puꞌ xuxyã yã
Meyemoꞌ, puxix tu kummuk nãm, haꞌ yõg kãmãnat kummuk xexka kamah.
26 —‍Yĩy tikmũꞌũn yĩpkutuk hok. Tikmũꞌũn te hãpxopmãꞌax xaptop, pa Topa
te hãpxopmã xaptopꞌax tuꞌ mũg putup, puyĩꞌ xohiꞌ pẽnãꞌ. 27 ꞌÃte xa hãmꞌãktux
ꞌãmnĩy ꞌĩhãꞌ, nũy xeꞌ xuktux hãptup ꞌĩhãꞌ. ꞌÃte ꞌãxop ꞌãp-xet pu hãmꞌãktux, ha
ꞌãxop te hãmꞌãktux kaꞌok putup, puyĩꞌ xohiꞌ yũmmũg. 28 Tikmũꞌũn yĩpkutuk
hok. Yã ꞌãyĩn putexꞌax, pa ꞌãkoxuk putex hok. ꞌÃpu Topa yĩpkutuk. Tute ꞌãyĩn
nõãꞌax xix ꞌãkoxuk, nũy kuxap hã mõꞌhap Hãmgãyãgnãg Pet tuꞌ, ha ꞌãxũy
xuxi ꞌohnãg. 29 Putuxnãg ta manat, yã tayũmak kutõgnãg hã hãmenax, pa
Topa te nõm xop putup pax, tuꞌ pẽnã max, pu hãm tu tu nã hok, haꞌ xaxok
ꞌohnãg, 30 tu ꞌãxop mõꞌãyãy xeꞌẽgnãg, tu mõ ꞌãxe kupix, nũy ꞌãxe xohix te xĩy
yũmmũg, ꞌãp-tup pax tuꞌ. 31 Yã Topa te mõꞌãyãy xeꞌẽgnãg, yĩy ꞌãkuxãnõg hok!
Yeyox yũmmũg hok ꞌãktux
32 —‍Tikmũꞌũn xohix te: “ꞌŨgmũn yã Yeyox yõg,” kaxĩy, puyĩy tikmũꞌũn xupax,
kopxix ꞌÃtak Topa puꞌ yãnãn tu hãmꞌãktux, nõm te pexkox tuꞌ xip pu hãmꞌãktux,
hu: “ꞌÕhõm yõgnũꞌ.” Kaxĩy. 33 Pa tikmũꞌũn teꞌ nõy xop keppa hãmꞌãktux, hu:
“ꞌŨgmũn ꞌã Jesus yõgꞌah,” kaxĩy, kopxix ꞌÃtak Topa puꞌ yãnãn tu hãmꞌãktux, yã
yõg ꞌÃtak te pexkox tuꞌ xip pu hãmꞌãktux, hu: “ꞌÕhõm ꞌap yõgꞌah.” Kaxĩy.
Tute yãytukmĩy ꞌãktux
34 —‍ꞌAk nũnꞌah, nũy ꞌũhep xop xohix kuxa mãmmãꞌ. ꞌÃmhok. Pak nũn,
hãm tuk nũn, pu tikmũꞌũn yãytukmĩy, 35 xik nũn puk-tok pit xop yãy
MÃTEO 10

21
tak xop mũtik yãytukmĩy, xik nũn puk-tok hex xop yãy tut xop mũtik
yãytukmĩy, puk-tok xetut xop yãy yĩpxox mũk tut mũtik yãytukmĩy. 36 Yã
tikmũꞌũn te yãy xape hãꞌ puknõg, ꞌũgãy tuꞌ.
37 —‍Tikmũꞌũn teꞌ tak putup pax hãmãxap, peꞌ tut putup pax hãmãxap,
tuk-nãy tuk putup, puxix ꞌũgmũtik tu hãpkumep hok. Ha tikmũꞌũn tek-tok
pit putup hãmãxap, pek-tok hex putup hãmãxap, tuk-nãy tuk putup, puxix
ꞌũgmũtik tu hãpkumep hok. 38 Pa tikmũꞌũn tek putup hãmãxap, nũy ꞌũgmũtik
xok, puxix ꞌũgmũtik tu hãpkumep mõ kumaꞌ mõg. 39 Tikmũꞌũn xok ꞌohnãg
putup, puxix tu xok, ha tikmũꞌũn te Topa tuꞌ xok, puxix tu hi mõkumaꞌ mõg.
Topa te hãpxopmã max hãꞌ yãnãn
40 —‍Tikmũꞌũn te ꞌãp-tup, puxix ꞌũkputup, ha Topap-tup kamah, nõm
te nũgkutnãhãꞌ. 41 Tikmũꞌũn te Topa yõg nũꞌkutnãꞌax putup, Topa te
nũꞌkutnãhãꞌ puyĩy yãy pupi hãmꞌãktux, puxix pexkox yõg hãpxop pop,
nũꞌkutnãꞌax mũtik pop putup. Ha tikmũꞌũn te tik max putup, ꞌũmax hah,
yã tik max xop mũtik pop putup pexkox yõg hãpxop.
42 —‍ꞌŨxaxok hok: Tikmũꞌũn te Topa yõg tik kutõgnãg pu kõnãg tat, puyĩy xoꞌop,
tuꞌ tat tik tek mũtik mõg hah, puxix pexkox yõg hãpxop pop xeꞌe. Tu ta tuꞌ kux.
Yoãm nõm tep-tox pix te Yeyox ha mõ tik pok
11 1 Tu hãmꞌãktux kux, tu yãy yõg tik xop puꞌ xat kux, tu taꞌ mõg
Yeyox, nũy hãmyũmmũgãꞌ, nũy kõmẽn xohix yĩkãgnãg hã
hãmꞌãktux. 2 Ha taꞌ xip Yoãm kanet kopah, Yoãm nõm tep-tox pix, tu
Kunnix ꞌãpak, hu yãy yõg tik xop mõꞌpok, 3 pu Yeyox yĩkopit, hu:
—‍ꞌOk ꞌãmũn yã Topa yõg yãykutnãꞌax xeꞌeꞌ, pe tik nõy nũn? Kaxĩy.
4 Ha Yeyox te:
—‍Putpu mõg, nũy Yoãm pu hãmꞌãktux, nũy hãpxopmãꞌax kaꞌok xeꞌẽgnãg
ꞌãktux, ꞌãte nõm hãpxopmãhãꞌ. Yã ꞌãxop teꞌ pẽnãhãꞌ, tuꞌ xupak. 5 Hãmꞌãktux te
kaxĩy: Tikmũꞌũn pa hok te hãmpẽnã max, xix hãpkumep hok xop te hãpkumep,
xix yãy xax kunut xop xax tup, xix hãmꞌãpak hok xop te hãmꞌãpak max, xiꞌ
xakix xop te putpuꞌ hiꞌ, xiꞌ hok xop te hãmꞌãpak maxꞌax ꞌãpak. 6 Yã tikmũꞌũn
kuxa hittup, nõm kuxa yũm kaꞌok ꞌũgkopah, tuk yĩkopit ꞌohnãg. Kaxĩy.
7 Ha Yoãm yõg tik xop mõg, ꞌĩhã Yeyox te tikmũꞌũn pu Yoãm ꞌãktux, hu:
—‍ꞌÃmõg hãm panip xexka hah, nũy Yoãm pẽnãꞌ. Tep-tep pẽnãhãꞌ? ꞌOk mĩtkup
pẽnãhãꞌ, ꞌãmuuh te nõm mahap? 8 Tep-tep pẽnãhãꞌ? ꞌOk pẽnãhã tik te topixxax
max tat? ꞌÃmhok! ꞌŨptexop mũn te mĩptut xexka tuꞌ pip. 9 ꞌÃpu, ꞌãyĩy: Xatep-
tep pẽnãhãꞌ? ꞌOk pẽnãhã tik te Topa pupi hãmꞌãktux? Hamũn! ꞌÃte xa hãpxeꞌe
ꞌãktux: Yoãm te Topa pupi hãmꞌãktux xeꞌeꞌ. 10 Yã Topa yõg tappet te Yoãm ꞌãktux,
yã Topa te Yoãm ꞌãktux, hu: “ꞌÃte mõ tik kutnãhãꞌ, ꞌãte nõm mõꞌkutnãp-tup
ꞌãkeppah, nũy ꞌõg putat maxnãꞌ.” Kaxĩy. 11 ꞌÃte xa hãpxeꞌe ꞌãktux: Tik xop hittap
yãꞌ xexka miax, ha ta Yoãm xexka xeꞌeꞌ. Pãyã tikmũꞌũn yĩpkox pip xop xexka
xeꞌẽgnãg. 12 Hõmã Yoãm te Topa yõg hãmꞌãktux ꞌãktux, xix hõnhãꞌ, ha tikmũꞌũn
MÃTEO 10, 11

22
te hãpxopmã xeꞌẽgnãg, Topa teꞌ kaꞌogã hah, haꞌ yĩpkox pip. 13 Yã tik xop te Topa
pupi hãmꞌãktux xop xohix te hãmꞌãktux, tu Topa te tikmũꞌũn xat ꞌãktux, ha
Mõyyex yõg xatꞌax teꞌ xuktux kamah. 14 Ha Topa yõg tappet te mõnãyxop hittap
ꞌEnit ꞌãktux, yã Topa pupi hãmꞌãktux nõꞌõm, yã Yoãm xix ꞌEnit te yãy putuk,
Topa te nõm nũꞌpok hah. 15 ꞌÃyĩpkox piꞌ, nũy hãmꞌãpax.
16 —‍Hõnhã tikmũꞌũn tep-tep putuk? Tute kakxop putuk. Kakxop te
hãmnuhnõg tuꞌ mãm, ha yãꞌ yĩy kaꞌok ꞌũnõy xop puꞌ, hu: 17 “ꞌŨgmũꞌãte kãyãhãꞌ,
yãytaꞌax kãyã putuk, pa ꞌãxop te hãmyã ꞌohnãg. Ha ta kãyãhã nõ ꞌãpkot
kãyãꞌax putuk, pa ꞌãxop pota ꞌohnãg.” Kaxĩy. 18 Kaxĩy Yoãm tep-tox pix, tuꞌ xit
hok, xix xupyãg xoꞌop hok, haꞌ xohix te: “Yãmĩy kummuk te nõm kopaꞌ xip.”
Kaxĩy. Pãyãꞌ koit. 19 Hak mũn Tikmũꞌũn Kutok, tuk nũn, tuk xit xiꞌ xoꞌop, haꞌ
xohix te: “Pẽnãꞌ! ꞌÕhõm xit xexka nãm, xiꞌ xoꞌop xexka nãm, tu tik kummuk
hãꞌ xape, xix nõm xop te gohet pupi tayũmak pop hãꞌ xape,” kaxĩy. ꞌOk max,
peꞌ kummuk nõꞌõm? Xateꞌ yõg hãpxopmãꞌax kopit, huꞌ yũmmũg. ꞌŨkux. Kaxĩy.
Kõmẽn yõg tikmũꞌũn kuxa mãm ꞌohnãg
20 Tu ta xe kõmẽn yõg tikmũꞌũn ꞌãktux kummuk, ha kõmẽn yõg
tikmũꞌũn te hãpxopmã kaꞌok xeꞌẽgnãg pẽnãhãꞌ, tikmũꞌũn puxet te nõm mĩy
hok, pãyã hãpkummuk mĩy kux ꞌohnãg, tu yãyhãhup ꞌohnãg. Yĩy Yeyox te:
21 —‍Kõmẽn Konãy yõg tikmũꞌũn xũy putup, xix kõmẽn Metxax yõg tikmũꞌũn
xũy putup. Tute hãpxopmã kaꞌok xeꞌẽgnãg pẽnãhãꞌ, tikmũꞌũn puxet te nõm mĩy
hok, ha yãyhãhup ꞌohnãg, nũy hãpkummuk mĩy kux. Pax pu kõmẽn hittap
Tinok yõg tikmũꞌũn pẽnãꞌ, pax pu kõmẽn hittap Xinõm yõg tikmũꞌũn pẽnãꞌ,
puxix yãyhãhup, nũy xagok hã mõꞌtat, tu putok nũꞌxok yãy putox yĩmũꞌ, puyĩꞌ
xohix yãyhãhup yũmmũg. 22 ꞌÃte xa hãpxeꞌe ꞌãktux, ꞌũxaxok hok: ꞌÃmnĩy ꞌũm
mõꞌnãp-tup ꞌĩhã Topa teꞌ hep xop xohix yõg hãpxopmãꞌax kopit, tu kõmẽn hittap
Tinok yõg tikmũꞌũn kuxa kap-tup, xix kõmẽn hittap Xinõm yõg tikmũꞌũn kuxa
kap-tup, pãyã kõmẽn Konãy yõg tikmũꞌũn kuxa ka ꞌohnãg, xix kõmẽn Metxax
yõg tikmũꞌũn kuxa ka ꞌohnãg. 23 Ha Kapãnãn yõg tikmũꞌũn te hãmpeꞌpaxex, hu:
“ꞌŨgmũg mõg pexkox hah.” Kaxĩy. Pãyãꞌ mõg ꞌohnãg. Yã Hãmgãyãgnãg Pet haꞌ
mõg. Tu hãpxopmãꞌax kaꞌok xeꞌẽgnãg pẽnãhãꞌ, tikmũꞌũn puxet te nõm mĩy hok,
pãyãꞌ kuxa mãm ꞌohnãg. Pax pu Xonõm yõg tikmũꞌũn hittap pẽnãꞌ, puxiꞌ kuxa
mãm kaꞌok, nũy kõmẽn tu tuꞌ pip nõmhã. 24 ꞌũxaxok hok: ꞌÃmnĩy ꞌũm mõꞌnãp-
tup ꞌĩhã Topa teꞌ hep xop xohix yõg hãpxopmãꞌax kopit, tu Xonõm yõg tikmũꞌũn
kuxa kap-tup, pa Kapãnãn yõg tikmũꞌũn kuxa ka ꞌohnãg. ꞌŨkux.
Tute tikmũꞌũn xapit pu tuꞌ kuxa mãm
25 Ta xe Topa pu hãmꞌãktux, hu:
—‍ꞌÃtak, ꞌãmũn yã pexkox hã ꞌãxuxyãꞌ, xix hãm xexka hã ꞌãxuxyãꞌ!
ꞌÃmax, tu tikmũꞌũn te hãmyũmmũg hok xop yũmmũgãhãꞌ, puyĩy
hãmyũmmũg, ꞌĩhã tikmũꞌũn te hãmyũmmũg puꞌ xaptop, puyĩꞌ yũmmũg
hok. 26 Hamũn. Yã kaxĩy xatep-tup. Kaxĩy.
MÃTEO 11

23
27 Tu yãy yõg tik xop pu hãmꞌãktux, hu:
—‍Yõgnũ ꞌÃtak te ꞌãꞌ popmãhãꞌ hãpxop xohix. Yãk tak puxehnãg tek-tok
yũmmũg, hak puxet te ꞌÃtak Topa yũmmũg, nũy tikmũꞌũn pu hãmyũmmũgãꞌ.
28 —‍Mãꞌ, ꞌũg ha nũꞌ, ꞌĩhã ꞌãteknõg, ꞌĩhã ꞌõg hãpxop xak hãꞌ tot hok, ha
ꞌãte ꞌãkuxa yũmmãp-tup. 29 ꞌŨg pe mõg, ꞌũ xa hãmyũmmũgãꞌ, ꞌũgmũn yãg
max, tu yãy kutõgnãg pekpaxex, yĩy ꞌãkuxa yũm putup, 30 ha ꞌãte ꞌãxatꞌax,
xayĩy mĩy, haꞌ kaꞌok ꞌohnãg yõg xatꞌax, yĩy ꞌãyĩpkox xip, nũy yõgnũ
hãpxop xakꞌax tat, hap-tux ꞌohnãg. ꞌŨkux. Kaxĩy.
Yeyox te nit xap ꞌãktux
12 1 ꞌÃmnĩy xohik-tõgnãg nõg, ꞌĩhã nit xap, ha Yeyox te hãpkumep,
tu ta hãpxa xexka xak, ha xuxnãg xetox xap taꞌ, ha tik xop teꞌ
peꞌ mõg, tuꞌ xap mõy, nũy mãꞌ, ꞌũp-tup teꞌ kix hah, 2 ha Paniye xop teꞌ
pẽnãhãꞌ, tu Yeyox pu hãmꞌãktux, hu:
—‍Pẽnãꞌ! ꞌÕg tik xop te xuxnãg ta xetox xap mõy, ha yũmũ yõg xatꞌax teꞌ
xat hok, puꞌ xut hok nit xap ꞌĩhãꞌ. Kaxĩy.
3 Ha:
—‍ꞌOk mõꞌkupix Topa yõg tappet? Hõmã putup te mõnãyxop hittap
Namix putex, ha putup teꞌ kix tik te nũ mũtik mõg, 4 yĩy Topa pet xexka
hãꞌ mõxakux, tu pãm pop, nõm pãm te Topa keppaꞌ pip pop, tuꞌ mãhãꞌ, ha
Topa teꞌ xat hok, pu tikmũꞌũn mã hok. Yã ꞌãmãnex xop puxet teꞌ mãꞌax. 5 ꞌOk
mõꞌkupix hok xateꞌ? Mõyyex teꞌ xat, pu ꞌãmãnex xop hãm nit xap ꞌĩhãꞌ, Topa
pet xexka kopa hãpxopmãhãꞌ, tu hãpxopmã max. 6 ꞌÃte xa hãpxeꞌe ꞌãktux:
Topa pet xexkah, pak mũn xexkah xeꞌẽgnãg. 7 ꞌA ꞌãxop te hãmyũmmũgꞌah,
tu Topa yõg tappet mõꞌkupix, ꞌĩhã hãmyũmmũg ꞌohnãg, ha: “ꞌÃtep-tup xa
hãpxopmã max, pa hãpxop mõꞌhapꞌax ꞌũyĩy hax ꞌãtep-tup nõg.” Kaxĩy. Pax
xa ꞌãxop nõm hãmꞌãktuxꞌax yũmmũg, puxix yõg tik xop ꞌũhitop kopit ꞌohnãg.
8 Yãkmũn Tikmũꞌũn Kutok, tu nit xap hãk xuxyã kamah. ꞌŨkux. Kaxĩy.
Tik yĩm nĩã hittupmãhãꞌ
9 Tu taꞌ mõg, tu Topa pet haꞌ mõg, 10 pa tik xip, tuꞌ yĩm nĩãꞌ, ha
tikmũꞌũn te Yeyox yõg hãpxopmãꞌax kopit putup, nũy kupeh, nũy nit xap
ꞌĩhã hãm hãꞌ kupeh, huꞌ yĩkopit, hu:
—‍ꞌOk yũmũ yõg xatꞌax teꞌ xat, ꞌok peꞌ xat hok, ꞌũhittupmã nit xap hã? Kaxĩy.
11 Ha:
—‍Tikmũꞌũn yõg kahnẽn puxet, tu nit xap ꞌĩhã hãpkox kopaꞌ nãhãꞌ,
puxix tik xut, mõꞌkaꞌok, 12 ha kahnẽn kutõgnãg yã manat, ta tikmũꞌũn
xexkah, Topa te mõꞌyãy xeꞌẽgnãg, tu te takat putuk. Yĩy yũmũ yõg xatꞌax
teꞌ xat ꞌũ yũmũg nõy hã tehet nit xap ꞌĩhãꞌ. Kaxĩy.
13 Tu tik yĩm nĩãa pu hãmꞌãktux, hu:
—‍ꞌ hu:
—‍ꞌÃyĩm koaꞌ! Kaxĩy
MÃTEO 11, 12

24
Haꞌ koaꞌ, tuꞌ hittup, haꞌ yĩm teꞌ yĩm nõy putuk.
14 Yĩy taꞌ mõg Paniye xop, tu yãy mũtik hãmꞌãktux, Yeyox putex putup tuꞌ.
Topa te yãy tik yãykutnãhãꞌ
15 Ha Yeyox te hãmyũmmũg, hu taꞌ mõg, ha tikmũꞌũn teꞌ peꞌ mõg, haꞌ
pakut xop xohix hittupmãhãꞌ, 16 tuꞌ xat, pu tikmũꞌũn nõy puꞌ xuktux hok,
nũy Yeyox ꞌãktux hok. 17 Hõmã ꞌIyait te Topa pupi hãmꞌãktux, tu tappet tu
kaxꞌãmiꞌ, pu tikmũꞌũn mõꞌkupix, ha Yeyox ꞌãktux, yĩy:
18 —‍Topa te hãmꞌãktux, hu: “ꞌÃte nũhũ tik yãykutnãhãꞌ, nũy mõꞌkutnãꞌ,
tu mõꞌyãy xeꞌẽgnãg, hak kuxa hittupmãhãꞌ.
ꞌŨgkoxuk te nõm kopaꞌ xip putup, nũy ꞌũgmũn ꞌãktux,
pu yõgnũ putat ꞌãktux ꞌũhep xop xohix puꞌ, tu hãpxeꞌe ꞌãktux putup.
19 Tu hãmꞌãktux hãꞌ nõy yãnãn putup ꞌohnãg, tuꞌ yĩy kaꞌok putup ꞌohnãg,
tu kõmẽn yõg putat hã hãmꞌãktux ꞌãhĩynãg putupꞌah.
20 Tu tikmũꞌũn hok xop kuxa kap-tup,
tuꞌ puꞌũgnãg xop mõꞌnĩynãm putup, puyĩy tu kaꞌok,
tu hãpxopmã kaꞌok putup, nũy tikmũꞌũn pu hãmmaxnã mõꞌkumaꞌ mõg.
21 Haꞌ hep xohix xop kuxa mãm kaꞌok ꞌũkopah, tu hãmmax hip.”
ꞌŨkux. Kaxĩy.
Yeyox xix Meyemo
22 Ha taꞌ xip tik pa hok, haꞌ mõgãhã Yeyox hah, haꞌ yĩy hok kamah, yã
yãmĩy kummuk te tik kopaꞌ xip. Yeyox teꞌ hittupmãhãꞌ, ha hãmpẽnãhãꞌ,
tu hãmꞌãktux. 23 Ha tikmũꞌũn xohix kuxãnõg, tuꞌ yĩkopit, hu:
—‍ꞌOk nũ tik mõnãyxop Namix hãꞌ mõkputox? Kaxĩy.
24 Ha Paniye xop teꞌ xupak, tu:
—‍Meyemo te yãmĩy xop xohix xat, tu Yeyox kaꞌogãhãꞌ pu yãmĩy
kummuk xop mõy. Kaxĩy.
25 Pa Yeyox te nõm xop te hãmpeꞌpaxex yũmmũg, hu:
—‍Hãpxexka yõg tikmũꞌũn te yãytukmĩy, puxix tu nõg, xiꞌ xape xop nõgꞌax,
ꞌũyãytukmĩy tuꞌ. 26 Pax pu Hãmgãyãgnãg xop yãytukmĩy, tu yãy mõy, puxix
tu nõg kamah. 27 ꞌÃxop te: Meyemo te Yeyox kaꞌogãhãꞌ pu yãmĩy kummuk
mõy. Kaxĩy. Xateꞌ koit. ꞌŨ ꞌũm te ꞌõg tik xop kaꞌogãhã puꞌ mõy? ꞌAꞌ Meyemoꞌah.
Ha kaxĩy ꞌũxohix te xate yãꞌ koit yũmmũg. 28 Pa Topa Koxuk tek kaꞌogãhã ꞌũ
yãmĩy mõy, xa ꞌãxop yũmmũg. Yã hõnhã Topa te tikmũꞌũn xat nũnteꞌ.
29 —‍Tik ꞌũm kaꞌok xip, yĩy tik te hãpxop hãꞌ xupxet teꞌ pet hã ꞌã mõꞌnãꞌah,
nũy tuꞌ xupxet. Pa tik kaꞌok kĩy, puxix hãpxop xohix hã tu xupxet, yĩy ꞌãte
Hãmgãyãgnãg kĩy hãmãxap, nũy kũnãy tu yãmĩy kummuk mõy tikmũꞌũn kopah.
30 —‍Tik tek mũtik mõg hok, puxik tukmĩy. Ha ta tik te ꞌãhã te hok,
puxik kummũgãꞌ, 31 yĩy ꞌãte xa hãmꞌãktux xeꞌeꞌ: Tikmũꞌũn te Topa ꞌãktux
kummuk, puxix Topaꞌ xaxogã pu tu kux, pa timũꞌũn te Topa Koxuk ꞌãktux
kummuk, puxiꞌ xaxogã ꞌohnãg, pu tu xip. 32 Tikmũꞌũn te Tikmũꞌũn Kutok
MÃTEO 12

25
ꞌãktux kummuk, puxix Topaꞌ xaxogã pu tu kux, pa tikmũꞌũn te Topa
Koxuk ꞌãktux kummuk, puxiꞌ xaxogã ꞌohnãg mõ kumaꞌ mõg.
Mĩpkup max xix mĩnta max
33 —‍Mĩpkup max te mĩnta ta max tahaꞌ, ha ta mĩpkup kummuk te
mĩnta ta kummuk tahaꞌ, yĩy tikmũꞌũn te mĩnta pẽnãhãꞌ, tuꞌ kup yũmmũg
kamah, ꞌok peꞌ max, ꞌok peꞌ kummuk. 34 ꞌÃxop yã kãyã gãy kutok xop!
ꞌÃkummuk, hu hãmꞌãktux kummuk. ꞌAp hãmꞌãktux max yũmmũgꞌah. Tik
kuxa kummuk, puxix tik hãmꞌãktux kummuk, pa tik kuxa max, puxix tik
hãmꞌãktux max. 35 Tikmũꞌũn max teꞌ kuxa max tu hãmmax ꞌãktux, ha ta
tikmũꞌũn kummuk teꞌ kuxa kummuk tu hãpkummuk ꞌãktux.
36 —‍ꞌÃte xa hãpxeꞌe ꞌãktux: Topa yõg hãptup mõꞌnãp-tup, ꞌĩhã Topa te
tikmũꞌũn yõg hãpxopmãꞌax xohix kopit, tuꞌ yõg hãmꞌãktux hitop kopit putup,
ꞌok pe yãꞌ max, ꞌok pe yãꞌ kummuk. 37 Yã ꞌõg hãmꞌãktux hã Topa te ꞌãxop yõg
hãpxopmãꞌax kopit putup, nũy yũmmũg, ꞌok pe ꞌãmax, ꞌok pe ꞌãkummuk. Kaxĩy.
Yoneo xexka xop te hãpxopmãꞌax kaꞌok xeꞌẽgnãg xak
38 Ha taꞌ pip tik te hãmyũmmũg xop, tu Yeyox pu hãmꞌãktux, ha Paniye
xop ꞌũm te:
—‍ꞌŨgmũꞌãte ꞌãp-tup xa hãpxopmã kaꞌok xeꞌẽgnãg, tikmũꞌũn te nõm mĩy
hok, ꞌũgmũg pẽnãꞌ. Kaxĩy.
39 Ha:
—‍Hõnhã tikmũꞌũn kuxa kummuk, tuꞌ mãm ꞌohnãg Topa yõg hãmꞌãktux kopah.
ꞌÃxop te hãpxopmãꞌax kaꞌok xeꞌẽgnãg xak, ꞌaꞌ mĩy ꞌãtep-tupꞌah. ꞌÃxop te Topa yõg
tappet mõꞌkupix, ha tik hittap Yõn ꞌãktux, nõm te Topa pupi hãmꞌãktux, yĩy ꞌãxop
te mõnãyxop Yõn yõg hãpxopmãꞌax puxet pẽnãp-tup. 40 Yõn te mãm xexka tex
kopaꞌ xip, tu ꞌãmnĩy tikoxyuk hãꞌ kopaꞌ xip, ha kaxĩy ꞌũgmũn te hãpkox kopak xip
putup, yãk mũn Tikmũꞌũn Kutok, tu ꞌãmnĩy tikoxyuk hã hãpkox kopak xip putup.
41 Topa yõg hãptup mõꞌnãp-tup, ꞌĩhã Topa teꞌ hep xop xohix yõg hãpxopmãꞌax kopit,
ha Nĩn yõg tikmũꞌũn te ꞌãxop ꞌãktuxꞌax kummuk. Yã nõm te Yõn yõg hãmꞌãktuxꞌax
ꞌãpak, tuꞌ yĩpkox pip, tu yãyhãhup, nũy kuxyã hãpxopmãꞌax kummuk, ha Yõn
ꞌũk-tõgnãg, ha tak mũn xexkah, pa xate yãyhãhup ꞌohnãg. 42 Topa yõg hãptup
mõꞌnãp-tup, ꞌĩhã hãpxexka Xamah yõg ꞌũn tu yok, nõm te hãpxexka yõg tikmũꞌũn
hittap xat, tuꞌ yok putup, nũy ꞌãxop kummuk ꞌãktux. Yã hãptox tuꞌ nũn, nũy tik teꞌ
xatꞌax hittap Xanomãm pẽnãꞌ, ha ta Xanomãm ꞌũk-tõgnãg, ha tak mũn xexkaꞌ.
Yãmĩy kummuk te put puꞌ mõg
43 —‍Yãmĩy kummuk te tikmũꞌũn ꞌũm kopaꞌ xip, tuꞌ nĩm, tu hãm panip
haꞌ mõg, tuꞌ xak, nũy ta pihiꞌ. ꞌŨxip hok, 44 puxix tute: “ꞌŨkpet ha putpuk
mõg.” Kaxĩy. Tuꞌ mõg, tu mõktu tikmũꞌũn tuꞌ xupep, tuꞌ mõꞌnãhãꞌ, haꞌ
hok yũm, ha hãpkunut xit, ha mõktu yãꞌ max, 45 ha xeꞌ mõg, tu yãmĩy
MÃTEO 12

26
kummuk xop nõy xãnãhã pu nũ mũtik mõg, tuꞌ tihiꞌ, yĩy tikmũꞌũn xũy
xexkah. Ha kaxĩy nõm tikmũꞌũn kummuk xũyꞌax nõmhã. Kaxĩy.
Yeyox xape nũn
46 Tu hãmꞌãktux ha taꞌ tut nũn, xiꞌ taknõy xop nũn, tu hãptopaꞌ pip, tuꞌ
xak, nũy Yeyox mũtik hãmꞌãktux, 47 yĩy tik te Yeyox pu hãmꞌãktux, hu:
—‍Pẽnãꞌ! ꞌÃtut xix ꞌãtaknõy xop te hãptopaꞌ pip, nũy ꞌãmũtik hãmꞌãktux. Kaxĩy.
48 Ha:
—‍Piꞌyãk tut? Piꞌyãk taknõy xik hex? Kaxĩy.
49 Tu tikmũꞌũn te yãy mũtik hãpkumep xop pẽnãhãꞌ, tuꞌ yĩm xix, tu:
—‍Pẽnãꞌ! Nũ xop yãk tut, xik taknõy xop xeꞌeꞌ! 50 Yã tikmũꞌũn xohix
te ꞌÃtak Topa puꞌ yĩpkox pip, nõm te pexkox tuꞌ xip, puxix yãk xape, tuk
taknõy, xik hex, xik tut. Kaxĩy.
Tik te hãpxop xap xok
13 1 Hãpxip kutõgnãg ꞌĩhã Yeyox mõg hãptopaꞌ, tu kõnãg xexka haꞌ
mõg, tu taꞌ mõg tu mõktu hãpkux tuꞌ xupep, tuꞌ yũm, tu tikmũꞌũn
yũmmũgãhãꞌ, ha tikmũꞌũn teꞌ xakot, nũy xupax. 2 Yãꞌ xohix xexkah, yĩy Yeyox
te mĩpkox hã mõꞌnãhãꞌ, tu mĩpkox te kõnãg yĩmũꞌ mõg, ha mõktu mõꞌnãhãꞌ,
tuꞌ yũm, ha tikmũꞌũn te yãykoteꞌ pip, tuꞌ xakot hãpkux tuꞌ, 3 ha Yeyox te
hãmꞌãktuxꞌax hã hãmyũmmũgãhãꞌ, nũy Topa yõg hãpxopmãꞌax yũmmũgãꞌ, hu:
—‍Tik mõg, nũy hãpxop xap xok, 4 tu hãpxa xexka tuꞌ xok, haꞌ yãg te putat yĩka
te tuꞌ nãhãꞌ, ha putuxnãg teꞌ mãnãm, haꞌ nõg. 5 Ha taꞌ yãg nõy te mĩkax xap tuꞌ
nãhãꞌ, ha hãm xet kutõgnãg, tu mĩkaxxap yĩmũꞌ pip, haꞌ xap xokax mõꞌkaꞌok,
6 ha mãyõn xupep, tuꞌ nakgãhãꞌ, ꞌũyĩpxatit kutõgnãg pip tuꞌ nakgãhãꞌ, 7 ha taꞌ yãg
nõy te mĩmyãm xop kopaꞌ nãhãꞌ, tuꞌ tuk mĩmyãm xop mũtik, paꞌ xupep ꞌohnãg,
mĩmyãm kopaꞌ pip tuꞌ, haꞌ nõg. 8 Ha taꞌ yãg te hãm max tuꞌ nãhãꞌ, huꞌ tuk max, tu
mõktu xexkah, tuꞌ xap xohix xexka popmãhãꞌ, yãꞌ xap puxet te 30 popmãhãꞌ, ha
taꞌ xap nõy te 60 popmãhãꞌ, ha taꞌ xap nõy te 100 popmãhãꞌ, ꞌŨkux. Kaxĩy.
9 Tu xe hãmꞌãktux, hu:
—‍ꞌŨg ꞌãpax, xa ꞌãyĩpkox piꞌ. Kaxĩy.
Teptu hãmꞌãktuxꞌax hã hãmyũmmũgãhãꞌ?
10 Ha tikmũꞌũn te Yeyox mũtik hãpkumep, tuꞌ nũn, tu nũktu Yeyox yĩkaꞌ
pip, tuꞌ yĩkopit, tu:
—‍Teptu xate hãmꞌãktuxꞌax hã tikmũꞌũn nõy pu hãmyũmmũgãhãꞌ? Kaxĩy.
11 Ha:
—‍Topa te ꞌãxop pu hãmyũmmũgãhãꞌ, xayĩy hãmyũmmũg. ꞌAp nõy xop
puꞌ xuktuxꞌah, tu yãy yõg tikmũꞌũn xat, pa tikmũꞌũn nõy te pexkox yõg
hãpxopmãꞌax yũmmũgꞌah, yĩy hãmꞌãktuxꞌax hã ꞌãte hãmyũmmũgãhãꞌ, nũy
Topa yõg hãpxopmãꞌax yũmmũgãꞌ. 12 Yã ꞌãxop te hãmyũmmũg tap, yĩy
xa ꞌã ꞌũm yũmmũgãp-tup, ha mõktu hãmyũmmũg xexkah, ha tikmũꞌũn
MÃTEO 12, 13

27
te hãmyũmmũg hok, tu hãpxaxok putup, tu mõktu hãmyũmmũg ꞌohnãg.
13 Yĩy ꞌãte hãmꞌãktuxꞌax hã hãmyũmmũgãhãꞌ nũy Topa yõg hãpxopmãꞌax
yũmmũgãꞌ. Yã pa mãm, pãyãꞌ pẽnã ꞌohnãg, tu hãmꞌãktuxꞌax ꞌãpak, pãyãꞌ
yũmmũg ꞌohnãg. 14 Yĩy tik hittap ꞌIyait te Topa pupi hãmꞌãktux, tu:
“ꞌÃxop te hãmꞌãpak, pãyã ꞌa hãm ꞌũm ꞌãpak ꞌohnãg,
tuꞌ pẽnãhãꞌ, pãyã hãm ꞌũm pẽnã ꞌohnãg.
15 Yã tikmũꞌũn putox kaꞌok, tu mõꞌyãy yĩpkox yĩnnĩn, nũy hãmꞌãpak hok,
xiꞌ pa kĩy kaꞌok, nũy hãmpẽnã hok,
ka hãmyũmmũg, xix yãyhãhup, ka Topa yõg putat hãꞌ mõg ꞌũxeheh.
Yã ꞌãte nõm hittupmãꞌax, pãyãp-tup nõg.
Yã Topa teꞌ xuktux tap.” Kaxĩy.
16 Tu xe hãmꞌãktux, hu:
—‍Pa ꞌãxop kuxa hittup xop, hãmpẽnã max tuꞌ, xix hãmꞌãpak max tuꞌ! 17 ꞌŨxaxok
hok: Tik xop te Topa pupi hãmꞌãktux, pu tikmũꞌũn yũmmũgãꞌ, tuꞌ xak, nũy
pexkox yõg hãpxop pẽnãꞌ, ꞌãxop te nõm pẽnãhã nõmhã, xix Topa yõg tikmũꞌũn
punethok teꞌ xak, nũy pẽnãꞌ, nũy xupax, pãyãꞌ pẽnã ꞌohnãg, xiꞌ xupak ꞌohnãg.
Yeyox te hãmꞌãktuxꞌax hã hãmyũmmũgãhãꞌ
18 Yĩy ꞌũg ꞌũm ꞌãpax, nũy yõg hãmꞌãktux ꞌũm yũmmũg max, nũy yõg
hãpxopmãꞌax yũmmũg. 19 Hãpxop xap te putat kuxyãꞌ nãhãꞌ, ha kaxĩy tikmũꞌũn
te yõg hãmꞌãktuxꞌax ꞌãpak, ha ꞌãte Topa te tikmũꞌũn xakꞌax ꞌãktux, haꞌ xupak,
pa hãmyũmmũg ꞌohnãg. Hãmgãyãgnãg nũn, tu yõg hãmꞌãktux xaxogãhãꞌ, pu
tikmũꞌũn yĩpkox pip hok. 20 Ha ta hãpxop xap yãg te mĩkax xap tuꞌ nãhãꞌ, ha
kaxĩy tikmũꞌũn te hãmꞌãktuxꞌax ꞌãpak, tuꞌ kuxa hittup. 21 Pa hãpxip kutõgnãg
ꞌĩhãꞌ xũy, haꞌ gãy xop teꞌ kummugãhãꞌ, yĩy Topa yõg hãmꞌãktuxꞌax xaxok
mõꞌkaꞌok, ꞌũkuxa yũm puꞌuk tuꞌ. 22 Ha taꞌ yãg nõy te mĩmyãm xox xop kopaꞌ
nãhãꞌ, ha kaxĩy tikmũꞌũn te hãmꞌãktux ꞌãpak, pa hãpxip kutõgnãg ꞌĩhãꞌ yãykuxop
punethok, ha tayũmak nõg, ha hãmꞌãktux xaxok, haꞌ nõg. 23 Haꞌ yãg nõy te hãm
max tuꞌ nãhãꞌ, ha kaxĩy tikmũꞌũn te hãmꞌãktuxꞌax ꞌãpak, tu hãmyũmmũg, tuꞌ
yĩpkox pip, tu Topa yõg putat hãꞌ mõg kumaꞌ mõg. Tu ta tuꞌ kux.
24 Tu xe hãmꞌãktuxꞌax hã hãmyũmmũgãhãꞌ, nũy Topa yõg
hãmpxopmãꞌax yũmmũgãꞌ, hu:
—‍Tik te hãpxop xap xuxnãg xetox xok, ha kaxĩy Topa te yãy yõg tikmũꞌũn xat.
25 ꞌÃmnĩy ꞌũm ꞌĩhãꞌ nũn tik gãy, tuꞌ xap kummuk xok hãpxop xap max kotĩnnãhãꞌ,
tuꞌ xok kux, tuꞌ mõg, 26 haꞌ xap xokax, tuꞌ tuk, ha mĩxux kummuk punethok te nõm
max kotĩnnãhãꞌ, 27 yĩy kãmãnat xop te hãpxa xexka xuxyã xãnãhãꞌ, tu: “Yãyãꞌ, xate
hãpxop xap max xok nũhũ hãm tuꞌ. Teptuꞌ mãm mĩxux kummuk kamah?” Kaxĩy.
28 —‍Ha: “Yã tik gãy teꞌ xap kummuk xok,” kaxĩy.
—‍Ha: “Xatek mũ putup ꞌũ mõy?” kaxĩy.
29 —‍Ha: “ꞌŨmõy hok, pũyãꞌ piꞌ, ka hãpxop mõy kamah mĩxux kummuk
mũtik. 30 ꞌŨtux hok pu tuꞌ tuk, nũy mõy yã tu taꞌ, ꞌĩhã ꞌãteꞌ xat, pu mõꞌ
MÃTEO 13

28
yãy pot, tu mĩxux kummuk putyõn hãmãxap, nũy nõ kuxap hã mõꞌxut,
nũy xuxnãg ta xetox nũnnãꞌ, tuk pet kopaꞌ xex.” Tu ta tuꞌ kux. Kaxĩy.
Tute mõytat xap ꞌãktux
31 Tu xe hãmꞌãktuxꞌax hã hãmyũmmũgãhãꞌ, nũy Topa yõg hãpxopmãꞌax
yũmmũgãꞌ, yã Topa te tikmũꞌũn xat,
—‍Hãpxop xap mõytat yãk-tĩgnãg, ha tik teꞌ xap xok hãm kopah, 32 haꞌ
xokax, tuꞌ tuk tu mõktu yãꞌ kup xexkah, ha putuxnãg xop teꞌ mĩmmãg tuꞌ
pet. Kaxĩy Topa te tikmũꞌũn kutõgnãg xat hãmãxap, ha tikmũꞌũn nõy nãꞌ
mõg, tu mõktu tikmũꞌũn xohix te Topa puꞌ yĩpkox pip. Tu ta tuꞌ kux. Kaxĩy.
Pãm yõg tokatogãꞌax ꞌãktux
33 Tu xe hãmꞌãktuxꞌax hã hãmyũmmũgãhãꞌ, nũy Topa yõg hãpxopmãꞌax
yũmmũgãꞌ, hu:
—‍ꞌŨn te pãm yõg tokatogãꞌax pahaꞌ, xix xuxnãg ta xetox xap kõnnõn, tuꞌ
yõg xox tix pahaꞌ, nũy ꞌũyõg kãnẽy 3 tu nõm kanop, tu mõktu ꞌũpohot, haꞌ
tokatogãꞌax teꞌ mõmmãhãꞌ, ha kaxĩy Topa te tikmũꞌũn kutõgnãg xat hãmãxap, haꞌ
mõg, nũy nõy puꞌ xuktux, hak-nãy tu tikmũꞌũn xohix xexka xat. ꞌŨkux. Kaxĩy.
Teptu Yeyox te hãmꞌãktuxꞌax hã hãmyũmmũgãhãꞌ?
34 Yã Yeyox te hãmꞌãktuxꞌax hã hãmyũmmũgãhã tikmũꞌũn puꞌ, nũy Topa yõg
hãpxopmãꞌax ꞌãktux, tu hãmꞌãktux nõy hãꞌ xuktux ꞌohnãg. 35 Topa yõg hãmꞌãktux
hittap hã Yeyox te hãmyũmmũgãhãꞌ, yã Topa yõg tappet hittap teꞌ xuktux. Hõmã
tik hittap ꞌIyait te Topa pupi hãmꞌãktux, tu tappet tu kaxꞌãmiꞌ, tu Yeyox ꞌãktux, hu:
“ꞌÃte yãy pupi hãmꞌãktuxꞌax hã hãmyũmmũgãhãꞌ, nũy tikmũꞌũn yũmmũgãꞌ,
nũy hãpxopmãꞌax hittap xop ꞌãktux,
yã hõmã Topa te hãm xexka xohix mĩy xix hõnhã,
ha tikmũꞌũn te nõm hãpxopmãꞌax kaꞌok yũmmũg ꞌohnãg.” Kaxĩy
Yeyox te hãmꞌãktux hãꞌ yãnãn
36 Ha ta Yeyox mõg, tu tikmũꞌũn nĩm, nũy yãy xipꞌax haꞌ mõg, ha
tikmũꞌũn te Yeyox mũtik hãpkumep, tuꞌ yĩgãhãꞌ mõg, tuꞌ yĩkopit, hu:
—‍ꞌŨgmũꞌã hãmꞌãktux. Putep yũmmũgãhã xateꞌ, ꞌĩhã mĩxux kummuk
ꞌãktux? Kaxĩy.
37 Ha Yeyox te:
—‍ꞌŨgmũn yã Tikmũꞌũn Kutok Pit, tu tik putuk, nõm te hãpxop xap max xok,
38 tu hãpxa xexka tuꞌ xok, ha hãm xexka putuk, ha hãpxop xap max te tikmũꞌũn
max putuk, Topa te nõm xat, ha mĩxux kummuk te Hãmgãyãgnãg yõg tikmũꞌũn
kummuk putuk, 39 ha tik gãy te Hãmgãyãgnãg mũn putuk. Yã tikmũꞌũn te
hãpxop ta nũnnãhãꞌ, ha kaxĩy hãm xexka nõg putup, ꞌĩhã pexkox yõg nũꞌpok
xop nũn, nũy mõꞌpot. 40 Kãmãnat xop te mĩxux kummuk mõy, nũy kuxap kopa
mõꞌpok, pu mõꞌxut, ha kaxĩy pexkox yõg nũꞌpok xop te hãpxopmã kummuk xop
MÃTEO 13

29
mõy putup, nũy kuxap xeꞌẽgnãg kopa mõꞌpok. 41 ꞌŨgmũn yã Tikmũꞌũn Kutok, tu
pexkox yõg xop nũꞌpok putup, nũy tikmũꞌũn kummuk xeh yaꞌomaꞌ, ꞌũp-tup nõg tuꞌ,
yã mõꞌpok putup, pu tu pip hok, ꞌĩhã ꞌãte yãy yõg tikmũꞌũn xat. Yã nõm kummuk
xop teꞌ nõy pu hãpkummuk yũmmũgãhãꞌ. Yãꞌ kummuk xop xohix te hãpxopmã
kummuk yaꞌomaꞌmõg, 42 nũy kuxap xeꞌẽgnãg kopa mõꞌpok. Tu potap-tup, ꞌũxũy
xexka tuꞌ. 43 Ha Topa yõg tikmũꞌũn xexkanãp-tup xeꞌẽgnãg, mãyõn putuk, tuꞌ yõg
ꞌÃtak Topa mũtik pip putup pexkox tuꞌ. ꞌÃxop te hãmꞌãpax, ꞌãpu ꞌãyĩpkox piꞌ. Kaxĩy.
Tu hãpxop takat xexka ꞌãktux
44 Tu xe hãmꞌãktux, nũy Topa yõg hãpxopmãꞌax yũmmũgãꞌ, hu:
—‍Tik te hãpxaha ꞌĩhã hãpxop te takat xipihi hãpkox kopah, tu xeꞌ xaptop, tuꞌ
kuxa hittup xexkah, huꞌ mõg mõꞌkaꞌok, tuyãy hãpxop xohix hãmenex hãmãxap,
nũy tayũmak punethok pop, tuk-nãy tu hãpxa pa yãy puꞌ. Ha kaxĩy tikmũꞌũn
te Topa yõg hãmꞌãktux ꞌãpak, tuyãy yõg hãpxop xohix xaxok, ꞌũhittup tuꞌ, nũy
Topa pu tuꞌ yĩpkox piꞌ. Ha kaxĩy Topa te yãy yõg tikmũꞌũn xat. ꞌŨkux.
Tute kupxat xap max ꞌãktux
45 Tu xe hãmꞌãktux, nũy Topa yõg hãpxopmãꞌax yũmmũgãꞌ, nũy tu
tikmũꞌũn xat ꞌãktux, hu:
—‍Tik teꞌ xap max pop, yã kupxat xap max pop, nũy xe nõmenax, tayũmak
xexka hãꞌ nõy yãnãn, 46 tu nõm xap max xipihiꞌ, huꞌ mõg, tu yãy yõg hãpxop
xohix hãmenex, nũy tayũmak xexka pop, nũy ta tuꞌ xap max paꞌ. Ha kaxĩy
tikmũꞌũn te hãpxop xohix xaxok, nũy Topap-xehnãg puꞌ yĩpkox piꞌ. ꞌŨkux.
Tute mãpxamut ꞌãktux
47 —‍Topa te hãpxopmãhãꞌ, tuyãy yõg tikmũꞌũn xat hã kaxĩy: Tikmũꞌũn te
mãpxamut kõnãg xexka kopah, tu mãm xohix pop, 48 ha nũꞌxip ꞌĩhã hãpkux haꞌ
nũnnãhãꞌ, tu hãm tuꞌ mãm, nũy mãm mõꞌpot. Tuꞌ yĩy max yaꞌomaꞌmõg manax
kopah, tuꞌ yĩy kummuk yaꞌomaꞌmõg kõnãg kopah. Ha kaxĩy Topa teꞌ hep xop
xohix mõꞌpot putup, 49 ha kaxĩy mõꞌãgmũg xohix kux putup, ꞌĩhã pexkox nũꞌpok
xop teꞌ hep xop xohix mõꞌpot, 50 tuꞌ yĩy kummuk xop yaꞌomaꞌ mõꞌpok, tu kuxap
xeꞌẽgnãg kopa mõꞌpok putup, ha potap-tup, ꞌũxũy xexka tuꞌ. ꞌŨkux. Kaxĩy.
Tute hãmꞌãktux xeꞌe ꞌãktux
51 Ha Yeyox te yãy yõg tikmũꞌũn yĩkopit, hu:
—‍ꞌOk yũmmũg hãpxopmãꞌax ꞌãte xaꞌ xuktux? Kaxĩy.
Ha:
—‍Yã ꞌãteꞌ yũmmũg. Kaxĩy.
52 Ha:
—‍Yã tik te hãmyũmmũg xop tek mũtik hãpkumep, nũy ꞌũgmũn
puxehnãg pu tu yĩpkox piꞌ, puxix mĩptut xuxyã putuk, tu hãpxop kutut
xex, yãy pet kopaꞌ xex, xix hãpxop tup xex, nũy kũnãy tuꞌ mõy. Kaxĩy.
MÃTEO 13

30
Yeyox te kõmẽn Nãyane tuꞌ xip
53 Tu hãmꞌãktux kux, tu taꞌ mõg, 54 tuyãy yõg kõmẽn haꞌ mõg, tuꞌ mõg
tu mõktuꞌ xupep, tu Topa pet kopa tikmũꞌũn yũmmũgãhãꞌ, ha tikmũꞌũn te
hãmꞌãpak, tuꞌ yẽy, tu:
—‍ꞌOk hãmyũmmũg ꞌũm ꞌõhõm? Tute xĩy ꞌõhõm te hãpxopmã kaꞌok
xeꞌẽgnãg? 55 Yã Yoye kutok, nõm te mĩmpe mĩyꞌax, haꞌ tut Mãnix, haꞌ
taknõy xop yũmmũꞌãteꞌ yũmmũg. ꞌŨxohix te: Tiak, xix Yoye, xix Xĩmãm,
xix Yot. 56 Yãꞌ hex xop nũnte ꞌãti kamah. ꞌŨ ꞌũm te Yeyox kaꞌogãhãꞌ, pu
hãpxopmã kaꞌok xeꞌẽgnãg? Yã tikmũꞌũn puxet teꞌ mĩy hok. ꞌĨntuꞌ. Kaxĩy.
57 Tup-tup nõg, yĩy Yeyox te:
—‍Tik te Topa pupi hãmꞌãktux, yã hãpxexka yõg tikmũꞌũn xohix teꞌ
xexka ꞌãktux, pãyã yãy xape xop tek-tõgnãg ꞌãktux, xix kõmẽn yõg
tikmũꞌũn tek-tõgnãg ꞌãktux kamah. Kaxĩy.
58 ꞌAp hãpxopmã kaꞌok xeꞌẽgnãgꞌah, tikmũꞌũn ꞌũm kuxa mãm ꞌohnãg hah.
ꞌEnot te Yoãm putex, nõm tep-tox pix
14 1 Hãpxip ꞌĩhã ꞌEnot te hãpxexka Ganinet yõg tikmũꞌũn hã
gohenanok, tu nõm tikmũꞌũn xat, ha tikmũꞌũn te Yeyox ꞌãktux, ha
ꞌEnot teꞌ xupak, 2 yĩy kãmãnat xop pu hãmꞌãktux, hu:
—‍Hamũn! ꞌÕhõm yã Yoãm, nõm tep-tox pix! Yãꞌ xok, paꞌ putpuꞌ hiꞌ, hu
hãpxopmã kaꞌok xeꞌẽgnãg nõmhã, tikmũꞌũn te nõm mĩy hok. Kaxĩy.
3-4 Hõmã ꞌEnot te yãy taknõy Pinip xetut mũg, haꞌ xuxetꞌax ꞌEnonit, ha
Yoãm teꞌ mãnõg pax, tu: “Yãyta hok! Topa yõg xatꞌax teꞌ xat hok, pu yãy
taknõy xetut mũy hok!” Kaxĩy. Ha ꞌEnot gãy, ꞌũyãytap-tup tuꞌ, huꞌ xat, pu
xonat xop Yoãm mũy, haꞌ mũg, tuꞌ yĩm kĩy, tu kanet ha mõꞌtat, haꞌ kopaꞌ xip.
5 Yã ꞌEnot tep-tex putup, pa Yoneo yõg tikmũꞌũn yĩpkutuk, tikmũꞌũn
te Yoãm ꞌãktux max hah, tu: “ꞌÕhõm te Topa pupi hãmꞌãktux!” Kaxĩy. Tuꞌ
xexka peꞌpaxex. 6 ꞌÃmnĩy puxet ꞌĩhã ꞌEnot te ꞌãmuk xexka mĩy, nũy yãy
yõg hãmyãxatamuk xohix hãꞌ hittup, ha ꞌEnonit kutok hex te hãmyãg,
ꞌũxexka xop keppaꞌ hãmyãg, 7 ha ꞌEnot tep-tup pax, hu hãmꞌãktux xex, tu
Topa ꞌãxetꞌax ꞌãktux nũy hãmꞌãktux xeh ꞌũtuk tup hex puꞌ, hu:
—‍Topa tek yũmmũg, ꞌãte xaꞌ hõm hãpxop xohix xatep-tup. Kaxĩy.
8 Ha tukũm teꞌ tut tuꞌ xak, pu tu hãmyũmmũgãꞌ, haꞌ tut te
hãmyũmmũgãhãꞌ, yĩy putpuꞌ nũn ꞌEnot keppah, tu:
—‍ꞌÃte Yoãm putox putup, tu nõm tat putup kãnẽy pet xax yĩmũ nõmhãꞌ.
Kaxĩy.
9 Ha ꞌEnot kuxa hittup ꞌohnãg, pãyã yãyhãhup, hãmꞌãktux xex tuꞌ, 10 huꞌ
xat, pu Yoãm putox xax, 11 haꞌ xak, tu kãnẽy pet xax yĩmũꞌ yũm, tuꞌ tuk
tup hex puꞌ hõm, ha homiꞌ tut puꞌ hõm. 12 Ha Yoãm yõg tik xop teꞌ xokxax
pahaꞌ, tuꞌ mõgãhãꞌ, tu mõktu nõ hãpkot, tu hãpkot kux, ꞌĩhãꞌ mõg, nũy
Yeyox puꞌ xuktux.
MÃTEO 13, 14

31
Yeyox te tikmũꞌũn xĩnnãhãꞌ
13 Haꞌ xupak, tu taꞌ mõg, tu mĩpkox hã mõꞌnãhãꞌ, nũy kõnãg yĩmũꞌ mõg, tu
yãp-xehnãg mõg, hãm panip haꞌ mõg, tu mõktuꞌ xupep, pa tikmũꞌũn teꞌ yũmmũg,
tuyãy pipꞌax nĩm, tu hãmnak hãꞌ peꞌ mõg, 14 ha Yeyox te mĩpkox mõktuꞌ xupep,
tu ta tikmũꞌũn pẽnãhãꞌ, yã tikmũꞌũn xohix xexkah, haꞌ kuxa kaꞌ, tuꞌ pakut xop
hittupmãhãꞌ. 15 Ha ꞌãmãxak ꞌĩhãꞌ yõg tik xop nũn, tu Yeyox pu hãmꞌãktux, hu:
—‍Mãyõn mog, ha hãm panip tu yũmũg pip. ꞌÃpu tikmũꞌũn mõꞌpok, puꞌ
xip tu xexka ha mõg, nũy tuꞌ xitꞌax pop kõmẽn tuꞌ. Kaxĩy.
16 Pa Yeyox te:
—‍ꞌAꞌ mõg putupꞌah. ꞌÃpu, nõmhã xĩnnãꞌ. Kaxĩy.
17 Ha:
—‍ꞌŨxitꞌax yãk-tõgnãg: yã pãm te 5 pip, xix mãm 2 mãm. Kaxĩy.
18 Ha:
—‍Paxnũꞌ! Kaxĩy.
19 Tuꞌ xat pu tikmũꞌũn te mĩxux yĩmũꞌ mãm, tu pãm pop, xix mãhãm,
tu pexkox tuꞌ pẽnãhãꞌ, tu Topa pu hãmꞌãktux, hu:
—‍ꞌÃmax Topah. Xate tikmuꞌũn xohix puꞌ xitꞌax popmãhãꞌ. Yãꞌ puxiꞌ! Kaxĩy.
Tu pãm koxip, tuyãy yõg tik xop puꞌ popmãhãꞌ, ha tikmũꞌũn xohix xexka
puꞌ popmãhãꞌ, 20 haꞌ mãhãꞌ, tu nõ hi kaꞌok, pãyãꞌ pip xitꞌax punethok,
yĩy tik xop te manax hãꞌ tat, tu mõktu manax te 12 nũꞌ tihigãhãꞌ, 21 ha
tikmũꞌũn xohix xexka teꞌ mãhãꞌ, tik xohix te 5.000 teꞌ mãhãꞌ, ha ꞌũn xit
kamah, xix kakxop, pãyã ꞌap tikmũꞌũn te nõm mõꞌkupixꞌah.
Yeyox te kõnãg xexka yĩmũ hãpkumep
22 Hãpxip kutõgnãg ꞌĩhã Yeyox teꞌ xat, pu yãy yõg tik xop mĩpkox hã mõxakux,
nũy tu mõg hãmãxap, nũy kõnãg xexka xak, ꞌĩhã Yeyox te tikmũꞌũn xat pu yãy
pet ha mõg, 23 haꞌ mõg, ha Yeyox te yĩktix tuꞌ mõg, tu mõktu yĩmũꞌ xip, tu Topa
pu hãmꞌãktux ꞌũp-xehnãg hã, ha mõktu yã ꞌãmnĩy, hap-xet xip, 24 ꞌĩhã mĩpkox
te kõnãg yĩmũꞌ mõg, tu kõnãg xexka koteꞌ xup, ha ꞌãmuuh kaꞌok, tu kõnãg
mahapnãm, haꞌ mõg putux, 25 ha hãptup ꞌĩhã mãyõn xupep putup, ꞌĩhã Yeyox te
kõnãg xexka yĩmũ hãpkumep, 26 ha tik xop teꞌ pẽnãhãꞌ, tuꞌ kuxãnõg xexkah, tu:
—‍Yãꞌ koxuk ꞌõhõm! Kaxĩy.
Tuꞌ yĩy kaꞌok, ꞌũkuxãnõg tuꞌ, 27 ꞌĩhã Yeyox te:
—‍ꞌÃkuxãnõg hok! Yãkmũn xeꞌeꞌ! ꞌŨkyĩpkutuk hok! Kaxĩy.
28 Yĩy Pet te:
—‍ꞌÃmũn xeꞌeꞌ, ꞌãpuk xat, ꞌũ kõnãg xexka yĩmũ hãpkumep kamah, nũy
ꞌãhakmõg! Kaxĩy.
29 Ha:
—‍Mãꞌ! Kaxĩy.
Haꞌ mõg, pa ꞌãmuuh gãy te mõꞌkoꞌuk, 30 yĩy Pet teꞌ yĩpkutuk, tu kõnãg
hã mõꞌnãꞌax, huꞌ yĩy kaꞌok tu:
MÃTEO 14

Bible in caposho, cumanasho, macuni, monaxo, monocho

Bible in caposho, cumanasho, macuni, monaxo, monocho

Recommended

Recommended

More Related Content

Viewers also liked

Viewers also liked (17)

More from HolyBibles

More from HolyBibles (20)

Bible in caposho, cumanasho, macuni, monaxo, monocho