السلام عليكم، معكم وسيم الأطرش
مستقل اعمل في مجال الويب دفلوبمنت
هالفيديو موجه للناس اللي الريدي بتشتغل على مواقع العملا لحر..
الفيديو تاعنا بحكي عن كيف تاخد البزنس تاعك برات مواقع العمل الحر ..
وهنبدا سريعا.. بالسؤال الاهم .. ليش ؟ ليش انا محتاج اعمل هيك ؟
انا بعرف اشخاص كتير صارلهم سنين بشتغلو على مواقع العمل الحر فقط !
لنجواب هاد السؤال.. لازم نرجع نفكر جوات البوكس..
شو المشكلة في مواقع العمل الحر..؟ شو المانع لو ضليت فيها !؟
المشكلة بتبدا من النسبة اللي باخدها الموقع 8- 10% كحصة الموقع من كل مشروع.. هاد غير ان كنت محتاج تاخد ممبرشب ع الموقع.. غير الفلوس اللي ممكن ياخدها في عمليات السحب والايداع من البالانس تاعك..
النقطة التانية هي انك كل مرة بتحتاج فيها مشروع جديد.. انتا مضطر تفوت ع الموقع لتقدم عروض عالمشاريع.. هالمشاريع ممكن يكون صاحبها مهتم باقل سعر.. او باقل وقت.. او بافضل جودة..
عالاكيد لو كان صارلك فترة بتشتغل في مجال الحر.. فاقل سعر مش من نقاط قوتك... ولا حتى اقل وقت.. لانو عالغالب هتكون ماسك اكتر من مشروع.. فهيضل عندك صنف واحد محتمل وهو اللي بدو جودة عالية..
السيناريو هاد هيكون مكلف جدا من ناحية وقت.. ممكن تقضي يوم يومين.. وانتا بتحاول تمسك شغل جديد! واكيد بالنسبة للفريلانسر، الوقت = فلوس
موضوع اخر وهو القواعد اللي بفرضها الموقع على الفريلانسرز والكلاينتس.. اللي اوقات بتكون مجحفة بحق الفريلانسر.. وبتفتح الباب للعملاء السيئين ليستغلو هالقوانين ضد الفريلانسرز..
ابسط مثال.. انو العميل ممكن كل 3 ايام يرد عليك بمسج واحد.. وبالنسبة لموقع العمل الحر.. ما في اي ادنى مشكلة ! بالنسبالك الديلي مشكلة !
العميل ممكن يكون من النوع اللي دايما عندو تعديلات كتير.. الفريلانسر ممكن يخاف يحكيلو لا.. وتطلع اللا في الريفيو .. او ان العميل يرفض يدفع !
كل هالقواعد.. مش لصالحك كفريلانسر..
نقطة اخرى .. وحقيقة لمستها في اخر فترة بعد اغلاق حسابات كثير من الفريلانسرز في المشروع.. البعض خسر مشاريع.. البعض الاخر البزنس تاعو وقف !
وهاد مرجعو لانو البزنس تاعو بشكل كامل معتمد على موقع العمل الحر..
تخيلو لو حسابك اغلق .. وضلو موقف !
كل اللي بنيتو.. بححح
اخر سبب ممكن نذكرو كدافع لتدرك خطورة البقاء على مواقع العمل الحر.. هو المنافسة المستمرة الموجودة على مواقع العمل الحر!
اليوم ان بنحكي عن عميل اشتغلت معو مرة ومرتين وتلاتة.. ممكن في المرة الرابعة ممكن يقلك هات اجرب حدن تاني ! من غير سبب.. فضول
انا جربت وسيم اكتر من مرة.. خلينا نجرب غيرو..
بالزبط متل لما تكون متعود تاكل عند مطعم.. حتى لونك زبون عندو.. لو شفت مطعم جديد او ما جربتو قبل هيك.. ممكن تحب تاكل عندو وان عجبك ممكن ترجعلو تاني وتالت ويمكن تصير
زبون لالو.. والمكان الاول.. انتهى !
اذا ملخص الحديث.. حسابك هو البزنس تاعك... محتاج وقت طويل نسبيا لتاخد بروجكت جديد.. قواعدمواقع العمل الحر قد لا تكون لصالحك.. نسبة الموقع مرتفعة.. منافسة دائمة قد تكسر رابطة long-term relationship
الان خلينا نقسم المشكلة لجزئين
شو الخدمة اللي بتوفرها مواقع العمل الحر للطرفين بعد الحصول على المشروع؟
حاجتين
الدفع من خلال فيزا، ماستر كارد، الخ من النقاط..
وامكانية التواصل سواء من خلال رسائل او chat ..
خليك متذكر هالكلام.. ويلا نبدا في خطوات اساسية لننتقل للعمل خارج الموقع.. لنبدا نفكر خارج الصندوق..
الخطوة الاولى هي التدقيق في الباك قراوند تعت العميل اللي هتاخدو برا الموقع ؟
شوف البروفايل تاع العميل.. الريفيوز.. نوعية المشاريع اللي بطلبها.. واسأل نفسك.. هل بامكاني اثق بهاد العميل؟
وهل العميل جاهز لانقل العمل معو خارج الموقع؟ مهم انو يكون بينكم عمل سابق ليكون في ثقة.. مش من اول مشروع هحكيلو تعال نشتغل برا الموقع!
هل هاد العميل من النوعية اللي دايما عندو low budget و بدفع قليل؟
ان كان هاد نوع العميل.. انا ما بعتقد انو مناسب لتاخدو برا الموقع.. لانو في الاساس انا مش معني بعمل اخر منو..
هل العميل من النوعية اللي بستغرق ايام ليرد على المسج؟
هل دايما برجعلك بتعديلات كتيرة؟
هل العمل مع هاد العميل هيفتحلي فرص تانية ؟
ان كان هاد العميل المناسب.. ابدا معو بالخطوة الاولى
وهي الحصول على contact information
بشكل اساسي.. انتا محتاج تعرف اسم العميل.. وبأكد اسم العميل.. لانو شفت كتير ناس بتشتغل مع عملاء عن طريق مواقع العمل الحر.. ما بعرفو اسمهم !
رقم الجوال والايميل والسكايب ايضا مهمات لتقدر تصل للزبون..
طبعا بالمثل.. متل ما معلومات العميل صارت عندك.. انتا كمان لازم تشارك معلوماتك مع العميل.. مشان يوم لما يحتاجك في شغل جديد.. او بدو يستفسر عن شي بخص العمل القائم بينكم..
انا ما بدي اياه يرسلي عن طريق مواقع العمل الحر..
انا بدي يتصل في ع الجوال او يرسلي مسج ع الايميل..
هيك بكون قلصت اهمية موقع العمل الحر.. وبصير الموقع الو معنى واحد بالنسبة للعميل.. « وسيلة دفع «
الخطوة التالية هي المبادرة بالسؤال
لا تنتظر العميل يعرض عليك العمل خارج الموقع.. بادر انتا بالطرح
ولا تقلق.. شو اسوء شي ممكن يصير؟
ممكن يقلك لا، انا بفضل نبقي الدفع على الموقع ؟
بكل بساطة.. اوكي.. ما في مشاكل !
للناس اللي بتتواصل مع عملائها وهي خايفة..
السؤال مش هيخسرك شي..
لاكن مهم لما تسأل توضح للعميل ليش؟ ليش مهم لالك ولالو انو يكون شغلكم برات الموقع..
عن نفسي..
بنتظر لما يرجعلي بمشروع جديد..
بعرض عليه سعرين.. سعر مضيوف عليه 10% للموقع وسعر بدون ال 10% ان كان حابب نشتغل برات الموقع !
ومهم تبين في هالمرحلة للعميل انو الموقع الو مهمة وحدة وهي الدفع..
وهو باخد مني عمولة 10% وممكن يكون باخد منك ايضا عمولة ع المشروع..
ومن خلال عرضك اللي بتقدمو هيفهم انو العمولة اللي باخدها مني الموقع هو اللي بدفعها.. مش انا
وفي النهاية.. العميل هو المتضرر..
لازم تصلو هاي الصورة... عمولة علي يعني عمولة عليك.. ان بدي اساويلك شغل ب 100 دولار هحط 110 عشان عمولة الموقع..
فبدل ما تضلك تدفع هالعمولة..
خلينا نطلع برات الموقع !
وبشيل عنك هاي العمولة.. !
بعد ما توضح للعميل اهمية العمل خارج الموقع.. لازم توفر البديل.. الان الموقع الو هدف واحد وهو الدفع..
شو الحلول اللي بتوفرها للعميل ليدفعلك ؟
ومهم هان تكون موفرلو خيارات كتيرة قدر الامكان.. ليدفع بالاسلوب اللي بريحو.. وما يضطر يرجع للموقع لانو الموقع بوفر طريقة دفع اسهل !
بالنسبالي.. هاي هي الطرق اللي بشتغل فيها
حوالات بنكية
حوالات وستن يونيون ومني قرام واكسبريس مني
وبي بال للمبالغ الصغيرة .. اقل من 100$ وبالعادة هالمبالغ بتنصرف على الانترنت.. دومينات واستضافات.. وهيك امور..
وان كنا هنشتغل برا الموقع فلا بد تستخدم تولز برا..
يعني تفعل الاتصالات على الموبايل
المسجات على الايميل
المحادثات على السكايب..
وخصوصا في اول مشروع بتشتغلوه برا الموقع..
لانو مهما كان العميل متفهم هيضلو مش مطمن 100%
فهو لازم يكون على اطلاع بالبروقرس تاعك في المشروع.. اول ما باول..
ما تنتظر منو يسألك لوين وصلت وشو صار معك بموضوع اكس..
انتا بادر باتصال او رسالة على الايميل..
ولازم يحس انو لما طلع برا الموقع اصبح التواصل افضل.. مش اسوء.. يعني بلاش تاخدلك 24 ساعة عبين ما ترد عايميل.. انتا مش مايكروسوفت ! وعندك ملايين العملاء !
وهلقيت خلينا نرجع للسؤال التقليدي..
شو افضل ماركت بليس ؟
او دسك
اي لانس
فريلانسر دوت كوم
؟؟
بكل بساطة.. مش مهم !! مش مهم لاني عابر طريق.. انا ما بخطط اني اضلي على الموقع..
الموقع هو التول اللي هتوفرلي عملاء اشبك معهم ويكونو نقطة انطلاقي.. مش المكان اللي هستقر فيه !
ان كنت هطلع ع الجندي وعندي سيارتين وحدة موديل2014 والتانية 2013 مش هيهمني باي سيارة هطلع.. لاني بعد 5 دقايق هكون بالجندي.. ومش مهم بعد هيك السيارة ! انا مش هتملك السيارة !
اذا ملخص حديثنا.. لتنقل العمل مع عميل ما.. برا الموقع.. لازم اشوف ال client background واتأكد انو هالعميل مناسب للعمل خارج نطاق الموقع..
خطط للعمل خارج الموقع.. خد كامل المعلومات اللي ممكن تحتاجها عن العميل..
فسر للعميل ليش مهم لالو انو يشتغل معك برا الموقع..
واطلب منو البدأ باول مشروع لالكم خارج الموقع..
و وفر للعميل بدائل للدفع خارج الموقع..
واخيرا استخدام الادوات المناسبة للعمل خارج الموقع
هاد كان درسنا لليوم.. شكرا للمتابعة
ان عجبك الفيديو لا تنسى تضغط Like وsubscribe لتشوف فيديوهات تانية.. والسلام ختام