1. Saattaakos työpaikkoja äänestää framile?
Kaikki puoluheet luppaavat enämpi työpaikkoja. Mutta kukas se oon joka ottaa töihin?
Enämpi työpaikkoja tarvithaan, perätikki nuorile. Jokku uskovat ette politiikkerit saattavat lua
töitä. Jokku toivovat ette uuet työt tulevat julkisella sektorilla. Eli suur-teolisuuessa. Center-
puoluheela oon toisenlainen itea siittä mihin uuet työt saahan. Jos sie uskot ette Ruothiin
mahtuu paljon uusia yrityksiä, met olema sinun puolela. Huomisen työpaikat oon monissa
pienissä firmoissa. Palvelusektorissa, esimerkiksi esi-kouluissa, kaffiloissa ja restaurangissa.
Ja avanseeratuissa miljöötekniikka-yrityksissä. Semmosia töitä ei saata lua muut ko yrittäjät
itte. Yrittäjät oon ihmisiä joila oon unelma. Net oon valhmiita satsaahmaan oman aikansa ja
omat rahat jonku itean takia. Ko se itea kantaa ja yritys kasvaa ja työntekiät lissäintyvät,
unelma saattaa totheutua. Hallitus saattaa helpottaa ihmisitten unelmia. Mikä hallitus, sie
uskot, sattaa auttaa usseimpia yrityksiä alottamhaan, kehittymhään ja kasvamhaan? Onkos se
vasemiston korkeamat verot, korkeamat työnantajamaksot ja ankarat säänöt irtisanomisille?
Eli onkos se Aliansi ja Center-puolue joka raivaa tien useamille työpaikoile uusissa
yrityksissä?
Näin Center-puolue halvaa jatkaa sitä työtä:
VÄHENTÄÄ hankaluuksia (krånglet)
Yrityksen pyörittäminen häätyy olla helppoa! Se joka oon hyvä leipomhaan eli svetsaahmaan
halvaa tehhä sitä, ei administreerata turhia sääntöjä. Viimisitten neljän vuen aikana hankaluuet
oon vähentynheet. Töihin ottaminen oon tullu helpomaksi ja halvemaksi. Met olema
esimerkiksi puolittanheet työnantajamakson nuorilta. Sitä tietä met halvaama jatkaa.
Meän aikhainen LAS
Ko LAS-laki kirjotethiin 1930-luvula, meininki ei ollu ette kokohnaisia nuoritten ikäluokkia
lyötäs ulos 2010-luvula. Tänä päivänä LAS oon turvalisuuen ja ittensä totheuttamisen
vastakohta. Nuorila ei ole töitä ko yritykset ei tohi ottaa uusia työntekiöitä. Sen takia Center-
puolue halvaa muuttaa LAS:ia niin ette useamat nuoret kieremästi pääsevät työmarkkinoile.
Antaa landstingile ja kunnile kilpailua
Vasemiston Ruottissa siukkasysteri oon hyvä jos se oon landstingin töissä, mutta huono jos se
alottaa oman vasthaanoton. Met uskoma ette hään oon yhtä hyvä, jos hään alottaa oman
firman. Ja met uskoma senki ette hällä saattaa olla vielä suurempi kiinostus, ilo ja voima jos
hään tekkee työtä ittele. Ja sehän sporraa isojaki siukkatupia parantamhaan ommaa toimintaa.
Sama asia jällaa kouluja, vanhoitten asumisia ja päivähoitoa. Ja Ruotti tarttee enämpi
vaimonpuolia joila oon oma firma!
Useampia yrityksiä jossa tarttee töitä
Monet asumisaluheet Ruottissa oon täynä ihmisiä joila oon kokemuksia koko mailmasta.
Sielä oon vaikka kuinka paljon ihmisiä jokka halvaavat tehhä töitä, mutta net ei saa. Net ei
löyä työmarkkinoile. Jokku halvaavat ratkasta tämän korkeamilla piitraakila ja lissäämällä
sääntöjä. Center-puolue uskoo justhiinsa vastakohthaan. Met halvaama lua uusia töitä
helpottamalla verotusta firmoile jokka alkavat toimimhaan Rinkebyssä, Rosengårdissa eli
Angeredissä. Met kuttuma prujektia Uus-starttialuheet (Nystartszoner). Sitä oon kokkeiltu
hyvilä tuloksilla Englantissa, Franskassa ja Italiassa.