1. Miljöö ei ole yks työ. Se oon tuhansia.
Meilä oon kaikila vihreä tavote. Sinne pääsemä parhaiten jos emmä kääny vasemalle
Jos Grönlantin jää sullaa, oon kohta kaikki muut prupleemit pieniä. Siittä kaikki oon sammaa
mieltä. Jos met tosihaan halvaama estää ilmastomuutoksen, meilä oon kaks tietä joita kulkea.
Tämän vuen valtiopäivävaalissa sie valittet kumphaan tiehen luotat.
Sie joko valittet kääntyä vasemalle ja saat korkeamat verot, ei-sanomista ja kasvamisen ja
kehityksen jarruttamista. Eli sitte sie olet optimisti ja uskot ette keksiöilä ja entreprenöörilä
oon voimaa kehittää ilmastolle hyvvää tekniikkaa meän tulevaisuuen elämisele. Optimistinen
tie vaatii politiikkeriä jokka ymmärtävät yrittämistä ja tykkäävät siittä. Niin yksinkertanen
ilmasto-valinta pohjimilthaan oon.
Ennen syyskuun vaalia saattaa kannattaa hunteerata histuuriaa vähä aikaa. Onkos se
vasemistopolitiikka eli yrittäjyys joka oon antanu mailmale net tuulivoimalat, miljööbiilit,
katalysaattorit ja bio-polttoaihneet jokka meilä jo oon? Kenen sie uskot antavan meilä lissää
semmosta – eli uusia, vihreitä työpaikkoja?
Center-puolue oon Ruottin enniiten yrittäjäystävälinen puolue. Met olema kans se puolue joka
oon ohjanu Ruottin mailman enniiten kunnianhimosheen ilmasto-politiikhaan. Met uskoma
ette se oon hyvä yhistelmä tulevaisuuele.
Joitaki etappia Center-puoluheen tielä:
Vihreä valo biilile
Vasemiston tie oon sanoa ”ei” biilile – eikä ees rakentaa uusia teitä. Meän politiikka oon
”joo” biilile, mutta ei päästöile (utsläpp). Sen takia olema ottanheet framile verottomia
miljööbiiliä. Met halvaama ette biiliä oon vuen 2015 jälkhiinki, mutta vain fosiili-vaphaita.
Biilit jokka käyvä sähölä, bio-kaasula eli etanoolila. Met uskoma ette Ruotti saattaa tulla
mailman johtavaksi ko oon kyse tehhä miljööbiiliä. Se saattaa antaa kymmeniä tuhansia
työpaikkoja. Silloin häätyy sanoa ”joo” biilile, mutta ”ei” vasemalle kääntymisille.
Vihreä teolisuus (industri)
Aurinkovoima ja tuulivoima saattavat korvata öljyn ja hiilen. Center-puolue halvaa satsata
tutkimuksheen, kehityksheen ja uushiin yritykshiin. Se vaatii yritysystävälisen politiikan, ei
vasemistopolitiikkaa. Sitte tarvithaan kans matalamat verot, ei korkeampia. Vähempi
hankaluuksia yrittäjille, ei enämpää. Enämpi kannattavuutta, ei vähempi. Siittä tullee kasvua.
Ja siittä tullee kans vihreitä töitä.
Vihreä maaseutu
Täälä oon jo monta vihreää työpaikkaa. Uuet firmat maaseu´ula lissäintyvät. Ja Ruottista
pittää tulla vielä parempi myyhmään korkealaatusta ruokaa. Se saattaa antaa 10000 uutta
työpaikkaa. Monet ihmiset hakevat elämäntyyliä eli tyristielämystä luonon likeltä. Viimisinnä
vuosina investeerinkit maaseu´ula oon lissäintynheet. Center-puolue halvaa jatkaa satsauksia
uushiin työpaikhoin maaseu´ula.
Uutta tekniikkaa ja kasvamista eli vasemalle kääntyminen?
Vasemistolta kuulee ussein ette se oon kasvaminen joka pillaa ilmaston. Mutta aatelkaa,
lentopuulaakit, energia-ala ja biiliteolisuus huutavat uutta miljööle ystävälistä tekniikkaa. Se
oon niitten maholisuus olla kannattavia ja lua uusia töitä. Mistä net saavat tekniikkaa joka
pelastaa ilmaston? Ei Ruottista, jos met käänymä vasemalle.

2. Äänestä Center-puoluetta syyskuussa, niin äänestät työpaikoitten ja ilmaston puolesta.