2. Maraming iba pang bagay na naibahagi ang aking Wai po tungkol sa
kanyang minamahal na bansa. Mayaman ang Tsina sa paniniwala at
tradisyong nagmula pa noong unang panahon at patuloy na isinasagawa
hanggang sa kasalukuyan. Katunayan, ang marami rito ay sinusunod pa rin
ng aming pamilya kahit pa matagal na kaming naninirahan dito sa Amerika.
Sinabi ni Wai po na maraming Tsino ang sumusunod sa mga feng shui dahil
ito raw ay gabay para maisaayos ang pamumuhay nang naaayon sa limang
elemento ng kalikasan: ang kahoy, apoy, lupa, metal at tubig. Makakatulong
daw ito sa pagpapanatili ng mabuting kalusugan, kaligayahan, at kaayusan
sa buhay. Kaya naman bago pa simulan ang pagtatayo ng aming tahanan
ay kumonsulta na ang aking magulang sa isang eksperto sa feng shui para
malaman kung saan pinakamasuwerteng ilagay ang mga bahagi ng bahay.
Maliban dito ay marami pang pamahiin at paniniwala kaming sinusunod
tulad halimbawa ng posisyon ng chopstick kapag kumakain. Bata pa ako ay
3. lagi nang ipinaaalala sa akin ni Wai po na hinding-hindi ko dapat itusok nang
patayo sa gitna ng kanin dahil ito raw ay nangangahulugan ng kamatayan.
Marami pang ibang paniniwala ang sinusunod namin sa mga okasyong
tulad ng kapag may ikinakasal, sa mga paglilibing, sa pagdiriwang ng
Bagong Taon, at iba pa.
Subalit hindi lang si Wai po ang nagtuturo sa akin. Siya man ay
tinuturuan ko rin ng kulturang Amerikano. Isinasama ko siya minsan sa
panonood ng footbal at pagkatapos ay kumakain kami ng hotdog,
hamburger, at iba pang pagkain Amerikano. Sinersermunan nga lang ako ni
Mama dahil mamantika raw ang mga ito at baka makasama sa kalusugan ni
Wai po. Ako rin ang nagturo sa kanyang mag-Ingles. Nakakatuwa dahil
pagkalipas ng sampung taon niyang pagtira dito sa Amerika ay marami-rami
na siyang alam na salitang Ingles. Pumayag naman siyang matuto dahil
4. Kapag lumalabas kami at napahiwalay siya ay baka hindi na siya makauwi
sa bahay kung hindi siya makapagsasalita nang kahit basic English man
lang. At di tulad ng ibang matatandang Amerikano na sa mga home care
tumitira kapag hindi na kayang mag-isa sa bahay, hinding-hindi namin
papayagang malayo sa amin si Wai po. Tiyak na malulungkot siya roon at
malulungkot din ako dahil kaming dalawa ang magkasama sa silid.