Isang balagtasan ang isinagawa ukol sa kahalagahan ng wikang Filipino kumpara sa wikang Ingles, na dinamuon ng dalawang mag-aaral sa ikalimang baitang. Ang wikang Filipino ay itinuturing na pambansang wika na nagbubuklod sa mga Pilipino, habang ang wikang Ingles, bilang pandaigdigang wika, ay mahalaga sa pakikipag-ugnayan at pag-aaral. Sa dulo, tinanong ang mga nakikinig kung alin ang mas mahalaga, ang sariling wika o ang banyagang wika.

1. Alin and Higit na Mahalaga, Wikang Filipino o Wikang English?
Isang Balagtasan ni Gng. Resy A. Felipe (New Era Elementary School)
Lakandiwa:
Minamahal naming mga kamag-aral
Mga magulang, mga guro at prinsipal
Mga panauhing pinagpipitaganan
Naririto ngayon sa’ting paaralan.
Magandang umaga po, ang bating marangal
Ang Buwan ng Wika ating ipagdiwang
Ikalimang baitang ang amin pong alay
Ipagmamalaki, isang balagtasan.
Wikang Filipino ay sariling wika
At ang wikang English ay wikang banyaga
Kapwa ginagamit ng may pang-unawa
Higit na mahalaga, alin na nga kaya?
Sa umaga pong ito, aking ipinakikilala
Dalawang mahusay, maganda at batikang makata
Sa pangangatuwiran, hahanga ka sa kanila
Masigabong palakpakan pasalubungan natin sila.
Sa wikang Filipino ang mangangatuwiran
Si Bb. Irish ng Grade V- Emerald
At sa wikang English ang makakalaban
Bb. Lariza ng Grade V- Section one.
Wikang Filipino:
Sa puso at diwa, ako’y Pilipino
Mgandang Pilipinas ito ang bayan ko
May sariling wika, wikang Filipino
Na s’yang nagbubuklod sa sambayanan ko.
Wikang Filipino ay wikang panlahat
Ang ilaw at lakas ng tuwid na landas
Sa pagkakaisa naipahahayag
Mabisang kalasag tungo sa pag-unlad.

2. Wikang English:
Alam nating itong English, isang wikang pandaigdig
Sa lahat ng pag-aaral pangunahing ginagamit
Ang mga asignaturang Science, English at Mathematics
Paano mo ililiwat, di malirip, di maisip.
Ang bagong alpabeto hindi mo ba napapansin
Ang dating A B K D ngayon ay A B C D na
May computer, may internet, Facebook at may Google plus pa
Ito’y mga pagbabagong Wikang English ang simula.
Wikang Filipino:
Alam nating sa’ting mundo marami ng pagbabago
Makabagong teknolohiya patuloy sa pag-asenso
Mentalidad na kolonyal dayuhan ang pasimuno
Ngunit naghihirap pa rin ang maraming Pilipino.
Sariling wika ay salamin nitong ating pagkatao
Matibay na pundasyon ng ating pagka-Pilipno
Isang wikang kinagisnan minana pa sa ninuno
Nararapat alagaan, itaguyod nang lumago.
Wikang English:
Sapagkat itong English isang wikang unibersal
Wikang ating ginagamit sa pakikipagtalastasan
Sa pakikipag-ugnayan sa mga dayuhan
Upang itong mga bansa ay magkaunawaan.
Kahit hindi ka nakatapos sa iyong pag-aaral
Kung mahusay kang mag-English sa call center ka mag-apply
Siguradong matatanggap at kikita rin kaagad
Kaya nga lang, mga dayuhang makukulit, kausap mo sa magdamag.
Wikang Filipino:
Sa mahal kong katunggali na kapwa ko Pilipino
Huwag nating kalimutan, dapat nating isapuso
Itong wikang kinagisnan, ang Wikang Filipino
Gamitin nating sandigan sa pag-unlad, pag-asenso.

3. Wikang English:
Hindi ko nalilimot na ako ay Pilipino
Mahalaga rin ang English at ‘yan ay nababatid mo
Lalo na kung may balak kang sa ibang bansa ay magtungo
Ang pandaigdig na wika, dapat pag-aralan mo.
Lakandiwa:
Tama na, sukat na, mahuhusay na makata
Ang pagtatalo n’yo ay h’wag nang palawigin pa
Sa madlang nanonood kayo na po ang magpasiya
Alin ang mas mahalaga, sariling wika o wikang banyaga?
Kaming tatlo ay narito, sa inyo’y nagpapasalamat
Mahal naming kamag-aral, mga guro at magulang
Taos pusong bumabati, maligayang pagdiriwang
Ang hiling po namin, masigabong palakpakan.

4. SA TABI NG DAGAT
Marahang-marahang
manaog ka, Irog, at kata’y lalakad,
maglulunoy katang
payapang-payapa sa tabi ng dagat;
di na kailangang
sapnan pa ang paang binalat-sibuyas,
ang daliring garing
at sakong na wari’y kinuyom na rosas!
Manunulay kata,
habang maaga pa, sa isang pilapil
na nalalatagan
ng damong may luha ng mga bituin;
patiyad na tayo
ay maghahabulang simbilis ng hangin,
nguni’t walang ingay,
hangganq sa sumapit sa tiping buhangin...
Pagdating sa tubig,
mapapaurong kang parang nanginigmi,
gaganyakin kata
sa nangaroroong mga lamang-lati:
doon ay may tahong,
talaba’t halaang kabigha-bighani,
hindi kaya natin
mapuno ang buslo bago tumanghali?
Pagdadapit-hapon
kata’y magbabalik sa pinanggalingan,
sugatan ang paa
at sunog ang balat sa sikat ng araw...
Talagang ganoon:
Sa dagat man, irog, ng kaligayahan,
lahat, pati puso
ay naaagnas ding marahang-marahan...

5. DULA-DULAAN PARA SA ARAW NG MGA GURO
Teachers' Day Presentation
VO:
Ngayon ay ipinagdiriwang natin ang Pandaigdigang Araw ng mga Guro. Tunghayan po
natin ang isang nakakaiyak at nakakatawang pagtatanghal mula sa Ikalimang Baitang-
Pangkat Apat at ang inyong lingkod ____________________.
Teaching is a noble profession, ika nga. Totoo naman dahil kung walang guro,
walang doctor, walang inhinyero, walang ibang guro at iba pang propesyon. At bago
nagiging guro ang isang guro, sankatirbang aralin muna ang uunawain, sandamakmak
munang demonstration teaching ang pagdadaan at sandamukal munang pawis ang
patutuluin bago maging isang lisensyadong guro. Well, lahat naman ng propesyon ay
mahirap..ngunit, iba ang hirap ng isang guro lalo na kung ganito kagulo ang mga mag-
aaral mo..
(Ang mga mag-aaral ay maghahabulan sa loob ng classroom. May mag-aaway. May
magbabatuhan ng nilukot na papel. May nagsusulat sa board ng Noisy at Standing.
Tapos, papasok ang teacher. Sisigaw. Magbabalikan sa kanya-kanyang upuan ang mga
estudyante... Manggigigil ang guro, ngunit walang magagawa.)
VO: Sabi ko sa inyo, e... Mahirap ang maging guro. Idagdag mo pa ang walang
katapusang paperworks..
(Papasok ang isang bata, may iaaabot sa teacher.)
DIALOGUE:
Bata: "Mam, pinabibigay po..."
Teacher: "Salamat... Ano naman kaya ito. Diyos ko, gawain na naman at due date na
agad... Di ba puwedeng next month na?!"
VO:
Hay! Oo nga naman, kabibigay lang tapos ipapasa na agad.. Ano ba ang teacher? LBC
Express?! Tapos, dagdagan pa ng problemang ganito...
(Papasok ang magulang, kasama ang anak na may black-eyed... Galit-na galit ang
magulang...)
DIALOGUE:
Magulang: "Kayo ba ang adviser ng anak ko?''
Teacher: "Ako nga po. Bakit po? Ano pong problema?"
Magulang: "Ang anak ko, binugbog ng kaklase niya. At di mo raw pinansin..."

6. Teacher: "Ano po? Di ko pinansin? Di nga nagsumbong iyang anak mo... Alam nilang
kasisimula pa lang ng klase, 'di ko pa sila kilala, nagpapasaway na. Siguro may kasalanan
kaya sinaktan."
Magulang: "Anong ginawa mo, bakit nangyari ang ganito? Di ba ikaw ang adviser? ''
Teacher: "Sir, 'di niyo po alam ang nangyari... 'di niyo rin alam ang pinagkaabalahan ko
kaya 'di niyo dapat ako sinisisi. Pasaway ang anak mo, kaya nasapok siya. Nasa mukha
naman, e.. Aminin mo, bata...''
Magulang: "A, kahit na, hindi dapat ginanito ang anak ko... nasaan ang Guidance?
Ipapatanggal ko ang lalaking nanakit sa anak ko."
Teacher: "Huwag naman, alamin muna natin ang dahilan."
Magulang: "A, hindi! Gusto mo isama pa kita?!"
Teacher: "Aba! Bakit po? Ako pa ang may kasalanan... Kung 'yan ang gusto mo...
magkakasubukan tayo... Sige mabuti pa nga... Magpamediko legal pa kayo. Ayun ang
guidance!"
VO:
Tsk Tsk! Ang hirap makasalamuha ng magulang na makitid ang utak at kunsintidor.
Akala siguro, uurungan siya ng teacher... ha ha. Isa pang mahirap ay ang pakikisalamuha
mo sa kapwa guro... Tulad nito...
(Nakaupo ang bidang guro nang pumasok ang mahaderong guro... namumula sa galit)
DIALOGUE:
Story continues below
Mahadero: "Anong problema mo?"
Bidang Guro: "Wala naman. Kayo po?"
Mahadero: "Kaw ang problema ko... Bakit mo tooooooot ang toot ng toooot ko? Gusto
mo away? Blah Blah Blah.."
Bidang Guro: "A, ganun ba? Gusto ko lang naman wag kang makialam o manghimasok
sa advisory class ko. At ang iniisip ko ay sa kapakanan lang ng kooperatiba natin dahil
nakikinabang naman tayong lahat, e..."
Mahadero: ''Tooot! Gago rin ako... kaya wag mo akong gaguhin pa. Gusto mo square na
lang tayo, e..."
Bidang guro: "Hindi ako lalaban sayo, ang laki mo ba namang 'yan.."
VO:
Haha! Nakakatawa ang eksenang ganyan.. Gayunpaman, part 'yan ng propesyon at
hamon sa pagkaedukado, kung papatulan mo, mapapahamak ka lang... Speaking of
mapapahamak, mapapahamak ka lang kung mamamalo ka ng mamamalo ng mga
estudyante..

7. (Mag-iingay ang nga estudyante... Magagalit ang guro... Hahampasin niya ang balikat
ng isang pinakamalapit sa kanya. At akma pa niyang hahampasin ang isa, ngunit
sasabihin ng bata...)
DIALOGUE:
Bata: "Ooops! Sayang ka, Mam!"
(Walang nagawa ang pobreng guro kundi ibaba ng dahan-dahan ang pamalo habang
nanginginig sa galit at takot... Duduriuin na lamang niya ang pasaway na bata.)
VO:
Ang hirap manakit ng bata. Sila na nga ang pasaway at abusado, sasabihan ka pa ng
Child Abuse! Walang hiya... Nagkaroon lang ng idea ng Bantay Bata at DSWD, child
abuse agad. Di ba pwedeng Teacher Abuse naman? Hay naku.. Wala pang natanggal na
bata sa kanyang pagpapasaway, pero marami nang guro ang natanggal ang lisensiya at
trabaho dahil sa pagdidisiplina sa kanila... Ang hirap magsalita... Kaya ang ginagawa ng
guro...
(Habang tahimik na ang mga bata... Magsasalita siya sa harap. Magkukuwento... )
DIALOGUE:
Guro:
"Alam niyo ba, hindi ako ganyan noong ako'y kasing edad ninyo. Ni hindi ako napalo ng
teacher ko. Ang hiya ko lang lumapit sa table ng teacher ko..At nakukuha kami sa
tingin... pero kayo, kahit murahin kayo nang murahin, 'di pa rin kayo nagbabago. Wala
na kayong respeto sa mga guro ninyo. Para ano pa at nag-aral kami para lang bastusin
ninyo ng ganito? Huwag naman ninyo kaming igaya sa inyong mga magulang o mga
kabarkada. Guro kami na handang tumugon sa pang-akademikong pangangailangan
ninyo. Tandaan ninyo na ang paaralan ay lugar para sa mga gustong matuto at
guminhawa ang buhay pagdating ng panahon. Hindi ito Estrella, Maginhawa o
anupamang kalsada d'yan na inyong kinalakhan."+
(Magwo-walk-out ang teacher. Magbubulungan ang mga estudyante..)
VO:
Ganyan ang ginagawa ng karamihan para lang mag-subside ang galit niya. Kesa naman,
makapanakit pa siya. Kailanganng habaan ang pasensiya.. Kelangan magtiyaga dahil
iyan ang napili at sinumpaang propesyon... at 'yan din ang bread and butter. Ang
hinihintay mo ngang madalas ay uwian... Pero..
(Ayaw umayos ng pila ang mga bata... nagtutulakan...)
DIALOGUE:

8. Guro: "Hindi kayo aayos?! Punyeta! Mula Kinder kayo, pumipila na kayo. Hanggang
ngayon ba, hindi pa rin ninyo maayos! Anong klase kayo! Hayan! Iniwan pa ninyo ang
mga kalat ninyo... Ano?! Janitor ba ako? Hala sige, umuwi na kayo. Magsigawan pa kayo
doon sa hagdan!
VO:
Ang mahirap pa... pati sa bahay, dala-dala mo pa rin ang mga gawain... At, pagdating
sa bahay... may kakaharapin ding problema. Minsan nga, hindi na makatulog ang guro,
dahil sa kakaisip ng trabaho. Paano ba magiging epektibong guro?
(Maagang papasok ang guro... Mag-aayos ng classroom. Maglilinis. Magsusulat uli.
Walang humpay na kakasulat)
VO:
Pero, wala naman siyang asenso... Sabagay, di naman siya naghahangad ng dagdag
sahod, sadya lang talagang committed sa trabaho ang guro... Ni hindi na nga niya
namamalayan ang oras. Susubo pa lamang siya ng pananghalian, magsisidatingan na
ang mga mag-aaral..
(Maiingay na naman ang mga bata. Labas pasok uli at naghaharutan... Kaya, sisigaw uli
siya bago nakasubo ng pagkain.)
DIALOGUE:
Guro: "Ummmmupooooooooo!! Lahat kayo magsiupo... Bakit ang aaga ninyo? Tapos,
magpapasaway lang kayo... Pakainin niyo naman muna ako... Maaari ba?"
Mag-aaral: "Opo!"
(Lalapit ang isang mag-aaral. May iaabot sa guro... Babasahin ng guro...)
DIALOGUE:
Guro: "Totoo ba 'to? Puro lang naman kayo pangako, e. Di ko kailangan ang pangako
ninyo o ang mga regalo ninyo... Gusto ko regalo ninyo... Joke lang! Sige, anak... salamat!
Kain muna ako, baka maiyak pa ako..."
Mag-aaral: "Sige po, Mam!"
(Babaliktarin ng mga mag-aaral ang blackboard... At sabay-sabay silang babati
ng HAPPY WORLDTEACHERS DAY! At sabay-sabay nilang lalapitan ang kanilang guro
at sabay-sabay ding sasabihing MYTEACHER: MY HERO!
(BOW!)