1. Propoñemos algunhas actividades para compartir en familia.
1. Actividades relacionadas coa linguaxe. Aproveitar para mergullarse nos
contos tradicionais, recuperar relatos... Visitar cos nenos unha libraría e
acostumalos a equiparse de libros para as vacacións é un hábito saudable
que logo nos agradecerán. Adquirir un bo libro permitiranos gozar cos nenos
de adiviñas, de trabalinguas, historias, andrómenas e contos... que, sen
dúbida, farán as delicias dos pequenos.
2. Visitas a lugares de interese. Os nenos non teñen por que ser unha
carga cando nos dispoñemos a visitar un museo, un mercado ou un porto
pesqueiro. Todo depende de como lle propoñamos vivir esa experiencia
compartida. Debemos falar antes cos nenos de que imos ver, convén crear
neles expectativas favorables motivándoos e xerando curiosidade. Pode ser
útil levar un pequeno caderno de campo onde facer algúns debuxos e
anotacións e deixar que o neno faga algunhas fotos, que logo levará á escola
para referir a súa experiencia.
3. Actividades domésticas: de cociña, de costura, de limpeza... Este é un bo
momento para concienciar os nenos de que as actividades domésticas, en
boa compaña, poden ser moi agradables: realizar receitas de cociña,
practicar a xardinaría, axudar a papá a lavar o coche, empezar a tecer a
bufanda do inverno, aprender a facer recados...
4.Actividades de expresión dramática. Maquillarse, disfrazarse,
escenificar un conto, aprender poesías para recitalas na noite ante toda a
familia, aprender a manexar unha marioneta; preparar, adultos e nenos
conxuntamente, un pequeno teatro de monicreque...
5. Actividades de expresión plástica. Facer colaxe con diversos materiais,
facer construcións tridimensionais con material de refugallo (unha escultura
moderna para decorar o soportal...), facernos colares e pulseiras, para
poñernos guapos...
6. Xogos. Ensinar aos nenos xogos novos e xogar con eles é unha actividade
sempre grata para a que cotiamente non adoitamos dispoñer de tempo. As
vacacións poden ser un momento oportuno. Podemos botar man de xogos
tradicionais
7. Actividades físicas ao aire libre. Se o lugar onde estamos o permite,
facer algo de sendeirismo cos nenos, sempre tendo en conta as súas
capacidades físicas, pode ser unha boa actividade. Así mesmo, nadar,
mergullarse, voar papaventos, todo tipo de actividades de competición e
xogos colectivos ao aire libre: ao pano, carreiras de sacos...
2. Por último, queremos sinalar que as vacacións, lonxe de ser un período
estéril situado entre dous proveitosos cursos escolares, deben ser
entendidas, e sobre todo vividas como unha magnífica oportunidade para
coñecer mellor ós nosos fillos e que estes nos coñezan. Ensinar ós nenos e
nenas e aprender con eles é un pracer que ningún pai ou nai debe deixar de
experimentar.
O equipo docente de 4º nivel de primaria do CEIP López Ferreiro deséxalles
unhas felices e proveitosas vacacións de verán.