1. IKASLE LAGUNTZAILEA
HAZKUNDE PERTSONALA ETA BIZIKIDETZA HOBETZEKO
PROGRAMA
ATARIKOA
Bilboko Maristak Ikastetxean ikasleen arteko laguntza sustatu nahi dugu, Ikasle
Laguntzailearen programaren bitartez, bizikidetza hobetzeko eta bide batez
lankidetzaren eta bakearen kultura sortzeko. Berdinen arteko sistema da; hala, ikasle
talde bat sortu nahi dugu zenbait ikaskiderekin elkarlanean aritzeko, ikaskide horiek
bideratzeko babesgabe edo galduta sentitzen direnean, edo ikasteko zailtasunak edo
besteekin harreman normalak izateko zailtasunak dituztenean.
Ikasgeletan, eskolako jardueretan eta eskolaz kanpoko jardueretan aplikatuko da
programa. Horrela, ikasle laguntzaileak ikasgelako zenbait jardueraren nondik norakoak
azaldu diezazkioke beste ikasleren bati, edo lagun talde batean integratu, etxera
bueltatzean lagundu, edo, ikasle hori gaixorik balego, etxera joan bisita egiteko eta
apunteak eramateko. Ikasle laguntzaileak, beraz, taldeko kideez arduratzen dira, eta
taldekideen arteko bizikidetzaz.
LAGUNTZA MOTAK
Laguntza akademikoa: Ikasteko zailtasunak dituzten ikasleei laguntzeko, atazak
ebazteko eta lana planifikatzeko.
Talde laguntza: Talde txikiko lidergoan oinarritutako laguntza.
Gatazken aurreko laguntza: Gatazka egoeretan aplikatzekoa (ikasle bakartiak,
taldeak baztertutakoak, etorri berriak, banakoen edo taldeen arteko ika-mikak eta
liskarrak, berdinen arteko tratu txarrak, irainak…).
IKASLE LAGUNTZAILAREN FUNTZIOAK
Gatazkaren bat denean, tartean daudenen arteko akordioak bilatzeko hartzen du
parte (iritzia eman gabe).
Ikasle berriak taldean integratzeaz arduratzen da, ikasgelan eta zentroan.
Beren kezkak, atsekabeak, zalantzak, arazoak… partekatu beharra duten ikaskideez
arduratzen da, jaramon egiten die eta babesten ditu.
Esku hartze zuzena du ikasgelan: jarduerak egiten eta ikasten laguntzen du, eta
taldean lider rola jokatzen du.
Dituen ezagutzak partekatu egiten ditu: zer estrategia erabili jarduerak edo atazak
burutzeko, zer teknika erabili ikasteko...
2. PROFILA
Laguntzaile izateko aukeratutako ikasleek eragin positiboa izan behar dute taldean. Eta
honako ezaugarri hauek izan behar dituzte: enpatia, tolerantzia, besteekiko begirunea,
besteei jaramon egiteko prestasuna, konfiantzazko laguna izateko prestasuna, gatazkak
daudenean parteen artean negoziatzeko gaitasuna, komunikatzeko trebetasuna, ikasteko
erantzukizuna, eta arazoak edo gatazkak bideratzeko sormena.
ONURAK
Elkarrizketa hobesteko jarrera sustatzea.
Ikasleen autoestimua hobetzea.
Gatazkak gutxitzea, eta, gatazka gertatuz gero, denak gogobetetzeko moduan
konpontzea.
Diziplina neurriak gutxitzea (zuzentzaileak, zigortzaileak…).
Taldean ikasteko eta lan egiteko orientatzea.
Ikasleek aktiboago eta arduratsuago parte hartzea.
Bizikidetza eta giroa hobetzea.
Ikastaldearen elkartasuna handiagoa izatea.
Bakearen kultura sustatzea.
EMAN BEHARREKO PAUSOAK
1. pausoa: programa zertan eta zertarako den azaldu ikasleei. Ikasle laguntzaileak
nortzuk izango diren aukeratu. Ikasle laguntzailearen rola zertan den azaldu (zer
funtzio dituen). Profila betetzen duten ikasleei boluntario aurkez daitezela eskatu.
2. pausoa: Programaren funtzionamendua familiei jakinarazi. Horrez gain, ikasle
laguntzaileen familiei baimena eta adostasuna eskatu.
3. pausoa: Ikasle laguntzaileak eginkizun berrietan trebatu (ikasle laguntzaileek bi
egunetan jasoko dute prestakuntza hori, ikasturtean zehar, eskola orduetan).
4. pausoa: Programa zabaldu: kartelak, triptikoak, hitzaldiak, proiekzioak… erabilita.
5. pausoa: Jarraipena egin eta ebaluatu (aldizka, programan parte hartzen duten
irakasleek ikasle laguntzaileekin izango dituzte bilerak, aztertzeko zer zailtasun
dituzten eta nola garatzen ari diren laguntzak).
