Discurso lido por Susana Martínez Galdós, Concelleira delegada de Educación do Concello de Ferrol, no acto de homenaxe celebrado o día 28 de abril de 2013, por mor do 150 aniversario da publicación de Cantares Gallegos e do 50 aniversario da institucionalización do Día das Letras Galegas.
1. Bos días a todos e a todas
O Concello de Ferrol acolleu a iniciativa, que lle presentou a
Coordinadora de Equipos de Normalización Lingüística, de conmemorar
nun acto conxunto de diversas entidades culturais e veciñais, por unha
banda, o 150 aniversario da publicación de Cantares Gallegos, de Rosalía
de Castro, e por outra, o 50 aniversario da institucionalización do Día das
Letras Galegas.
A publicación de Cantares Gallegos supuxo un remuíño decisivo na obra
de Rosalía de Castro, pero tamén un paso estratéxico de enorme
transcendencia para o futuro da nosa literatura. En 1863, na cidade de
Vigo, vía a luz a obra Cantares Gallegos, de Rosalía de Castro, quen
contribuíu como ningún outro autor ou autora do seu tempo na xénese e
afirmación do sistema literario galego contemporáneo.
E, como xa indicou Xosé Manuel Pazo, a data que aparecía no libro foi
a referencia para os membros da Real Academia Galega, hai 50 anos, e
así a estableceron o 17 de maio como Día das Letras Galegas.
O Concello presenta hoxe esta homenaxe coa satisfacción de que non
só está colaborando coa difusión e o prestixio da nosa cultura e da nosa
literatura, senón coa certeza de que hoxe dámos un paso máis no camiño
que ten como meta acadar que na 51 (cincuenta e unha) edición das Letras
Galegas o homenaxeado sexa o ferrolán Ricardo Carballo Calero.
O pasado mes de marzo, o Concello Pleno de Ferrol aprobaba por
unanimidade a proposta de dirixirse á Real Academia Galega para
solicitarlle que o ano 2014 sexa o ano o ano do recoñecemento merecido
da obra de don Ricardo Carvalho Calero, do seu compromiso coa cultura
e coa lingua galega.
2. Non é a primeira vez que desde a nosa cidade se reclama este
recoñecemento, tanto desde a propia Corporación como desde o
movemento cultural ferrolá.
Agardamos que esta nova etapa dea o seu froito e que no 2014 poidamos
organizar e participar en diversos actos en que a figura central sexa a obra
e a produción de Carballo Calero.
Convido hoxe a todas as entidades aquí representadas a sumarse á esta
solicitude que imos promover desde o Concello co fin de que sexa unha
demanda colectiva, non só institucional, de xeito que a Real Academia
Galega a asuma como unha petición cidadá, do conxunto do pobo ferrolán.
Non quero rematar sen agradecerlles ás entidades que participan neste
acto e aos seus representantes a súa colaboración e axuda na organización
desta homenaxe, a Coral Alecrín, A Coral Polifónica Armonía, O Real
Coro Toxos e Froles, AAsociación de Veciños de Brión , a Coordinadora
de Equipos de Normalización Lingüística de Ferrolterra e ao alumnado e
profesorado que nos acompaña do colexios de San Xoán de Filgueira,
Sagrado Corazón e IES Canido.
Moitas grazas polo voso traballo e bo facer.
Ferrol, 28 de abril de 2103
Susana Martínez Galdós
Concelleira delegada de Educación