3. O maluloy-on kag mahinuklugon
nga Amay, kami nagapalapit sa
Imo sa amon kinahanglanon sa
pagpangayo sang Imo pagtabang
batok sa COVID-19 virus, nga
nagtublag sa kadamoan kag nag-
utas sang mga kabuhi.
4. Kami nagapangayo nga Imo kami
tamdon sing may paghigugma kag sa
Imo makaalayo nga kamot,
dula-a sa amon ang kahadlok sa
masakit kag kamatayon,
ipanumbalik sa amon ang paglaum,
kag pabakura ang amon pagtuo.
5. Kami nagapangamuyo nga Imo
tuytoyan ang mga tawo nga
gintugyanan sa paghimo sang
bulong sang sining balatian agod
matapna ang paglaton sini.
Kami nagapasalamat sa natukiban
nga bakuna nga nahimo paagi sa
Imo pagbulig.
6. Bendisyoni ang amon mga
pagpanikasog sa paggamit sining mga
bakuna sa pagpa-untat sang
pandemiya sa amon pungsod.
Kami nagapangamuyo para sa amon
mga utod nga naga-obra para sa
ikaayong lawas kabay nga ila
maalagaran ang mga masakiton sing
may kasangkol kag kaluoy.
7. Hatagi sila sang ikaayo sang ila
panghuna-huna kag
lawas,kabakod sa ila panugyanon,
pagdampig gikan sa masakit. Kami
nagapangamuyo para sa mga
nagamasakit. Kabay sila magaayo
sa gilayon. Amligi ang mga
nagatatap sa ila.
8. Hatagi sang kapahuwayan nga
dayon ang mga nagtaliwan na.
Hatagi kami sang grasya sa sining
mga tion sang pagpanghangkat
agod kami magpanikasog para sa
kaayuhan sang tanan kag sa
pagbulig sa mga nagakinahanglan.
9. Kabay ang amon pag-ulikid kag kaluoy sa
isa kag isa magbulig sa amon sa sining
tion sang krisis kag magdala sa amon sa
pagpanibag-o kag pagpakasantos.
Ginapangayo namon ini sa Imo, paagi kay
Jesuskristo, Imo Anak, nga nagakabuhi
kag nagahari, sa paghiupod sang Espiritu
Santo, Dios sa tanan nga mga tuig sang
mga katuigan. Amen.
10. Sa Imo panabang nagadangop kami
O Mahal nga Iloy sang Dios. Indi
pagtamaya ang amon pag-ampo sa
amon mga kinahanglanon kundi
ilikaw kami sa tanan nga mga
katalagman. O mahimayaon kag
bulahan nga Birhen. Amen.
11. O Mahal nga Birhen, ikaayo sang
nagamasakit, ig-ampo mo kami
O Mahal nga Birhen sang Candelaria,
ig-ampo mo kami
San Jose, ig-ampo mo kami.
San Rafael Arkangel,
ig-ampo mo kami.
12. San Roque, ig-ampo mo kami.
San Lorenzo Ruiz, ig-ampo mo kami
San Pedro Calungsod,
ig-ampo mo kami.
San Nicolas de Tolentino,
ig-ampo mo kami.
14. San Miguel Arkanghel, apini
kami sa amon mga kaaway, kag
amligi kami batok sa kalaut kag
tago nga halit sang panulay.
Naga-ampo kami sa Imo, Mahal
nga Dios, nga tapna-on Mo sila,
kag ikaw San Miguel,
15. Arkanghel nga prinsipe nga
gintugyanan sang Makagagahom
nga Dios, tabuga sa Infierno si
Satanas kag ang tanan nga mga
malaut nga espiritu nga nagalibot sa
bug-os nga kalibutan
sa kalaglagan sang mga kalag. Amen.