1. INFORMACIÓN AOS MEDIOS
A Axencia para a Modernización Tecnolóxica desenvolve este programa en
colaboración con Academia Postal e Fundetec
A AMTEGA PON EN MARCHA A INICIATIVA DE CAPACITACIÓN TECNOLÓXICA
“FAITE DIXIT@L” CON MÁIS DE 160 ACTIVIDADES ATA DECEMBRO
§ Achegará aos participantes ferramentas e coñecementos para a configuración de
dispositivos móbiles, programación de aplicacións, estratexias de márketing online
e uso da identidade dixital e servizos telemáticos das administracións
§ Contempla actividades complementarias como un concurso de aplicacións móbiles,
seminarios de expertos, casos de éxito e presentacións “PechaKucha”
§ Realizarase a través da rede de aulas CeMIT e ampliarase a outras zonas sen
centros da Rede grazas á colaboración dos GDRs e da Asociación de Redeiras
§ A inscrición pode realizarse a través da Rede Cemit a partir do cinco de setembro
Santiago, 30 de agosto de 2014.- O vindeiro 22 de setembro, a Axencia para a
Modernización Tecnolóxica de Galicia, en colaboración con Academia Postal e Fundetec,
pon en marcha a iniciativa Faite Dixit@l, un itinerario de capacitación tecnolóxica orientado a
ofrecer aos participantes ferramentas e coñecementos que favorezan a empregabilidade, o
emprendemento e a adquisición de novas competencias dixitais. Faite dixit@l está aberto a
todo mundo e contempla máis de 150 actividades gratuítas ata o mes de decembro,
superando as 500 horas de duración.
A iniciativa foi presentada esta mañá pola directora da Axencia para a Modernización
Tecnolóxica de Galicia, Mar Pereira, o coordinador de proxectos de Academia Postal,
Miguel Caneda e a xerente de proxectos de Fundetec, Lourdes Iglesias.
Actividades e inscrición
O itinerario ofrece como actividades centrais bloques temáticos sobre a configuración de
dispositivos móbiles e a programación de aplicacións, sobre ferramentas web 2.0 para o
desenvolvemento de contidos especializados no eido da sociedade da información e sobre
estratexias de marketing online e a súa aplicación no eido do comercio electrónico e de
vendas por internet. Outros módulos máis orientados a obter o máximo proveito das TIC son
os que se centran no uso de la identidade dixital e dos servizos electrónicos das
administracións públicas.
Cada unha destas actividades terá unha duración entre 25 e 30 horas, repartidas en sesións
diarias de 4 horas en edicións a través do sistema de videoconferencia do que dispoñeen as
aulas CeMIT, e que contarán con edicións de mañán ou tarde para favorecer a asistencia
dos interesados.
Os contidos destas actividades están específicamente deseñados para o proxecto e os
usuarios terán a súa disposición asesoramento para avaliar a súa evolución. Os interesados
en sumarse á Faite Dixit@l poderán inscribirse a partir do cinco de setembro nas aulas da
Rede Cemit e a través da web, www.cemit.xunta.es, onde atopará a información desta
inicitiva dispoñible tamén a través nos canais de Faite Dixital en Facebook. e Twitter.
Comunicación da Xunta de Galicia 1
San Caetano, s/n - 15704 Santiago de Compostela
Tel.: 981 541 238/42/51 - Fax: 981 541 252/41
Correo-e: comunicacion@xunta.es
2. INFORMACIÓN AOS MEDIOS
Ademais Faite Dixit@l ofrece actividades complementarias como seminarios de expertos a
través da fórmula “PechaKucha”, presentacións creativas de curta duración sobre
experiencias no eido das TIC así como casos de éxito e seminarios de mentores dixitais.
Ademais convocarase un concurso de aplicacións móbiles, cuxo prazo se abrirá o 6 de
outubro.
Estas actividades, que ofertan máis de 2.000 prazas, realizaranse a través da Rede de
Aulas CeMIT que coordina a Amtega e que conta con 98 centros en 92 concellos. Para
ampliar o seu alcance territorial Faite Dixt@l conta coa colaboración dos Grupos de
Desenvolvemento Rural (GDRs) e da Asociación de Redeiras de Galicia, que axudarán a
difundir a iniciativa e a ampliar o alcance destas actividades de xeito presencial naquelas
localidades sen aulas CeMIT.
Incrementar a capacitación dixital da cidadanía, obxectivo da nova Axenda Dixital
A directora da Amtega explicou que esta esta iniciativa enmárcase nun dos obxectivos
principais da nova Axenda Dixital de Galicia 2020 que estamos a elaborar: “a de
Incrementar a capacitación dixital das persoas, acadando a plena integración das TIC na
práctica educativa e posibilitando a inclusión dixital de toda a cidadanía.”
Este obxectivo busca avanzar nas liñas de actuación desenvolvidas ata agora pola primeira
Axenda Dixital de Galicia 2014.gal que puxo en marcha iniciativas como Abalar no eido
educativo e a rede de aulas CeMIt, chave nesta iniciativa. Unha rede que suma 98 aulas en
92 concellos, e que está presente nas 53 comarcas galegas. En tres anos leva impartida
máis de 123.000 horas de formación TIC gratuíta e conta con máis de 37.300 usuarios
rexistrados. Ofrece cursos de alfabetización dixital para os colectivos con máis dificultades
de acceso ás TIC e tamén formación especializada para profesionais.
SAÚDOS, COMUNICACIÓN DA XUNTA DE GALICIA
Comunicación da Xunta de Galicia 2
San Caetano, s/n - 15704 Santiago de Compostela
Tel.: 981 541 238/42/51 - Fax: 981 541 252/41
Correo-e: comunicacion@xunta.es