1. John Anthony B. Teodosio
1.
2.
Isang Rebisyon ng Tula
Isang malayang taludturan
Shotgun
-Si Kurt Cobain, 27, ay isa sa mga kinikilalang rock icon noong dekada 90. Nagulantang ang lahat nang
matagpuan siyang patay sa kanilang bahay noon pang ika-5ng Abril, 1994. Isang shotgun ang ginamit sa
kanyang pagpapatiwakal kalakip ang isang suicide note na naglalaman ng marahil ay pamamaalam sa
mundo ng musika.
Nakarating na marahil kay Boddah ang iyong pamamaalam
Na ngayo’y alingawngaw pa rin.
Dala ba ito ng paglalaro sa ibang mundo?
Ng pagkasawi?
Ng masamang pinagkabihasnan?
O ng
Paghahanap ng ganap na katahimikan?
Hindi kita naintindihan
Sa mga itinititik mong awit
Ng pagkahibang?
Ng pagkamatulain?
O ng pagnanais ng makapag-isa?
Hindi rin kita naintindihan
Kung ano ba ang nasa loob ng malikot mong dalumat?
Gayunpaman, patuloy akong sumasamba
Sa mga pira-pirasong gunita ng pagkagalit at pagkatuwa
At sa pagkitil ng gitara.
Di ko akalaing
Matatapos sa isang baril
Ang lahat ng ito.
Napabalitaang nakabulagta sa iyong silid
At ikinalabit ang gatilyo ng katapusan.
Bang!
Sumambulat
ang maraming
alaalang
nagkalat
sa buong paligid.
Nagkawatak-watak din
ang masasayang gunita.

2. Tinapos ng baril na ito
Ang musikerong tinatanglawan
Ng nakararami.
Ang baril na ito
Ay kailangang isundo ka
Sa walang hanggang mundo
Na iyong hinahanap.
“Na hindi ko nahanap
noong buhay ka pa.”
Binabalikan ko ngayon
Ang liriko ng pagluluksa,
Ang tinig na umungol sa murang pandinig.
Marahil ay sawa ka na sa lupang maraming nangmamata
At salat sa pag-unawa.
Marami ka pang tatakbuhing milya ng pagkabantog.
Ngunit sadyang matulin ang kawit ng dilim at lumbay.
Malayo pa sana ang babagtasin mong mga himig
Kung hindi ipinaubaya ang sarili sa baril ng pagwawakas.
Iisiping nasa langit ang simoy ng iyong tinig.
Mistulang pinaparinig ang melodya ng dalangin.