Txingudi Ikastolak kalejira antolatu zuen 2013ko ekainaren 1ean, 50. urteurrenaren ospakizun egunean. Kalejirak 7 gune; Irungo bertso eskolan zazpi ikasle ohi. Hona gune bakoitzerako jarritako bertsoen bilduma.
2. SARRERA
• 2013ko otsaila-martxoa aldera jarri ziren
harremanetan gurekin Txingudi Ikastolatik,
ekainaren 1ean ospatuko zen jai handirako
bertso batzuk jarriko ote genituen galdezka…
• Izan ere, kalejira bat antolatu nahi zuten
Irunen barrena, zazpi gunetatik igaro ostean
Txingudi ikastolan bertan amaituko zena.
3. SARRERA
• 2012-2013 ikasturtean Txingudiko bertso
eskoletan ikastolako ikasle ohiak izandako zazpi
lagun ginen, eta kalejira zazpi gunetatik igarotzea
aurreikusten zenez, bakoitzak gune bateko
bertsoak prestatzeko ardura hartu genuen.
• Aurkezpen honen bidez, gune bakoitzerako
prestatutako bertsoak aurkeztu nahi dizkizuegu.
4.
5. 1.Go GUNEA: AMA XANTALEN
GURASOEN ETA IKASLEEN GUNEA
Familia da oraindik ere
gizarte honen zutabe
baina ikasi behar denean
haurrak ikastolan gaude
ta hango martxa ziurtatzeko
baldintza batzuk badaude,
ezin delako komunitate
bat osatu halafede,
hamaika aita eta amaren
inplikaziorik gabe.
Guraso batzun ametsa zena
gaur haurrek gozatzen dute;
horretarako bidea zein den
erakutsia digute
ta horri eutsi behar zaiola
ederki dakigu guk’e,
zeren, horrela izan ez balitz
ezin beteko lituzke
gure hezkuntza egitasmoak
berrogeita hamar urte.
Aitor Errazkin
Aitor Errazkinek prestatu zituen bertsoak eta 2012-2013 ikasturtean Txingudi Ikastolako Bertso Eskolan aritutako bere ikasleek kantatu zituzten.
6. 2. GUNEA: EKT
TALDEEN GUNEA: EKT, BAT, KEMEN,
TXORIMALOAK, …
Berrogeitamar urte atzera,
itxita hainbeste ate.
Desertu hartan oasi bat zen
jaio berri zen EKT.
Ikastolaren aldeko griñak
kultura izan du kate,
ehun eskurekin ezin zenbatu
daitezkeen zenbat elkarte
aritu diren gogor lanean
gaur duguna lortu arte.
Dantza, kirola, musika edo
bertsoak goiz-arratsaldez
eskolaz kanpo irakatsiaz,
gehienetan borondatez.
Militantzia punttu bat badu
eginbide honek berez.
Esker onaren erakusgarri
hau dugu soilik, tamalez;
har ezazue txalo bero hau,
eskerrik asko bihotzez.
Gotzon Aizpiolea
7. 3. GUNEA: UDALETXEA
UDALAREN ETA TXIKIEN GUNEA
Julita pasa zaitez mesedez
arren idazkaritzatik
Gazte klubeko kuota Mariani
iritsi al da jadanik
hiru bat bi bat korrika egin
baratzearen atzetik
lasai Manolo gaurkoan ez da
hautsi fluoreszenterik
boligrafoez lurrean otoi
ez egin txirrintxintxinik
aurrera hogei ezkerrera sei
dordoka izan nahi dut nik
ikastolako une gozoak
nahiz pasa diren jakinik
esaldi hauek gogoratzean
ume nauzue oraindik.
Beñat Elosegi
8. 4. GUNEA: KALE NAGUSIA
SORTZAILEEN GUNEA
Garai ilunak izango ziren
ikastolaren sorreran
Gure hizkuntza, hezkuntza
sortu gabeko egoeran.
Guraso lanez ta bat egiñez
etzegon ezer soberan
ilusioa sortzen zan
euskaldunaren jarreran
Euskal mundua pizturik
kezka guztien galeran
gure hizkuntzan sorturik
ikastearen aukeran
mende erdia iraunduz
bultzatuz gure hizkeran
zuen ametsen indarrez
hezkuntza degu euskeran.
Joxeja Zabalo
(Argazkian eskubitik hasita bigarrena da Joxeja, bertsoa
kantatzeko txandaren zain)
9. 5. GUNEA: OIASSO MUSEOA
LAGUNTZAILEEN GUNEA
Laguntzaileen gune honetan
asko dauzkat parez pare
laguntza eman dutenak gure
etorkizunaren alde
guraso eta lagun pila bat
ekitalditan partaide
irakasleak ere lanean
konpromiso baten jabe
ez ginateke hemen egongo
zuen laguntzarik gabe
Ikusten ez den zenbat lan egin
ziren kilometroetan
zenbat izerdi tanta isuri
eraikin eta obretan
mende erdian ikastola bat
eutsi da zuen hormetan
borondatezko lana hain gutxi
ikusten den garaietan
inoiz lagundu duen orori
eskerrik asko benetan
Manu Goiogana
10. 6. GUNEA: PASIONISTAK
LANGILEEN GUNEA
Hasierako ilusioak
gogo ta itxaropenak
gauzatu nahian urte luzetan
hortan aritu direnak
zueri esker mende erdi bat
bete du ametsen trenak
egunez egun lanean sendo
aritu zareten denak
eskerrikasko guztion partez
zuek zarete onenak.
Oroimenaren kutxa irekiz
astin ditzagun garunak
hasierako une haietan
aritu ziren lagunak
bide horretan batu gintuen
Euskararen maitasunak
haziak erein eta denboran
jarraituriko jardunak
fruitu sendoak eman ditula
ondoren etorkizunak.
Zuhaitz Olazabal
Gune honetarako bertsoak Zuhaitzek prestatu bazituen ere, azkenean, Igauri Lopetegi aritu zen bat batean, argazkiak erakusten duen gisan. Igaurik kantaturiko bertsorik ez
dugu oraindik eskuratzerik izan.
11. 7. GUNEA: BETHERRAM
HONDARRIBIAKO GUNEA
Betherramera etorri eta
zer nolako zimikoa
konturatu naiz oroitzapena
ez daukadala itoa
gogoan daukat ni nintzenean
bost urteko mutikoa
eraikin hontan egin nuela
bigarren parbulitoa.
Ikastola bat bi herrientzat
euskera_izanik xedea
urte batzutan izan zen elkar
lanaren adibidea
eta gerora hartuagatik
bakoitzak bere bidea
ezin ahaztu inolaz ere
Hondarribiko jendea.
Abel Zabala
12. Zorionik beroenak joan den mende erdian
Txingudi ikastolaren proiektuan parte hartu
duzuen guzti-guztioi; oinarri ezin sendoagoa
jarri diozue etorkizunari.