Det er ei storhending at denne eldste soga om Olav Haraldsson endeleg er tilgjengeleg i moderne norsk språkform. Verket er forfatta bortimot tretti år før kongesogene til Snorre Sturlason. Forskarar reknar med at nedskrivaren var frå nord-Trøndelag, då handskriftet inneheld nordtrøndske målmerke. Denne Olavssoga er ei lettlesen og spennande samling av historier om Olav og samtida hans. Den gjev eit levande bilete av vikingtida, kampen om einkongemakt i Noreg og brytningane mellom heiden og kristen tru. Boka gjer det mogleg å sjå med kritisk blikk på korleis Snorre Sturlason framstiller nokre av dei same hendingane i kongesogene sine.