1. FINAL DO “II CONCURSO O PREGUNTÓN”
Parece que a Biblioteca Castelao adquiriu dende o curso pasado a tradición de celebrar
o Preguntón tódolos anos, e este ano realizouse a segunda edición deste concurso consistente
na procura de información en fontes bibliográficas co obxectivo de responder ás preguntas,
formuladas polos profesores implicados, para así obter a maior puntuación posible.
O ano pasado o concurso constou de dez semanas de preguntas pero este ano foron
unicamente sete. Hai que dicir que moitos dos que estaban inscritos no concurso non
participaron ou interromperon a súa participación, pero tamén hai que dicir que se tiñan
algunha esperanza de levar un premio, en fin ... os que levamos algún premio agradecémoslles
que decidisen retirarse, aínda que así houbo menos emoción, faltou máis “sana competencia”
(aínda que tamén é verdade que non ten moito que dicir un servidor, que quedou co seu
compañeiro no terceiro lugar por “chiripa”, xa que houbo empate no segundo posto).
Sempre resulta e resultará interesante adquirir coñecementos dispares que favorecen ó
noso nivel cultural, que ó fin e ó cabo e o que conseguiu o Preguntón. Dende o nome científico
dunha planta carnívora e o seu olor ata un mosteiro do Camiño de Santiago aprendemos
curiosidades en varios campos (Arte, Historia, Matemáticas, Lóxica, Ciencias, personaxes
ilustres...).
Outro dos trazos que sempre identificará ó Preguntón polo simple feito de celebrarse
en territorio español é o de que sempre se entregarán as respostas o día no que finalice o prazo
(venres) xa que se responderon con desesperación, pero con eficacia, o día anterior (xoves).
E que máis dicir? Pois que un participante que se cadra non ten máis ocasión de estar
na lista do Preguntón anima aos profes da Biblioteca e colaboradores a seguir con esta tradición
sempre enriquecedora, interesante e que aumenta o tránsito dos corredores do Xestal coa
intriga das puntuacións e das respostas correctas, coas almas dos participantes pensando “a ver
se non puxen unha burrada” ou “a ver qué nota sacamos”.
En Monfero, a 30 de abril de 2013;
Antonio González na redacción da revista Xesteira 2013. CPI Virxe da Cela, Monfero