1. NÚÑEZ SINGALA, Manuel: Comedia bífida Velaquí un xuízo á lingua. Ou ao emprego que dela facemos os galegos. Cómpre que esteades mortos para participardes nesta farsa do xuízo final. Se non o estades, quizais poidades asistir a este encontro con algunhas das situacións que a diario vivimos en relación co galego. Dispoñédevos a rir, sorrir e pensar. Porque algunhas das cousas que facemos e dicimos sobre a nosa lingua non as entende nin san Pedro.
2. VASCONCELOS, J. Mauro de: A miña planta de laranxa lima A primeira parte non me entusiasmou demasiado e non me enganchou como eu pensaba que o faría; pero na sengunda parte foi demasiado, impresionoume moito como describe todo, cando falaba da brutalidade das malleiras doíanme a min, e cando reflicte a súa amizade é moi gratificante, aínda que non esperaba o final, non contaba con que acabase tan tristemente. Pero cando lin a última páxina sentín como un alivio e quedei moi contenta de telo lido. (Noelia Soto, IES de Brión)
3. LONDON, Jack: A chamada da selva No outono de 1894 o descubrimento de ouro en Klondike levou ata as rexións xeadas de Alaska a homes de todas as partes do mundo. A chamada da selva é a historia destes homes, desta epopea vivida no espello da aventura dun can, Buck, que tras catro anos de cómodo vagar na granxa do xuíz Miller, preto de San Francisco, ten que comezar unha vida rexida pola lei do vergallo e da loita pola existencia para, ao cabo, sentir a chamada do atávico, o achegamento ao lobo, o seu irmán salvaxe, que ha cantar co seu ouveo a canción do mundo primitivo.
4. FERNÁNDEZ PAZ, Agustín: Cartas de inverno Despois dunha longa estadía en Québec, o escritor Xabier Louzao volve a Galicia e atopa as cartas que o seu amigo Adrián lle escribira na súa ausencia. Unhas cartas que, nunha espiral de enigmas, descobren os estraños sucesos que está a vivir Adrián na súa nova casa e que levan a Xabier a acudir na súa axuda. Pero alí, na vella casa colonial, os dous amigos terán que enfrontarse a misterios que tal vez as persoas nin tan sequera somos quen de imaxinar.
5. FERNÁNDEZ PAZ, Agustín: Corredores de sombra Verán de 1995. No pazo dos Soutelo, ao facer unhas obras de restauración, descúbrese un esqueleto dentro dunha alfombra enrolada, oculto entre dous tabiques. Un cadáver emparedado hai máis de cincuenta anos, cun furado de bala na cabeza. Quen é o morto? Que man empuñou a pistola que o asasinou? Clara Soutelo, testemuña involuntaria da descuberta, asume o reto de desvelar o misterio que se agocha tras as dúas preguntas. Unha investigación complexa, que a levará a indagar no pasado da súa familia.
6. DOUGLAS ADAMS: Guía do autostopista galáctico Cando descobres que o teu mellor amigo é un extraterrestre, e que o teu planeta vai desaparecer para deixar sitio a unha autoestrada intergaláctica, deixa de parecer importante que a túa casa estea no medio do trazado dunha nova vía de circunvalación, ¿non é? Por fin temos en galego este auténtico clásico da literatura de humor e ciencia ficción. Desfrutádeo. Picade aquí para asistir ás reflexións dun cachalote que aparece de súpeto a varios quilómetros da superficie dun afastado planeta. Aquí subtitulado .