Manifesto4ºeso c.p.i. monfero sobre a folga de estudantes

1. M ANIFESTO
DO ALUMNADO DE CUARTO DA E.S.O. DO C.P.I. “VIRXE DA CELA”
EN DEFENSA DO ENSINO PÚBLICO E DE APOIO Á FOLGA XERAL ESTUDANTIL DE OUTUBRO 2012
Podemos obviar facer unha revista xeral da actualidade. Non seriamos os primeiros nin os derradeiros en
facelo, por iso cremos que sobra. Os recortes sociais preséntanse en tódolos campos. Xa sufrimos de
certo modo os recortes educativos e vemos como hai moita xente á que lle repercuten
considerablemente os recortes en sanidade.
Se outrora aproveitabamos o motivo de folga, fose xeral ou estudantil, para non asistir á clase e quedar
na casa despreocupadamente (como seguramente o facía outra moita xente que non vía modificacións
no seu salario); arestora mostrámonos cun maior sentido da responsabilidade, este é o sentido que nos
leva a redactar o presente manifesto e a deliberar na aula sobre os pasos a seguir en resposta á
convocatoria.
Hoxe, 15 de outubro de 2012; xa non somos rapaces e rapazas sen preocupacións, porque aínda que
tentemos evadi-la realidade sabemos que está aí e non mudará nin desaparecerá, mais sabemos que
alza-la nosa voz fará que a sociedade saiba que nós, que somos meros representantes do futuro, un
futuro que se mostra preto de nós máis ca nunca; loitamos por saír adiante, por ascender na vida e pola
utopía omnipresente dun mundo mellor. Quedar na casa non valerá de nada. No colexio quedará
rexistrada a nosa ausencia, que servirá para cifrar o seguimento da folga, cifras que serán terxiversadas
por medios de comunicación segundo o que lles conveña; moitos non teremos quen nos leve ás
manifestacións convocadas, pero este manifesto será a voz dun grupo de alumnos e alumnas de
Monfero e Irixoa que pese a que non son da Coruña, de Madrid, de Santiago ou de Pontedeume si son
capaces de manifestar as súas ideas.
Estaremos libres, nesta ocasión, de coaccións indebidas, ou dicídenos: somos nós inferiores ó alumnado
da ESO dun instituto de vila ou cidade? Acaso non temos os mesmos dereitos? Acaso non temos o
mesmo dereito á folga ca o alumnado de 4 o da ESO que viva nun bloque de pisos? Ídesnos facer crer
que non estamos no dereito de protesta? Pois dicimos: ídelle contar contos a quen queira escoitalos. É
mentira que o alumnado de Educación Secundaria Obrigatoria non poida ir á folga, mentira. Porque
sabemos o que queremos, somos conscientes e temos criterio propio, haberá folga en Monfero e Irixoa.
Moi probablemente non faremos pancartas e limitarémonos a distribuí-los carteis de convocatoria do
Sindicato de Estudantes, mais teremos desta vez a forza da voz e da palabra.
Completamente de acordo coa protesta que leva a cabo o Sindicato de Estudantes, situámonos como
grupo de alumnado. Basicamente en contra dos recortes educativos, e das recuperadas reválidas, que
son un atranco para todos nós como estudantes e que limitarán considerablemente a obtención dos
títulos académicos correspondentes e o acceso á Universidade. Porque vemos como unha aberración
que en 6o de Primaria e 4o da ESO haxa que facer un exame e moitas persoas vexan frustrados os seus
obxectivos na vida e reducido o seu nivel á hora de redactar un currículum e acceder ao mundo laboral.
Tamén en contra do aumento de taxas universitarias e de acceso a ciclos de FP, así como mostrar o noso
rexeitamento ó paro xuvenil e reiteradamente á reforma educativa da que antes falamos.
Así o asinamos, o alumnado de 4o da ESO do CPI “Virxe da Cela”. Ano académico 2012/2013
En Monfero, a 15 de outubro de 2012.