1. QUE É UN BLOGUE? PRINCIPAIS TERMOS RELACIONADOS
Un blogue é un sitio dinámico na rede no que se recollen artigos ou anotacións
persoais de maneira cronolóxica, aparecendo en primeiro lugar os máis
recentes. Tamén ofrece opcións de interactividade para o visitante,
fundamentalmente a través dos comentarios. Desenvolvéronse en todos os
ámbitos da rede -desde a política ao ensino- dada a súa facilidade de uso e o
seu potencial.
Os principais termos que se deben coñecer cando traballamos con blogues
son:
a) Blogroll ou lista de blogues: é o menú que se mostra nun lateral da portada e
no que aparece a listaxe de ligazóns recomendadas, normalmente en relación
coa temática do blogue.
b) Comentarios: a través deles crease a interactividade entre o usuario lector e
o autor do blogue. Con eles é posible o coñecemento e a reciprocidade.
c) Ligazón permanente ou permalink: é o enderezo propio de cada anotación
nun blogue. Podemos ligalo e recuperar o artigo de xeito independente
d) Etiquetas (tags) e categorías: son os elementos que nos axudan a
ordenación, organización e identificación dos contidos.
e) Plugin e widget: son complementos que permiten ampliar as posibilidades do
caderno: calendario, barra de vídeos, comentarios recentes, RSS, etc.
f) Post, artigo ou anotación: o corpo do contido que forma o blogue.