1. VISITA Ó MUSEO NACIONAL DE CIENCIA E TECNOLOXÍA – MUNCYT E
Á EXPOSICIÓN “MULLERES: A FORZA DE CAMBIO NA INDIA” DA FVF
NA CORUÑA
Crónica de Antonio Gonzalez López (4º ESO)
Este pasado cinco de outubro de dous mil doce, alumnos e alumnas de segundo, terceiro e cuarto
da ESO acudimos a unha excursión para visita-lo recentemente inaugurado MUNCYT (Museo Nacional
de Ciencia e Tecnoloxía) na Coruña, e a exposición “Mulleres: a forza de cambio na India” da F.V.F.
Na primeira parte da saída tivemos unha visita guiada polo MUNCYT, que foi inaugurado en
marzo deste mesmo ano. Alí, pese a que había algunha sala inacabada, ou que non se podía visitar debido
a outros usos (como a sala do século XX); puidemos ver cousas que nos impresionaron, sobre todo a
cabina dun avión chamado “Lope de Vega”, que durante moitos anos serviu para a compañía aérea Iberia.
Estivemos na zona “bussiness” e na cabina do piloto, que foi o máis emocionante. Asemade, tivemos
ocasión de ver os avances da robótica nun monólogo que dous aparellos destes tiveron perante nós. No
ámbito científico recóllese o nome, vida, avances e descubrimentos de moitos científicos, aparellos que
utilizaban, teorías, afirmacións … Expóñense tamén a Ciencia e a Tecnoloxía no ámbito doméstico
(primitivas lavadoras, automóbiles, unha pianola …) e no ámbito histórico (Revolución industrial).
Tamén aplicadas estas áreas á vida xeral (máquinas de escribir, computadoras, surtidores de gasóleo …).
Foi unha visita interesante para repetir en ocasións posteriores, xa que os avances científicos e
tecnolóxicos son diarios.
Na segunda parte da visita, fomos ós Xardíns de Méndez Núñez, onde estaba a exposición móbil
da Fundación Vicente Ferrer, “Mulleres: a forza de cambio na India”, que trataba sobre o papel da
muller na India, sobre todo no rural. O espírito emprendedor, o afán de progreso, superación e de cambio
social para reafirmar a identidade feminina cara á igualdade na India vense representados polas sete
mulleres das que se nos falaba na exposición. Algunhas delas estaban casadas e tiñan fillos, outras
atopábanse en situacións máis delicadas debidas a problemas familiares, a discapacidades e outras
calamidades como o feito de que unha muller sexa repudiada polo seu marido (caso dunha delas), co
agravante da posición da muller na cultura da India e do sistema de castas imperante.
Monfero, 8 de novembro de 2012
Antonio González López
REVISTA XESTEIRA 2012/2013