Crónica antonio gonzález obradoiro de creatividade
1. OBRADOIRO DE CREATIVIDADE
Crónica de Antonio González López (4º ESO)
O venres 19 de outubro, no pavillón polideportivo, todos os alumnos da ESO
participamos nun obradoiro de “creatividade” que tres persoas viñeron impartir, como
unha actividade proposta pola Deputación provincial que o noso centro acolleu.
Foi este un obradoiro dinámico e interactivo no que todos/as tivemos algunha
tarefa que facer. Á parte das explicacións que nos deron sobre a cultura Hip hop, que foi
o tema de referencia que nos deron para “desencadear” ou “liberar” a nosa creatividade;
tivemos que desempeñar labores dispares que pasan pola reflexión sobre a actualidade,
a atención, descubrimento e afondamento sobre a cultura Hip hop que a nós nos resulta
afastada; o uso, a liberación e a busca da inspiración para as nosas calidades e
competencias literarias, que tivemos que expor na confección dun pareado sobre
temática social actual; expoñe-las nosas dotes na arte da pintura facendo un “graffiti” e,
por último, dous compañeiros prestáronse voluntarios para unha demostración sobre a
danza break-dance. Óscar Vidal e Daniel Vázquez, de 4o curso da ESO atrevéronse a
facerlle competencia ás persoas encargadas de imparti-lo obradoiro.
En resumo foi un aporte xeral de coñecementos sobre este tipo de cultura, que
engloba a arte plástica dos graffitis, a arte musical e literaria das rimas dos Rap e a arte
ximnástica e corporal da danza, chamada break-dance. Utilizaron este tipo de cultura a
fin de dar un exemplo de expresión de creatividade e amosando múltiples formas para
expoñer as ideas, o maxín e as dotes artísticas (literarias, musicais e plásticas) e
reflexivas de cadaquén.
Antonio González López
REVISTA XESTEIRA 2012/2013
8/11/2012