1. INAUTERIAK ALTZAN
Altzan inauteriek garrantzi handia dute. Donostiako erdialdean ere ospatzen dira,
baina Altzan beti era berezian ospatzen dira jai hauek.
Altzako ospakizunean, bizilagunek aktiboki parte hartzen dute inauteri jaiak
prestatzen, mozorroak josten eta dantzak asmatzen. Oso ospakizun
garrantzitsua da eta ia urte erdiz egiten dira inauterien prestakuntzak. Musika
aukeraketa, dantzen koreografiak eta mozorroen diseinua iraila-urrian hasten
direnez, inauterien prestatze prozesu luzeak altzatar asko biltzen ditu eta
bizikidetzarako aitzakia bihurtzen dira.
Altzan inauteriak data ofizialaren hurrengo
astean ospatzen dira, beste leku askotan
garizuma garaia izango zen asteburuan. Izan
ere, Donostiako inauteriak amaitu eta hurrengo
larunbatean ospatzen dira Altzako inauteriak.
Horrela izanik, auzokide gehiago festetara
hurbildu daitezke eta auzoko giroaz disfrutatu.
Altzako inauteri jaiegunik garrantzitsuena
Piñatako igandea da.
Ospakizuna larunbat gauean hasten da, egun
horretan konpartsen dantzen aurkezpena egiten
delako. Hala ere, nahiz eta gaur egun mozorrotutako konpartsa taldeen dantzen
bidez ospatzen jarraitzen den eta Altzako biztanleontzat jai garrantzitsu bat den,
lehen beste hainbat gauza egiten zirela kontatu digute hainbat altzatarrek.
2. Inauteriak Euskal Herriko kulturan garrantzi berezia duten neguko festetako bat
da, beste jai batzuekin batera, hala nola: Santa Ageda, Kaldereroak, Santa
Barbara edo Kandelaria Eguna. Inauteri egunetan, Altzako biztanleak
mozorroturik etxez etxe eta baserriz baserri joaten ziren abestera eta abestien
truke dirua edo janaria eskatzera.
Inauterietan egiten zen kantu eskean,
askotan, bizilagunek ez zekiten nor zen
beraien etxera etorri zena, mozorroak
aurpegia estaltzen ziolako edo itxura oso
aldatua zuelako. Hori aukera aparta zen
janaria eta dirua eskatzeko, mozorroei esker ausartzen baitziren tirabirak zituzten
bizilagunengana edo harremanik ez zuten auzokideen etxeetara joatera.
Gainera, bizilagun batzuk euren musika-tresnak hartu eta kalera ateratzen ziren,
eta, taldeka elkartuz, txarangak antolatzen zituzten.
Gaur egun, konpartsek pisu handia hartu dute eta ospakizuna aldatu da, baina
oso giro alaia izaten jarraitzen du. Altzatar gehienek asko disfrutatzen dute
inauteriak ospatzen eta bizilagun eta ezagunekin elkartzeko eta momentu
dibertigarriak konpartitzeko garaia izaten da.
Zure auzo edo inguruko inauterietan parte hartzen al duzu? Hala bada, nola? Zer
da bereziki gustatzen zaizuna? Nola ospatzen dituzu inauteriak?
Material hau “Dinamizazio komunitarioa Altza auzoan ahozko historien bitartez”
proiektutik dator.
Material gehiago:
https://ahozkohistoriak.blogspot.com/
https://www.ehu.eus/eu/web/ism/altza