1. Á MESA DO PARLAMENTO GALEGO
O Grupo Parlamentar da Alternativa Galega da Esquerda (EU-ANOVA), pola iniciativa da súa
Vicevoceira Yolanda Díaz Pérez, ao abeiro do recollido no artigo 160 do Regulamento da
Cámara, presenta a seguinte PROPOSICIÓN NON DE LEI para o seu debate no Pleno, relativa
as irregularidades e ilegalidades que acumula a planta de gas sita na vila de Mugardos.
EXPOSICIÓN DE MOTIVOS
O Grupo Parlamentar da Alternativa Galega da Esquerda (EU-ANOVA), quere significar a valía e
a constancia das loitas desenvolvidas polo amplo espectro de organización sociais que
agrupadas no Comité Cidadá de Emerxencias sosteñen hai xa máis dunha década unha
secuencia de actuacións e loitas sociais para acabar co grave perigo para a vida que representa
o actual emprazamento da planta de gas de Reganosa no interior da ría de Ferrol.
Loita cívica que xa tivo importantes fitos xudiciais, como o aínda recente fallo firme da Sala
Terceira do Tribunal Supremo, en sentenza de 11 de maio de 2012, que anula a Modificación
Puntual do PXOM da vila de Mugardos, que no seu día servira para permitir a construcción da
planta de gas de Reganosa, adoecendo da Declaración de Impacto Ambiental, e que ratificou
unha sentenza previa, a 00311/2008, do Tribunal Superior de Xustiza de Galicia. Declaración de
impacto Ambiental (DIA), que previa á construcción da planta de gas, supuña o instrumento
que debía prescribir a ubicación idónea da devandita instalación industrial.
Da sentenza firme do Tribunal Supremo se desprende que todos os actos administrativos que
se derivan daquel acto administrativo son nulos: a autorización da construcción, a licenza da
obra, ou a autorización para entrar en funcionamento.
Mais nunha manobra que presenta os caracteres propios da dilación cun afán prevaricatorio,
a Dirección Xeral de Urbanismo da Xunta de Galicia e o concello de Mugardos son quen de
aprobar unha nova modificación apenas dez días após da sentenza. Semellante dilixencia
aplicada a facer respectar a legalidade e a seguridade da veciñanza tería rendido enormes
froitos para o ben común; desgrazadamente se aplica esa celeridade a tentar agochar as
miserias dun dos casos paradigmáticos da corrupción político-empresarial do noso país.
Ao punto chega esa relación espuria, que a Xunta gobernada polo exministro da ditadura
franquista, Manuel Fraga Iribarne asinou un convenio secreto co grupo empresarial promotor
da planta de gas para garantir si ou si os beneficios, ignorando non só a legalidade e
seguridade para as poboacións da contorna, sino incluso as pretendidas bondades do mercado
libre, que se deturpa con eses pactos secretos.
Digitally signed by Rexistro
Entrada
Date: 2013.04.17 11:38:37 +02:00
Reason: 6826
Location: Parlamento de Galicia
Signature Not Verified

2. En atención ao referido, o Grupo Parlamentar da Alternativa Galega da Esquerda (EU-ANOVA)
achega a seguinte PROPOSICIÓN NON DE LEI para o debate plenario:
- O Parlamento de Galicia insta ao goberno galego a realizar todas as accións oportunas
para conquerir o desmantelamento da planta de gas de Reganosa do seu actual
emprazamento.
- O Parlamento de Galicia insta ao goberno galego a denunciar o convenio secreto
asiando en tempos de Manuel Fraga e a saír do accionariado da planta.
- O Parlamento Galego insta ao goberno da Xunta a cumprir a sentenza firme de 11 de
maio de 2012 do Tribunal Supremo.
- O Parlamento Galego insta ao goberno da Xunta de Galicia a facer público o
expediente sobre planificación do solo, análisis de riscos previos á decisión e as
achegas veciñais durante o proceso segundo prescribe a Directiva Europea 96/82 CE.
Compostela, 17 de abril de 2013.
Asdo. Yolanda Díaz Pérez
Asdo: María Conselo Martínez García
Asinado dixitalmente por:
María Consuelo Martínez García na data 17/04/2013 11:36:02
Yolanda Díaz Pérez na data 17/04/2013 11:36:07